Nm 15 - Chuj San Sebastian Bible

Sleyl tas tz'aj yajx xajmb'al

¹ 'Ix yaln Jehová 'ixtc 'a Moisés:

² Al jun tzo'n̈ tic 'a eb' et israelal, to an tzwal 'ixtc 'a eb': A yic tzex c'och 'a sat lum lum tzwac' eyico'oc, lum 'aj 'oj eyaj cajn cha,

³ tzeyac' junc no quelm wacax, mto junc no cob's calnelu xajmb'al-l 'ayn an Jehová in, tzeya'n tz'a no 'a wojltac, yujto wach' sjab' tzwab'i, tzeyac' 'ayn yuj eya'n 'el'choc junc e ti', mto ton̈j tz'el 'a e c'ojl eya'ni, mto tzeyac' pax yuj junc q'uin̈.

⁴ A mach tzyac' junc xajmb'al 'ayin, yowlal tzyac' pax chan̈e'oc libra 'ixm harina caw wach' ofrendail yet' no xajmb'al cha, wach' cab' tz'aj scalx yet' junc litro aceite.

⁵ A yet' no xajmb'al tox xwal cha, yowlal tz'ajx pax junc litro yal uva ofrendail yet' junjn quelm calnelu cha.

⁶ Toto mam calnelu no tz'ajx xajmb'al-l cha, tz'ajx pax wajxque'oc libra harina ofrendail yet' no', 'ec'b'al cab' jun litro aceite tz'at 'a scal.

⁷ 'Ec'b'al cab' pax jun litro yal uva tz'ajx yet'oc, yujto a jun tzo'n̈ xajmb'al cha, wach' sjab' tzwab'i.

⁸ Toto quelm wacx no xajmb'al cha, 'ajx cab' tz'a no', yic tzeya'n 'el'choc junc e ti', mto xajmb'al yic junc'ojlal.

⁹ Yowlal tz'ajx pax lajchwe'oc libra 'ixm harina yet' no xajmb'al cha, wach' tz'aj scalx yet' chab'oc litro aceite,

¹⁰ chab' pax litro yal uva tz'ajx yet'oc, yujto a jun tzo'n̈ cha, xajmb'al to tz'a'i, wach' sjab' tzwab'i.

¹¹ Atn jun tzo'n̈ cha, yowlal tzeyac' yet' junjn no wacx cha, mto mam calnelu, mto quelm calnelu mto junc no yune chiwo tzeyac'a.

¹² A tzyal sb'isl no xajmb'al chi tz'ajx cha, 'ixta pax sb'isl jun tzo'n̈ xo ofrenda chi tzeyac' yet'oc.

¹³ E masnil ax israel ex tic, yowlal tzeyiclj jun tzo'n̈ ley tic, yic tzeya'n tz'a e xajmb'al 'a wojltac, yujto a jun tzo'n̈ cha, to wach' sjab' tzwab'i.

¹⁴ Toto a junc chuc chon̈b'al ton̈j tz'ec' 'a e cal, mto cajn 'ec' eyet' jun, toto tznib'j tzyac' junc xajmb'al 'ayn an Jehová in, ya' cab' tz'a'oc, yujto wach' sjab' tzwab'i, palta yowlal tzyiclj in ley tzeyiclj ax tic.

¹⁵ A jun in ley tic, tz'och yopiso 'ayex yet' 'a eb' chuc chon̈b'al. 'Oj sc'anlb'ocn̈ej eb' eyin̈tl b'aq'uin̈.

¹⁶ Junn̈j ley 'oj e c'anlb'oc ax tic, yet' pax eb' chuc chon̈b'al 'ayc' eyet'oc, xchi Dios.

¹⁷ 'Ix yaln pax Jehová 'a Moisés 'ixtic:

¹⁸ Tzal jun tzo'n̈ xo tic 'a eb' et israelal cha, to an tzwal 'a eb' 'ixtic: A yic 'ayx xo 'ec' 'a sat lum lum 'aj tzex wij 'at cha,

¹⁹ 'oj laj e wa 'ixm trigo tzyac' lum lum cha, palta yowlal tzeyij can 'el jun c'ajoc 'ixm tzeyac' ofrendail 'ayin.

²⁰ 'Icha tzeyutj eya'n 'ixm b'ab'l sat trigo tzte'x 'el cha, 'ixta pax tzeyutj 'ixm b'ab'l pan tze b'o yet' 'ixm harina, to tzeyac' ofrendail 'ayin.

²¹ A jun tzo'n̈ ofrenda cha, 'oj eyac' 'ayn an Jehová in 'a smasnil tiempo.

