Nehemías 11 - Chuj San Sebastian Bible

Eb' cajn 'a Jerusalén

¹ A eb' yajl 'a jun nacion̈ tic, 'ix can cajn eb' 'a Jerusalén; ax jaywn̈ xo eb' chon̈ab', xya'ch eb' suerte, sec wach' a junc n̈al 'a junjn lajn̈e n̈ail, tz'at cajn 'a Jerusalén, atn jun chon̈b' yic Dios yaji. Ax junx b'aln̈e n̈ail, tzcancn 'a jun tzo'n̈ xo chon̈b' 'a b'esan.

² Xlajw cha, xyaln eb' chon̈b' wach' paxti 'a smasnil eb' x'el 'a sc'ojl tz'at cajn 'a Jerusalén.

³ Palta ax eb' 'anma chi smasnil, junjn eb' x'atx can eb' 'a smacl lum 'a schon̈b' 'a yol yic Judá, yet' eb' ya'mal 'och sti eb' 'anma 'a Dios, eb' levita, eb' ya'mal servil yatut Dios yet' eb' yin̈tl eb' ya'mal servil Salomón. A 'a scal eb' cha, ata x'elt can jaywn̈ eb' yajl yaj 'a scal eb', 'ix can cajn eb' 'a Jerusalén.

^4-6 A 'a scal eb' yin̈tl Judá, ata x'elt can chawn̈ eb' yajl tic: Jun win tzcuch Ataías, yunnal Uzías, yixchicn Zacarías. Ax jun tzo'n̈ xo eb' smam yicham atn eb' tic: Amarías, Sefatías, Mahalalel, yin̈tl Fares eb'. A sb'isl eb' yin̈tl Fares xcan cajn 'a Jerusalén, 'ay 468 eb' 'a smasnil, caw wal jeln eb' 'a owal. Ax junx winac tzcuch Maasías yunnal Baruc yixchicn Colhoze. A jun tzo'n̈ xo eb' smam yicham atn eb' tic: Hazaías, Adaías, Joiarib, Zacarías, yin̈tl Siloni eb'.

⁷ Ax 'a scal eb' yin̈tl Benjamín, ata x'elt eb' tic: Salú, eb' smam yicham atn Mesulam, Joed, Pedaías, Colaías, Maasías, Itiel, Jesaías,

⁸ yet' eb' yican, atn Gabai yet' Salai. 'Ay 928 sb'isl eb' yic Benjamín 'a smasnil.

⁹ A Joel yunnal Zicri, a sat yaj sjucb'tzan eb'; ax Judá yunnal Senúa, a schab'l yaj sjucb'tzan eb' chon̈b' cha.

¹⁰ A eb' yajl yaj 'a scal eb' ya'mal 'och sti eb' 'anma 'a Dios, eb' 'ix can cajn 'a Jerusalén 'ay chan̈wn̈ eb': win b'ab'el tzcuch Jedaías yunnal Joiarib yican Jaquín;

¹¹ win schab'il tzcuch Seraías yunnal Hilcías, yixchicn Mesulam; eb' smam yicham atn Sadoc, Meraiot, Ahitob. A Ahitob cha, a yajl yaj 'a yatut Dios 'a pecti'.

¹² A smasnil eb' yican Seraías tzmunlj yet' 'a yatut Dios, 'ay 822 eb'. Win yoxil tzcuch Adaías yunnal Jeroham, yixchicn Pelalías. Eb' smam yicham atn Amsi, Zacarías, Pasur, yet' Malquías.

¹³ A sb'isl eb' yajl yaj 'a yib'n̈ eb' yican Adaías, 'ay 242 eb' 'a smasnil. Win schan̈il tzcuch Amasai yunnal Azarel, yixchicn Azai; eb' smam yicham, atn Mesilemot, yet' Imer.

¹⁴ A eb' yican Amasai cha, caw jeln eb' ya'n owal, 128 eb' 'a smasnil. A Zabdiel yunnal Gedolim, a yajl yaj 'a yib'n̈ eb'.

