Nehemías 3 - Chuj San Sebastian Bible

'Ix pojx 'ec' munljel

¹ A junjn c'aj eb' 'anma', schaj eb' yic chi 'oj sb'o 'a jun muro cha. Atn eb' tic xjucb'tzan jun munljel cha: A Eliasib sat ya'mal 'och sti eb' 'anma 'a Dios, yet' eb' yitb'eym ajun yet' cha, a eb' xb'on sjel spuertail chon̈b' 'aj tz'och no calnelu. 'Ix b'o yuj eb', 'ix ya'n 'och eb' spuertail, 'ix sb'on pax eb' jun muro tzchaj 'at 'a jun torre tzcuch Hamea, masnto xc'och 'a junx torre tzcuch Hananel.

² Yic tzb'ey schan eb' yic cha, a eb' winc 'aj Jericó, 'ix sb'o eb' yico', ax Zacur yunnal Imri, sb'on pax yico'.

³ Ax eb' yin̈tl Senaa, a eb' xb'on sjel 'aj tz'och spuertail yic no chay. Xya'ch eb' sjolm puerta, xya'n 'och eb' spuertail, ax q'uen hierro x'och yipnub'oc.

⁴ 'Ix b'eyn̈j jun muro cha, ax Meremot yunnal Urías yixchicn Cos, sb'o pax yico'. A Mesulam, yunnal Berequías yixchicn Mesezabel sb'o yico', sb'on pax Sadoc, yunnal Baana yico'.

⁵ Ax eb' 'aj Tecoa sb'on pax eb' yic cha, palta a eb' niwc winc 'a scal eb', ma'ix yal sc'ojl eb' xcolwj yet' eb' tzjucb'tzan jun munljel cha.

⁶ A Joiada, yunnal Pasea, yet' Mesulam, yunnal Besodías, a eb' 'ix b'on sjel 'aj tz'och jun puerta tzcuch Jesana. Xya'ch eb' sjolm puerta, xya'n 'och eb' spuertail cha, a q'uen hierro x'och yipnub'oc.

⁷ 'A stz'ey yic eb' cha, ata sb'o pax eb' tic yico', atn Melatías 'aj Gabaón yet' Jadón 'aj Meronot, yet' pax eb' 'anma 'aj Gabaón yet' eb' 'aj Mizpa, atn eb' 'aych can 'a yaln̈ schecnb'il win 'aych gobernadoral 'a yib'n̈ jun tzo'n̈ chon̈b' 'ay 'a sc'axpil 'e't a Éufrates.

⁸ Ax Uziel win yunnal Harhaía, atn jun b'om plata, a xb'on 'aj xc'och sti yic eb' cha. Ata xchaj 'el Hananías yunnal jun win b'om perjuma sb'on yico'. Atn nan̈l eb' tic 'ix b'on nan̈l muro cha, masnto xc'och 'a sti jun muro lewn sat.

⁹ Ax Refaías yunnal Hur sb'on pax yico'; a jun winc cha, gobernador yaj 'a nan̈l lugar 'ay 'a yol smacb'en Jerusalén.

¹⁰ An̈jtona', sb'on Jedaías win yunnal Harumaf yic 'a yojltac yatut. Ax Hatús, yunnal Hasabnías sb'on yico'.

¹¹ A Malquías, yunnal Harim, yet' Hasub, yunnal Pahat-moab, sb'on eb' muro 'aj 'ay jun torre tzcuch Hornos.

¹² A 'aj xc'och yic eb' cha, ata sb'o Salum, yunnal Halohes yico'. A jun winc cha, a 'alcl yaj 'a junx lugar 'a yol smacb'en Jerusalén, 'ix colwj eb' yisl yet'oc.

¹³ A Hanún yet' eb' cajn 'a Zanoa, a eb' 'ix b'on 'aj x'och spuertail yic lum pan̈n 'a'lic; xya'n 'och eb' spuertail, ax q'uen hierro xya'ch eb' yipnub'oc, sb'on pax eb' 450 metro muro masnto xc'och 'a spuertail 'aj tz'at can c'alem.

¹⁴ A Malquías yunnal Recab, a gobernador yaj 'a yol smacb'en chon̈b' Bet-haquérem, a 'ix b'on 'aj x'och spuertail 'aj tz'at can c'alem, 'ix ya'n 'och spuertail cha, ax q'uen hierro 'ix ya'ch yipnub'oc.

¹⁵ A Salum, yunnal Colhoze, a gobernador yaj 'a yol smacb'en chon̈b' Mizpa. A 'ix b'on muro 'aj xcan spuertail a pac'b'a'; xya'n q'ue yib'an̈, xya'n 'och spuertail cha, ax q'uen hierro xya'ch yipnub'oc. An̈jtona sb'on pax muro tz'ec' 'a sla'nil jun tanque tzcuch Siloé, tz'och 'a 'aj 'ay yawb'ente eb' rey, masnto xc'och pax 'a 'aj tz'ejm sc'ochal Schon̈b' David.

