Nm 16 - Chuj San Sebastian Bible

'Xoch Coré 'ajc'ojlal 'a Moisés

¹ 'Ay jun win levita yin̈tl can Coat, tzcuch Coré, yunnal jun win tzcuch Izhar, yet' pax 'oxwn̈ xo eb' yin̈tl Rubén, atn Datán yet' Abiram yunnal Eliab eb', yet' pax On win yunnal Pelet.

² 'Ix 'och eb' 'ajc'ojlal 'a Moisés. 'Ay junx 250 eb' yit israelal eb' 'aych yopiso 'a scal eb' chon̈b' cha, locn eb' tzaln yuj junc tas 'a scal eb' chon̈ab', palta 'ix ya'ch sb'a eb' yet' win Coré cha.

³ Syamn sb'a eb' smasnil, xlajw cha, xc'och eb' 'a Moisés yet' 'a Aarón xyaln eb' 'ixtic: ¡Colb' xo wal eyi'n chan̈ e b'a tic! Yujto qui masnil, yic xo Dios cajec, 'ayc' Jehová 'a qui calc qui masnil. ¿Tas yuj tzeyij chan̈ e b'a yajlilal 'a yib'n̈ schon̈b' Dios tic? xchi eb'.

⁴ A yic 'ix yab'n Moisés jun tzo'n̈ paxti cha, 'ix 'em n̈ojan, masnto squil 'ejm snan̈l sat 'a sat lu'um.

⁵ 'Ix yaln 'ixtc 'a Coré yet' 'a smasnil eb' ajun yet' cha: —Q'ui'nto 'a yic sq'uin̈b'ial, 'oj sch'ox Jehová mach wal eb' yic cha, mach eb' to yel sic'b'il 'el yu'uj, eb' 'ay yaln yic yoch 'a yojltac yet' jun tzo'n̈ xajmb'al. A mach 'oj sch'ox 'a qui calec, atn jun chi 'oj 'a'noc 'och jun tzo'n̈ xajmb'al chi 'a yojltac.

^6-7 A tic 'oj e b'o q'uic'an, ex to eyitb'eym e b'a yet' Coré, tzeyij cot e tz'ab'c'ac', tzeya'n 'ejm stzac'ac' 'a yojol, tzeya'n q'ue incienso 'a yib'an̈, tzlajw cha, tzeya'n 'och 'a yojltac Jehová. A mach 'oj si'l Jehová, atn eb' chi to yel ya'mal servil yaji. Ax xo ex wit levitail ex tic, ¡colb' xo eyi'n chan̈ e b'a tic! xchi Moisés.

⁸ 'Ix yaln Moisés 'ixtc 'a Coré: —Ex wit levitail 'ab'c tas 'oj wal 'ayex:

⁹ ¿Tom may wal yel'ch jun tic 'a e sat, yujto sic'b'ilx 'el yuj Jehová qui Diosal 'a scal eb' quit israelal tic, yic ex yi'n 'och 'a stz'ey, yic tzex munlj 'och 'a scajnub', yic tzeya'n pax servil eb' chon̈b' tic?

¹⁰ Yujto 'ixta x'el 'a sc'ojl Jehová, to ax wit levitail, ax tzex yij 'och 'a stz'ey, ax ticnec tze nib'j to tzex 'och e masnil ya'malc 'och sti eb' 'anma tic?

¹¹ Wal yel, a cob' 'a Aarón ata tzeyal tu paxti'al e nani, palta may yel'chi. A mach 'aj wan eyaln tu paxti', atn 'a Jehová. Atn 'a 'a, ata tzex 'och 'ajc'ojlal yet' eb' ajun eyet' tic, xchi 'a eb'.

¹² Xlajw cha, 'ix ya'n Moisés cot win Datán yet' win Abiram, atn eb' yunnal Eliab, palta 'ix ta'w eb' 'a 'ixtic: —Ma'ay, matz on̈ 'at on̈.

¹³ ¿Tom janc'n̈ej tzon̈ otj on̈ extni, 'ilto on̈ ej 'elt 'a lum Egipto, 'aj til wal tas wach' tzqui c'uxu. Ax ticnec ton̈j on̈ ej cot chamc 'a lum cusltac lum tic, tzlajw cha, tza nib'n wal on̈ a'x mandar?

¹⁴ Ach tic, matz on̈ ej 'at 'a junc lugar 'aj 'ay tas wach' qui c'uxni, may pax qui lum tzac' 'aj wach' cawn qui uva. ¿Tom caw yel xo suc 'anmaln̈ xoj tzela, yuj cha, tza nib'n tzon̈ awtj pax 'ati? Matz on̈ 'at xon cab' tas tzal cha, xchi eb'.

¹⁵ Yuj cha, 'ix cot yowl Moisés, 'ix yaln 'ixtc 'a Jehová: —Man̈ a cha yofrenda jun tzo'n̈ winc cha. An tic may tzwutj ewinac, may 'aj xwij 'ec' junc sb'uru ewinac, xchi.

