Nehemías 8 - Chuj San Sebastian Bible

¹ 'Ix syamn sb'a smasnil eb' chon̈b' 'a plas; junn̈j xyutj sb'a eb' 'a sti puerta 'aj tz'elt eb' 'ix 'ix cuchj a'. 'Ix alx 'a win cuywjum Esdras, to tzyij cot win ch'an̈ libro yic ley Moisés, atn jun ley ya'jnac Jehová 'a chon̈b' Israel.

² A win Esdras cha, ya'mal 'och sti eb' 'anma yaj win 'a Dios. 'Ix yi'n cot win ch'an̈ ley 'a sat eb' 'anma yamn yaj cha, 'a b'ab'l c'u yic yucl 'uj. Ata syam sb'a smasnil eb' winac, smasnil eb' 'ix 'ix, yet' smasnil eb' 'unn tzax nachj 'el yu'uj.

³ 'Ix chaj 'el yich yawtn ch'an̈ ley chi 'a sat eb' chon̈ab', 'a sq'uin̈b'ial masnto x'och chimc'ual, atn 'a plas 'a sti puerta 'aj tz'elt eb' 'ix 'ix cuchj a cha. Smasnil eb' chon̈ab', smaclj eb' yab' yawtx ch'an̈ un̈ cha, eb' winac, eb' 'ix 'ix yet' smasnil eb' 'unn tzax nachj 'el yu'uj.

⁴ A Esdras cha, lin̈n q'ue 'a yib'n̈ jun b'achnub' nab'a te', yujn̈ej jun cha xb'o cha'an̈. Ax 'a swach' c'ab', ata lin̈n 'ec' pax Matatías, Sema, Anías, Urías, Hilcías yet' Maasías. Ax 'a surito lin̈n 'ec' Pedaías, Misael, Malquías, Hasum, Hasbadana, Zacarías, yet' Mesulam.

⁵ Xlajw cha, 'ix sjacn Esdras ch'an̈ ley chi 'a sat smasnil eb' chon̈ab', 'ix yil eb' chon̈b' chi sjacw ch'an̈ ley cha, yujto chan̈ 'aj lin̈n 'elta. A yic 'ix sjacni, 'ix q'ue lin̈n smasnil eb' chon̈ab'.

⁶ Xlajw cha, xyaln Esdras wach' paxti 'a Jehová, atn jun Dios tztac' yuj smasnil. 'Ix ta'w smasnil chon̈ab', xyi'n chan̈ eb' sc'ab' 'a cha'an̈, xyaln eb' 'ixtic: 'Ixta cab' tz'aji, xchi eb'. Yajn̈ej x'em n̈ojn eb', squiln 'ejm eb' snan̈l sat 'a sat lu'um yic tzyaln sb'a eb' 'a Jehová.

⁷ Ax eb' levita, atn Josué, Bani, Serebías, Jamin, Acub, Sabtai, Hodías, Maasías, Kelitá, Azarías, Jozabad, Hanán yet' Pelaía, 'ix cham wal yaln 'elt eb' 'a eb' chon̈b' lin̈n 'ec' 'a yet'ul.

⁸ Caw wach' xyutj eb' yawtn ch'an̈ un̈ yic ley cha, xyaln 'elt eb' 'a sti' eb' 'anma cha, tas wal yel'chi, sec wach' tznachj 'el yuj eb' tas tzyal ch'an̈.

⁹ Ax Nehemías gobernador yet' Esdras ya'mal 'och sti eb' 'anma 'a Dios, cuywjum paxi, yet' eb' levita cha, xyaln eb' 'ixtc 'a smasnil eb' chon̈ab': A jun c'u tic yic Jehová qui Diosal yaji, man̈ ex cusoc, man̈ ex 'oc'oc, xchi eb' 'a eb', yujto a smasnil eb' chon̈ab', tz'oc' eb' yab'n tas tzyal ch'an̈ ley cha.

¹⁰ An̈jtona', xyaln pax Esdras 'a eb' 'ixtic: 'Ixquec wa'oc. A wal tas wach' tzlaj e c'uxu', tzeyu'n yal uva caw wach'. A eb' may yic b'ob'il yu'uj tzeyawtj eb' wac eyet'oc, yujto a jun c'u tic yic Jehová qui Diosalec yaji. Man̈ ex cusoc, yujto a tzaljc'ojlal tzyac' Jehová, atn wal 'aych qui te'naloc, xchi 'a eb'.

¹¹ 'Ix tenx pax 'och wan eb' chon̈b' chi yuj eb' levita cha, xyaln eb' 'a eb' 'ixtic: 'Actjec eyoq'ui, yujto yic Jehová yaj jun c'u tic, may cab' mach tzcusi, xchi eb'.

¹² Xlajw cha, x'at smasnil eb' chon̈b' wa'oc, xyu'n eb' tas xyuq'uej, ax eb' may yico', xya'n eb' yic eb'. 'Ix wa eb' 'a tzaljc'ojlal, yujto 'ix nachj 'el yuj eb' tas 'ix 'ajx scuy eb' cha.

Tznax q'uin̈ Chinama

¹³ Ax 'a junx c'u, 'ix syamn sb'a pax eb' yajl yaj 'a yib'n̈ junjn macn̈ eb' yican 'a scal smasnil eb' chon̈ab', eb' ya'mal 'och sti eb' 'anma 'a Dios, yet' eb' levita. 'Ix syam sb'a eb' yet' Esdras cha, yic tzmol cuyn eb' tas wal yel'ch tas tzyal ch'an̈ ley cha.

¹⁴ X'ilchj 'a yojl ch'an̈ un̈ yic ley 'ac'b'il yuj Jehová 'a Moisés, to a 'a yucl 'uj, tz'och eb' israel 'a yol chinama yic tznan eb' q'uin̈ chinama cha.

¹⁵ Xlajw cha, 'ix 'ajx 'ojcaxc 'el 'a smasnil chon̈ab' yet' 'a Jerusalén, to tz'at eb' 'anma 'a calte', tzyi'n cot eb' sc'ab'te olivo, sc'ab'te calte'al olivo, sc'ab'te tzcuch arrayán, sc'ab'te palma yet' sc'ab' eb' te pimxi'il, yic tzb'o chinama, 'icha yaln 'a ch'an̈ ley cha.

¹⁶ Yuj cha, x'at eb' chon̈ab' xyi'n cot eb' te sc'ab'te cha, junjn eb' 'ix sb'o eb' schinama 'a span̈nil yib'n̈ yatut, 'a yamq'uil yatut, 'a yamq'uil yatut Dios, 'a plas 'ay 'a stz'ey sti puerta 'aj tz'elt eb' 'ix 'ix cuchj a', yet' 'a plas 'ay 'a stz'ey spuertail yic Efraín.

¹⁷ Smasnil eb' 'anma paxn̈cta, eb' to xit'nc 'a 'icha presoal, 'ix sb'o eb' schinama, 'ix 'och eb' 'a yojol. A 'a yictax stiempoal Josué, win yunnal Nun, may 'aj b'onc jun 'ejmoc 'icha jun tic. Yuj cha, caw 'ix tzalj eb' chon̈ab'.

¹⁸ 'Ix yawtj Esdras ch'an̈ libro yic ley 'a junjn c'u, schaj 'el 'a b'ab'l c'u masnto 'aj tzlajw uque c'u niwn q'uin̈ cha. Ax 'a junx c'u, 'ix syamn pax sb'a eb' yic tz'och eb' 'emmquilal 'a Jehová, 'icha yaln ley cha.