Nm 1 - Chuj San Sebastian Bible

'Ix q'ue wan sb'isl eb' israel 'a Sinaí

¹ A 'a b'ab'l c'u yic schab'l 'ujl yoch schab'l ab'il yelt eb' israel 'a Egipto, 'ix paxtin Jehová 'a Moisés 'a yol Mantiado 'aj tzchaj sb'a Dios yet' eb' 'anma', yic 'ayx 'ec' eb' 'a lum cusltac lum yic Sinaí. 'Ix yaln 'a 'ixtic:

² 'Ij q'ue wan sb'isl smasnil eb' winc israel, junjn macn̈ eb' yet' yin̈til, yet' jantc pax sb'isl eb' 'a junjn n̈ail, yic wach' tz'ilxi jantc sb'isl eb', yet' pax sb'i junjn eb'.

³ Tz'el yich sb'isx eb' 'a junc'l ab'il sq'uinal yet' 'a yojltac, atn eb' smoj yoch soldadoil, macquixtac tz'aj eb'. Colwj cab' Aarón et'oc,

⁴ yet' pax junjn eb' syajlil junjn 'in̈tal.

^5-15 Atn sb'i jun tzo'n̈ eb' yajl tic 'oj colwjoc eyet'oc: 'A yin̈tl Rubén, atn Elisur yunnal Sedeur; 'a yin̈tl Simeón, atn Selumiel yunnal Zurisadai; 'a yin̈tl Judá, atn Naasón yunnal Aminadab; 'a yin̈tl Isacar, atn Natanael yunnal Zuar; 'a yin̈tl Zabulón, atn Eliab yunnal Helón; 'a eb' yin̈tl José, 'a eb' yic Efraín, atn Elisama yunnal Amiud; ax 'a eb' yic Manasés, atn Gamaliel yunnal Pedasur; 'a yin̈tl Benjamín, atn Abidán yunnal Gedeoni; 'a yin̈tl Dan, atn Ahiezer yunnal Amisadai; 'a yin̈tl Aser, atn Pagiel yunnal Ocrán; 'a yin̈tl Gad, atn Eliasaf yunnal Deuel; ax 'a yin̈tl Neftalí, atn Ahira yunnal Enán, xchi Dios.

¹⁶ Atn jun tzo'n̈ eb' yajl tic 'ix si'x 'elt 'a scal smasnil eb' yin̈tl Israel.

^17-18 A 'a yic b'ab'l c'u yic schab'l 'ujl yoch jun ab'il cha, 'ix syamb'tzan Moisés yet' Aarón jun tzo'n̈ eb' winc tic, to caw a Dios si'n 'elt eb', an̈jtona', syamb'tzan eb' smasnil eb' chon̈ab'. 'Ixta 'ix 'aj sq'ue wan sb'isl smasnil eb' israel. Stzol-l x'aj stz'ib'x sb'i eb', atn eb' 'aych 'a junc'l ab'il sq'uinal yet' 'a yojltac, a tzyal smacquixtacl yaj yin̈tl eb',

¹⁹ 'icha xyutj Jehová yaln 'a Moisés. Ata xq'ue wan sb'isl eb' chi 'a lum cusltac lum yic Sinaí.

^20-21 A tzyal smacquixtacl yaj yin̈tl eb', 'ixta x'aj sq'ue wan sb'isl eb' cha. 'Ix tz'ib'x sb'i eb', yet' pax sb'isl eb' winc tz'acn xo junc'l ab'il sq'uinal, atn sb'isl eb' tic: 'A eb' yin̈tl Rubén, win sb'ab'l 'unnal Israel 'ay 46,500 eb' winc smoj yoch soldadoil.

^22-23 'A eb' yin̈tl Simeón 'ay 59,300.

^24-25 'A eb' yin̈tl Gad 'ay 45,650.

^26-27 'A eb' yin̈tl Judá 'ay 74,600.

^28-29 'A eb' yin̈tl Isacar 'ay 54,400.

^30-31 'A eb' yin̈tl Zabulón 'ay 57,400.

^32-35 'A eb' yin̈tl José yuj Efraín 'ay 40,500; 'a eb' yic Manasés 'ay 32,200.

^36-37 'A eb' yin̈tl Benjamín 'ay 35,400.

^38-39 'A eb' yin̈tl Dan 'ay 62,700.

^40-41 'A eb' yin̈tl Aser 'ay 41,500.

^42-43 'A eb' yin̈tl Neftalí 'ay 53,400.

⁴⁴ Atn sb'isl eb' 'anma tic xyij q'ue wan Moisés yet' Aarón, yet' pax lajchwan̈ xo eb' yajl yaj 'a scal eb' israel cha, eb' cotnc 'a yin̈tl junjn c'aj eb'.

⁴⁵ 'Ix q'ue wan jun sb'isl eb' tic; atn eb' 'aych 'a junc'l ab'il sq'uinal yet' 'a yojltac; eb' smoj yoch soldadoil.

⁴⁶ A x'aj sb'isl eb' winc chi 'a smasnil 'ay 603,550.

'Ajxnac 'och yopiso eb' levita

⁴⁷ A eb' yin̈tl Leví, ma'ix 'och eb' sb'isloc eb' yit israelal cha,

⁴⁸ yujto yaljnac Jehová 'a Moisés 'ixtic:

⁴⁹ A yic 'oj e'nc chan̈ sb'isl eb' israel, man̈ a'ch eb' yin̈tl Leví sb'isloc eb'.

⁵⁰ Yujto a eb' levita chi 'oj a'ch ya'malc servil in cajnub' 'aj 'ayc' scaxail in trato, yet' smasnil yamc'ab' tzc'anlb'ax 'a 'a. An̈jtona', a eb' 'oj 'i'nc b'ey jun in cajnub' chi yet' smasnil syamc'ab'il. Yowlal tzcann̈j cajn eb' 'a spatquil 'el in cajnub'.

⁵¹ Toto 'ay 'aj 'oj 'ijxoc 'ati, a eb' 'ajcuenta xuyn cha'an̈, tzb'on pax 'ejm eb' 'a 'aj tzc'och cha. Tzann̈j 'anmal tzjaw 'a stz'ey in cajnub' cha, toto man̈ levitaoc, tojln̈ej schami.

⁵² Ax smasnil jun tzo'n̈ xo eb' yin̈tl israel 'oj 'aj cajn eb' 'a stzolil, junjn c'aj eb' 'a yol smantiado 'a stz'ey sbandera.

⁵³ A pax eb' levita, ata 'oj 'aj cajn eb' 'a spatquil in cajnub'; a eb' 'oj tan̈wnoc sec wach' ma'oj cot wowl 'a eb' israel, xchi Dios.

⁵⁴ 'Ix syiclj eb' israel sb'on smasnil tas xyal Jehová 'a Moisés.