Nm 14 - Chuj San Sebastian Bible

'Ochnc eb' israel 'ajc'ojlal 'a Jehová

¹ A wal yic xyab'n eb' israel jun tzo'n̈ cha, 'ix 'el yaw eb' smasnil, 'oc'ln̈ej sb'o eb' yic 'ix 'ec' jun 'ac'wl cha.

² Smasnil eb' 'anma cha, xlaj q'ue b'uynjoc eb' yaln tu paxti 'a Moisés yet' 'a Aarón, xyaln eb' 'ixtic: ¡Comnoc wal a 'a Egipto, mto a 'a lum cusltac lum tic on̈ chamc cani!

³ ¿Tas laj yuj tzon̈ yijec 'at Jehová 'a jun lum lum cha, sec am ata tzon̈ chamc can ta yuj owal, ax eb' 'ix quistlec, eb' cunnalec, 'oj can eb' 'a yol sc'ab' eb' 'ajc'ojl yajch 'ayn̈ec cha? Yel xom wach' tzon̈ meltzjec pax 'a Egipto, xchi eb'.

⁴ 'Ix laj yal-lanc junjn eb' 'ixtc 'a 'a: Qui sayc junc mach tzon̈ jucb'tzanec yic tzon̈ meltzjec 'a Egipto, xchi eb'.

⁵ Yuj cha, 'ix 'em n̈ojn Moisés yet' Aarón 'a sat lum 'a yojltac eb' chon̈b' cha.

⁶ Ax Josué yet' Caleb, locn eb' xit' 'ilnoc lum lum cha, 'ix stzilnjat eb' spichul, yic tzch'oxn 'el eb' to tzcus eb' yab'n jun tzo'n̈ paxti cha.

⁷ 'Ix yaln eb' 'a smasnil eb' 'anma chi 'ixtic: —A lum lum xit' quil chi 'on̈, caw wach' lu'um.

⁸ Toto tz'el 'a sc'ojl Jehová tzcolwj quet'ec, 'oj cochc xon 'a lu'um, yujto a 'oj a'noc lum 'ayn̈ec. A jun lum cha, caw wal yax sat lu'um.

⁹ Palta comnoc matz eyij 'el e nab'en 'a Jehová, man̈ ex comn xiw yuj eb' 'anma chi 'ay 'a lum lum cha. 'Ichan̈ej wal qui wan junc pan, 'ixta 'oj 'aj eb' satl cujec, toc 'ay mach 'oj colnc 'el eb' 'ayn̈ec. An̈ec xo tic, a Jehová a 'aych quet'ec. Yuj cha, man̈ ex comn xiwoc, xchi eb'.

¹⁰ Wach'xam 'ixta xyutj eb' yalni, palta ax eb' 'anma cha, snib'j eb' sjulq'uenoc eb'. Yuj cha, sch'oxn sb'a stzictznil Jehová 'a sti Mantiado 'aj tzchaj sb'a yet' eb' 'anma'. Smasnil eb' israel cha, 'ix yil eb'.

¹¹ 'Ix yaln Jehová 'a Moisés 'ixtic: —¿B'a'n̈ to wal 'oj yactc eb' 'anma tic in spatquiln can 'eli? ¿B'a'n̈ to wal 'oj yactc eb' in schab'c'ojlani? 'In til wal milagro tzin ch'ox pax yil eb'.

¹² A ticnec b'i'an, 'oj wa' cot junc niwquil yab'il 'a yib'n̈ jun tzo'n̈ 'anma tic, ax scham eb' yu'uj. Palta a 'ayach, ata 'oj 'el jun chon̈b' caw niwquil, caw wal jelnto 'a yib'n̈ eb' tic, xchi Dios.

¹³ Yuj cha, 'ix ta'w Moisés 'ixtc 'a Jehová: —Ach xej 'elt eb' 'anma tic yet' a poder 'a Egipto, ax 'oj yab'nc sb'a eb' 'aj Egipto cha, to wan a satn 'el eb' a chon̈b' tic.

¹⁴ Caw wal 'oj yal eb' a peclal 'a eb' 'anma 'ay 'a lum Canaán. An̈jtona eb' cha, 'ix yab' pax eb' yab'xil, to ach Jehová ach, 'aych 'ec' 'a qui cal on̈. Q'uelc'mb'a tzach 'aj a paxtin quet' on̈. Ax jun 'asn eco', a 'ayc' 'a quib'n̈ on̈. A 'a c'ual b'ab'l a 'at cuj 'a scal jun 'asn cha, ax 'a 'ac'wal, 'aych 'och 'a scal jun c'ac' b'ab'l s'at cuj on̈.

