Nm 23 - Chuj San Sebastian Bible

¹ Yuj cha, 'ix yaln Balaam 'ixtc 'a Balac: —B'o chan̈ uque'oc yet'l xajmb'al 'a tic. Tzlajw cha, tze'n cot ucwn̈oc no quelm wacax, yet' ucwn̈oc no mam calnelu, xchi.

² 'Ix sb'on Balac tas 'ix yal Balaam, smol b'on eb' jun tzo'n̈ no xajmb'al chi schawn̈il, jun quelm wacax yet' jun mam calnelu chi 'a junjn yet'l xajmb'al cha.

³ Xlajw sb'o yuj eb', 'ix yaln Balaam 'ixtc 'a Balac: —Wach' ajcn 'a stz'ey jun tzo'n̈ xajmb'al tic, ya' sb'a 'oj 'at wila', toto 'oj jawc Jehová paxtinc wet'oc, ax waln 'aych muc'uc tas 'oj yutc yaln 'ayin, xchi 'a 'a. Xlajw cha, 'ix 'at Balaam 'a sjolm jun lum witz may ste'al.

Yaljnac Balaam wach' paxti*r* 'a yib'n̈ eb' israel

⁴ Ata sch'ox sb'a Dios 'a Balaam, 'ix yaln win 'ixtc 'a Jehová: —'Ix wac' b'o chan̈ uque yet'l xajmb'al 'a cha. A 'a junjn yet'l xajmb'al cha, 'ix wa'cn q'ue junjn no quelm wacax yet' junjn no mam calnelu xajmb'al-l 'a yib'an̈, xchi.

⁵ Yuj cha, 'ix yaln Jehová 'a Balaam tas 'oj yutc paxtinc sb'a, 'ix yaln 'a 'ixtic: —A ticnec, meltzjan̈ 'a 'aj 'aycn Balac, tzaln 'a 'icha xwutj waln 'ayach, xchi.

⁶ 'Ix meltzj Balaam 'a 'aj 'ix 'at cha, ax yic xc'och 'a Balac, lin̈n 'och 'a stz'ey no xajmb'al chi yet' eb' yichm wincal chon̈b' Moab.

⁷ Xlajw cha, 'ix syamn 'och Balaam yaln 'ixtic: Atta 'ayn 'ec' 'a jun lum witz 'a stojlal 'aj tzq'uel c'u, 'a yol yic Aram, yic in ya'n 'ijxoc cot Balac sreyl Moab. 'Ix yaln 'ixtc 'ayin: Lem, cotn̈ muc'uc, wul catb'tzej can eb' israel tic, alcn 'el tu paxti 'a yib'n̈ eb' yin̈tl Jacob, xchi 'ayin.

⁸ Palta, ¿tas wal tzwutj in catb'tzan junc 'anma', toto man̈oc Dios tzcatb'tzani? ¿Tas wal tzwutj waln can 'el tu paxti'al 'a yib'an̈, toto man̈oc Jehová tzalni?

⁹ Caw wal wach' wiln 'at jun chon̈b' chi 'a sjolm q'uen q'uen 'aj te'n in q'ue tic. Caw wal wach' wiln 'at 'a jolm witz tic: A jun chon̈b' cha, caw wal mun 'ay sch'ocoj, chuc yeli, matz calj sb'a eb' yet' jun tzo'n̈ xo chon̈ab'.

¹⁰ Lajn eb' 'icha wal lum pococ, ¿may junc mach tztac' sb'isn eb'? ¡Comnoc wal tzin cham 'a junc'ojlal 'icha jun tzo'n̈ 'anma wach' snab'en cha! xchi win Balaam 'a sat eb' 'ayc' 'a stz'ey cha.

¹¹ A yic xyab'n Balac to 'ixta yaln Balaam, yuj cha, 'ix yaln 'a 'ixtic: —¿Tas wal jun wan a b'on tic? Yuj a catb'tzan jun tzo'n̈ 'anma 'ajc'ojl yajch 'ayn tic, yuj cha, ach wi'n coti, ax pax tzotej, 'in to a wach' paxti tzal-l 'a yib'n̈ eb', xchi.

¹² 'Ix ta'w Balaam, xyaln 'a 'ixtic: —Toc wal 'oj in xiw waln tas tzyac' Jehová wal-li, xchi 'a 'a.

¹³ Palta 'ix tew 'och Balac 'a Balaam cha, xyaln 'ixtc 'a 'a: —Con̈ wet' 'a junc xo lugar, 'a 'aj cojn sti 'el scamplamento eb' chequel, 'a 'aj man̈ checloc smasnil, sec wach' ata tza catb'tzej can eb' in c'ana', xchi.

