Nahúm 2 - Chuj San Sebastian Bible

Alb'il 'eli to 'oj 'em Nínive

¹ Ex soldado 'aj Nínive, wan scot jun mach 'oj satn 'el e chon̈ab'. Q'uen̈ec 'a sjolm e cuartel. Macwjan̈ec. Jalc 'och eyespada 'a e nan̈al. Molb'tzej e b'a e masnil.

² Wach'xam 'elc'b'il cot smasnil tas 'a chon̈b' Israel eyu'uj, scan eyuj 'icha junc snun uva man̈x 'a sc'ab', palta a Jehová 'oj 'i'noc pax chan̈ sb'inab'ilal eb' yin̈tl can Jacob jun 'ejm xo, 'icha xon 'a yic yaln̈taxi.

³ A wal eb' 'ajc'ojl tzcot 'ayex, caw chac yilx syamc'ab' eb' yic owal, chac yilx pax spichl eb' soldado cha. Lista xo yaj eb' yoch 'a owal. Caw tzictzni yilx scaruaje eb', man̈xtzac yamchj 'och wan lin̈n no schej eb'.

⁴ Man̈x yalnb'ilc yec' scaruaje eb' 'a yoltc caye, can oyn yec' eb' 'a spatquil 'el chon̈ab', lajn wal yilx 'icha cantil 'aych sc'aq'uil, lajn yec' eb' 'icha letz'lo'om.

⁵ A eb' soldado caw jelan, x'awtx 'at eb' 'a owl cha, ax yic x'at eb', t'oclji laj s'at eb' stenlan sb'a s'at 'a smuroal chon̈b' cha, atn 'a 'aj tzb'o 'aj tzcol sb'a eb'.

⁶ 'Oj jacwc jun tzo'n̈ puerta 'ay 'a sti eb' a a', 'oj lan̈chjoc 'ejm despacho.

⁷ 'Oj 'ijxoc can 'at 'ix reina 'icha presoal, locn eb' 'ix schecb' 'ix 'oj 'ijxoc 'at yet' 'icha yaj yalx cani. Xoj sc'acw eb' 'icha no parama, tztenn 'och eb' sc'ab' 'a sn̈i sc'ojl yuj cusc'ojlal.

⁸ 'Icha wal tz'aj sn̈i'chj 'el a a 'a yet'l 'aj molb'il, 'ixta wal 'oj 'aj s'at eb' 'aj Nínive 'eloc. 'Ojt cob' 'och 'aw, ax yalx 'a eb' 'ixtic: 'Ochn̈ec wa'an, meltzjan̈ec, 'oj xchioc, palta man̈x 'a mach 'oj scha yab'i'.

⁹ 'Oj alxoc 'a eb' 'ajc'ojl 'ixtic: 'El'jec 'at q'uen plata, yet' pax q'uen oro, yujto a sricoal chon̈b' Nínive may slajub', xchi.

¹⁰ Tox xlajw 'ejm Nínive, cusltac xoj yilx cani. A wal eb' cajn 'a 'a, caw tz'el yip eb' yuj xiwlal. Toxn̈ej tzlan̈lni spenc eb' smasnil, man̈x 'a mach 'ay yip. Caw tzsacb'el sat eb' yuj xiwlal.

¹¹ ¿Tas 'ix 'i'n chon̈b' Nínive tic? 'Icha wal sn̈aq'uen no león 'aj 'ayc' yet' yune', 'ixta yaj 'a yic yaln̈taxi. A e no león chi yet' yune', caw wach' yaj no ta tzyab'i, may mach tzxib'tn no ta'.

¹² A yic tzmiln cham no mam león chi schib'ej, tzcotc pojn 'ec' no a no snun yet' 'a e no cotc cha. Caw wal b'ut'jnac 'el yol sn̈aq'uen e no chi yuj schib'ej. 'Ixta yaj chon̈b' Nínive 'a yic yaln̈taxi.

Lajwnac 'el chon̈b' Nínive

¹³ A Jehová tztac' yuj smasnil, a tzaln 'ixtic: 'Ayn 'och wal 'ajc'ojlal 'ayx ex 'aj Nínive. 'Oj wac' n̈usxoc jun tzo'n̈ e caruaje yic owal, ax wa'n can 'och tab'il. 'Oj in mil cham smasnil eb' e soldado, ax in satn can 'el smasnil tas 'elc'b'il cot eyu'uj. Man̈x 'a 'aj ow 'oj yutc paxtinc sb'a eb' e checab', xchi Dios.