¹⁶ Xlajw cha, a Nehemías, yunnal Azbuc, gobernador yaj 'a spacloc lugar 'a yol yic chon̈b' Bet-sur, a 'ix b'on 'aj xc'och sti muro 'ipn sb'o cha, xc'och 'a yojltac 'aj mucn rey David yet' eb' yin̈til, xc'och pax 'a stan̈queal a a', masnto xc'och 'a scuartel eb' soldado.

¹⁷ Ax eb' levita tzjucb'tzej Rehum, win yunnal Bani, 'ix sb'on eb' nan̈l xo muro; ata schaj 'el Hasabías yich sb'on nan̈l xo muro sjelc eb' yit chon̈b' 'aj Keila, a jun winc cha, a gobernador yaj 'a spacloc lugar 'a yol smacb'en jun chon̈b' cha.

¹⁸ Ax 'a 'aj xc'och yic eb' cha, ata xchaj 'el jun tzo'n̈ xo eb' yitb'eym sb'a yet' eb'; atn Bavai, yunnal Henadad, a gobernador yaj 'a spacloc lugar 'a yol smacb'en chon̈b' Keila cha.

¹⁹ A Ezer yunnal Josué, gobernador yaj 'a chon̈b' Mizpa, a xb'on jab'x muro 'a yojltac 'aj tzmolx yamc'ab' yic owal, masnto xc'och 'a yisquinyoal.

²⁰ A Baruc yunnal Zabai, 'a smasnil sc'ojol, 'ix sb'on nan̈l xo muro 'a jun 'isquinyo cha, masnto tzc'och 'a spuertail yatut Eliasib sat ya'mal 'och sti eb' 'anma 'a Dios.

²¹ A Meromot, yunnal Urías yixchicn Cos, 'ix sb'on muro 'a stojlal spuertail yatut Eliasib masnto tzc'och 'a 'aj tzlajw c'och cha.

²² Ax eb' ya'mal 'och sti eb' 'anma 'a Dios sb'on pax eb' yico', atn eb' cajn 'a lum span̈nil sti a Jordán.

²³ A Benjamín yet' Hasub, 'ix sb'o eb' nan̈l xo muro chi 'a sti yatut, ax Azarías yunnal Maasías, yixchicn Ananías 'ix sb'o yic 'a stz'ey yatut.

²⁴ A Binuy, yunnal Henadad sb'o nan̈l xo yico', schaj 'at 'a yatut Azarías masnto tzc'och 'a yisquinyoal.

²⁵ A Palal yunnal Uzai, a 'ix b'on jun muro 'a 'isquinyo, yet' jun torre niwquil ste'il 'ay 'a sdespacho win rey, atn 'a yamq'uil yatut eb' soldado 'aj tzmacwji. Ax Pedaías yunnal Faros sb'on yico',

²⁶ masnto xc'och 'a sti spuertail 'aj tz'elt eb' 'ix 'ix yic' ya'al, jun tz'atcn 'a stojlal 'aj tzq'uel c'u, 'a sla'nil jun torre niwquil ste'il. A eb' tz'a'w servil 'a yatut Dios, atn eb' cajn 'a Ofel, 'ix sb'o pax eb' nan̈l muro cha.

²⁷ A eb' 'aj Tecoa sb'o eb' nan̈l xo muro 'a yojltac jun torre caw niwquil ste'il masnto xc'och pax 'a Ofel.

²⁸ A eb' ya'mal 'och sti eb' 'anma 'a Dios, junjn eb' 'ix sb'o eb' yic 'a stojlal yatut, schaj 'at 'a spuertail 'aj tz'och e no chej.

²⁹ Ax Sadoc yunnal Imer, a 'ix b'on nan̈l xo muro 'a stojlal yatut; 'ix sb'on pax Semaías yunnal Secanías nan̈l xo yic 'a yojltac yatut, a jun winc chi tztan̈wnin̈ej puerta 'a stojlal 'aj tzq'uel c'u.

³⁰ 'Ix sb'on Hananías yunnal Selemías nan̈l xo, yet' Hanún, atn swacl 'unnal Salaf. 'Ix sb'on Mesulam yunnal Berequías nan̈l xo yic 'a stojlal yatut.

³¹ A Malquías win tzb'on jun tzo'n̈ q'uen q'uen wach' yilxi, 'ix sb'o win nan̈l yic cha, masnto xc'och 'a yatut eb' tz'a'n servil yatut Dios, yet' 'a yatut eb' chon̈wjum, yet' 'a sti puerta masnto xc'och 'a eb' 'aych stan̈wc 'isquinyo cha.

³² Ax eb' tzb'on jun tzo'n̈ q'uen wach' yilxi yet' eb' chon̈wjum, a eb' xb'on yic 'a 'aj 'ayc' eb' tztan̈wni 'isquinyo cha, masnto xc'och a 'aj 'ay spuertail yic no calnelu.