Mt 25 - Chuj San Sebastian Bible

A yab'xil lajn̈wan̈ eb' cob's 'ix

¹ 'Oj wal 'ayex chajtl 'oj 'aj eb' 'anma', yic 'oj sch'oxnc 'el sb'a Dios to wan ya'n yajlil. A 'a jun 'el, 'ay lajn̈wan̈ cob's 'ix, 'ix yij 'at eb' scantil 'a 'ac'wal, x'at eb' 'a jun nupnel, x'at schanc eb' sjaw win tznupn cha.

² Own̈ eb' may wal snab'en, own̈ eb' jelan.

³ A eb' may wal snab'en cha, man̈x 'a jacx yaceite eb' xyij 'at yet'oc, cojn jab' 'ay 'ejm 'a yol scantil eb' cha.

⁴ Ax eb' jelan, chuc 'ix yij eb' nan̈l xo yaceite.

⁵ Ax win tznupn cha, caw x'ec' hora sjaw winac. Yuj cha, caw xcot swayn̈ eb' 'ix, 'ix way eb' smasnil.

⁶ Palta ax 'a chim'ac'wal, 'ay jun mach 'ix 'awj 'ixtc 'a eb': Wal sjaw win tznupn tic, 'at chajec sjaw winac, xchi 'a eb'.

⁷ Yuj cha, 'ix q'ue wan eb', 'ix laj ya'nc 'och eb' scantil cha.

⁸ Ax eb' may wal snab'en, xyaln eb' 'a eb' jeln chi 'ixtic: 'A'c qui c'an e yaceite tic eyet' on̈, wal scaw tup quic tic on̈, xchi eb' 'a eb'.

⁹ Matz cac' on̈, lemb'il 'oj lajwc pax quic tic junx on̈. 'Ixquec, 'at manc jac eyic 'a 'aj tzchon̈xi, xchi eb'.

¹⁰ Yuj cha, x'at eb' 'ix chi sman yico'. 'Ayt 'at eb' 'ix, 'ix jaw win tznupn cha. A eb' lista xon yaj yet' scantil, 'ix 'ochcn eb' yet' win 'a 'aj tznupn cha, xlajwn̈ej cha, 'ix macx can te puerta.

¹¹ Ax yic 'ix japx eb' may snab'en cha, 'ix cob' 'awjc 'och eb' 'ixtic: Mamin, mamin, jacn̈ 'och on̈, xchi cob' eb'.

¹² Palta xyaln 'elt win 'ixtc 'a eb': Ma'ay, wal yel tzwal 'ayex, man̈ ex wojcoc, xchi win 'a eb' 'ix. 'Ixta tzyal jun 'abx tic.

¹³ Yuj cha, tzwal 'ayex, caw lista tzeyutj e b'a, yujto man̈ eyojcoc, 'aja sc'ual, yorail ['oj in jaw an 'Ochnc in 'Anmal tic.]

A yab'xil 'oxwn̈ eb' munljwum

¹⁴ 'Oj wal 'ayex chajtl 'oj 'aj eb' 'anma', yic 'oj sch'oxnc 'el sb'a Dios to wan ya'n yajlil. A 'a jun 'el, 'ay jun winc x'at 'a junx chon̈b' 'a najat. Yic mantzac 'ati, 'ix yawtn cot eb' smoso 'a 'a, 'ix ya'n can win jun tzo'n̈ stumn 'a yol sc'ab' eb'.

¹⁵ 'Ay jun 'aj 'ix yac' o'e talento, ax jun 'aj 'ix yac' chab' talento, 'ay pax jun 'aj 'ix yac' jun talento, a tzyal sjelnal junjn eb'. Xlajw cha, x'at winac.

¹⁶ Ax win moso xchan o'e talento cha, 'ix yac' win snegocio yet' q'ue'en; 'ix ya'n ganar win o'e xo.

¹⁷ 'Ixta pax win xchan chab' talento, 'ix yac' ganar win chab' xo.

¹⁸ Palta ax win xchan jun talento cha, x'at sjoy win lum lu'um, 'ix smucn can 'ejm win q'uen tumn chi ta'.

