Nahúm 3 - Chuj San Sebastian Bible

¹ 'Oltac wal chon̈b' Nínive, yujto ata 'ay eb' 'ixtm 'anma', yet' eb' milwjum. Man̈x yalnb'ilc tas tz'el sb'on eb' ta'.

² Palta ax ticnec, n̈iln̈ni sb'ey caruaje, caw tzc'an̈ ste'n 'ejm no chej yoc, chan̈ tzq'ue wan caruaje chi sb'eyi. Tzpa'mj tz'um 'a yol schon̈b' eb'.

³ 'Ay q'ue eb' soldado 'a yib'n̈ chej tz'ec' eb'. Caw tzcopmj yespada eb' yeq'ui. Tzictzni yilx q'uen lanza. Smil-l xo sb'isl eb' x'ejmi, b'ulctac xoj yaj eb' chamnac. Man̈x yalnb'ilc niwnal t'ocq'uixtac yaji. Tzlaj can locn yoc eb' 'anma 'a eb'.

⁴ 'Ixta 'ix 'aj sjaw 'a yib'n̈ chon̈b' Nínive, yujto caw x'ixtx jun tzo'n̈ xo chon̈b' yu'uj. A wal eb' yajl 'a jun chon̈b' cha, caw jeln eb' 'a 'ajchumal yic tzya'n ganar eb' yoch jun tzo'n̈ xo chon̈b' 'a yaln̈ schecnb'il. Lajn yaj schon̈b' eb' 'icha junc 'ix 'ajmul 'ix tzmontj 'och winc 'a 'a, caw wach' yilxi, caw nib'b'il 'ix, 'ixta jun chon̈b' cha.

⁵ A Jehová tztac' yuj smasnil, a tzaln 'ixtic: Ex 'aj Nínive, caw 'ajc'ojl wajch 'ayex, 'oj in ch'oxl e q'uixwel 'a sat smasnil eb' chon̈ab', 'icha wal tz'aj yijx 'el spichl junc 'ix 'ajmul 'ix 'a sat eb' chon̈ab', yuj sch'oxx 'ilxoc sq'uixwelal,

⁶ tzlaj julxoc 'och tas man̈ wach'c 'a 'ix, yic tzch'oxn 'eli to man̈ wach'c 'ix. 'Ixta wal 'oj wutc in ch'oxn 'el e q'uixwel ex 'aj Nínive.

⁷ A smasnil mach 'oj eyiln 'ochi, caw 'oj 'at eb' 'elc 'ayex. Ax yaln eb' 'ixtic: A wal chon̈b' Nínive, caw xlajw 'ejmi. ¿Mach to wal 'oj 'o'ch sc'ojl 'a 'a? ¿'Ajto wal 'oj yic' mach 'oj 'a'nc sniwnal sc'ojol? 'oj schic eb'.

⁸ Ex 'aj Nínive, ¿tom yel xo caw wach'x 'a yib'n̈ eb' 'aj Tebas, atn jun chon̈b' 'ayc' 'a sti a Nilo, caw niwn eb' a a 'oyn 'och 'a 'a? 'Icha to a eb' a 'aych scolnb'iloc, 'icha smuroal yajch eb' a'.

⁹ Man̈x yalnb'ilc eb' soldado yic Etiopía yet' eb' yic Egipto xcolwj yet'oc, locn eb' 'aj Fut, yet' pax eb' 'aj Libia 'aych yet'oc.

¹⁰ Palta jun, a eb' 'aj Tebas, 'ix 'ijx 'at pax eb' 'icha presoal. Ax yunnal eb', xma'x can ch'iychjoc eb' 'a yisquinyoal caye. 'Ix 'ajx 'och suerte 'a yib'n̈ eb' niwc winc 'a scal eb', x'ajx 'och q'uen cadena 'a eb' tzjucb'tzan eb'.

¹¹ An̈jtona', ax 'aj Nínive ex tic, 'icha 'u'm 'an̈, 'ixta wal ex 'ajcni. 'Oj cob' eya'lc e c'ub'n 'el e b'a 'a eb' 'ajc'ojl yajch 'ayex, palta nab'a xoj.

¹² A smasnil e cuartel, lajn xoj 'icha sat te higo caw 'ec'm xo, c'un xoj scot c'otljoc. Toto 'ay mach tzicb'tan̈n te snun cha, tojl xoj scot te sat cha.

¹³ A eb' e soldado, caw lajn xoj eb' 'icha eb' 'ix 'ix. A spuertail e chon̈ab', jacn xo 'a eb' 'ajc'ojol, xlajw stz'a 'ejm jun tzo'n̈ 'aych smacloc e chon̈b' cha.

¹⁴ Ex 'aj Nínive, 'ay cab' a a molb'il can eyu'uj, sec 'oj techjoc eyuj 'a eb' 'ajc'ojl oyn xo 'och 'ayex. 'A'c 'och yipnub'al smuroal e chon̈ab', 'ochn̈ec te'j b'iq'uich, 'ijec cot molde yic ladrillo.

¹⁵ Wach'xam tze b'o smasnil jun tzo'n̈ cha, palta 'oj e milxn̈ej chamoc. 'Oj e n̈usxi mto 'oj e tzu'x chamoc. Caw 'oj e satln̈ej 'icha wal tz'aj slajw 'el 'awb'en yuj no c'ulub'. Caw niwtjnac e b'isl cob' 'icha no c'ulb' cha, mto 'icha no tzac'.

¹⁶ Caw xniwtj sb'isl eb' e chon̈wjum, 'ec'b'al x'aj sb'isl eb' 'a jun tzo'n̈ c'anal. 'Icha wal tzyutj no c'ulb' satn 'el smasnil tas, tzlajw cha, tz'atx can no', 'ixta 'eb'.

¹⁷ A eb' e soldado sic'b'il 'el eyu'uj, lajn wal eb' 'icha jun b'ulc no c'ulub', tz'ochcn b'uln no 'a sat yich n̈a yic caw 'ay si'ic, ax 'a yic tz'elx yoc c'u, tz'atx can jen̈n̈oc no', toc 'ayt mach 'ojtnac 'aj tzc'ochi, 'ixta eb' a soldado cha.

¹⁸ Ach sreyl Asiria, a wal eb' stan̈mal a chon̈ab', waync xo eb'. A eb' 'aych yajlil et'oc, to tz'ilj eb'. A eb' a soldado, caw sactzicnac s'at eb' 'a lum jolmctac witz, man̈x 'a mach tzmolb'tzan eb'.

¹⁹ A wal jantc x'aj slajw 'ejm a chon̈b' tic, caw man̈x 'a sb'omb'il. Smasnil tas xjuw 'a 'a, man̈x 'a b'a'n̈ 'oj b'o'oc. A smasnil eb' 'oj 'ab'nc ab'xil yuj tas ach 'aji, caw 'oj spoc' eb' sc'ab' yuj tzaljc'ojal, yujto c'uxn xyab' eb' syal yuj a tu nab'enal, xchi Dios.