Nehemías 6 - Chuj San Sebastian Bible

Eb' 'ajc'ojl 'a Nehemías

¹ Ax xyab'n Sanbalat, Tobías, Gesem yet' jun tzo'n̈ xo eb' 'ajc'ojl yajch 'ayn̈ on̈, chajtlto tox 'ix b'o jun muro cha, man̈x 'a 'aj jacn 'eli, (wach'xam mantzac 'och spuertail 'a yet'ul).

² A yic xyab'n eb' jun cha, 'ix schecn cot eb' jun schecab' yic tzwul yalnc 'ayin, to tzin chaj in b'a yet' eb' 'a jun aldea 'a jun 'a'lic 'a yol yic Onó. Palta tox sna eb' tas tznib'j eb' tzin yutej.

³ Xlajw cha, xin checn 'at jun in checb' yal 'a eb', chajtlto caw witz'n waji, may in colnal yuj jun munljel caw niwn yel'ch tic. Matz tac' in 'at 'a eb', yujto matz tac' yoch wan jun munljel tic, matz tac' wactcn can paxi.

⁴ Chan̈ 'ejm 'ix schec cot eb' schecab', yic tzwul ya'nc eb' alxc jun paxti chi 'ayin; an xo tic, 'ixtan̈ej xwutj wa'n spac 'a eb'.

⁵ Xlajw cha, ax jun ya'mal servil win Sanbalat 'ix schec cot 'a yo'ejmal 'ayin, yic tzwul ya'nc jun ch'an̈ carta to jacan,

⁶ 'a 'aj tzyal win 'ixtic: Caw wal tzb'ey speclal 'a scal 'anma', 'ixtnta pax yaln Gesem, chajtlto ach tic yet' eb' et israelal, to wan e nalb'an eyi'n 'el e b'a 'a yaln̈ schecnb'il win rey. Yuj cha, wan e b'on chan̈ e muro. A tzyal wal tz'aj yel speclal, tolab' ach 'oj och reyal.

⁷ Tox ab' 'ix a'ch eb' schecb' Dios yic tzyaln 'el eb' 'a Jerusalén to 'aych xo 'och reyl 'a Judá. A jun tzo'n̈ e peclal cha, toxn 'oj yab' win rey Artajerjes. Yuj cha, cotan̈ to tzon̈ paxtin wal et'oc, xchi Sanbalat 'a scarta cha.

⁸ Xlajw cha, xwa'n alxc 'a 'ixtic: A jun tzo'n̈ paxti tzal cha, man̈ yeloc, a jun tzo'n̈ cha, mun tza pitz cha'an̈, xin chi 'a 'a.

⁹ A eb' cha, tzyal eb' 'ixta', yuj on̈ xib'tn chan̈ eb', snan am eb' to 'oj cac' chab'c'ojlal, sec man̈xtzac lajw sb'o jun munljel tic; palta to xwach' 'och in te'nal.

¹⁰ Xlajw cha, in 'at 'a yatut Semaías, yunnal Delaía yixchicn Mehetabel. A jun winc cha, tox 'ix smacch sb'a 'a yol yatut, xyaln 'ayn 'ixtic: Qui c'ub'c 'el qui b'a 'a yatut Dios, tzqui macn spuertail, yujto a 'a jun 'ac'wl tic, tzna eb' 'ach wul smil chamoc, xchi 'ayin.

¹¹ Yuj cha, xwaln 'a 'ixtic: An tic man̈ in mojc in 'at 'eloc. ¿Tom 'oj c'och 'a yatut Dios in c'ub'c 'el in b'a tza na'a? xin chi 'a 'a.

¹² 'Ix nachj 'el wu'uj, to a jun winc cha, man̈oc Dios tz'a'n yal jun cha. A jun tzo'n̈ xyal cha, yuj in xib'tni sec tz'och in mul a Dios, yujto a Sanbalat yet' Tobías tox 'ix yac' eb' tumn 'a 'a.

¹³ Tojb'ilx yuj eb', yic tzin xib'tni, sec tz'och in mul yaln eb', sec maysch'olnil in b'inaxi, yic tz'el in q'uixwel.

¹⁴ Yuj cha, in leslwi 'ixtic: Ach in Diosal tza na coti, to tza'ch yailal 'a yib'n̈ Sanbalat yet' Tobías, yuj jun tzo'n̈ tas 'ix sb'o eb' cha. An̈jtona', tza nan pax cot 'ix Noadías, 'ix cob' ya'ch sb'a yaln 'el a paxti', yet' jun tzo'n̈ xo eb' tzyalch sb'a a checb'oc, yujto tzyac' eb' 'ip in xib'tni, xin chi.

Xb'o 'el'ch smuroal chon̈ab'

¹⁵ 'Ix lajw sb'o muro 'a yic 25 yoch 'uj Elul; 52 c'u 'ix 'och munljel cha.

¹⁶ A yic 'ix yab'n smasnil eb' 'ajc'ojl yajch 'ayn̈ on̈, yet' jun tzo'n̈ xo nacion̈ 'ay 'a qui la'nil, caw 'ix xiw eb'. 'Ix can eb' 'a yalan̈, yujto sb'an̈jnac sb'a eb', 'ix yojquej 'el eb' to yuj scolwal Dios 'ix b'o jun munljel cha.

¹⁷ A 'a yic jun tiempoal cha, til wal carta 'ix stz'ib'j 'at eb' winc niwn yel'ch yopiso 'aj Judá 'a Tobías, xya'n Tobías chi spac jun tzo'n̈ carta cha.

¹⁸ Til wal eb' 'aj Judá caw wach' ya'n yet' win Tobías cha, yujto n̈ilab'il yajch win 'a Secanías yunnal Arah. Ax Johanán, yunnal Tobías cha, 'ix nupn yet' 'ix yisl Mesulam, yunnal Berequías.

¹⁹ An̈jtona', yuj jun cha, caw wach' xyutj eb' yaln yuj 'a in sat, c'uxn xyal eb' 'a 'a, yuj tas xlaj wala'. A pax Tobías cha, 'ix yac' scarta 'ayin yic tzin xib'tni.