Nehemías 5 - Chuj San Sebastian Bible

Tejb'a 'a scal eb' chon̈ab'

¹ A 'a jun tiempoal cha, 'ix yal sb'a eb' 'anma', eb' winac yet' eb' 'ix 'ix yuj tas tz'aj eb' yixtx yuj eb' quit chon̈ab'.

² 'Ay eb' tzalni to caw niwn yunnal eb', yuj cha, tzc'ann eb' 'ixm trigo sb'ococ, sec wach' matz cham eb' yuj wejel.

³ 'Ay pax mach tzalni to tzya'cn 'at yun̈al slu'um, yet' yawb'en uva yet' yatut prendail, yic tzmann tas tzc'ux yuj wejel.

⁴ 'Ay pax mach tzalni to tzc'an eb' q'uen tumn majnil, yic tzya'n eb' q'uen tumn tz'ajx yac' 'a win rey, yuj cha, tzya'n can 'at slu'um, yawben uva yuj smajnub'l q'ue'en. An̈jtona tzyaln pax eb' 'ixtic:

⁵ A ticnec, an̈ec tic yet' eb' quit chon̈b'ec tic, junn̈j quin̈tlec, may mach chuc yilx yunnal, lajn yilx cunnalec yet' yunnal eb'. ¿Tas yuj a eb' cunnalec 'aych mosoal 'a eb'? 'Ayn̈ec 'ayx 'och quislec ya'mal servil eb', man̈x 'a wach' tas tzcutj qui colnec qui b'a, yujto yic xo eb' qui lumec, yet' cawb'ente', xchi eb'.

⁶ A yic 'ix wab'n yaln eb' 'anma tas tz'aj eb', yuj cha, caw 'ix cot wowal.

⁷ Xlajw cha, xin nan wal si'mb'il 'a yib'an̈. Xin tench wan eb' niwc winac, yet' eb' yajal, yuj sc'ann 'el eb' yune stumin. Yuj cha, xwawtn smasnil eb' 'anma 'a jun c'umjb'a yuj jun paxti cha.

⁸ Xlajw cha, xwaln 'a eb' 'ixtic: An̈ tic on̈, caw 'ix cac' 'ip qui coln 'el eb' quit chon̈b'ec chon̈b'il can 'at 'a jun tzo'n̈ xo nacion̈, ¿tom 'oj e chon̈x 'at eb' quit chon̈b'ec, an̈ xo 'oj qui manl eb' jun 'ejm xo on̈? xin chi 'a eb'. Caw sictac xoj xcan eb', man̈xtoc xnachj 'el yuj eb' tas xyutj eb' sta'wi.

⁹ Xwaln pax jun 'ejm xo 'a eb' 'ixtic: A jun tas wan e b'on tic man̈ wach'oc. Smoj to tze ch'oxli to niwn yel'ch qui Diosalec 'a e sat, sec wach' man̈xtzac b'uchwj jun tzo'n̈ nacion̈ 'ajc'ojl yajch 'ayn̈ec.

¹⁰ An̈jtona 'in, yet' eb' 'ayt wuj in b'a yet'oc, yet' pax eb' in checab', 'ix cac' q'uen tumn smajnc eb' on̈, xca'n 'ixm trigo sjel eb' on̈. A ticnec ca'c tup jun tzo'n̈ sb'oc eb' cha.

¹¹ Yuj cha, tzin tew 'ayex, to tzeyac' meltzjc pax slum eb' chi ticnec, yawb'ente eb', yolivo eb', yet' yatut eb'. Tzeya'n tup sb'oc eb' 'aych 'a yib'an̈. Tzeya'n pax meltzjc yune q'uen tumin, yet' yuc'm 'ixm trigo, yal uva, yet' aceite, xin chi 'a eb'.

¹² 'Ix ta'w eb', xyaln eb' 'ixtic: 'Oj cac' meltzjoc smasnil jun tzo'n̈ chi 'a eb', man̈x 'a tas 'oj cal yuj jun tzo'n̈ cha. 'Oj qui b'o smasnil 'icha tzotj aln cha, xchi eb'. Xlajw cha, xwawtn eb' ya'mal 'och sti eb' 'anma 'a Dios. 'A sat eb', xwa'n yac' eb' sti yuj tas xyal cha.

¹³ An̈jtona', xin tzicb'tan̈n 'el in pichul, xwaln 'ixtic: 'Ixtnta 'oj yutc pax Dios ex stzicn 'elt 'a eyatut yet' 'a e munljel, atn jantcn̈ej smasnil mach ma'oj syiclc sb'on jun tzo'n̈ cha, 'ixtnta pax 'oj yutc yi'n 'ec' tastc 'ay 'ayex, xin chi 'a eb'. 'Ix ta'w eb' smasnil: B'o cab' 'ixta', xchi eb'. Xlajw cha, xyaln eb' wach' paxti 'a Jehová. 'Ix syiclj eb' sb'on 'icha xyutj yaln cha.

Swach'c'ojlal Nehemías

¹⁴ A yic sjunc'lil ab'il yoch Artajerjes reyal, in ya'n 'och gobernadoral 'a yol yic Judá, masnto 'ix tz'acw 32 ab'il yoch win reyal. A yic xwa'n gobernadoral 'a lajchwe ab'il, mun in cuenta in b'a yet' in gasto, may q'uen tumn to yic xon eb' gobernador chi 'ix in c'an 'elta, may pax tas 'ix in c'an yuj eb' wican.

¹⁵ Palta 'icha eb' gobernador 'e'nc 'a yaln̈taxi, caw wal 'icha 'ictz yaj eb' 'a eb' chon̈ab', junjn c'u tzya'n eb' 40 q'uen tumn plata yuj tas tzc'ux eb', yet' yuj yal uva tzyu'j eb'. An̈jtona', caw wal tz'ixtx eb' chon̈b' yuj eb' schecb' eb'. Palta an xo tic, man̈ 'ixta'oc tzwutej, yujto caw niwn yel'ch Dios 'a in sat.

¹⁶ An̈jtona', xin b'o nan̈l in macl muro yet' eb' in checab', smasnil eb' in checb' chi 'ix munlj wet'oc, may pax junc lum lum 'ix qui macc quico'oc on̈.

¹⁷ An̈jtona', 'ay 150 winc tzwa wet'oc, atn eb' wit chon̈ab' yet' eb' 'aych yajlil, palta ax eb' tzon̈ wul 'ilnoc 'ay 'a jun tzo'n̈ nacion̈ 'a qui la'nil tic, man̈ 'ayc 'och eb' stz'acb'oc.

¹⁸ A wal tas to wic yaji, a tzwac' b'o 'a junjn c'u yic tzc'uxxi, jun no mam wacax, wacwn̈ no calnelu, chuc pax no caxtilan̈; 'a junjn slajn̈il c'u til wal yal uva tz'ijx coti. Palta mant 'a xon jun 'ejmoc tzin c'an tas tzin c'ux to in moj in chani yujto gobernador in. Ma'ix wa'ch in b'a in yac' servil eb' chon̈b' tic, yujto niwn xo tas 'aych 'a yib'n̈ eb'.

¹⁹ In leslwi 'ixtic: Ach in Diosal, nan cot yuj smasnil tas xin b'o 'a jun chon̈b' tic yic tza'n spac 'ayin, xin chi 'a 'a.