Mt 9 - Chuj San Sebastian Bible

B'oxnc jun win sicb'nac 'eli

¹ Xlajw cha, ax Jesús 'ix 'ochx 'a yojl barco, 'ix 'atx 'a junx sc'axpil 'ec' a', 'ix c'ochx 'a schon̈ab'.

² Ata 'ay jun winc sicb'nac 'eli. C'otn 'ec' win 'a swaynub'. 'Ay eb' 'anma x'i'n 'at win 'a Jesús. Ax 'ix yilni to xya'ch eb' sc'ojl 'a 'a, yuj cha, xyaln 'a win sicb'nac 'el chi 'ixtic: —Tzaljan̈ ach winac, tic 'ix 'ajx can lajwc a mul, xchi 'a winac.

³ Palta 'ay jaywn̈ ewin cuywjum 'a ley yic Moisés 'ayc' ta'. 'Ix snan ewin 'ixtic: A jun winc tic, ton̈j tzb'uchwj 'a Dios, xchi ewinac.

⁴ Ax Jesús yojc tas wan snan ewinac, yuj cha, xyaln 'a ewin 'ixtic: —¿Tas yuj wan e nan jun tzo'n̈ maysch'olnil tic?

⁵ ¿'Aja junc man̈ 'ajltacc yel'ch tze na'a? Toto tzcal 'ixtic: Tic 'ix 'ajx can lajwc a mul, xqui chi: Mto q'uen̈ wa'an, b'eyan̈, xqui chi. ¿Tom 'ay junc man̈ 'ajltacoc yel'chi?

⁶ A ticnec, 'oj in ch'ox 'ayex, to an 'Ochnc in 'Anmal tic, 'ay in poder wa'n can lajwc smul eb' 'anma 'a yolyib'n̈q'uinl tic, xchi 'a ewinac. Xlajwn̈ej cha, xyaln 'ixtc 'a win sicb'nac 'el cha: —Q'uen wa'an, 'ijchan̈ a waynub' tic, paxn̈ 'a atut, xchi 'a winac.

⁷ Yajn̈j wal cha, xq'ue wan winac, xpax win 'a yatut.

⁸ A yic xyiln eb' 'anma jun cha, caw 'ix xiw eb'. 'Ix laj yalnc eb' wach' paxti 'a Dios, yujto caw niwn spoder 'ix yac' 'a jun mach 'a scal eb' cha.

'Awtb'il Mateo yuj Jesús

⁹ Ax Jesús, 'ix 'atxi. Yic wan sb'eyi, 'ix yiln jun Mateo sb'i. Wocn 'ejm 'a yet'l 'aj tztecl tumn 'a eb' 'anma'. —'Ochn̈ in cuywumoc, xchi Jesús 'a 'a. Yajn̈j cha, xq'ue wa'an, 'ix 'och scuywumoc.

¹⁰ Ax 'a jun 'el, wocn 'ejm Jesús wac yet' eb' scuywum 'a yol jun n̈a. An̈jtona', til wal eb' tecm 'el tumn 'ayc' ta', yet' jun tzo'n̈ xo eb' maysch'olnil sb'eyb'al, jun xwa' eb' yet' eb'.

¹¹ Ax yic xyil ewin fariseo jun cha, yuj cha, xyaln ewin 'ixtc 'a eb' scuywum Jesús: —A jun e Cuymal tic, ¿tas yuj jun tzwa yet' eb' tecm 'el tumin, yet' jun tzo'n̈ xo eb' maysch'olnil sb'eyb'al tic? xchi ewinac.

¹² Ax yic xyab'n Jesús jun cha, 'ix yaln 'a ewin 'ixtic: —Q'uinloc 'ay junc 'a'm remel ticnec. A eb' wach' sc'ojol, toc 'ay tz'och yuj eb'. Cojn eb' ya'ay, a eb' 'ay tz'och yu'uj.

¹³ 'Ixquec, 'at cuyc tas tzyal 'el'ch jun yaljnac can Dios 'a Ch'an̈ U'un̈, yic yaln can 'ixtic: A tas tzin nib'j 'ayex, to tz'o'ch e c'ojl 'a eb' eyit 'anma'il, man̈ocn̈ej jun tzo'n̈ xajmb'al tzin nib'ej, xchi 'a Ch'an̈. A eb' wach' sb'eyb'al snani, toc 'ay tzin 'och yuj eb', palta yuj wawtn eb' tznachj 'el yu'uj to maysch'olnil sb'eyb'al, yuj cha, in jawi, xchi Jesús.