¹⁵ Ax eb' yajl yaj 'a scal eb' levita 'ix can cajn jaywn̈ eb' 'a Jerusalén: Jun win tzcuch Semaías, yunnal Hasub, yixchicn Azricam; eb' smam yicham atn Hasabías, yet' Buni;

¹⁶ junx winac tzcuch Sabtai yet' junx win tzcuch Jozabad, a eb' 'aych pax yiln munljel 'a spatquil yatut Dios.

¹⁷ Junx winac tzcuch Matanías yunnal Micaía, yixchicn Zabdi; a smam yicham atn Asaf; a Asaf cha, a xjucb'tzan eb' xb'itn 'a pecti', atn eb' xb'itnan wach' paxti yet' alj yuj diosal 'a yorail lesal. A Bacbuquías a schab'l yajl yaj 'a scal eb' yican. Junx win tzcuch Abda yunnal Samúa, yixchicn Galal; a smam yicham atn Jedutún.

¹⁸ A sb'isl eb' levita xcan cajn 'a schon̈b' Dios, 'ay 284 eb' 'a smasnil.

¹⁹ A eb' tan̈m puerta: atn Acub, Talmón yet' eb' yican eb', 'ay 172 eb' tztan̈wni puerta chi 'a smasnil.

²⁰ Ax jantcto eb' israel cha, yet' jaywn̈ xo eb' ya'mal 'och sti eb' 'anma 'a Dios yet' eb' levita, xc'ochx can cajn eb' 'a smasnil lum chon̈b' 'a yol yic Judá, junjn mach xcan 'a smacl lu'um.

²¹ A eb' ya'mal servil yatut Dios, xcan cajn eb' 'a tzaln Ofel, yet' eb' tzjucb'tzan eb', atn Siha yet' Gispa.

²² A jun mach yajl yaj 'a yib'n̈ eb' levita 'a Jerusalén, atn Uzi win yunnal Bani, yixchicn Hasabías; eb' smam yicham atn Matanías yet' Micaía. Atn eb' tic 'ix 'elt 'a scal eb' yin̈tl Asaf cha, eb' tzjucb'tzan eb' 'a b'it 'a yatut Dios,

²³ yujto 'ix yal win rey, chajtl tz'aj yoch junjn macn̈ eb' tzb'itn 'a stzol-l 'a junjn c'u.

²⁴ A mach tz'och 'a yojltac win rey, yuj tzann̈j checnb'ilal yuj eb' chon̈ab', atn Petaías, yunnal Mesezabel, yin̈tl win Zera, yunnal Judá.

Jun tzo'n̈ xo chon̈b'*r* 'aj 'ix can cajn eb'

^25-30 'Ay eb' yin̈tl Judá xcan cajn 'a Quiriat-arba, 'a Dibón, 'a Jecabseel, 'a Josué, 'a Molada, 'a Bet-pelet, 'a Hazar-sual, 'a Beerseba, 'a Siclag, 'a Mecona, 'a En-rimón, 'a Sora, 'a Jarmut, 'a Zanoa, 'a Adulam, 'a Laquis, 'a Azeca yet' 'a yaldeail eb', yet' a 'aj tzlaj 'och munljel, tzchaj 'at 'a Beerseba masnto 'a lum pan̈n 'a'lic yic Hinom.

^31-36 Ax eb' yin̈tl Benjamín, 'ay eb' xcan cajn 'a Geba, 'a Micmas, 'a Aía, 'a Bet-el yet' 'a yaldeail eb', yet' pax 'a Anatot, 'a Nob, 'a Ananías, 'a Hazor, 'a Ramá, 'a Gitaim, 'a Hadid, 'a Seboím, 'a Nebalat, 'a Lod, 'a Ono, yet' 'a lum pan̈n yic Carisim. An̈jtona', 'ay pax eb' levita schaj smacl lum 'a yol yic Judá yet' 'a yol yic Benjamín.