Nm 2 - Chuj San Sebastian Bible

Stzol-l x'aj camplamento sb'o'i

¹ 'Ix yaln Jehová 'a Moisés yet' 'a Aarón 'ixtic:

² A yic 'oj sb'onc chan̈ eb' israel scamplamento 'a junc lugar, najt wal tz'el eb' 'a spatquil in Mantiado 'a 'aj tzin chaj in b'a eyet'oc, junjn c'aj eb' 'a stz'ey sbandera, a tzyal smacquixtacl yaj yin̈tl junjn c'aj eb'.

^3-4 A 'a stojlal 'aj tzq'uel c'u, ata 'oj 'aj scamplamento eb' soldado 'et'jnac sbandera eb' yin̈tl Judá. A Naasón yunnal Aminadab a 'aych syajlilc eb' soldado 'a yin̈tl Judá, a sb'isl eb' 'ay 74,600 soldado.

^5-6 A yet' eb', ata 'ayc' pax scamplamento eb' yin̈tl Isacar, a Natanael yunnal Zuar a 'aych syajlilc eb', a sb'isl eb' 'ay 54,400 soldado.

^7-8 Ata 'ay pax scamplamento eb' yin̈tl Zabulón yet' eb', a Eliab yunnal Helón a 'aych syajlilc eb', a sb'isl eb' 'ay 57,400 soldado.

⁹ Yuj cha, a 'a scamplamento Judá cha, 'ay 186,400 eb' soldado 'a smasnil. A eb' b'ab'l s'at 'a yojltac eb' israel.

^10-11 Ax 'a stojlal sur, ata 'oj 'aj scamplamento eb' soldado 'et'jnac sbandera eb' yin̈tl Rubén. A eb' soldado 'a yin̈tl Rubén cha, a Elisur yunnal Sedeur a 'aych syajlilc eb', a sb'isl eb' 'ay 46,500 soldado.

^12-13 Junn̈j yaj pax scamplamento eb' yin̈tl Simeón yet' eb', a Selumiel yunnal Zurisadai a 'aych syajlilc eb', a sb'isl eb' 'ay 59,300 soldado.

^14-15 Ata 'ay pax scamplamento eb' yin̈tl Gad yet' eb', a Eliasaf yunnal Reuel a 'aych syajlilc eb', a sb'isl eb' 'ay 45,650 soldado.

¹⁶ Yuj cha, a 'a scamplamento Rubén, 'ay 151,450 eb' soldado 'a smasnil. A eb' tz'at 'a schac'ajil.

¹⁷ Ax eb' yin̈tl Leví, ata tz'at eb' 'a snan̈l chan̈e camplamento cha. A eb' tz'i'n b'ey Mantiado 'aj tzin chaj in b'a eyet'oc. A chan̈e camplamento cha, caw stzol-l tz'aj sb'eyi, a tzyal ya'jc eb' 'a smantiado, junjn c'aj eb' 'a stz'ey sbandera.

^18-19 Ax 'a stojlal 'aj tz'em c'u, ata 'oj 'aj scamplamento eb' soldado 'et'jnac sbandera eb' yin̈tl Efraín. A eb' soldado 'a yin̈tl Efraín cha, a Elisama yunnal Amiud a 'aych syajlilc eb', a sb'isl eb' 'ay 40,500 soldado.

^20-21 Junn̈j yaj pax scamplamento eb' yin̈tl Manasés yet' eb', a Gamaliel yunnal Pedasur a 'aych syajlilc eb', a sb'isl eb' 'ay 32,200 soldado.

^22-23 Ata 'ay pax scamplamento eb' yin̈tl Benjamín yet' eb', a Abidán yunnal Gedeoni a 'aych syajlilc eb', a sb'isl eb' 'ay 35,400 soldado.

²⁴ Yuj cha, a 'a scamplamento Efraín, 'ay 108,100 eb' soldado 'a smasnil. A eb' tz'at 'a yoxc'ajil.

^25-26 Ax 'a stojlal norte, ata 'oj 'aj scamplamento eb' soldado 'et'jnac sbandera eb' yin̈tl Dan. A Ahiezer yunnal Amisadai a 'aych syajlilc eb', a sb'isl eb' 'ay 62,700 soldado 'a smasnil.

^27-28 Ata 'ay pax scamplamento eb' yin̈tl Aser yet' eb', a Pagiel yunnal Ocrán a 'aych syajlilc eb', a sb'isl eb' 'ay 41,500 soldado.

^29-30 Junn̈j yaj pax scamplamento eb' yin̈tl Neftalí yet' eb', a Ahira yunnal Enán a 'aych syajlilc eb', a sb'isl eb' 'ay 53,400 soldado.

³¹ Yuj cha, a 'a scamplamento Dan, 'ay 157,600 eb' soldado 'a smasnil. A eb' tza'n 'och yuj sbandera Dan cha, slajb' xoj tz'aj eb' s'ati, xchi Dios.

³² A 'ix 'aj 'el'ch sb'isl eb' soldado 'a smasnil, 'ay 603,550 eb'.

³³ Ma'ix 'och eb' levita sb'isloc eb', 'icha yutjnac Jehová yaln 'a Moisés.

³⁴ A eb' israel cha, 'ix sb'o eb' smasnil tas 'ix yal Jehová 'a Moisés, junjn c'aj eb', xcan eb' 'a stz'ey sbandera, stzol-l 'ix 'aj eb' sb'eyi, a tzyal smacquixtacl yaj yin̈tl junjn c'aj eb'.