Nehemías 2 - Chuj San Sebastian Bible

X'ajx 'at Nehemías*r* yuj win rey 'a Jerusalén

¹ A 'a yic jun c'ual 'a yol 'uj Nisán, 'a yic sjunc'lil ab'il yoch Artajerjes reyal, yic wan wa'n 'ejm yal uva 'a yojltac win rey, xyilni to cusltac in sat, palta may 'aj 'ixta wilxi.

² Yuj cha sc'anb'n win rey 'ayn 'ixtic: —¿Tas yuj cusltac yilx a sat? Palta 'in may tas tzab' xon syail? Mto 'ay tas tzab' syal yet' a pixan, xchi. —Xlajw cha, in xiw cha'an̈,

³ xwaln 'a win 'ixtic: —'Aychn̈ej cab' 'ec' 'a smasnil tiempo mamin rey. Cusltac yilx in sat, yujto tzin cus yuj in chon̈b' 'aj mucn eb' in mam wicham, caw juwnac, tz'anc pax spuertail? xin chi.

⁴ —¿Tas tzwutj colwjoc in b'a 'aych ticnec jun? xchi win rey. Xlajw cha, in leslwi 'a Dios 'ay yic satcha'an̈.

⁵ 'Ix waln 'a win rey 'ixtic: —Toto wach' tzab' mamin rey, toto wach'n an a checb' in tic 'a a sat, tzin c'an 'ayach to tzin a chaj 'at 'a Judá, atn 'a jun chon̈b' 'aj mucn eb' in mam wicham, to tz'at in b'ox can chan̈ sjel, xin chi 'a winac.

⁶ Wocn 'ejm 'ix reina 'a stz'ey win rey, xyaln win 'ayin 'ixtic: —¿Jantc tiempo tzach 'ati? ¿B'a'n̈ wal tzach japxi? xchi win 'ayin. 'Ix walni jantc tiempo tzin 'ati, 'ix schan sc'ojl win in ya'n 'ati.

⁷ An̈jtona', xwaln pax 'a win rey 'ixtic: Toto wach' tzab' mamin rey, 'a't junc carta 'a eb' gobernador 'ay 'a sc'axpil 'ec' a Éufrates, sec wach' libre tzin schaj 'ec' eb', masnto tzin c'och 'a Judá.

⁸ Tza'n pax junc xo carta 'a win Asaf, atn win yilmal te niwc te 'ay 'a yol a macb'en, sec wach' tzyac' win te 'ayin. 'Oj c'anxoc te 'a spuertail yatut eb' 'ayc' stan̈wc yatut Dios, yet' spuertail smuroal chon̈ab', yet' pax stel watut 'aj 'oj waji, xin chi 'a 'a. Yuj swach'c'ojlal in Diosal 'a wib'an̈, 'ix ya'n win rey smasnil jun tzo'n̈ tic 'ayin.

⁹ A yic in jaw 'a eb' gobernador 'ay 'a sc'axpil 'e't a Éufrates, 'ix wa'n ch'an̈ carta xya' cot win rey 'ayin. Ajun pax eb' soldado xya' cot win rey wet'oc, eb' tzb'ey 'a yoc, yet' eb' 'aych 'a yib'n̈ chej.

¹⁰ Palta 'ay chawn̈ eb' yajal, atn Sanbalat 'aj Horón yet' Tobías yajl yaj 'a eb' 'aj Amón, a yic 'ix yab'n eb' to in c'och colwjoc 'a eb' wit israelal cha, ma'ix schaj sc'ojl eb'.

A Nehemías xyiptzej eb' chon̈ab'

¹¹ A yic yoxl xo c'u in c'och 'a Jerusalén,

¹² in q'ue wan 'a 'ac'wl yet' jaywn̈ eb' winc ajun wet'oc, palta may junc mach 'aj 'ix wala tas xyal Dios 'a in nab'en, yuj tas 'oj in b'o 'a Jerusalén. May schej eb' xyi'aj, cojn 'in xwij no 'in cuchmal.

¹³ On̈ 'elt 'a spuertail pan̈n 'a'lic, on̈ 'ec' 'a stojlal a pac'b'a tzcuch Dragón, on̈ 'ec' pax 'a spuertail 'aj tz'at can c'alem. X'ec' in maclnoc wil smuroal Jerusalén mac'b'il 'ejm lan̈chjoc, yet' spuertail tz'anac.

¹⁴ X'ec' wilnoc pax jun puerta 'ay 'a sla'nil a pac'b'a', yet' spila win rey; palta ma'ix stac' yec' no in cuchmal ta'.

¹⁵ An̈ja q'ui'to in q'ue'ch 'a sti a Cedrón. 'Ix lajw 'ec' wilnc muro cha, on̈ meltzj pax 'och 'a spuertail pan̈n 'a'lic cha.

¹⁶ Ax eb' yajl chon̈ab', man̈ yojcoc eb' 'aj 'ayn 'ati, man̈ yojcoc pax eb' tas tz'ec' in say in b'o'. An̈jtona', mant 'a tas tzwal yab' eb' wit israelal, eb' ya'mal 'och sti eb' 'anma 'a Dios, eb' caw niwn yel'ch yet' yopiso, eb' yajal, yet' eb' 'oj munljoc.

¹⁷ Xlajw cha, xwaln 'a eb' 'ixtic: —Ax tic, 'in caw eyojc si'mb'il, a jun tiempoal 'aj 'ayn̈ec 'ec' tic caw maysch'olnil, yujto mac'b'il 'ejm lan̈chjoc Jerusalén tic, ax spuertail tz'anac. Cotn̈ec, junn̈j tzcutjec qui b'a, qui b'oc pax chan̈ smuroal qui chon̈b' jun 'ejm xo, sec wach' man̈xtzac on̈ tzetzxec, xin chi.

¹⁸ A yic xwaln 'a eb' chajtlto xyac' Dios swach'c'ojlal 'a wib'an̈, yet' tas 'ix yal win rey 'ayin, 'ix ta'w eb', xyaln eb' 'ixtic: —Qui'c 'el yich qui b'oni, xchi eb'. Yet' swach' nab'enal eb' 'ix yiptzan sb'a junjn eb'.

¹⁹ Palta ax yic xyab'n Sanbalat yet' Tobías cha, yet' pax Gesem win árabe, caw 'ix b'uchjw eb' 'ayn̈ on̈, man̈x 'a quel'ch 'a eb' on̈, xyaln eb' 'ixtic: —¿Tas 'oj e b'o'? ¿Tom tze nib'j tzeyac' tu nab'enal 'a win rey? xchi eb'.

²⁰ Palta in ta'wi, xwaln 'a eb' 'ixtic: —Yuj wal scolwal Dios 'ay yic satcha'an̈ ax sta'n cuj on̈. An̈ schecb' on̈ tic on̈, 'oj qui'l yich qui b'on on̈, ax xo tic may eyaln eyic 'a 'a, may 'aj 'oj e c'anlb'axi, yujto man̈ quit chon̈b'oquec qui b'a, xin chi 'a eb'.