Nm 27 - Chuj San Sebastian Bible

Smacl lum eb' 'ix 'islab'il

¹ A 'a yin̈tl can Manasés ata 'ay own̈ eb' 'ix 'ix to snul'j sb'a, atn eb' 'ix tic; Maala, Noa, Hogla, Milca yet' Tirsa. Yisl win Zelofehad eb' 'ix. A yin̈tl eb' 'a smam yicham, atn stzol-l eb' tic: Hefer, Galaad, Maquir, Manasés yet' José.

² A own̈ eb' 'ix snul'j sb'a tic, 'ix c'och eb' 'ix 'a yol sti Mantiado 'aj tzchaj sb'a Dios yet' eb' 'anma'. Ata xc'och eb' 'ix paxtinc yet' Moisés, yet' Eleazar win ya'mal 'och sti eb' 'anma 'a Dios, yet' pax 'a eb' yajl yaj 'a scal eb' chon̈ab'. 'Ix yaln eb' 'ix 'ixtic:

³ A qui mam on̈, chamnc can 'a lum cusltac lu'um, palta man̈ locnoc 'aych 'a scal eb' yic Coré, eb' meltzjnac 'och 'ajc'ojlal 'a Jehová. 'Ix cham yuj smul mun yico', palta may junc yunnal to winac.

⁴ Man̈ wach'oc, toto tzsatl sb'i qui mam 'a scal eb' yin̈til, yujto may junc yunnal winac. Yuj cha, to tzeyac' qui macl lum chi 'on̈, 'elt cab' lum 'a eb' lum yic eb' yu'tac qui mam on̈, xchi eb' 'ix.

⁵ Ax Moisés 'ix yal jun tzo'n̈ snab'en eb' 'ix 'ix tic 'a Jehová.

⁶ Yuj cha, 'ix spacn Jehová 'ixtc 'a Moisés:

⁷ A eb' 'ix yisl can win Zelofehad cha, yel tzyal eb' 'ix. Tztac' e'n 'elt smacl slum smam eb' 'ix chi 'a lum yic eb' yu'tac, tza'n yico'oc eb' 'ix smacl slum smam cha.

⁸ Tzlajw cha, tzaln jun tic 'a eb' et israelal smasnil: Toto 'ay junc mach tzchami, palta may junc yunnal to winc tzcani, ax smacl lu'um, tzcan 'a yol sc'ab' yisil.

⁹ Toto may yisl junc winc cha, ax smacl lu'um, tzcan 'a eb' yu'tac.

¹⁰ Toto may pax yu'tac jun, ax smacl lum cha, ata tzcan lum 'a eb' yu'tac smam.

¹¹ Palta toto may xon pax yu'tac smam cha, ax smacl lum cha, ata tzcan 'a junc eb' yican la'nto yaj scal yet'oc. A jun tic ley tz'ajcn 'a e cal, 'icha wal tzwutj waln 'aych tic, xchi Dios 'a Moisés.

'Ochnc Josué sjelc Moisés

¹² 'Ix yaln Jehová 'a Moisés 'ixtic: —Q'uen̈ta 'a sjolm witz Abarim tic, tzlajw cha, tzeln can 'at lum lum 'oj wac' 'a eb' et israelal tic.

¹³ Cojn wal tzlajw eln can 'at lu'um, ax a cham 'icha 'ajnc scham o'tac Aarón,

¹⁴ yujto ma'ix eyiclj eyi'n chan̈ in b'i 'a lum cusltac lum tzcuch Zin, yic 'ix q'ue wan yaw eb' 'anma 'ayin, yic sc'ann eb' yuc' a', xchi. (A jun tic, ujnac 'a a a tzcuch Meriba 'a yol yic Cades, 'a lum cusltac lum tzcuch Zin.)

¹⁵ A yic xyab'n Moisés to 'ixta tz'aji, yuj cha, 'ix yaln 'a Jehová 'ixtic:

¹⁶ Mamin Jehová, ach tzac' sq'uinl smasnil 'anma', yuj cha, a ticnec, sic' 'elt junc mach tz'och syajlilc eb' a chon̈b' tic,

¹⁷ sec a 'oj jucb'tzanc eb' 'anma tic, yic 'oj 'atx eb' 'a 'aj 'oj b'eyoc, sec wach' ma'oj satc' eb' 'icha no calnelu may yilmal, xchi.

¹⁸ 'Ix ta'w Jehová 'a Moisés, 'ix yaln 'ixtic: —A Josué yunnal Nun, 'ayx 'och Wespíritu 'a 'a, yuj cha, 'awtj coti, tza'n can opiso 'a 'a.

¹⁹ 'Ixta tzotej, tza ch'oxn can yil Eleazar win ya'mal 'och sti eb' 'anma 'ayin, yet' 'a sat smasnil chon̈ab', 'a sat eb' smasnil tza'n can yopiso cha.

²⁰ Tza'n can jac a jelnal chi 'a 'a, sec wach' 'oj syiclc eb' 'anma tic tas 'oj yala'.

²¹ A 'a Eleazar ata 'oj yala'. Ax Eleazar a 'oj c'anb'noc 'ayn yu'uj, an xo Jehová in, an 'oj wac' yal q'uen Urim tas 'oj yutc sb'a. Ax Josué a 'oj alnoc, tas yowlal 'oj sb'o eb' 'anma cha, xchi Dios.

²² 'Ix syiclj Moisés smasnil tas 'ix yal Jehová, 'ix yi'n 'at Josué 'a yojltac Eleazar yet' 'a sat smasnil eb' yit israelal.

²³ Xlajw cha, xya'n q'ue Moisés chi sc'ab' 'a sjolm Josué cha, xya'n can 'och yopiso 'a yib'n̈ smasnil eb' 'anma cha, 'icha 'ix yutj Jehová yaln 'a 'a.