Nm 20 - Chuj San Sebastian Bible

'Ix 'elt a a 'a sat q'uen q'ue'en

¹ A 'a yic b'ab'l 'uj, 'ix c'och eb' israel 'a lum cusltac lum tzcuch Zin, ata 'ix can eb' jun tiempoal 'a yol smacb'en Cades. Ata 'ix cham 'ix María yanb' Moisés, a pax ta 'ix mucx cani.

² Yujto may a a wach' yu'n eb' 'anma cha, yuj cha, 'ix q'ue yaw eb' smasnil 'a Moisés yet' 'a Aarón.

³ 'Ix yaln eb' 'a eb' 'ixtic: —Comnoc wal on̈ chamc can yet' eb' quit chon̈b' 'ix ya'cn cham Jehová.

⁴ ¿Tas wal yuj on̈ eyij cot 'a lum cusltac lum tic? ¿Tom tze nib'j tzon̈ cham yet' smasnil qui cajb'en noc' 'a yojltac Jehová?

⁵ ¿Tas wal yuj on̈ eyij 'elt 'a Egipto, ax 'a jun lugar maysch'olnil tic 'aj on̈ eyij coti? 'In to a 'a tic, may tas wach' tzcawej. May te snun higo, may te uva, may te granado, may pax a a tzcuq'uej, xchi eb'.

⁶ A yic xyab'n Moisés jun tzo'n̈ paxti chi yet' Aarón, 'ix yi'n 'el sb'a eb' 'a stz'ey eb' chon̈b' cha, axta 'ix c'och eb' 'a yol Mantiado 'aj tzchaj sb'a Dios yet' eb' 'anma'. Ata 'ix 'em n̈ojn eb' 'a yojltac Jehová, masnto squil 'ejm eb' snan̈l sat 'a lu'um. Yajn̈j wal cha, 'ix sch'oxn sb'a stzictznil Jehová 'a eb'.

⁷ Xlajw cha, 'ix yaln Jehová 'a Moisés 'ixtic:

⁸ 'Ij 'at a c'ococh, tzaln 'a o'tac Aarón to tzcolwj smolb'tzan eb' 'anma chi et'oc. Wal 'a sat eb' 'anma chi smasnil, tzaln 'a jun q'uen niwquil q'uen 'ayc' ta', to tz'elt a a 'a sat q'ue'en. 'Ixta 'oj 'aj yel-l secnjoc a a chi 'a sat q'ue'en, yic tzyu'n eb' 'anma chi a', yet' pax smasnil scajb'en noc' eb', xchi.

⁹ Xlajw cha, 'ix yi'n 'elt Moisés te sc'occh 'aych 'a yojltac Jehová, 'icha wal 'ix yutj yalni.

¹⁰ Xya'n Moisés yet' Aarón syam sb'a eb' 'anma 'a yich q'uen niwquil q'uen cha, 'ix yaln Moisés 'a eb' 'anma chi 'ixtic: —¡'Ab'c tas 'oj wal 'ayx tenmtacx tic! ¿Tom yowlal a 'a sat q'uen niwquil q'uen tic tzquij 'elt a a tic on̈, tzca'n eyuc'? xchi.

¹¹ A yic xlajw yaln jun tzo'n̈ cha, 'ix yi'n chan̈ Moisés sc'ab' yet' sc'ococh, 'ix sma'n 'och cha'ejm 'a sat q'uen q'uen cha. Yajn̈j wal cha, 'ix 'elt secnjoc a a cha. 'Ix yu'n eb' 'anma chi a yet' smasnil scajb'en noc' cha.

¹² Palta ax Jehová, 'ix yaln 'a Moisés yet' 'a Aarón 'ixtic: —Ax tic, ma'in eya'ch wal 'a e c'ojol, ma'in eyij chan̈ 'a yojltac eb' israel tic, yujn̈ej ton wal chi b'i'an, man̈xtoc ax 'oj eyi'ch eb' 'anma tic 'a sat lum lum tzwal wac' 'ayex, xchi.

¹³ Meriba scuchcn jun lugar cha, yujto ata 'ix q'ue 'awjoc eb' israel 'a Jehová, ata sch'ox Jehová, to cojxn niwn yel'chi.

Ma'ix schaj 'ec' eb' 'aj Edom*r* eb' israel 'a sat slu'um

¹⁴ A yic 'ayc' Moisés 'a lum Cades, 'ix schecn 'at jaywn̈ eb' schecb' 'a win sreyl Edom, yic tz'at yalnc eb' 'ixtc 'a 'a: An̈ israel on̈ tic, cu'tac to qui b'a eyet'oc, tecn tzeyab' yab'xil tas wal tzon̈ 'aj quixtx 'a Egipto.

