Nm 26 - Chuj San Sebastian Bible

Q'uen̈c wan sb'isl eb' israel jun 'ejm xo

¹ A yic xlajw ye'cn jun chaml tzcham 'anma yuj cha, 'ix yaln Jehová 'ixtc 'a Moisés yet' 'a Eleazar yunnal Aarón:

² 'Ijec chan̈ sb'isl junjn macn̈il eb' winc israel tic, eb' to 'ay sq'uinl 'a junc'l ab'il yet' 'a yojltac, eb' smoj yoch soldadoil, xchi.

³ Yuj cha, 'ix ya'n Moisés yet' Eleazar syam sb'a smasnil ewin israel 'a ya'lical lum Moab, 'a sla'nil xo sti a Jordán 'a yojltac Jericó,

⁴ sec tzyac' tz'ib'xoc sb'a smasnil eb' winc 'ay junc'l ab'il sq'uinal yet' 'a yojltac, 'icha 'ix yutj Jehová yaln 'ayn̈ on̈. Atn smasnil eb' israel tic 'elnc ta 'a Egipto:

^5-6 Eb' yunnal Rubén, win sb'ab'l 'unnal win Israel, atn eb' tic tzb'inax can 'a yin̈til: Enoc, Falú, Hezrón yet' Carmi.

⁷ A 'ix 'aj chan̈ sb'isl eb' yin̈tl Rubén, 'ay 43,730 eb' winc 'a smasnil.

⁸ A Falú, a 'ay yunnal 'a win Eliab;

⁹ ax Eliab, a 'ay yunnal win Nemuel, Datán yet' Abiram. A Datán yet' Abiram cha, yichm wincal chon̈b' yaj eb'. Atn eb' junn̈j 'ix yutj sb'a yet' Coré, yic 'ix meltzj 'och eb' 'ajc'ojlal 'a Jehová, 'a Moisés yet' 'a Aarón.

¹⁰ Palta 'ix sjac lum lum sti', 'ix sb'u'n 'ejm lum eb' chawn̈ chi yet' pax Coré. Smasnil eb' x'och tza'n yuj Coré cha, 'ix cham eb'. 250 sb'isl eb' winc 'ix cham yuj c'ac'. A jun cha, 'ix 'och ch'oxnb'ilal 'a eb' israel smasnil.

¹¹ Ax pax eb' yin̈tl Coré cha, ma'ix cham eb'.

^12-13 Eb' yunnal Simeón, atn eb' tic tzb'inax 'a eb' yin̈til: Nemuel, Jamín, Jaquín, Zera yet' Saúl.

¹⁴ A 'ix 'aj chan̈ sb'isl eb' yin̈tl Simeón, 'ay 22,200 eb' winc 'a smasnil.

^15-17 Eb' yunnal Gad, atn eb' tic tzb'inax 'a eb' yin̈til: Zefón, Hagui, Suni, Ozni, Eri, Arod yet' Areli.

¹⁸ A 'ix 'aj chan̈ sb'isl eb' yin̈tl Gad, 'ay 40,500 eb' winc 'a smasnil.

¹⁹ A 'a scal eb' yunnal Judá, ata 'ix cham win Er yet' Onán. A eb' tic, ata 'ix chamcn eb' 'a yol yic Canaán.

²⁰ Eb' yunnal Judá, atn eb' tic tzb'inax 'a eb' yin̈til: Sela, Fares yet' Zera.

²¹ Ax eb' yunnal Fares tzb'inax 'a eb' yin̈til, atn Hezrón yet' Hamul.

²² A 'ix 'aj chan̈ sb'isl eb' yin̈tl Judá, 'ay 76,500 eb' winc 'a smasnil.

^23-24 Eb' yunnal Isacar, atn eb' tic tzb'inax 'a eb' yin̈til: Tola, Fúa, Jasub yet' Simrón.

²⁵ A 'ix 'aj chan̈ sb'isl eb' yin̈tl Isacar, 'ay 64,300 eb' winc 'a smasnil.

²⁶ Eb' yunnal Zabulón, atn eb' tic tzb'inax 'a eb' yin̈til: Sered, Elón yet' Jahleel.

²⁷ A 'ix 'aj chan̈ sb'isl eb' yin̈tl Zabulón, 'ay 60,500 eb' winc 'a smasnil.

²⁸ Eb' yunnal José, atn eb' tic tzb'inax 'a eb' yin̈tl yuj Manasés yet' Efraín.

²⁹ Eb' yunnal Manasés, atn eb' tic tzb'inax 'a yin̈til: Maquir atn smam Galaad.

^30-32 Ax eb' yunnal Galaad tzb'inax 'a yin̈til: Jezer, Helec, Asriel, Siquem, Semida yet' Hefer.

³³ Zelofehad win yunnal Hefer, a win tic, may junc swinc 'unin, palta 'ay eb' yisil, atn eb' 'ix tic: Maala, Noa, Hogla, Milca yet' Tirsa.

³⁴ A 'ix 'aj chan̈ sb'isl eb' yin̈tl Manasés, 'ay 52,700 eb' winc 'a smasnil.

³⁵ Ax eb' yunnal Efraín, eb' tzb'inax 'a eb' yin̈til: Sutela, Béquer yet' Tahán.

³⁶ 'Ay jun yunnal Sutela tzb'inax 'a yin̈til, atn Erán.

