Nm 19 - Chuj San Sebastian Bible

Stan̈il no chac wacax

¹ 'Ix yaln Jehová 'a Moisés yet' 'a Aarón 'ixtic:

² An Jehová in, an tzwac' jun checnb'il tic: Alc jun tic 'a eb' eyit israelal, to tzyij cot eb' junc no cob's wacx chac yilxi, tzya'n eb' 'ayex, no may spaltail, no mant 'a 'aj tzq'ue te yugo 'a sjolom.

³ Ax xo 'oj eyac' no 'a Eleazar, win ya'mal 'och sti eb' 'anma 'ayin, ax yijx 'el no 'a spatc 'el camplamento, ata tzyac' win milxoc no 'a yojltac.

⁴ A Eleazar cha, tzb'ech q'uet jac schic'l no', tzlajw cha, tzicn 'och jac chic' chi uc 'ejmoc 'a stojlal sti Mantiado 'aj tzin chaj in b'a eyet'oc.

⁵ Tzlajw cha, tz'ajx tz'a no wacx chi 'a yojltac Eleazar cha, tz'a pax no stz'umal, no schib'jal, no schiq'uil yet' no stza'.

⁶ Ya' sb'a tz'a no', tzyi'n cot Eleazar chi te c'ute', junc sc'ab' te hisopo yet' te chac ch'al, tzya'n 'och 'a scal c'ac' 'aj wan stz'a no wacx cha.

⁷ Tzlajw cha, tzju'n 'el win spichul, tz'achn paxi, 'ixta to b'i'an, tztac' yoch 'a yol camplamento cha, wach'xam mant wach'c wal 'icha yaln ley, to masnto 'a yic tzq'uic'b'i.

⁸ Ax win winc tz'a'n tz'a no wacx cha, yowlal tzju'l pax win spichul, tz'achn can paxi, palta man̈ wach'c jun winc cha, masnto yic tzq'uic'b'i.

⁹ Ax junc xo win winc wach' yaj 'icha yaln ley, a tzmolb'tzan stan̈il no wacx cha, tzlajw cha, tz'at ya'nc can 'el 'a spatc 'el camplamento, 'a junc lugar to wach'. Ax jun tan̈ cha, a 'oj sc'an eb' israel yic tzb'on eb' a a', a tzc'anx 'a yic tzsacb'tzan sb'a eb' chon̈ab'. A jun tic, xajmb'al yic mul tz'aji.

¹⁰ A mach tz'i'n 'el jun tan̈ cha, yowlal tzju'l spichul, tz'achn paxi, palta man̈ wach'oc masnto yic tzq'uic'b'i. A jun tic ley tz'ajcn 'ayx ax israel ex tic 'a jun 'ejmn̈ej, yet' 'a eb' chuc chon̈b'al cajn 'ec' 'a e cal.

¹¹ A mach tzyamn sniwnal junc chamnc 'anma', a jun cha, man̈ wach'c tz'ajcn 'a uque c'ual, 'icha wal yaln ley.

¹² A yic schab'jil syamn junc chamnc cha, tzsacb'tzan sb'a yet' a a cha, ax 'a yucb'ixial b'i'an, wach'xo tz'ajcni. Palta toto matz sacb'tzej sb'a 'a schab'jial, ax 'a yucb'ixial cha, man̈ wach'c tz'ajcni.

¹³ Toto 'ay mach tzyamn sniwnal junc chamnc cha, matz sacb'tzej sb'a, tzjuw 'el in cajnub' yu'uj, yujn̈ej cha, tz'ijx 'el 'a scal yit chon̈ab', yujn̈ej to matz sacb'tzej sb'a yet' a a cha, to man̈ wach'c yaj 'icha yaln ley.

¹⁴ Atn jun tzo'n̈ ley tic, toto 'ay mach tzcham 'a yojl smantiado: Smasnil eb' 'ayc' 'a yojl jun mantiado cha, yet' eb' tzat 'och 'a yojol, man̈ wach'c tz'ajcn eb' 'a uque c'ual.

¹⁵ Smasnil lum chen mto lum xalu, man̈ wach'c yaj q'ue smacl sti', an̈jtona man̈ wach'c tz'ajcni.

¹⁶ A mach tzyamn sniwnal junc chamnc 'anma yec' 'a sti 'el chon̈ab', junc tzmilx chamoc mto mun tzchami, mto junc sb'acl chamnc 'anma', mto pax junc yet'l junc chamnac, a jun tzyamn cha, man̈ wach'c tz'ajcn 'a uque c'ual.

¹⁷ A yuj jun tzo'n̈ man̈ wach'c cha, tztac' yijx cot jac stan̈il no wacx stz'a cha, no tz'ajx tz'a yuj mul, tz'ajx 'ejm jac stan̈il no 'a yojl junc b'el, tzlajw cha, tz'em a a 'a yib'an̈, a caw wach' tzcot 'a 'aj tzpaq'ui.

¹⁸ Tzlajw cha, ax junc winc wach' yaj 'icha yaln ley, a tz'i'n cot junc te sc'ab' hisopo, tzlab'n 'ejm 'a scal jun a a cha, tzicn 'och 'a yib'n̈ jun mantiado cha, tzicn 'och 'a smasnil lum chen mto lum xalu, yet' pax 'a smasnil eb' 'anma 'ay 'a yojl jun mantiado cha, an̈jtona tzicx 'och 'a jun mach tzyamn sniwnal junc chamnc cha, mto sb'acl junc 'anma milb'il chamoc mto mun chamnac, mto junc yet'l chamnc cha.

¹⁹ A junc mach wach' yaj cha, a tzicn 'och a a chi 'a jun man̈ wach'c yaj cha, 'a schab'jial tzicx 'och a 'a 'a, ax 'a yucl c'u cha, ax sb'ox can 'el'chi. A junc 'anma man̈ wach'c yaj cha, tzju'l spichul, tz'achn paxi, sec tzb'oxcan yuj a a cha. Palta man̈ wach'oc masnto yic tzq'uic'b'i.

²⁰ Toto 'ay junc 'anma matz sacb'tzej sb'a 'icha yaln ley, a jun 'anma cha, tztac' yijx 'el 'a scal eb' yit chon̈ab', yujto tz'och smul 'a in cajnub' an Jehová in, yujto matz tzicx 'och a a chi 'a 'a, a tzsacb'tzan 'anma', yuj cha, man̈ wach'c tz'ajcni.

²¹ A jun tic ley tz'aj 'a smasnil tiempo. A mach tzicn 'och a a chi 'a junc xo mach, yowlal to tzju'l spichul. A mach tzyamn a a tzsacb'tzan 'anma', a jun cha, man̈ wach'oc masnto yic tzq'uic'b'i.

²² Smasnil tas tzyam junc 'anma man̈ wach'c cha, tzjuw can 'el yu'uj. A tas tzyam junc 'anma man̈ wach'oc, man̈ wach'c tz'ajcn yu'uj, masnto yic tzq'uic'b'i, xchi Dios.