¹⁶ Xlajw cha, xyaln Moisés 'ixtc 'a Coré: —Q'uic'an tzach c'och 'a yojltac Jehová yet' smasnil eb' ajun et' tic, an̈jtona pax Aarón, 'oj c'och pax jun xo.

¹⁷ Junjn mach tzyij 'at stz'ab'c'ac', tzeya'n 'ejm incienso 'a yojol. Ach tic yet' Aarón, junn̈j tzeyutj 'och e tz'ab'c'ac' chi 'a yojltac Jehová, yet' pax yic eb' 250 cha, xchi.

¹⁸ Ax 'a junx c'u cha, junjn mach xyij stz'ab'c'ac', xya'n 'ejm eb' stzac'ac' 'a yojol, xya'n pax q'ue eb' incienso 'a yib'an̈. Xlajw cha, xc'och eb' 'a stzey Moisés yet' 'a Aarón, 'a yojltac 'elt Mantiado 'aj tzchaj sb'a Dios yet' eb' 'anma'.

¹⁹ Ax Coré tox xyac' syam sb'a smasnil eb' chon̈b' 'a sti 'elt Mantiado cha, 'ix sch'oxn sb'a stzictznil Jehová 'a sat eb' chon̈b' chi smasnil.

²⁰ Xlajw cha, 'ix yaln Jehová 'ixtc 'a Moisés yet' 'a Aarón:

²¹ 'Ijec 'el e b'a 'a stz'ey jun tzo'n̈ 'anma tic, yujto wal in satn 'el eb' tic, xchi.

²² A yic xyab'n Moisés yet' Aarón jun paxti cha, 'ix 'em n̈ojn eb' 'a sat lu'um, 'ix yaln eb' 'ixtic: —Mamin, ach ton wal tzac' sq'uinl smasnil 'anma', ¿tom tztac' scot owl 'a yib'n̈ smasnil eb' a chon̈b' tic yuj smul junc win winac? xchi eb'.

²³ Yuj cha, xyaln Jehová 'ixtc 'a Moisés:

²⁴ Al 'a smasnil eb' eyit israelal, to tzyij 'el sb'a eb' 'a stz'ey smantiado Coré, Datán yet' Abiram, xchi.

²⁵ Yuj cha, 'ix q'ue wan Moisés, 'ix 'at 'a 'aj 'ay smantiado Datán yet' Abiram, 'ix 'at pax smasnil eb' yichm wincal chon̈b' Israel yet'oc.

²⁶ 'Ix yaln 'ixtc 'a smasnil eb' 'anma cha: —'Ijec 'el e b'a 'a stz'ey smantiado jun tzo'n̈ 'anma maysch'olnil snab'en tic, man̈ eyam junc tas 'ay 'a eb', ax to laj x'aji, locn ex tzex cham yuj smul eb', xchi.

²⁷ Yuj cha, 'ix yi'n 'el sb'a eb' 'anma chi 'a stz'ey 'aj 'ayc' Coré, Datán yet' Abiram. Ax Datán yet' Abiram cha, 'ix 'elt can lin̈n eb' 'a sti smantiado yet' yistzil, yet' pax eb' yunnal eb'.

²⁸ Syamn 'och Moisés yaln 'ixtc 'a eb': —A ticnec b'i'an, 'oj eyojcoc 'eli to a Jehová a tz'a'n in b'o jun tzo'n̈ tic, man̈ munoc tzcot 'a in nab'en tzin b'oni.

²⁹ Toto yab'il tzmiln jun tzo'n̈ 'anma tic, toto 'ixta', man̈oc Jehová 'ayn schecb' tzyal cha.

³⁰ Palta toto 'ay tas satjub'tac 'oj sb'o Jehová, 'oj jacwc sti lum lum tic, ax sb'u'n 'ejm lum eb' 'anma tic yet' smasnil tas 'ay 'a 'a, pitznto eb' ax s'atcn eb' 'a yol lu'um. Ax eyojcan 'eli, to atn eb' 'anma tic 'ix meltzj 'och 'ajc'ojlal 'a Jehová, xchi Moisés.

³¹ Cojn wal xlajw yaln Moisés jun tzo'n̈ paxti tic, 'ix jat lum lum 'a yaln̈ eb' x'och smul cha.

³² 'Ix sb'u'n can 'ejm lum win Coré yet' eb' 'anma 'ix ya'ch sb'a yet'oc, 'ix 'atcn eb' 'a yol lum yet' yunnal yet' pax smasnil tas 'ay 'a eb'.

³³ Pitznto eb' 'ix 'atcn eb' 'a yich lu'um, yet' pax smasnil tas 'ay 'a junjn eb'. 'Ixtnta 'ix 'aj eb' satcn 'el 'a scal eb' yit israelal cha.

³⁴ A yic xyab'n eb' chon̈b' chi yel yaw eb' 'anma cha, 'ix 'at eb' 'eloc, xyaln eb' 'ixtic: Comnoc matz on̈ sb'u'c 'ejm lum jun xo, xchi eb'.