¹⁵ Toto jun 'ejmn̈ej tza satl jun tzo'n̈ 'anma tic, ax jun tzo'n̈ xo nacion̈, 'oj yab' eb' speclal tas 'oj a b'o', ax yaln eb' am 'ixtic:

¹⁶ A Jehová matz tac' yi'n 'och eb' 'anma chi 'a sat lum lum 'aj xyac' sti ya'n 'a eb', yuj cha, 'ix smiln can cham eb' 'a lum cusltac lu'um, 'oj xchic am eb' 'anma cha.

¹⁷ A ticnec Mamin, tzin tew 'och 'ayach, to tza ch'ox a poder, 'icha wal yaj aln cani,

¹⁸ chajtlto man̈ comnoc tzcot yowl a c'ojl muc'uc. Caw 'ay a chamc'ojlal yet' a niwnc'ojlal 'a yib'n̈ eb' maysch'olnil tzyutj sb'a, mto eb' tenmtac. Wach'xam matz ac' syailal eb' 'ay smul chi muc'uc, palta a smul eb' mamb'il cha, yowlal tzjaw to syailal 'a yib'n̈ eb' 'unnab'il, eb' 'ichicnab'il, eb' schab'il mto eb' yoxl 'ichicnab'il.

¹⁹ Comnoc tzac' niwnc'ojlal 'a yib'n̈ eb' 'anma tic, yujto caw 'ay xon a chamc'ojlal 'a eb', yic e'n 'elt eb' 'a Egipto masnto 'a jun lugar tic, xchi Moisés.

Ya'jnac Jehová syailal eb' israel

²⁰ 'Ix ta'w Jehová 'a Moisés 'ixtic: —'Oj wac' niwnc'ojlal 'a eb' israel 'icha wal tzotj a c'ann 'ayn tic, palta 'oj wac' xon syailal eb'.

²¹ Caw yel pitzn in, checl pax in tzictznil 'a smasnil yolyib'n̈q'uinal.

²² A eb' x'iln in tzictznil tic, yet' milagro in ch'oxjnac yil eb' 'a Egipto, xin ch'oxn pax yil eb' 'a lum cusltac lu'um, palta slajn̈ 'ejmal xo in ya'n prowal eb' tic, matz yiclj eb' xon tas tzwala.

²³ Yuj cha, tzwa'n can in ti', to may xon junc eb' 'oj 'ilnoc lum lum 'aj xwac' in ti wa'n 'a smam yichm eb'. May xon junc eb' in patquiln can 'el tic 'oj c'och 'a sat lu'um.

²⁴ Cojn wal win in checb' Caleb, cojn wal yiclum xyutj sb'a 'ayin. Yuj cha, 'oj c'och win 'a sat lum lum xit' yil cha, ax eb' yin̈til, a eb' 'oj cajnoc lu'um.

²⁵ A eb' amalecita yet' eb' cananeo, ata cajn eb' 'a lum pan̈quixtac 'a la'n tic. Yuj cha, ax xo tic, a q'uic'an chucx b'e 'aj tzex 'ati; tzex meltzj 'a lum cusltac lu'um, a 'a stojlal a Chac Mar ata tzex 'ati, xchi Dios.

²⁶ 'Ix yaln pax Jehová 'ixtc 'a Moisés yet' 'a Aarón:

²⁷ —¿Jantcto wal tiempo 'oj techjoc sti jun tzo'n̈ 'anma maysch'olnil tic wu'uj? 'Ix wab'i to caw tu yaln eb' 'ayin.

²⁸ 'Ixquec, 'at alc 'a eb', to an tzwal 'a eb' 'ixtic: An Jehová in, tox 'ix wac' in ti', to 'oj wac' 'el'choc 'icha 'ix wutj wab'n eyaln cha.

²⁹ Smasnil mach 'ec'b'alx sq'uinl 'a junc'l ab'il, atn mach xyac' tzib'xoc sb'a yic sq'ue wan e b'isul, atn eb' chi tu xyutj yaln 'ayin, 'oj cham eb' chi smasnil, 'oj laj can t'ocn sniwnal eb' 'a lum cusltac lum tic.