¹⁹ Niwn tiempo x'eq'ui, 'ixta to b'i'an, 'ix japx win spatron̈ eb' cha. 'Ix sb'on yaj win scuenta junjn eb'.

²⁰ A win chajnac o'e talento cha, a win xb'ab'l c'och 'a winac. 'Ix ya'n win q'uen o'e talento chi 'ix yac' ganar cha, 'ix yaln win 'a win spatron̈ chi 'ixtic: Mamin, a'jnac can o'e talento 'ayin, palta ticnec, yaj pax o'e xo yune q'uen xwac' ganar, xchi winac.

²¹ Wach' jun, caw wach' xotj a munlj 'ayin, caw tza b'o 'icha tzin nib'ej. Yujto yiclum ach yet' jab' tic, yuj cha, til to wal tas 'oj wac' 'ayach, 'ochan̈, tzaljan̈ wet'oc, xchi win 'a win smoso cha.

²² Xlajw cha, 'ix c'och win chajnac chab' talento cha, 'ix yaln win 'ixtc 'a win spatron̈ cha: Mamin, a'jnac can chab' talento tic 'ayin, palta ticnec, yaj pax chab' xo yune q'uen xwac' ganar, xchi winac.

²³ Wach' jun, caw wach' xotj a munlj 'ayin, caw tza b'o 'icha tzin nib'ej. Yujto yiclum ach yet' jab' tic, yuj cha, til to wal tas 'oj wac' 'ayach, 'ochan̈, tzaljan̈ wet'oc, xchi win 'a junx smoso cha.

²⁴ Palta ax yic 'ix c'och win chajnac jun talento cha, 'ix yaln win 'ixtic: Patron̈, wojtac, to ch'an ach, toxn̈ej tza jach'a, palta may tas tzawej, toxn̈ej tza chaj eco'oc tas tzyac' ganar junc xo 'anma'.

²⁵ Yuj cha, in xiw o'oj, xin mucn can 'ejm q'uen a tumn tic 'a yol lu'um, yaj q'uen a tumn tic smasnil, xchi winac.

²⁶ Palta xyaln win spatron̈ win chi 'ixtic: Ach tic cob' moso ach, palta may a ch'olnil, caw 'isj ach. 'In ojc xoni, toxn̈ej tzin jach'a, palta may tas tzwawej, toxn̈ej tzin chaj wico'oc tas tzyac' ganar junc xo 'anma'.

²⁷ Yuj cha, octom xa't q'uen in tumn tic majnil, sec wach' xin chaj pax q'uen yet' yune', yic in japx tic, xchi win 'a win smoso cha.

²⁸ Xlajwn̈ej cha, xyaln win 'ixtc 'a jun tzo'n̈ eb' 'ayc' ta': 'Ijec 'ec' q'uen talento chi 'a winac, 'a'c q'uen 'a win 'ay lajn̈e talento yic cha.

²⁹ Yujto a mach 'ay yico', 'oj wach' 'ajxoc 'a 'a, sec 'oj swach' 'a'c sobra yic cha. Ax eb' may wal yico', 'oj wach' 'ijxc 'ec' jab' yic eb' cha.

³⁰ Ax win moso may yopiso tic, tz'at e julcn 'at 'a 'aj 'ay q'uic'q'uinal. Ata 'oj 'oc'oc, 'oj juch'ch'oc ye yab'n syail, xchi winac.

A yic 'oj b'eyc'ojlaxc eb' 'anma'

³¹ An 'Ochnc in 'Anmal tic, 'oj in jaw yet' eb' wángel smasnil, caw niwn in poder, ax wem wocn 'a in despacho. Atta 'oj checljoc 'eli, to caw niwn wel'chi.

³² Ax junjn nacion̈al eb' 'anma', 'oj jawc eb' 'a wojltac. 'Icha junc 'ilm calnelu tzpoj 'elt no calnelu 'a scal no chiwo, 'ixta 'oj wutc in pojn snan̈l eb'.

³³ A eb' 'icha in calnelu, 'oj can eb' 'a in wach' c'ab', ax eb' 'icha chiwo, 'oj can eb' 'a in surito.

