Nm 11 - Chuj San Sebastian Bible

Tu xyal eb' israel 'a Jehová

¹ 'Ay jun c'ual, 'ix syamch eb' israel yaln tu paxti 'a Jehová, yuj yailal tzlaj 'ec' 'a yib'n̈ eb'. A wal yic xyab'n Jehová jun tzo'n̈ paxti cha, caw wal 'ix cot yowal. Yuj cha, 'ix ya'n cot jun c'ac' 'a scal eb', 'ix tz'a eb' 'ayc' 'a sti 'el camplamento cha.

² Smasnil eb' chon̈ab', 'ix 'awj chan̈ eb', sc'ann eb' scolwal Moisés, yuj cha, 'ix leslwi 'a Jehová yuj eb', cojn cha, 'ix tup jun c'ac' cha.

³ Yuj cha, Tabera 'ix scuchcn jun lugar cha, yujto ata 'ix yac' Jehová pitzwc chan̈ jun c'ac' 'a scal eb' israel.

⁴ Til wal eb' chuc chon̈b'al toxn ajun 'a scal eb' israel. A jun tzo'n̈ 'anma cha, a wal tas tz'aj eb' swa'i, a chi nan yuj eb'. Locn pax eb' israel tzcham yuj wejl yet' eb', yuj cha, 'ix 'oc' chan̈ eb', xyaln eb' 'ixtic: ¡Mach junc tz'a'n qui chi chib'j 'a tic!

⁵ ¡Caw wal tzqui na cot no chay tzsiyx qui chi 'a Egipto, 'ay pax te pepino, te melón, te puerro, te cewolia yet' te 'axux tzqui c'uxc ta'!

⁶ Palta ax 'a tic, caw wal tzon̈ chamc yuj wejel, caw tzquixtjec qui b'a qui c'uxn jun maná tic, xchi eb'.

⁷ (A jun maná cha, lajn 'icha yilx sat te culantro, c'an yilx 'icha tzataj,

^8-9 ax sjab', lajn wal 'icha sjab' 'ixm c'oxox pan tzb'o yet' aceite. A yic tz'ejm chicb'chan̈ 'a 'ac'wal, ata tz'eml can jun maná chi 'a scal, 'a 'aj 'ay scamplamento eb' cha. Yuj cha, ax 'a yic caw sq'uin̈b'ilto tz'elt eb' 'anma chi sic' yico', tzjaxnchojc eb', tzb'on eb' 'icha tz'aj sb'o 'ixm pan 'a jorna. 'Ay pax eb' ton̈j tztenpoj yico', tz'an̈n eb'.)

¹⁰ Ax xyab'n Moisés x'oc' chan̈ smasnil eb' israel 'a stitc smantiado, yuj cha, caw wal 'ix cot yowl Jehová. An̈jtona', caw xtac sc'ojl Moisés.

¹¹ 'Ix yaln Moisés 'a Jehová 'ixtic: —¿Tas yuj tzac' wil yailal an a checb' in tic? ¿Tas wal yowl a c'ojl 'ayin, yuj cha, tza'n jun chon̈b' tic in tan̈woc?

¹² ¿Tom mamb'il mto nunb'il waj 'a eb', yuj cha, tzalni to tzin mec' eb' 'icha junc tz'ulc 'unin, tz'at wa'nc can eb' 'a sat lum lum alb'il can oj 'a eb' qui mam quichm on̈?

¹³ ¿'Aj wal til tz'at wic' chib'j tzwac' schi jun tzo'n̈ 'anma tic? Caw tz'oc' eb', tzwul yaln̈c sb'a eb' 'ayin: 'A' cot qui chib'j tzqui chi on̈, xchi eb'.

¹⁴ Caw wal man̈xtzac in ta'wj 'och 'a wib'n̈ in ch'ocj wi'n 'at jun chon̈b'al eb' 'anma tic; 'icha wal junc 'ictz caw 'al, 'ixta wal tzwab'i.