³⁷ A 'ix 'aj chan̈ sb'isl eb' yin̈tl Efraín, 'ay 32,500 eb' winc 'a smasnil. Atn eb' yin̈tl José tic, 'icha yaj stzol-l yin̈tl eb'.

^38-39 Eb' yunnal Benjamín, atn eb' tic tzb'inax 'a eb' yin̈til: Bela, Asbel, Ahiram, Sufam yet' Hufam.

⁴⁰ Ax eb' yunnal Bela, eb' tzb'inax 'a eb' yin̈til, atn eb' yic Ard yet' eb' yic Naamán.

⁴¹ A 'ix 'aj chan̈ sb'isl eb' yin̈tl Benjamín, 'ay 45,600 eb' winc 'a smasnil.

⁴² Eb' yunnal Dan, atn eb' tic tzb'inax 'a eb' yin̈til, atn eb' yunnal Súham.

⁴³ A 'ix 'aj chan̈ sb'isl eb' yin̈tl Súham, 'ay 64,400 eb' winc 'a smasnil.

⁴⁴ Eb' yunnal Aser, eb' tzb'inax 'a eb' yin̈til: Imna, Isúi yet' Bería.

⁴⁵ Eb' yunnal Bería tzb'inax 'a eb' yin̈til, atn Heber yet' Malquiel.

⁴⁶ A win Aser, 'ay jun yisl tzcuch Sera.

⁴⁷ A 'ix 'aj chan̈ sb'isl eb' yin̈tl Aser, 'ay 53,400 eb' winc 'a smasnil.

^48-49 Eb' yunnal Neftalí, eb' tzb'inax 'a eb' yin̈til: atn Jahzeel, Guni, Jezer yet' Silem.

⁵⁰ A 'ix 'aj chan̈ sb'isl eb' yin̈tl Neftalí, 'ay 45,400 eb' winc 'a smasnil.

⁵¹ Ax 'ix 'aj chan̈ sb'isl eb' winc israel 'a smasnil, 'ay 601,730.

Sleyl tas tz'aj spojx 'ec' lum lu'um

⁵² 'Ix yaln Jehová 'a Moisés 'ixtic:

⁵³ 'Oj pojxoc 'ec' lum lum 'a eb' 'anma tic, a tzyal jantc sb'isl eb' 'a junjn 'in̈tal, 'icha wal x'aj eb' stz'ib'xi.

⁵⁴ A eb' niwn sb'isul, niwn yic eb' tz'ajxi, ax eb' man̈ niwnoc sb'isul, jab' wal yic eb' tz'ajxi. A junjn c'aj eb', 'oj 'ajxoc slum eb' cha, a tzyal 'ix 'aj chan̈ sb'isl eb', 'ixta pax slum eb' tz'ajxi.

⁵⁵ A 'oj 'aj spojx 'ec' lum lum cha, to 'oj 'och suerte 'a yib'n̈ lu'um. Junjn mach 'oj scha smacl 'a smacl yic smam yicham.

⁵⁶ 'Oj 'och suerte 'a scal eb' niwn sb'isul yet' pax 'a scal eb' man̈ niwnoc sb'isl cha, xchi Dios.

A sb'isl eb' yin̈tl Leví

⁵⁷ Eb' yunnal Leví, eb' tzb'inax 'a eb' yin̈til: Gersón, Coat yet' Merari.

⁵⁸ Ax eb' yixchicn Leví, atn Libni, Hebrón, Mahli, Musi, yet' Coré. A Coat cha, atn smam Amram.

⁵⁹ Ax win Amram cha, 'ix yij sb'a win yet' jun 'ix yin̈tl Leví, atn 'ix tzcuch Jocabed. Ata 'aljnac 'ix 'a Egipto. A Amram yet' Jocabed, atn smam snun Aarón, Moisés yet' 'ix María.

⁶⁰ Ax eb' yunnal Aarón atn eb' tic: Nadab, Abiú, Eleazar yet' Itamar.

⁶¹ A Nadab yet' Abiú, atn eb' 'ix chami yic ya'n 'och eb' jun c'ac' man̈ wach'c 'a yojltac Jehová.

⁶² A smasnil eb' winc 'a eb' yin̈tl Leví, eb' jun 'ujl sq'uinal yet' 'a yojltac, 'ay 23 mil sb'isl eb'. A eb' tic, man̈ 'ayc 'och eb' sb'isloc eb' yit israelal, yujto may smacl lum eb' tzchaj yet' eb' yit chon̈b' cha.

⁶³ 'Ixtn tic wal 'ix 'aj sq'ue wan sb'isl eb' israel 'ix yij chan̈ Moisés yet' win Eleazar ya'mal 'och sti eb' 'anma 'a Dios, yic 'ayc' eb' 'a lum ya'lical Moab, 'a sla'nil sti a Jordán 'a yojltac Jericó.

⁶⁴ Smasnil jun tzo'n̈ 'anma tic, may xon junc eb' 'ix 'och sb'isloc eb' sb'is Moisés yet' Aarón, yic 'ix yi'n chan̈ eb' sb'isl eb' yit israelal, yic 'ayc' eb' 'a lum cusltac lum yic Sinaí.

⁶⁵ Yujto a Jehová, a 'ix alni to smasnil eb' cha, yowlal tzchamcn eb' 'a lum cusltac lu'um, man̈x 'a xon junc eb' 'ix cani, cojxn Caleb win yunnal Jefone, yet' win Josué yunnal Nun, cojn eb' xcani.