³⁴ An Rey in tic, 'oj wal 'ixtc 'a eb' 'ayc' 'a in wach' c'ab': Ax tic, ya'jnac in Mam swach'c'ojlal 'ayex, 'ochn̈ec wet' 'a 'aj tzwac' Yajlil, yictax sb'on Dios yolyib'n̈q'uinl tic, sb'on can jun tic eyico'oc.

³⁵ Yujto a yic yoch in wejel, eya'jnacn wa'oc; yic yoch pax in tacn̈ti'al, eya'jnac tas xwuq'uej, yic in b'eyc' 'icha junc b'eymal 'anma', eya'jnac in posada.

³⁶ Yic may wal in pichul, eya'jnac wico', yic ya'ay in, xit'nc ex in eyila', ax yic 'ayn 'och 'a preso, xit'nc ex in e c'umoc, 'oj in chic 'a eb'.

³⁷ Ax eb' tojl sb'eyb'al cha, 'oj yal eb' 'ixtc 'ayin: Mamin, ¿b'a'n̈i ach quil chi 'on̈, yic yoch a wejel, a tacntil cha? Toc 'ay tas ca'jnac 'aych on̈.

³⁸ ¿B'a'n̈i ach quil chi 'on̈, yic a b'eyc' 'icha junc b'eymal 'anma cha, yic ca'n a posada chi 'on̈? Ax yic may wal a pichl cha, toc 'ay tas ca'jnac 'aych on̈.

³⁹ Yic ya'ay ach, yet' 'a yic 'aych 'och 'a preso cha, toc 'ay 'aj xit' ach quiljnac on̈, 'oj schic eb' 'ayin.

⁴⁰ 'Ixta to b'i'an, ax waln 'ixtc 'a eb': Wal yel tzwal 'ayex, yic e b'on jun tzo'n̈ tic 'a eb' wico', wach'xam 'a eb' may yel'chi, tzyal 'el'chi, a 'ayn e b'ojnac jun tzo'n̈ cha, 'oj in chic 'a eb'.

⁴¹ 'Oj lajwc cha, ax waln 'a eb' 'ayc' 'a in surito: 'Eln̈ec ax tic 'a in tz'ey, yujto 'ay yowl sc'ojl Dios 'a eyib'an̈. 'Ixquec 'a jun c'ac' may b'a'n̈ tztupi, 'a jun lugar sb'ojnac Dios yico'oc win diablo, yet' eb' yángel winac.

⁴² Yujto yic yoch in wejel, ma'ix in eyac' wa jab'oc, yic yoch pax in tacn̈ti'al, ma'ix eyac' jac tas xwuq'uej.

⁴³ Yic in b'eyc' 'icha junc b'eymal 'anma', ma'ix eyac' in posada, yic may wal in pichul, may jac in pichl eya'jnac. An̈jtona', yic ya'ay in yet' 'a yic 'ayn 'och 'a preso, ma'ex xit' in eyil jab'oc, 'oj in chic 'a eb'.

⁴⁴ Yuj cha, ax yaln eb' 'ixtc 'ayin: Mamin, ¿b'a'n̈i ach quil chi 'on̈, yic yoch a wejel, a tacn̈til cha, yic a b'eyq'ui, yic may wal a pichl cha, yic ya'ay ach, yic preso aji? ¿Tom 'ay 'aj ma'on̈ colwj 'aych on̈? 'oj schic eb' 'ayin.

⁴⁵ Palta 'oj wal 'ixtc 'a eb': Wal yel tzwal 'ayex, a yic ma'ex colwj 'a jun tzo'n̈ eb' tic, wach'xam may yel'ch eb', tzyal 'el'chi, a 'ayn ma'ex colwji, 'oj in chic 'a eb'.

⁴⁶ A eb' cha, 'oj 'atcn eb' 'a yailal 'a jun 'ejmn̈ej. Palta ax eb' tojl sb'eyb'al, 'oj scha eb' sq'uinl 'a jun 'ejmn̈ej, xchi Jesucristo 'a eb'.