Nm 12 - Chuj San Sebastian Bible

Yaljnac María yet' Aarón*r* speclal Moisés

¹ A 'ix María yet' Aarón syamn 'och eb' yaln tu paxti 'a spatc Moisés, yujto a jun 'ix cusita x'och yistloc.

² An̈jtona', 'ix yaln pax eb' 'ixtic: A Jehová man̈ cojnoc Moisés tzc'anlb'ej yic tzpaxtin 'a eb' chon̈ab', palta 'in tzon̈ sc'anlb'ej paxi, xchi eb'. Ax Jehová xyab' tas xyal eb'.

³ Caw yel, cojn Moisés 'emmquilal tzyutj sb'a 'a yolyib'n̈q'uinl tic.

⁴ Yuj cha, yajn̈ej 'ix yaln Jehová 'ixtc 'a Moisés, 'a Aarón yet' 'a María: 'Ixquec eyoxwn̈il 'a yol Mantiado 'aj tzin chaj in b'a eyet'oc, xchi. Cojn wal cha, 'ix 'at eb' yoxwn̈il.

⁵ Ax Jehová, 'ix 'eml 'a scal jun 'asn 'ix 'och oyn 'a sti Mantiado cha. Yajn̈j cha, 'ix 'awj 'a Moisés, 'a Aarón yet' 'a María, yic xc'och eb' 'a yojltac Jehová,

⁶ 'ix yaln 'a eb' 'ixtic: 'Ab'c tas 'oj wal 'ayex: A yic tzwa'n cot junc in checb' 'a e cal, an tzin ch'ox in b'a 'a 'a, tzin paxtin pax 'a 'icha waychil 'a 'a.

⁷ Palta ax yet' in checb' Moisés, man̈ 'ichcta tzwutej, yujto cojn wal jun in checb' tic caw yiclum tzyutj sb'a 'a scal eb' wico',

⁸ q'uelc'mb'a wal tzin 'aj in paxtin yet'oc, jichn tzwutj paxtinc in b'a 'a 'a, tzin yilchj wal si'mb'il. ¿Tas pax yuj tze te'wtzej e b'a eyaln speclal? xchi Dios 'a eb' chawn̈ cha.

⁹ Caw xcot yowl Jehová 'a eb', xlajw cha, 'ix 'ati.

¹⁰ A yic 'ix 'elx jun 'asn chi 'a yib'n̈ Mantiado cha, ax María 'ix pitzw chan̈ lepra 'a sniwnal, caw wal sac x'aj yuj jun yab'il cha. Ax Aarón 'ix 'at q'ueln 'a María, ax xyilni to 'ayx 'och lepra 'a 'a.

¹¹ Yuj cha, 'ix yaln Aarón 'ixtc 'a Moisés: ¡'Ac' wal niwnc'ojlal 'ayn̈ on̈ mamin, man̈ a'ch jun yailal tic 'a quib'n̈ on̈, yuj qui man̈ nab'enal on̈, yuj cha, 'ix 'och qui mul on̈!

¹² Comnoc wal tz'el 'a a c'ojol, matz can María tic 'icha tzyac' junc 'unn chamnc xo tz'alji, ax sniwnal man̈x 'a swach'l yilxi, xchi Aarón cha.

¹³ Yuj cha, 'ix syamn 'och Moisés sleslwi 'a Jehová, xyaln 'ixtic: 'Ac' niwnc'ojlal Mamin, tzin tew 'och 'aych yuj 'unx canb' tic on̈, to tzej 'el jun yab'il tic 'a 'unix, xchi Moisés.

¹⁴ 'Ix ta'w Jehová 'a Moisés, 'ix yalni: Toto a smam 'unx stzub'n sat, can cab' 'unx 'a q'uixwc'ojlal 'a uque c'ual. Yuj cha, 'elcn cab' 'unx 'a spatquil 'el camplamento 'a uque c'ual, 'ixta to b'i'an, tztac' sjapx 'unx eyet'oc, xchi.

¹⁵ Yuj cha, 'ix 'ijx 'el María 'a spatquil 'el camplamento 'a uque c'ual. Ya' sb'a x'elcn 'ix, ax eb' chon̈b' cha, 'ix cann̈j eb' 'a yet'l cha, masnto xc'ochx 'ix 'a eb'.

¹⁶ Ax yic xc'ochx María chi yet' eb' 'a scamplamento cha, 'ix 'ochx eb' 'a b'eyel. 'Ix 'el paxt eb' 'a lum Hazerot, axta x'ochx wan eb' 'a lum cusltac lum tzcuch Parán.