Nehemías 10 - Chuj San Sebastian Bible

^1-8 A eb' xya'cn 'ejm sb'i 'a ch'an̈ un̈ 'ix stz'ib'x can cha, atn eb' tic: Nehemías yunnal Hacalías, atn win gobernador. Xya'n pax eb' ya'mal 'och sti eb' 'anma 'a Dios yico': atn Sedequías, Seraías, Azarías, Jeremías, Pasur, Amarías, Malquías, Hatús, Sebanías, Maluc, Harim, Meremot, Obadías, Daniel, Ginetón, Baruc, Mesulam, Abías, Mijamín, Maazías, Bilgai yet' Semaías.

^9-13 Ax eb' levita xyac' pax eb' yico': atn Josué, yunnal Azanías, Binuy yin̈tl Henadad, yet' Cadmiel, yet' eb' yit levitail eb', atn Sebanías, Hodías, Kelitá, Pelaías, Hanán, Micaía, Rehob, Hasabías, Zacur, Serebías, Sebanías, junx win Hodías, Bani yet' Beninu.

^14-27 A pax eb' 'aych yajlil 'a jun nacion̈ cha: atn Parós, Pahat-moab, Elam, Zatu, Bani, Buni, Azgad, Bebai, Adonías, Bigvai, Adín, Ater, Ezequías, Azur, Hodías, Hasum, Besai, Harif, Anatot, Nebai, Magpías, Mesulam, Hezir, Mesezabel, Sadoc, Jadúa, Pelatías, Hanán, Anaías, Oseas, Hananías, Hasub, Halohes, Pilha, Sobec, Rehum, Hasabna, Maasías, Ahías, junx win Hanán, Anán, Maluc, Harim yet' Baana.

A jun trato sb'o eb' chon̈ab'

²⁸ Ax smasnil eb' chon̈ab', eb' ya'mal 'och sti eb' 'anma 'a Dios, eb' levita, atn eb' tan̈m puerta, eb' tzb'itni, eb' ya'mal servil yatut Dios, yet' nan̈l xo eb' yit chon̈b' eb' tox spojl sb'a 'a scal eb' chuc chon̈b'al 'a jun lugar cha, xyac' eb' sti', yic tzyiclj eb' sley Dios, yet' yistzil, yet' smasnil yunnal eb', yet' yisl eb', eb' to tzax nachj 'el jun cuynb'il chi yu'uj.

²⁹ 'Ix syam sb'a eb' yet' eb' syajlil eb' to yicanto sb'a yet'oc. 'Ix yac' eb' sti', to 'oj sb'eylb'oc eb' sley Dios alb'il can yuj Moisés, win schecb' Dios, ax syiclni pax eb' smasnil schecnb'il, scuynb'il Jehová Dios, ax eb' ma'oj yiclnoc jun trato cha, 'oj jawc catb' 'a yib'n̈ eb'.

³⁰ Yuj cha, xyaln can eb' 'ixtic: Man̈x 'oj ca'c nupnc eb' 'ix quisl yet' eb' chuc chon̈b'al; an̈jtona', man̈x 'oj qui cha nupnc yisl eb' yet' eb' cunnalec.

³¹ Toto tzjaw eb' chuc chon̈b'al chon̈wjoc 'a sc'ul 'iljelal, ma'oj qui manwjec 'a eb', yet' 'a sc'ul jun tzo'n̈ xo q'uin̈. Ax 'a yucl ab'il ax cactnec can lum lum 'iljoc, ax ca'nec pax tup sb'oc eb' 'ay sb'oc 'ayn̈ec.

³² An̈jtona', tox 'ix qui b'oc jun qui ley to yowlal 'oj ca'c chan̈e gramo q'uen tumn plata 'a junjn ab'il, yic tzc'anlb'ax 'a yatut qui Diosalec.

³³ Atn q'uen 'oj mannoc 'ixm pan tz'ajx 'a yojltac Dios, yet' ofrenda tz'ajx 'a junjn c'u, yet' xajmb'al to tz'a smasnil 'a junjn c'u, yet' xajmb'al tz'ajx 'a sc'ul 'iljelal, 'a yic tzpac' 'uj, yet' 'a jun tzo'n̈ xo q'uin̈ tznax 'a junjn ab'il, yet' jun tzo'n̈ xo ofrenda yet' pax xajmb'al yic tz'ajx lajwc qui mul an̈ israel on̈c tic, yet' jun tzo'n̈ xo tas tzc'anx 'a yatut Dios yic tz'och 'emmquilal.

³⁴ An̈jtona', 'ix ca'ch suerte 'ayn̈ junjn 'in̈tal on̈ec, sec wach' tzquilec 'aja tiempoal 'a junjn ab'il, 'oj ca'c te c'atztz yic yatut qui Diosalec, te tz'a 'a yet'l xajmb'al yic Jehová qui Diosalec, 'icha yaj stz'ib'x 'a ch'an̈ ley. Wach'xam to ya'maln̈ 'och sti eb' 'anma 'a Dios, mto levita on̈, mto comn 'anma 'on̈, 'oj qui yicljn̈ej jun tzo'n̈ cha.

³⁵ A 'a junjn ab'il, 'oj qui'c 'at qui b'ab'l sat 'awb'en tz'el 'a sat qui lum 'a yatut Jehová, yet' smasnil sb'ab'l sat qui te 'awb'il.

³⁶ An̈jtona', 'oj qui'c 'at eb' qui b'ab'l 'unnal, no sb'ab'l 'une qui wacax, no sb'ab'l 'une qui calnelu yet' sb'ab'l 'une qui chiwo 'a yatut qui Diosalec, 'a yojltac eb' ya'mal 'och qui ti 'a Dios, atn eb' tzmunlj 'a yatut qui Diosalec cha, 'icha yaj stz'ib'x can 'a ch'an̈ ley.

³⁷ An̈jtona', 'oj qui'c 'at 'ixm qui b'ab'l harina, sb'ab'l sat smasnil cawb'ente', qui b'ab'l yal uva yet' qui aceite 'a eb' ya'mal 'och qui ti 'a Dios. Ax ca'nec sdiesmoal smasnil tas tzcawjec, ax eb' levita 'oj chanoc, yujto a eb' 'ay yaln yic schan sdiesmoal sb'al sat qui lum 'a junjn chon̈b' 'aj tzon̈ munljec.

³⁸ A yic tz'at eb' levita 'at scha jun diesmo cha, yowlal tz'at junc eb' ya'mal 'och sti eb' 'anma 'a Dios yet' eb', atn junc yin̈tl Aarón. Tzyi'n 'at eb' levita sdiesmoal jun diesmo tzchaj chi 'a 'aj tzmolx 'a yatut qui Diosalec.

³⁹ An̈ israel on̈c tic yet' eb' levita, 'oj qui'c 'at 'ixm trigo, yal uva yet' aceite 'a 'aj tzmolxi, atn 'a 'aj 'ayc' smasnil yamc'ab' tzc'an eb' 'anma 'ay yopiso, atn eb' ya'mal 'och qui ti 'a Dios, eb' tan̈m puerta yet' eb' tzb'itni. 'Ix ca'nec can qui ti', to ma'oj cactquec can yatut qui Diosalec, xchi eb'.