Matz chaj sb'a 'ichm b'eyb'al*r* yet' 'ac' cuynb'il yic Jesucristo

¹⁴ A 'a jun 'el, 'ix c'och eb' scuywum Juan Bautista 'a Jesús, 'ix sc'anb'n eb' 'ixtc 'a 'a: —¿Tas yuj matz 'och eb' a cuywum 'a c'ajb'c'ojlal? Aln̈ tic on̈, caw tzca'ch qui b'a 'a c'ajb'c'ojlal on̈. An̈jtona', 'ixta pax tzyutj sb'a eb' fariseo, xchi eb' 'a 'a.

¹⁵ Yuj cha, xyaln Jesús 'ixtc 'a eb': —Q'uinloc 'ay junc nupnel tz'och ticnec. A eb' 'awtb'il 'at ta', ¿tom tztac' ya'n 'och sb'a eb' 'a c'ajb'c'ojlal, yic 'ayt 'ec' win tznupn chi yet' eb'? Palta at 'oj jawc stiempoal man̈x 'ayc 'ec' win yet' eb', atta 'oj 'och eb' 'a c'ajb'c'ojlal. 'Ixta 'in yet' eb' in cuywum.

¹⁶ Q'uinloc 'ay junc 'ichm pichl tzolchji, ¿tom 'ay junc mach tz'a'n 'och junc 'a't nip sniploc? Yujto a jun 'a't nip cha, caw tzpotzi, tzwach' to'n jat jun 'ichm pichl cha.

¹⁷ An̈jtona', may junc mach tz'a'n 'ejm 'ac' yal uva mantzac jaw sti 'a yojl junc 'ichm tz'um yet'l yal uva, yujto a yic tzjaw sti', caw tzsipji, ton̈j tzjat jun 'ichm tz'um chi yu'uj, ton̈j tz'ixtx jun yal uva chi yet' jun tz'um cha. Yuj cha, an̈j 'a yojl jun tzo'n̈ 'a't tz'u'um, an̈j ta tz'ejm 'ac' yal uva yic tzjaw sti', sec may tas tz'ixtx 'a schab'il, xchi Jesús 'a eb'.

A 'ix yisl Jairo, yet' junx 'ix ya'ay

¹⁸ Yic wan yaln Jesús jun tzo'n̈ cha, 'ix jaw jun syajlil yatutal 'aj tzyam sb'a eb' israel, 'ix 'em cumn 'a yojltac, 'ix yaln 'ixtic: —'Ay jun wisil, 'at wal scham tic, palta con̈ wet'oc. Tzin nib'j tz'at a tzaych a c'ab' 'a 'unix, sec 'oj pitzwc paxi, xchi.

¹⁹ Yuj cha, xq'ue wan Jesús, 'ix 'at yet'oc. 'Ix 'at pax eb' scuywum yet'oc.

²⁰ Ax 'a scal eb' 'anma wan s'at yet' Jesús cha, 'ay jun 'ix ya'ay. Slajchwil ab'il xo caw ya'ay 'ix yuj a a tz'el 'a 'a. Yuj cha, xc'och 'ix 'a spatquil Jesús, stzayn 'och 'ix sc'ab' 'a sti spichul.

²¹ Yujto sna 'ix 'ixtic: Cojn cab' tzin tzaych jac in c'ab' 'a spichul, ax sb'ox can in c'ojl yu'uj, xchi 'ix.

²² Yuj cha, 'ix sutmj 'at q'uelnjoc Jesús 'a 'ix, 'ix yaln 'ixtc 'a 'ix: —Ach 'ix, tzaljan̈ ticnec, tic ach b'ox can wu'uj, yujto tzin a'ch 'a a c'ojol, xchi 'a 'ix. Yajn̈j wal cha, xb'ox can sc'ojl 'ix.

²³ Ax yic xc'och Jesús 'a yatut win yajl cha, 'ix yilni 'ay eb' wan yutz'n yamay. Ax eb' 'anma', til wal yoc' eb'.

²⁴ Yuj cha, xyaln Jesús 'ixtc 'a eb': —'Eln̈ec 'a tic. A 'ix 'unn tic, man̈ chamncoc 'ix, ton̈j waync 'ix, xchi 'a eb'. Palta ton̈j 'ix tzewj eb' yu'uj.