³⁰ Cojn Caleb yet' Josué, a eb' 'oj c'och 'a sat lu'um. Ax xo ax tic e masnil, may junc ex 'oj e c'och 'a sat lu'um, atn lum xwal wac' 'ayex.

³¹ Palta ax eb' eyunnal xeyal to tzcan 'a yol sc'ab' eb' 'ajc'ojl cha, 'oj wi'ch eb' 'a sat lum lum chi tze patquilj can 'el cha, sec ax eb' 'oj yac' tzaljoc sc'ojl 'a sat lu'um.

³² Ax xo ax tic, 'oj can t'ocn e niwnal 'a lum cusltac lum tic.

³³ Ax eb' eyunnal tic, 'icha to 'ilj calnelun̈ej 'oj sb'o eb' chawinc ab'il 'a lum cusltac lum tic. A eb' 'oj tupn lajwc e tenmtacl x'och 'ayin, masnto 'oj lajwc e chamcn ax tic 'a lum cusltac lum tic.

³⁴ Yujto chawinc c'u xit' eyil 'elt lum lum cha, yuj cha, chawinc ab'il 'oj 'och yailal 'a eyib'an̈. Tzyal 'el'chi, junjn ab'il 'a junjn c'u, sec 'oj eyojcoc 'eli, to 'ay smay e meltzj 'och 'ayin.

³⁵ An Jehová in, an tzwala: 'Ixta wal 'oj wutc jun tzo'n̈ 'anma 'ix meltzj 'och 'ajc'ojlal 'ayn tic, a 'a lum cusltac lum tic 'oj lajwc can eb' schami, xchi Dios.

Chamnc eb' 'ilm lum tu snab'en

^36-37 Ax eb' winc xit' 'ilj lum chi yuj Moisés, man̈ wach'c xyutj eb' yalni tas yilx lum lum cha, yuj cha, xlaj b'uchwj eb' 'anma 'a Jehová.

³⁸ Yuj cha, 'ix ya'n cot Jehová jun yab'il 'a scal eb', 'ix laj cham eb'. Cojxn Josué yet' Caleb ma'ix chami.

'Ajxnac ganar eb' israel 'a Horma

³⁹ A yic 'ix yaln Moisés 'a eb' israel cha, yuj tas xyutj Jehová yaln 'a 'a, yuj cha, 'ix cuschan̈ eb' 'anma chi smasnil.

⁴⁰ Ax 'a yic sacb'el 'a junx c'u, 'ix laj seb' q'ue wan eb', 'ix snan eb' to tz'at yac' eb' owl yet' eb' 'anma cajn 'a lum jolmctac witz, yuj cha, 'ix yaln eb' 'ixtic: —A ticnec 'ayn̈ecx 'ec' 'a tic, coyc 'a sat lum lum chi xyal Jehová to tzyac' 'ayn̈ec cha, yel toni 'ix 'och qui mulc 'a 'a, xchi eb'.

⁴¹ Palta ax Moisés 'ix yaln 'a eb' 'ixtic: —¿Tas wal yuj tzex 'ec' 'a yib'n̈ 'a tas tzyal Jehová? A jun e nab'en cha, ma'oj 'el'choc 'a wach'.

⁴² Man̈ ex 'atoc, yujto a Jehová man̈ 'ayc 'och eyet'oc. A eb' 'ajc'ojl cha, 'oj ex yac' ganar eb'.

⁴³ Macb'il e c'och yuj eb' amalecita yet' eb' cananeo 'a jun tzo'n̈ lugar cha, sec tzyac' eb' owl eyet'oc, ax ex smiln eb'. Yujto ax tic, xeyij 'el e nab'en 'a Jehová, yuj cha, ma'oj colwjoc eyet'oc, xchi.

⁴⁴ Caw ma'ix schaj eb' yab'i', 'ix yi'n 'at sb'a eb' 'a lum jolmctac witz cha. Palta ax te scaxail strato Jehová yet' Moisés, ma'ix 'elt xon 'a yojl camplamento cha.

⁴⁵ A eb' amalecita yet' eb' cananeo cajn 'a jun tzo'n̈ lugar cha, 'ix 'elt eb' yac' owl yet' eb'. Ax 'ix 'aji, ma'ix techj yuj eb' israel cha, 'ix pechx eb', masnto xjapx can eb' 'a lum Horma.