¹⁵ A eb' qui mam quichm on̈, 'ix 'atcn eb' 'a Egipto; ata c'ochnc cajn eb'. Caw niwn tiempo 'ix can eb' ta'. Palta ax eb' 'aj Egipto cha, caw wal on̈ yixtj eb' on̈, 'ixta pax 'ajnc eb' qui mam quichm chi yuj eb' on̈.

¹⁶ Yuj cha, 'ix qui c'an scolwal Jehová quet'oc, 'ix yab'n yel caw 'a 'a, xya'n cot jun yángel yic on̈ yi'n 'elt 'a Egipto. Ax ticnec, caj 'a yol smacb'en Cades 'a smon̈jonal lum e lu'um.

¹⁷ Yuj cha, tzon̈ tew wal 'ayex, comnoc tzon̈ e chaj 'ec' 'a sat lum e lum tic. Ma'oj qui cot 'a scal e munljel 'aj 'ay eyawb'ente', ma'oj cu' pax eyal tzeyuq'uej. Cojn 'a niwn b'e 'oj qui b'ey on̈, may 'aj 'oj quel 'a sti b'e, masnto tzon̈ c'axw can 'ec' 'a e mon̈jon, xe xchi 'a winac, xchi Moisés 'a eb'.

¹⁸ Palta 'ix ta'w win sreyl Edom chi 'ixtic: —Matz ex 'ec' xon 'a sat lum qui lum tic on̈, toto tzex 'ec' 'a yib'an̈ yic tzex 'eq'ui, 'oj quel yet' eb' qui soldado tic, ax ex qui pechn 'eli, xchi 'a eb'.

¹⁹ Ax eb' israel cha, 'ix yaln pax eb' jun 'ejm xo 'a win 'ixtic: Ma'ay, man̈ ex 'och 'il cuj on̈, cojn 'a niwn b'e 'oj qui b'ey on̈, toto 'ay 'aj 'oj cu' jac eya'al, mto a qui cajb'en noc' tz'u'ni, 'oj qui toj 'ayex. Cojn tzqui nib'ej to tzon̈ e chaj 'ec' 'a sat e lum tic, xchi eb' 'a 'a.

²⁰ Palta 'ix ta'w pax win sreyl Edom chi 'a eb' 'ixtic: —May xon wal permiso tzex 'eq'ui, xchi. Ax x'aji, 'ix 'elt win rey chi yet' eb' soldado yic spechn eb' israel cha, atn eb' soldado caw tec'an, yet'n̈j eb' syamc'ab' yic owl smasnil.

²¹ Ma'ix yal xon sc'ojl win sreyl Edom to 'ix 'ec' eb' israel 'a sat slum eb' cha, yuj cha, 'ix sayn eb' israel chi junx b'e 'aj 'ix 'eq'ui.

Schaml Aarón.

²² 'Ix 'elx smasnil eb' israel 'a Cades, stojlb'tzan 'at sb'a eb' 'a stojlal lum switzl Hor, 'a sla'nil smon̈jonal lum Edom.

²³ Ata 'ix yal Jehová 'a Moisés yet' 'a Aarón 'ixtic:

²⁴ A ticnec b'i'an, jab'xoj wal 'oj cham Aarón tic, man̈x 'oj c'och 'a sat lum lum tzwal wac' 'a eb' eyit israelal tic, yujto ma'ix eyiclj in checnb'il 'ix wal 'ayex, yic 'ayx 'ec' 'a sti a spac'b'a Meriba.

²⁵ Ach Moisés ach tic, 'ij 'at Aarón tic yet' jun yunnal, atn win Eleazar, 'ij 'at eb' 'a lum jolm witz Hor.

²⁶ Ata 'oj e'l spichl Aarón tic tzc'an yuj yopiso, yic tzya'n 'och sti eb' 'anma 'ayin. Tzlajw e'n 'el 'a 'a, ax 'a Eleazar ata tza'x can 'ochi, ax Aarón 'oj chamcn ta', xchi Dios.

²⁷ Syiclj Moisés tas 'ix yal Jehová, q'ueln 'och smasnil eb' israel cha, yic 'ix 'ijx 'at Aarón yet' Eleazar yuj Moisés chi 'a lum jolm witz Hor.

²⁸ A yic xc'och eb' 'a lum jolm witz cha, 'ix yi'n 'el Moisés spichl Aarón, ax 'a win Eleazar, ata 'ix ya'x can 'ochi. Xlajw xoj cha, xchamcn Aarón 'a lum jolm witz cha. Cojxn cha, 'ix pax 'emt Moisés yet' Eleazar.

²⁹ Ax yic xyab'n eb' israel to xchamcn Aarón, yuj cha, lajn̈schawinq'uin̈ 'ix 'oc' eb' yu'uj.