³⁵ An̈jtona', 'ix ya' cot Jehová jun c'ac' 'a yib'n̈ eb' 250 'ix c'och 'a yojltac Jehová yet' stz'ab'c'ac', jun tzo'n̈ 'ay 'ejm incienso 'a yojol.

³⁶ Yuj cha, xyaln Jehová 'ixtc 'a Moisés:

³⁷ Al 'a Eleazar, win yunnal Aarón ya'mal 'och sti eb' 'anma 'ayin, yi' cab' 'elt jun tzo'n̈ tz'ab'c'ac' bronce 'a scal jun tzo'n̈ stz'a cha, ax stzac'ac' 'ay 'ejm 'a yojol, najt tz'at secxoc can 'eli.

³⁸ A jun tzo'n̈ stz'ab'c'ac' eb' 'anma chi xcan cha, atn eb' xcham yuj smul x'ochi, wic tz'ajcn jun tzo'n̈ cha, yujto xc'anx eb' yet' incienso x'ajx 'och 'a wojltac an Jehová in. Tzac' b'o jun tzo'n̈ q'uen chi laminail, tz'och eb' yen̈loc yet'l xajmb'al, sec wach' tz'och jun tic cuynb'ilal 'a eb' eyit israelal, xchi Dios 'a Moisés.

³⁹ Ax Eleazar, 'ix si'n syam sb'a jun tzo'n̈ tz'ab'c'ac' nab'a bronce cha, atn jun tzo'n̈ yic eb' 'anma xchami, jun tzo'n̈ x'ajx tz'a'oc. 'Ix yalni to tz'ajx b'o laminail, sec tz'och yen̈loc yet'l xajmb'al.

⁴⁰ A jun tic, cuynb'il x'ajcn 'a eb' israel, chajtlto cojn eb' yin̈tl Aarón tztac' yochch sn̈us incienso 'a yib'n̈ yet'l xajmb'al 'a yojltac Jehová. Yuj cha, toto 'ay mach tzb'on 'icha eb' x'och tza'n yuj Coré cha, 'ixta pax tz'aj eb' jun xo. 'Icha wal xyutj Jehová yaln 'a Moisés, 'ixta wal xyutj Eleazar jun tzo'n̈ cha.

⁴¹ Ax 'a junx c'u, smasnil eb' 'anma', 'ix meltzj 'och eb' 'ajc'ojlal 'a Moisés yet' 'a Aarón, 'ix laj yalnc eb' 'a eb' 'ixtic: —Ax tic, 'in to 'ipn e satn 'el eb' schon̈b' Jehová, xchi eb'.

⁴² Smasnil eb' 'anma cha, 'ix 'och oyn eb' yowx 'och 'a Moisés yet' 'a Aarón, xlaj 'at q'ueln eb' 'a 'aj 'ay Mantiado cha. Yajn̈j wal cha, x'och oynjoc 'asn 'a yib'an̈, 'ix sch'oxn sb'a stzictznil Jehová.

⁴³ Yuj cha, x'at Moisés yet' Aarón 'a yol sti Mantiado cha.

⁴⁴ 'Ix yaln Jehová 'a Moisés 'ixtic:

⁴⁵ 'Ijec 'el e b'a 'a stz'ey jun tzo'n̈ 'anma tic, yujto wal in satn 'el eb' tic, xchi. —Ax Moisés yet' Aarón, 'ix 'em n̈ojn eb', masnto squil 'ejm eb' snan̈l sat 'a sat lu'um.

⁴⁶ 'Ix yaln Moisés 'a Aarón 'ixtic: —'Ij cot a tz'ab'c'ac', tza'n 'ejm stzac'ac' yic yet'l xajmb'al 'a yojol, tza'n q'ue incienso 'a yib'an̈. Tzlajw cha, tzach 'at mu'c 'a scal eb' 'anma cha, tza c'ann niwnc'ojlal 'a Dios yuj smul eb', yujto tox 'ix cot yowl Jehová 'a yib'n̈ eb', tox 'ix ya' cot jun yab'il to tzcham eb' 'anma smasnil yu'uj, xchi.

⁴⁷ Ax Aarón 'ix syiclj tas xyal Moisés, carela x'at 'a 'aj yamn eb' chon̈b' cha. Ax jun yab'il xyac' cot Jehová, wan xo laj scham 'anma chi yu'uj. Yuj cha, 'ix ya'n 'och Aarón sc'a'l incienso yic tzc'ann niwnc'ojlal 'a Dios yuj smul eb' chon̈b' cha.

⁴⁸ Yajn̈j wal cha, xya'n 'och 'a scal eb' chamnc xo cha, yet' 'a scal eb' pitznto, cojn cha, 'ix 'och wan eb' 'anma chi schami.

⁴⁹ Wal 'a muc'uc, xcham chan̈lajn̈e mil yet' uque ciente eb' 'anma cha, chuc pax yaj eb' xcham yet' Coré yic 'ix 'och eb' 'ajc'ojlal 'a Moisés yet' 'a Aarón.

⁵⁰ A yic x'och wan scham eb' 'anma cha, ax Aarón 'ix meltzj pax 'a scajnub' Dios 'a 'aj 'aycn Moisés.