¹⁵ Toto 'oj a'n̈j jun yailal tic 'ayin, yel xo wach' tzin a mil chamoc; palta toto 'ay wal a chamc'ojlal 'ayin, 'ij in 'el 'a scal jun tzo'n̈ yailal tic, xchi Moisés.

¹⁶ Yuj cha, 'ix ta'w Jehová 'a 'ixtic: —Yamb'tzej junc 70 eb' yichm wincal chon̈b' tic, tzel eb' niwn yel'ch 'a scal eb' chon̈ab'. Tzlajw cha, tze'n 'at eb' 'a sti in cajnub' 'a 'aj tzin chaj in b'a eyet'oc, ata tzin a tan̈wj yet' eb'.

¹⁷ Ax 'a yic 'oj weml b'i'an, ax in paxtin et'oc, ax wi'n 'el jac espíritu 'aych 'ayach, ax wa'n 'och 'a eb' yichm wincal chon̈b' tic. A eb' 'oj colwjoc et'oc, yic tzyiln eb' jun tzo'n̈ 'anma tic, sec man̈ a ch'ocjoc tzel eb'.

¹⁸ Tzlajw cha, tzaln 'a eb' 'anma cha, to tzsacb'tzej sb'a eb', yujto a q'uic'an 'oj schi eb' no chib'j sc'an cha. Tox 'ix wab' yoc' eb' yic 'ix yaln eb' 'ixtic: ¡Comnoc wal 'ay junc mach tz'a'n qui chi chib'ej! ¡Caw wal wach' cajc xon 'a Egipto! xchi eb'. Yuj cha, 'oj wac' schib'j eb' chi an Jehová in tic.

¹⁹ Man̈ junn̈joc c'u, man̈ chab'ocn̈ej c'u, man̈ o'e'ocn̈ej c'u, man̈ lajn̈ecn̈ej c'u, man̈ junq'uin̈cn̈ej, 'oj wac' schib'j eb' cha.

²⁰ Palta to jun 'uj 'oj schi eb' chib'j cha, masnto 'oj xej eb' yuj no'. 'Oj jawc no 'a yol sn̈i eb', 'oj syajl eb' no', yujto may yel'ch in yutj eb', an Jehová in tic. 'Ayn 'ec' 'a e cal, til wal yoc' eb' xjaw eb' 'a wojltac, xyaln eb' 'ixtic: ¿Tas yuj on̈ ej 'elt 'a Egipto? xchi eb', xchi Dios 'a Moisés.

²¹ Yuj cha, xta'w Moisés 'ixtic: —Mamin Jehová, a eb' 'anma ajun wet' tic, 'ay 600 mil eb' winc smoj tz'och soldadoil, tzlajw cha, tzalni to 'oj ac' qui chib'j 'a jun 'ujal.

²² ¿'Aj wal til 'oj cot nan̈loc no calnelu, mto nan̈loc no wacax, yic tzmilx cham no schi smasnil jun tzo'n̈ 'anma tic sec tz'e'ch 'a eb'? An̈jtona', wach'xam chay tzcac' schi eb', wach'xam tzlajw q'uet no chay smasnil 'a yojl a mar, palta matz yab' no 'a eb', xchi Moisés.

²³ Xlajw cha, 'ix ta'w pax Jehová, 'ix yaln 'ixtic: —¿Tom tza na'a to jab' wal in poder? A ticnec 'oj ela', toto 'oj 'el'choc tas 'ix wal an Jehová in tic, mto ma'ay, xchi Dios.

A 70 eb' 'ichmtac winc*r* schaj yopiso 'a Jehová

²⁴ Xlajw xoj cha, 'ix 'elt Moisés, 'ix yaln 'a scal eb' chon̈ab', yuj tas xyal Jehová 'a 'a. 'Ix syamb'tzan 70 eb' yichm wincal chon̈b' Israel, 'ix 'och oyn eb' 'a spatquil 'el scajnub' Dios yuj Moisés.

