Mt 4 - Chuj San Sebastian Bible

'Ajxnac prowal Jesús yuj win diablo

¹ 'Ix 'ijx 'at Jesús yuj Yespíritu Dios 'a cusltac lu'um, yic tz'ajx prowal yuj win diablo ta'.

² Chawinq'uin̈ may tas sc'uxu, yuj cha, caw x'och swejel.

³ 'Ix c'och win 'a'm prowal chi 'a 'a, 'ix yaln win 'ixtc 'a 'a: —'In yunnal ach Dios, yuj cha, al 'a jun tzo'n̈ q'uen tic, 'och cab' panil, xchi win 'a 'a.

⁴ —A Ch'an̈ Un̈ tz'ib'b'il cani, ata tzyal 'ixtic: Man̈ cojnoc yuj tas tzc'uxxi pitzn on̈ec, palta pitzn on̈c yuj smasnil tas tzyal Dios. 'Ixta tzyal 'a Ch'an̈, xchi Jesús 'a winac.

⁵ Xlajw cha, x'ijx 'at yuj win 'a jun chon̈b' yicn̈ej Dios yaji, atn Jerusalén. 'Ix yi'n q'ue win 'a schon yatut Dios.

⁶ 'Ix yaln win 'ixtc 'a 'a: —'In yunnal ach Dios, yuj cha, jul 'ejm a b'a 'a sat lum cha, yujto tzyal 'ixtc 'a Ch'an̈ Un̈ tz'ib'b'il cani: 'Oj ya' cot Cajlil eb' yángel ach stan̈woc. 'Oj ach squetz chan̈ eb', sec man̈ comnoc tza tench oc 'a q'uen q'ue'en, xchi 'a Ch'an̈, xchi win diablo cha.

⁷ 'Ix ta'w pax Jesús 'ixtic: —Palta tzyal pax 'ixtc 'a Ch'an̈ Un̈ tz'ib'b'il can cha: Man̈ eyac' prowal Cajlil qui Diosalec, xchi 'a Ch'an̈, xchi 'a winac.

⁸ Ax win diablo cha, 'ix yi'n 'at win jun 'ejm xo. 'Ix c'och eb' 'a jun niwquil tzalan, 'ix sch'oxn win smasnil jun tzo'n̈ niwc chon̈b' 'ay 'a yolyib'n̈q'uinl tic 'a 'a, chajtlto caw niwn yel'ch eb'.

⁹ 'Ix yaln win 'ixtc 'a 'a: —Smasnil jun tzo'n̈ tic, 'oj wac' eco'oc, toto tzach 'em cumn 'ayin, tzaln a b'a 'ayin, xchi win 'a 'a.

¹⁰ Xlajw cha, xyaln pax Jesús 'ixtc 'a winac: —Ach Satanás, 'ij 'el a b'a 'a in tz'ey, yujto tzyal 'ixtc 'a Ch'an̈ U'un̈: Cojn 'a Cajlil qui Diosalec tzeyal e b'a, cojn 'a tzeyac' servil, xchi 'a Ch'an̈, xchi Jesús 'a winac.

¹¹ Yuj cha, xyactn can win Jesús, 'ix 'at winac. Ax eb' ángel xwul 'a'nc servil Jesús cha.

Syamjnac 'och Jesús yopiso 'a Galilea

¹² A yic xyab'n Jesús to preso yaj Juan, 'ix 'atxi. Axta xc'och 'a yol yic Galilea.

¹³ Man̈oc 'a Nazaret 'ix c'ochi, palta a 'a Capernaum, ata xc'och cajan. A jun chon̈b' cha, a 'a sti a mar 'ay, 'a yol smacb'en eb' yin̈tl Zabulón yet' Neftalí.

¹⁴ 'Ixta x'aji, sec tz'el'ch tas tz'ib'b'il can yuj jun schecb' Dios pecti', atn Isaías yic yaln can 'ixtic:

¹⁵ A slugar Zabulón yet' yic Neftalí, a 'a sti a mar 'ay, 'a sc'axpil 'ec' a niwn a Jordán. Ata 'ay jun chon̈b' Galilea sb'i, 'ajtil cajn eb' man̈ israeloc.

¹⁶ A eb' 'anma cha, wan sb'ey eb' 'a scal q'uic'q'uinal, palta 'oj yil eb' sjaw jun niwquil sacq'uinl 'a scal. A jun sacq'uinl cha, 'oj c'och tzicnjoc yoc 'a scal eb' 'icha to chamnc 'a scal q'uic'q'uinl cha, xchi Isaías 'a Ch'an̈ Un̈ cha.

¹⁷ Ax yic xc'och Jesús 'a jun lugar cha, 'ix syamn 'och yaln 'el spaxti Dios 'a eb' 'anma', 'ix yaln 'ixtc 'a eb': Nac e b'a yuj e mul, yujto jab'xoj 'oj wach' 'och jun 'aj satchan̈ Yajlil, xchi 'a eb'.

Yawtjnac Jesús chan̈wn̈ eb' yamn chay

¹⁸ Yic wan sb'eyc' Jesús 'a sti a mar yic Galilea, 'ix yilni 'ayc' Simón atn pax tzcuch Pedro, yet' jun yu'tac Andrés sb'i. Wan ya'n 'ejm eb' jun schim yic syamlab' chay 'a yojl a', yujto yamn chay eb'.

¹⁹ 'Ix yaln Jesús 'a eb' 'ixtic: —'Ochn̈ec in cuywumoc, 'icha tzeyutj eyamn no chay tic, 'ixta 'oj eyutc eyi'n cot eb' 'anma 'ayin, xchi 'a eb'.

²⁰ Yajn̈j cha, xyactn can eb' schim cha, 'ix 'och eb' scuywumoc Jesús.

²¹ 'Ix 'at jab'xo, ax xyiln 'ati 'ayc' chawn̈ xo eb' yu'tac sb'a, atn Jacobo yet' Juan, atn eb' yunnal Zebedeo. 'Aych eb' 'a yol jun barco yet' smam cha, wan snipn eb' schim yic syamlab' chay. 'Ix yawtn cot Jesús eb'.

²² Yajn̈j cha, xyactn can eb' smam chi yet' jun barco cha, 'ix 'och eb' scuywumoc Jesús cha.

Yaljnac Jesús wach' 'ab'x 'a eb' 'anma'

²³ C'uxn x'ec' Jesús 'a yol yic Galilea chi yet' eb'. 'Ix 'ec' cuywjoc 'a yol jun tzo'n̈ scapiya eb' israel. X'ec' yalnc 'el wach' 'ab'ix, yuj chajtl tz'aj eb' 'anma yoch 'a yol sc'ab' jun 'aj satcha'an̈. Til wal tzann̈j yab'ilal tz'i'n eb' 'anma cha, xlaj b'ox can sc'ojl eb' yu'uj.

²⁴ C'uxn 'ix puccn 'el yab'xil 'a scal smasnil eb' 'aj Siria. Yuj cha, smasnil eb' ya'ay yuj tzann̈j yab'ilal, 'ix 'ijx cot eb' 'a 'a. An̈jtona yet' eb' tz'ixtx yuj ewin demonio yet' eb' tzcot owya 'a sjolom, yet' eb' sicb'nac 'eli, 'ix ya'n can b'oxc sc'ojl eb' smasnil.

²⁵ Til wal eb' 'aj Galilea 'ix laj 'och tza'n yu'uj, yet' eb' 'aj Decápolis, eb' 'aj Jerusalén, eb' 'aj Judea, yet' pax eb' 'a sc'axpil 'ec' a Jordán.