²⁵ Ax yic xlajw yel eb' 'anma chi yu'uj, 'ix 'ochch 'a 'aj 'ayc' 'ix cob's 'unn cha. 'Ix 'och yamn 'a sc'ab' 'ix, 'ix q'ue wan 'ix muc'uc.

²⁶ 'Ix puc yab'xil 'a smasnil jun lugar cha, yuj tas 'ix sb'o'o.

Jacwnac sat chawn̈ winc matz uj yilni

²⁷ Yic wan s'atx Jesús 'a yol b'e, 'ay chawn̈ winc matz uj yilni. 'Ix 'och tza'n eb' yu'uj, caw 'ip xyal eb' 'ixtic: —Ach Yin̈tl David, comnoc tz'o'ch a c'ojl 'ayn̈ on̈, xchi eb' 'a 'a.

²⁸ Ax yic x'och 'a yol n̈a, xc'och eb' 'a 'a, yuj cha, xyaln 'a eb': —¿Tzam eya'ch 'a e c'ojol, to tztac' in b'on tas tze nib'j 'ayin? xchi 'a eb'. —N', tzca'ch 'a qui c'ojl on̈ Mamin, xchi eb' 'a 'a.

²⁹ Yuj cha, 'ix stzayn 'och sc'ab' 'a yol sat eb'. 'Ix yaln 'ixtc 'a eb': —'Icha tzeyutj eya'n 'och 'a e c'ojl tic, 'ixta 'oj 'aj sb'o 'ayex, xchi.

³⁰ 'Ixta to b'i'an, xjacw sat eb'. Tztac' xo yiln eb'. Yuj cha, xcham wal yaln 'ixtc 'a eb': —'Ab'ec, may junc mach 'aj tztac' eyaln jun tic, xchi.

³¹ Palta ax yic x'at eb', c'uxn x'ec' yal-l eb' 'a smasnil jun lugar cha, yuj tas 'ix sb'o Jesús 'a eb'.

B'onc spaxtin win matz uj spaxtini

³² Wanto s'at eb', 'ix 'ijx cot junx winc 'a Jesús. A win cha, matz uj spaxtini, yujto 'aych jun demonio 'a 'a.

³³ Ax yic x'el jun demonio chi 'a win yuj Jesús, 'ix syamn 'och win spaxtini. Yuj cha, caw sat sc'ojl eb' 'anma chi 'ayc' ta', 'ix laj yalnc eb' 'ixtic: —A 'a qui calc an̈ israel on̈c tic, mant 'a 'aj xquilc junc tas 'icha jun tic, xchi eb'.

³⁴ Palta ax eb' fariseo 'ix yaln eb' 'ixtic: —A jun winc tic, tztac' ton yi'n 'el win ewin demonio, yujto a win syajlil ewin 'aych yet' winac, xchi eb'.

'O'nc 'och sc'ojl Jesús 'a eb' 'anma'

³⁵ Ax Jesús c'uxn x'ec' 'a jun tzo'n̈ chon̈ab', yet' 'a jun tzo'n̈ aldea. 'Ix 'ec' cuywjoc 'a eb' 'anma 'a yoltc jun tzo'n̈ scapiya eb'. 'Ix yaln 'el wach' 'ab'ix, chajtl tz'aj eb' 'anma yoch 'a yol sc'ab' Dios. Tzann̈j jun tzo'n̈ yab'il tz'i'n eb' 'anma', c'uxn xlaj ya'cn b'oxc sc'ojl eb'.

³⁶ A yic x'och q'ueln 'a eb' 'anma cha, 'ix 'o'ch sc'ojl 'a eb', yujto lajn eb' 'icha jun tzo'n̈ calnelu may yilmal, caw 'aych eb' 'a syailal, caw cusc'ojlal yaj eb'.

³⁷ Yuj cha, xyaln 'a eb' scuywum chi 'ixtic: —A eb' 'anma tic, lajn eb' 'icha 'ixm trigo caw stiempoal xo spolxi. Wal yel, caw te'nto yab'xni eb', palta jaywn̈n̈ej mach tzmunlj 'a scal eb'.

³⁸ Yuj cha, leslwan̈c 'a jun 'aj munljel, sec 'oj schecb't eb' smunljum 'a scal eb', xchi Jesús.