^22-23 Nac wal si'mb'il yuj jun tzo'n̈ checnb'il waljnac 'ayx 'a yictax b'ab'el, sec tzeyiclj ax tic, ax syiclni pax eb' eyin̈tl b'aq'uin̈; toq'ue tzlaj sat e c'ojl eyiclni. Yowlal 'oj eyiclc jun tzo'n̈ xo 'oj wal tic:

²⁴ Toto 'ay junc checnb'il tic tz'at satc'ojlal yuj eb' chon̈b' smasnil, 'oj e mol 'a'c junc no quelm wacx xajmb'al-l 'ayn an Jehová in, tzeya'n tz'a no', yujto wach' sjab' tzwab'i, tzeya'n pax 'ixm harina yet' yal uva, 'icha yaj sleyal. Chuc pax tz'ajx junc no chiwo xajmb'al-l 'ayn yuj ya'n lajwc e mul cha.

²⁵ Tzlajw cha, ax win ya'mal 'och e ti 'ayin, a win tzb'on 'och no xajmb'al chi 'a wojltac 'a 'icha sleyal, sec tz'ajx lajwc e mul. 'Oj wac' niwnc'ojlal 'a eyib'an̈, yujto man̈ sc'anc e c'ojol. Yowlal tzeyac' eyofrenda cha, yet' xajmb'al tz'a'n lajwc e mul.

²⁶ Yuj jun tzo'n̈ xajmb'al cha, ax wa'n niwnc'ojlal 'a eyib'n̈ ax israel ex tic, yet' pax 'a eb' chuc chon̈b'al cajn 'a e cal, yujto man̈ sc'anc e c'ojl tz'och e mul.

²⁷ Toto a junc comn 'anma tz'och smul, to man̈ sc'anc sc'ojol, a junc 'anma cha, tzyac' junc no cob's chiwo jun ab'il sq'uinl xajmb'al-l yuj smul cha.

²⁸ Ax win ya'mal 'och e ti cha, a win tzb'on no xajmb'al cha, 'icha xon tz'aji, sec tz'ajx lajwc smul junc 'anma cha, sec 'ixta tzwutj wa'n niwnc'ojlal 'a yib'n̈ an Jehová in.

²⁹ Atn jun ley tic tz'och yopiso 'a e cal ax israel ex tic, yet' pax 'a eb' chuc chon̈b'al cajn 'ec' 'a e cal, toto man̈ sc'anc sc'ojl junc mach tz'och smul cha.

³⁰ Palta toto sc'an wal sc'ojl junc 'anma chi tzsay smuloc, toxn̈ej to eyit chon̈ab', mto chuc chon̈b'al, palta tz'och smul 'ayin, a jun 'anma cha, yowlal tz'ijx 'el 'a e cal.

³¹ Yujto tzpatquilj can 'el in paxti an Jehová in, matz yiclj in checnb'il, yuj cha, mun wal tzyij cot 'a yib'an̈, yujto tenmtac, xchi Dios.

Chaml yuj matz yiclx sc'ul 'iljelal

³² A yic 'ayc' eb' israel 'a lum cusltac lu'um, 'ix yiln sb'a eb' 'a jun win winac, to wan sayn sc'atztz 'a sc'ul 'iljelal.

³³ Ax eb' x'iln win cha, 'ix yi'n 'at eb' win 'a Moisés, 'a Aarón yet' 'a sat eb' chon̈b' chi smasnil.

³⁴ 'Ix ya'n 'och eb' stan̈mal winac, yujto mant 'a yalnb'il tas tz'aji.

³⁵ Yuj cha, xyaln Jehová 'ixtc 'a Moisés: A jun winc cha, cham cab'i'. Smasnil eb' chon̈ab' sjulq'uenoc cab' eb' 'a spatquil 'el camplamento, xchi.

³⁶ Yuj cha, xyi'n 'el eb' chon̈b' chi 'a spatquil 'el scamplamento, axta sjulq'uenej eb', masnto xchami, 'icha wal xyutj Jehová yaln 'a Moisés, 'ixta 'ix 'aji.

Yelwnub'l sti pichul

³⁷ 'Ix yaln Jehová 'a Moisés 'ixtic:

³⁸ Al yab' eb' et israelal, to an tzwal jun tzo'n̈ tic: Ax tic, yet' eb' eyin̈tl b'aq'uin̈, yowlal tz'och yelwnub'l sti schicn e pichul. A jun tzo'n̈ yelwnub'l pichl cha, tzb'o 'a te q'uic'mucnac ch'al,

³⁹ sec ax yic 'oj eyilnc 'och yelwnub'l e pichl cha, ax e nan cot smasnil jun tzo'n̈ checnb'il xwalcn 'ayex. Tze b'eylb'ej, sec wach' man̈toc comnxoj tzex yijcan 'at e tu nab'enal, mto e nib'b'en 'a maysch'olnil, yujto a jun tzo'n̈ chi tzex jun 'eli.

⁴⁰ Palta 'ixta 'oj eyutc e nan cot smasnil in checnb'il, ax e b'eylb'ani, yujto wic tzex 'aji, an xo e Diosal tzin 'aji.

⁴¹ An tzwala, to an ex wij 'elt 'a Egipto, sec tzin 'och e Diosaloc. An ton Jehová e Diosal in, xchi Dios.