Nm 13 - Chuj San Sebastian Bible

'At ya'jnac Moisés 'ilxoc lum Canaán

¹ 'Ix yaln Jehová 'a Moisés 'ixtic:

² Checb't jaywn̈oc eb' winc 'at yil lum Canaán, atn lum 'oj wac' e yico'oc ax israel ex tic. A junjnoc eb' 'ay yopiso 'a scal junjn 'in̈tal israel, a eb' tza checb'ti, xchi.

³ 'Icha wal xyutj Jehová yalni, 'ixta xyutj Moisés schecn 'at eb' winc cha, yic 'ayc' eb' 'a lum cusltac lum yic Parán. A eb' winc cha, 'ayn̈j yopiso eb' 'a scal eb' yit israelal cha.

^4-15 A eb' x'at cha, atn sb'i eb' tic: Samúa, yunnal Zacur yic eb' yin̈tl Rubén; Safat, yunnal Horí yic eb' yin̈tl Simeón; Caleb, yunnal Jefone yic eb' yin̈tl Judá; Igal, yunnal José yic eb' yin̈tl Isacar; Oseas, yunnal Nun yic eb' yin̈tl Efraín; Palti, yunnal Rafú yic eb' yin̈tl Benjamín; Gadiel, yunnal Sodi yic eb' yin̈tl Zabulón; Gadi, yunnal Susi yic eb' yin̈tl José, (tzyal 'el'chi atn eb' yic Manasés;) Amiel, yunnal Gemali yic eb' yin̈tl Dan; Setur, yunnal Micael yic eb' yin̈tl Aser; Nahbi, yunnal Vapsi yic eb' yin̈tl Neftalí; Geuel, yunnal Maqui yic eb' yin̈tl Gad.

¹⁶ Atn sb'i eb' winc tic 'ix schecb't Moisés yic tz'at yilnc eb' lum Canaán. A win Oseas yunnal Nun, 'ix sjel Moisés sb'i winac, Josué xyac' sb'i'oc.

¹⁷ A yic schecn 'at Moisés eb' tz'at 'ilnoc lum Canaán cha, 'ix yaln 'a eb' 'ixtic: —'Ixquec 'a lum Neguev, tzlajw cha, tzex q'ue'ch 'a lum jolmctac witz.

¹⁸ Tze maclni eyila', chajtl wal sb'o lu'um, tze maclni pax eyil eb' 'anma cajn 'a lu'um, tom caw jeln eb', mto may sjelnal eb', tom niwn sb'isl eb', mto jaywn̈ej wal eb'.

¹⁹ Tze maclni pax eyila', tom a schon̈b' eb' cha, mantiado yaj yatut eb' 'aj cajan, mto 'aych smuroal, ax lum lum cha, wach' am lu'um, mto maysch'olnil lu'um,

²⁰ tzyac' am lum sb'a'al mto ma'ay, 'aym te 'awb'ente 'a sat lu'um, mto ma'ay. Man̈ ex xiwoc; tzeyij cot sat te 'awb'ente chi quil 'a tic, xchi 'a eb'. A wal yel-l te sb'ab'l sat uva yic 'ix xit'c' eb' cha.

²¹ 'Ix syamn 'och eb' winc chi smaclni yil lum lum chi 'a lum cusltac lum yic Zin, masnto xc'och eb' 'a Rehob, 'a sla'nil xo Hamat.

²² 'Ix 'ec' eb' 'a lum Neguev, masnto xc'och eb' 'a Hebrón. Ata cajn Ahimán, Sesai yet' Talmai. A eb' tic, yin̈tl can win Anac eb'. A chon̈b' Hebrón cha, yucl xo ab'il sb'o'i, yic 'ix b'o chon̈b' Zoán 'a Egipto.

²³ 'Ix c'och eb' 'a lum span̈nil sti a niwn a Escol, ata 'ix sch'in 'elt eb' jun c'ojlab' te uva, ax 'a jun te', ata slocch eb', chawn̈ mach x'i'ni. Xlaj yi'nc pax eb' te granada yet' te higo.

²⁴ A jun pan̈n cha, xyac' eb' sb'ic Escol, yujto ata sch'in 'elt eb' jun c'ojlab' te uva cha.

²⁵ Chawinc c'u 'ix smaclj eb' yil lum lum cha, 'ixta to b'i'an, 'ix meltzj eb'.

²⁶ A 'a lum Cades yic lum cusltac lum yic Parán, ata 'ayc' Moisés, Aarón yet' smasnil eb' chon̈ab'. A yic xjapx eb' 'ilm lum cha, 'ix laj yalnc eb' tas xlaj yil eb'. Sch'oxn eb' 'ilxoc sat te 'awb'ente 'ay 'a lum lum cha.

²⁷ 'Ix yaln eb' 'ixtc 'a Moisés: —On̈ xit' quil lum lum chi 'aj on̈ a checb'ti. Yel ton wal b'i'an, caw wach' lu'um, yax sat lu'um, yaj sat eb' te 'awb'ente tic 'ay 'a lu'um.

²⁸ Palta ax eb' 'anma cajn 'a sat lu'um, caw wal 'ay yip eb'. A schon̈b' eb', caw wal niwac, 'aych pax smuroal. An̈jtona', xquil pax eb' yin̈tl win Anac on̈, caw wal niwc stel eb'.

²⁹ A 'a lum Neguev, ata cajn eb' amalecita. Ax 'a lum jolmctac witz, ata cajn eb' hitita, eb' jebuseo yet' eb' amorreo. Ax 'a sc'axpil 'ec' a mar yet' 'a sti a Jordán, ata cajn eb' cananeo, xchi eb'.

³⁰ Xlajw cha, 'ix yaln Caleb to sictac tz'aj eb' 'anma 'ayc' 'a yojltac Moisés cha, xyaln 'a eb' 'ixtic: —¡A ticnec, coyec! ¡'At qui'c 'ec' lum lum cha, a eb' 'anma 'aych 'a lu'um, 'oj 'el xon eb' cujec, yujto 'ec'b'al qui jelnalec 'a yib'n̈ eb'! xchi.

³¹ Palta ax eb' xit' yet' cha, 'ix yaln pax eb': Ma'ay, ma'oj stac' xon ca'nec owl yet' eb' 'anma cha, yujto caw wal jeln eb' 'a quib'n̈ec, xchi eb'.

³² Yuj cha, xlaj yalnc eb' 'a scal eb' israel cha, to a lum lum xit' yil eb', caw wal maysch'olnil lu'um, 'ix yaln eb' 'ixtic: A 'a lum lum xit' quil chi 'on̈, caw c'un scham eb' 'anma ta', ax eb' 'anma cha, caw wal niwc wincn̈ej eb'.

³³ 'Ix quil eb' niwc stel ta 'on̈, atn eb' yin̈tl can win Anac. An̈ec xo tic, yo'lab' wal tzon̈ 'ajc 'och wetzn 'a stz'ey eb' 'icha no cotc c'ulub', an̈jtona', 'ixta pax on̈ yiln 'och eb', xchi eb'.