Nm 25 - Chuj San Sebastian Bible

Ya'jnac 'ejm sb'a eb' israel*r* 'a jun comn dios tzcuch Baal 'aj Peor

¹ A yic 'ix can cajn eb' israel 'a lum Sitim, til wal eb' winc israel 'ix muln yet' eb' 'ix moabita.

² 'Ix monchj 'at eb' winc chi yuj eb' 'ix 'a 'aj 'aych sq'uin̈ eb' yuj xajmb'al tzyac' 'a sdiosal, ax eb' winc israel cha, schi eb' no schib'jal no xajmb'al cha, xya'n pax 'ejm sb'a ewin 'a sdiosal eb' 'ix.

³ 'Ixta 'ix 'aj ewin yijx 'ati, yic x'at ya'nc 'ejm sb'a eb' 'a jun yechl comn dios tzcuch Baal 'aj Peor. Yuj wal cha, caw 'ix cot yowl Jehová 'a yib'n̈ chon̈b' Israel.

⁴ 'Ix yaln Jehová 'a Moisés 'ixtic: —Yamb'tzej smasnil eb' yichm wincal chon̈b' Israel tic, 'a in sat yet' wal 'a sat eb' 'anma tic, tza t'un̈n q'ue eb' x'och smul tic, xchi Jehová.

⁵ Xlajw cha, 'ix yaln Moisés jun checnb'il tic 'a eb' yajl yaj 'a scal eb' israel, xyaln 'a eb' 'ixtic: —Junjn 'in̈tal ex, milc eb' eyican xit' yac' 'ejm sb'a 'a Baal 'aj Peor, xchi 'a eb'.

⁶ Ya' sb'a wanto yoc' eb' 'a sti Mantiado cha, 'ix 'ec' jun win israel yet' jun 'ix 'aj Madián. Xyi'n 'at win 'ix 'a 'aj 'ay smantiado, 'ix 'ec' eb' 'a yojltac Moisés yet' 'a sat eb' chon̈ab'.

⁷ 'Ix yiln sb'a Finees win yunnal Eleazar, yixchicn can Aarón, win ya'mal 'och sti eb' 'a Dios, 'ix 'elt 'a scal eb' 'anma cha, 'ix yi'n win q'uen slanza.

⁸ 'Ix 'och tza'n yuj win israel cha, yet' 'ix 'aj Madián cha, masnto 'ix c'och win yet' eb' 'a yol smantiado. Cojn wal xc'och win muc'uc, stecn 'och win q'uen lanza chi 'a sc'ojl win israel cha, yet' 'a 'ix 'ix cha. Cojn yic 'ix cham eb', 'ix 'och wan scham eb' 'anma yuj jun yailal xyac' cot Jehová a scal eb' israel cha.

⁹ 'Ay 24 mil eb' 'anma 'ix chamcn yuj jun yailal cha.

¹⁰ Xlajw cha, 'ix yaln pax Jehová 'ixtc 'a Moisés:

¹¹ A Finees, a 'ix 'a'n sicb'oc yowl in c'ojl 'a yib'n̈ eb' chon̈b' tic, yujto locn xyab' syal wet'oc. Q'uinloc man̈toc 'ixta xyutej, toto 'ixta', 'ix lajw scham eb' 'anma tic smasnil.

¹² Ax ticnec al 'a 'a, to tzin b'o jun in trato yet'oc.

¹³ To tzwac' jun 'opiso tic 'a 'a, yet' 'a eb' yin̈tl b'aquin̈, yic tz'ochcn eb' ya'malc 'och sti eb' 'anma 'ayn 'a jun 'ejmn̈ej. Caw locn 'ix yab' syal wet'oc, 'ix ya'n sicb'oc yowl in c'ojl 'a yib'n̈ eb' chon̈b' tic, xchi Dios.

¹⁴ A win israel xcham yet' 'ix 'aj Madián cha, Zimri sb'i winac, yunnal jun win tzcuch Salu, yajl yaj win 'a scal eb' yin̈tl Simeón.

¹⁵ Ax 'ix 'ix cha, Cozbi sb'i 'ix, yisl jun win tzcuch Zur, yajl pax yaj win 'a jun c'aj eb' 'aj Madián cha.

¹⁶ 'Ix yaln Jehová 'ixtc 'a Moisés:

¹⁷ A ticnec, 'a'c owl yet' eb' 'aj Madián, ax e satn can 'el eb',

¹⁸ yujto xcot yailal 'a eyib'n̈ yuj eb'. 'In ex yij 'at eb' eyac' 'ejm e b'a 'a Baal cha, yet' pax yuj tas sb'o 'ix Cozbi, 'ix yisl junc win syajlil eb' chon̈b' cha. 'Ix cham yuj q'uen lanza yic caw ow ya'n jun yab'il 'a e cal, yujn̈ej eb' xit' yac' 'ejm sb'a 'a Baal cha, xchi Dios.