¹⁴ Xlajw cha, 'ix 'ijx 'at Balaam yuj Balac 'a jun lugar tzcuch Zofim, 'a lum jolm witz Pisga. Ata xyac' b'o chan̈ uque yet'l xajmb'al, xya'n q'ue xajmb'al 'a yib'an̈, jun quelm wacax, jun mam calnelu 'a jun jun.

¹⁵ Xlajw cha, xyaln 'a Balac 'ixtic: —Cann̈ pax 'a stz'ey no xajmb'al tic, ya' sb'a 'oj in 'at paxtinc yet' Jehová, xchi.

¹⁶ Yajn̈j wal cha, 'ix schan sb'a Jehová yet' Balaam, 'ix yaln tas 'oj yutc paxtinc sb'a, xyaln pax 'a 'ixtic: —Meltzjan̈ 'a 'aj 'aycn Balac, tzaln 'a 'icha 'ix wutj waln 'aych tic, xchi.

¹⁷ 'Ix meltzj Balaam 'a 'aj 'ix 'at cha, ax yic xjapx 'a Balac, lin̈n 'och 'a stz'ey jun tzo'n̈ xajmb'al cha, oyn 'och eb' yichm wincal chon̈b' Moab 'a stz'ey. Yajn̈j wal cha, sc'anb'n Balac 'ixtic: —¿Tas wal xyutj Jehová yaln 'aych jun? xchi.

¹⁸ Xlajw cha, syamn 'och Balaam yaln 'ixtic: Balac ach yunnal Zipor, tzcham wal ab'n tas 'oj wala':

¹⁹ A Dios man̈ lajnoc 'icha eb' 'anma'. Matz yac' 'es, matz jel snab'en. Toto 'ay junc tas tzyala, tz'el'chn̈ej yu'uj. May 'aj tz'ec' tas tzyala.

²⁰ Xyal Jehová 'ayin, to tzwal wach' paxti 'a yib'n̈ jun chon̈b' cha. A tas tzyala, matz tac' in jeln 'eli.

²¹ A 'a scal eb' israel, atn eb' yin̈tl Jacob, may cusc'ojlal yet' yailal tz'ilchj 'a scal eb', yujto a Jehová sDiosal eb'. A 'ayc'n̈ej yet' eb', a syajlil eb' yaji.

²² A Dios, a 'ix 'i'n 'elt eb' 'a Egipto, yuj cha, a 'aych yipc sc'ojl eb'. 'Icha no simbron wacax, a sch'ac no 'aych yipc sc'ojol, 'ixta yaj eb' yet' Dios.

²³ A 'a eb' yin̈tl Jacob, may yel'ch eb' tzyal jelnal sb'a, may yel'ch eb' b'alm 'a sat eb'. A ticnec b'i'an, yowlal tzalx 'ixtc 'a yib'n̈ eb' israel: Til wal satjub'tacl 'ix sb'o Dios yet'oc, xchi cab' eb' 'anma yuj eb'.

²⁴ A jun chon̈b' tic, caw wal tzyij chan̈ sb'a 'icha junc no león caw 'ay smay, matz 'ilj xon jab'oc, masnto tzyil yi'n schib'j cha, tzle'n 'ejm can schic'l tas tzmil cha, xchi Balaam.

²⁵ Xlajw cha, xyaln Balac 'ixtc 'a Balaam: —Toto matz tac' a catb'tzan can jun chon̈b' tic, man̈ alcn pax wach' paxti 'a yib'an̈, xchi winac.

²⁶ Yuj cha, 'ix ta'w Balaam 'ixtc 'a winac: —¿Tom ma'ix wal 'ayach, to a tas 'oj yac' Jehová wala', a chi 'oj wala', 'in xin chi? xchi Balaam cha.

²⁷ Xlajw cha, 'ix yaln pax Balac 'a Balaam 'ixtic: —Lem, con̈ wet' 'a junc xo lugar, toq'ue ata 'oj scha sc'ojl Dios a catb'tzan can chon̈b' Israel cha, xchi.

²⁸ 'Ix yi'n pax 'at Balac chi win 'a lum jolm witz Peor, 'a 'ajtil checl lum cusltac lu'um.

²⁹ Xlajw cha, 'ix yaln pax Balaam 'ixtc 'a winac: —B'o chan̈ uque'oc yet'l xajmb'al 'a tic, tzlajw cha, tza miln cham ucwn̈oc no quelm wacax, yet' ucwn̈oc no mam calnelu, xchi.

³⁰ 'Ix sb'o Balac 'icha wal xyutj Balaam yalni, jun quelm wacax yet' jun mam calnelu, 'ix ya'n q'ue 'a yib'n̈ junjn yet'l xajmb'al cha.