²⁵ Xlajw cha, 'ix 'eml Jehová 'a scal jun 'asun, 'ix syamn 'och spaxtin yet' Moisés cha. A yic cha, 'ix yi'n 'el jac espíritu 'aych 'a Moisés, ax 'a eb' 70 yichm wincal israel cha, axta 'ix ya'cn 'ochi. Yuj cha, 'ix syamn 'och eb' spaxtin 'icha junc schecb' Dios. Palta cojn wal jun 'ejm 'ix paxtin eb' 'ixta', man̈x 'ic yal eb' jun 'ejm xo.

²⁶ 'Ay chawn̈ eb' winc 'aych sb'isloc eb' 70 cha, jun win tzcuch Eldad, ax junx win tzcuch Medad. A eb' chawn̈ cha, ma'ix c'och eb' 'a 'aj 'ay scajnub' Dios, 'ix can eb' 'a camplamento, palta locn eb' 'ix chan jun espíritu cha. 'Ix syamn 'och eb' spaxtin 'icha junc schecb' Dios 'a camplamento cha.

²⁷ A yic wan spaxtin eb' cha, 'ay jun win quelm x'ab'n tas tzyal eb', yuj cha, caw carela 'ix 'ati, 'ix 'at yalnc 'a Moisés 'ixtic: —A Eldad yet' Medad, wan spaxtin eb' 'icha junc schecb' Dios 'a camplamento, xchi winac.

²⁸ Ax Josué win yunnal Nun, yictax quelm 'unin 'aych xon colwjoc 'a Moisés, a 'ix aln 'ixtic: —Mamin Moisés, a ticnec alb't 'a eb' chawn̈ cha, to tz'och wan eb' spaxtini, xchi.

²⁹ 'Ix ta'w Moisés, xyaln 'ixtic: —¿Tom tza nib'j cojn in niwn wel'ch 'a scal eb' 'anma tic? Comnoc wal tz'el 'a sc'ojl Jehová, tzyac' Yespíritu 'a smasnil eb' schon̈b' tic, sec wach' tz'ochcn eb' schecb'oc, xchi.

³⁰ Xlajw cha, 'ix meltzj pax Moisés yet' eb' yichm wincal chon̈b' Israel 'a scamplamento.

Xya' cot Jehová no chilti'ich

³¹ Xlajw cha, 'ix cot jun niwquil 'ic' 'a yib'n̈ a mar yuj Jehová, ax jun 'ic' cha, a 'ix 'i'n cot jun tzo'n̈ no chilti'ich. C'uxn 'ix 'em no 'a 'aj 'ay camplamento yet' 'a smasnil spatquil. 'Aym junc c'u ste'nb'il 'a spatquil 'el camplamento 'a 'aj 'ix c'och smacn no', 'aym junc metro schan̈il 'aj tz'ec' jen̈n̈oc e no 'a yib'n̈ lu'um.

³² Smasnil c'u, smasnil 'ac'wal yet' 'a junx c'u, 'ix syam eb' 'anma no chiltich cha. A eb' jaywn̈ej wal yic syama, cojn am lajn̈ec monto yic eb' 'ix syam jun jun, 'ix ya'n eb' tacjoc 'a spatquil 'el camplamento cha.

³³ Ax yic wan schin eb' no chiltich cha, 'ix cot yowl sc'ojl Jehová 'a eb'. 'Ix ya'n cot jun yab'il 'a yib'n̈ eb' 'anma cha, caw niwn eb' xcham yu'uj.

³⁴ Yuj cha, 'ix 'ajx can scuch jun lugar chi Kibrot-hataava, yujto ata xmucx can eb' nib'n chib'ej.

³⁵ Xlajw cha, 'ix 'el paxt eb' israel 'a Kibrot-hataava cha, 'ix b'eyx cot eb' 'a yojltac. 'Ix jaw eb' 'a jun lugar tzcuch Hazerot, ata 'ix can cajn eb' jun tiempoal.