Nm 24 - Chuj San Sebastian Bible

¹ Yujto xyil Balaam to tzchaj sc'ojl Jehová yalx wach' paxti 'a yib'n̈ chon̈b' Israel, yuj cha, man̈x 'ic 'at sc'anb'j 'a Jehová tas 'oj yalx cha, man̈ 'icha'oc xyac' 'a b'ab'el, palta ton̈j 'ix 'at q'ueln 'a lum cusltac lu'um.

² Ax xyiln 'at Balaam to latz'mtac yaj scamplamento junjn 'in̈tal eb' israel, yuj cha, 'ix 'och Yespíritu Dios 'a 'a.

³ Yuj cha, 'ix yaln 'ixtic: Yaj in paxti an Balaam in tic, yunnal in Beor, c'ac' yol in sat.

⁴ Tzwab' tas tzyal Dios, 'icha waychil tzwutj wiln Dios tztac' yuj smasnil. Man̈xtzac in na tas tzin 'aji, palta wach' wiln yet' in sat.

⁵ Ex yin̈tl Jacob sja'l wal yilx 'at e mantiado, caw wach' yilx 'at e camplamento ex israel.

⁶ Sja'l wal eyilx 'at 'icha spantail te palma, 'icha yilx te 'awb'ente 'a sti a a', 'icha pax yilx te áloe 'awb'il yuj Jehová, mto 'icha yilx te c'ute 'a sti a', 'ixta eyilxi.

⁷ A 'aj 'ayc' chon̈b' Israel cha, caw wal 'ay a a wach' yu'n eb' 'anma', wach' pax ya'n 'och eb' yalil tas tzyawej. A sreyl eb', 'ec'b'al 'a yib'n̈ rey Agag. Caw wal niwn tas tztac' yuj jun sreyl eb' cha.

⁸ A Dios 'ix 'i'n 'elt eb' 'a Egipto, a 'aych yipc sc'ojl eb' 'icha no simbron wacax, a sch'ac no 'aych yipc sc'ojol. A chon̈b' Israel, 'oj smil cham eb' nacion̈ 'ajc'ojl yajch 'a 'a. 'Oj smac' poj sb'acl eb', ax sc'axw 'ec' sjul-lab' 'a eb' 'ajc'ojl cha.

⁹ Lajn 'icha junc no león pun̈n 'ejm swayi: Toc 'ay mach tztac' stzuntzni. Alx cab' wach' paxti 'a yib'n̈ mach tzaln wach' paxti 'a eb' israel, ax mach tzaln tu paxti 'a yib'n̈ eb', catb'tzax cab' cani, xchi Balaam.

Slajb' spaxti Balaam

¹⁰ A yic xyab'n Balac jun tzo'n̈ paxti cha, caw wal xcot yowl 'a Balaam, caw spoc' sc'ab' scot yowal, xyaln 'ixtic: —Ach wawtej yic tza catb'tzan jun tzo'n̈ 'anma 'ajc'ojl yajch 'ayn tic, palta ax tzotej, 'in to yox 'ejmal xo aln wach' paxti 'a yib'n̈ eb'.

¹¹ Yel xom wach' tzach pax 'a atut. Tox 'ix cob' wala', to niwn tas 'oj wac' 'ayach, caw niwn pax el'ch 'ayin, palta 'in matz chaj sc'ojl Jehová to 'ixta tz'aji, xchi Balac.

¹² 'Ix ta'w Balaam 'ixtc 'a 'a: —Caw wach' xwutj waln 'a eb' a checab'.

¹³ Wach'xam b'ut'jnac a despacho yet' q'uen oro mto q'uen plata, yic tza'n q'uen 'ayn smasnil, palta matz tac' in tenn tas tzyal Jehová, may tas tztac' in b'on 'a yol wico'. Yujto a tas tzyac' Jehová wala', atn chi yowlal tzwala.

¹⁴ Caw wal wach' toto tzin pax 'a in chon̈ab', palta yic mantzac in paxi, yowlal tzwalcn ab'i' tas 'oj 'aj a chon̈b' tic yuj jun chon̈b'al eb' 'anma chi b'aq'uin̈, xchi.

¹⁵ 'Ix yaln can Balaam 'ixtic: Atn in paxti an Balaam in tic, yunnal in Beor, c'ac' yol in sat.

¹⁶ Tzwab' tas tzyal Dios, wojc paxi tas nab'ilx yuj jun tztac' yuj smasnil, 'icha waychil tzwutj wiln Dios. Man̈xtzac in na tas tzin 'aji, palta wach' wiln yet' in sat.

¹⁷ 'Ay jun mach to caw najtto 'ay, palta tztac' wiln 'ati: 'ay jun rey 'oj checljoc chan̈ 'a scal eb' yin̈tl Jacob, caw tzictzni 'icha c'anal. A jun rey cha, 'oj yac' yajlil 'a scal eb' yin̈tl Israel. A 'oj satnc 'el chon̈b' Moab, a pax 'oj satnc 'el eb' yin̈tl win Set.

¹⁸ 'Oj yac' ganar satn 'el eb' yin̈tl Edom cajn 'a lum Seír, ax yica'an can slum eb' to 'ajc'ojl yajch 'a 'a. A chon̈b' Israel 'oj yic' wal yip si'mb'il.

¹⁹ A 'a scal eb' yin̈tl Jacob, ata 'oj 'eltoc jun mach 'oj 'a'n yajlil, a 'oj wach' satnc 'el eb' 'anma 'oj can to 'a yol chon̈b' cha, xchi Balaam.

²⁰ 'Ix meltzj 'at q'ueln Balaam 'a lum chon̈b' Amalec, 'ix yaln 'ixtic: A chon̈b' Amalec, yel xo wal niwn yel'ch 'a yib'n̈ jun tzo'n̈ xo chon̈ab', palta 'oj satcn 'el 'a jun 'ejmn̈ej, xchi.

²¹ An̈jtona', 'ix 'at q'ueln 'a schon̈b' eb' quenita, 'ix yaln 'ixtic: Ex quenita, wach'xam caw lista eyaj e coln e b'a, wach'xam sjolm q'uen tze b'o q'ue eyet'ul,

²² palta 'oj satl e chon̈ab', ax jantc to ex ma'oj e chami, 'oj ex yi'cn 'at eb' 'aj Asiria 'a 'icha presoal, xchi.

²³ Xyaln pax 'ixtic: ¡'Ay! ¿Tom 'ayt mach 'oj can 'a spitznal yic 'oj sb'onc Dios jun tzo'n̈ tic?

²⁴ 'Ay eb' 'anma 'oj cot 'a yojl te barco 'oj cot 'a sti a mar yic Chipre, ax satn 'el eb' chon̈b' Asiria yet' chon̈b' Heber, palta 'oj satl pax eb', xchi Balaam.

²⁵ Xlajw xoj cha, 'ix pax Balaam 'a schon̈ab', 'ixta pax win Balac, 'ix paxcn win 'a yatut.