Mt 24 - Chuj San Sebastian Bible

Yaljnac Jesús,*r* to 'oj lajwc 'ejm yatut Dios

¹ 'Ix 'elt Jesús 'a yol sti yamq'uil yatut Dios, ax yic wan s'ati, 'ix jaw eb' scuywum 'a 'a, 'ix sch'oxn eb' jun tzo'n̈ n̈a 'ay 'a yamq'uil yatut Dios chi 'a 'a.

² Yuj cha, xyaln 'a eb' 'ixtic: —A jun tzo'n̈ niwc n̈a tic, c'uxn 'oj lan̈chjc 'ejm smasnil, yet' jun tzo'n̈ q'uen tusb'il q'ue tic, tzwal 'ayex to man̈x 'a junc 'oj can 'a yib'n̈ yit q'uenal, xchi 'a eb'.

Jun tzo'n̈ senya yic slajb' c'ual

³ Xlajw cha, 'ix 'at eb' 'a tzaln Olivo, x'at 'em wocn Jesús ta'. Ax eb' scuywum, 'ix jaw eb' sch'ocj 'a 'a, 'ix yaln eb' 'ixtic: —Tzqui nib'j tzal 'ayn̈ on̈, ¿b'a'n̈ 'oj jawc jun chi xal cha? ¿Tas junc senya 'oj sch'ox Dios yic jab'xoj 'oj a japxi, yet' 'a yic 'oj lajwc 'ec' jun tiempoal tic? xchi eb' 'a 'a.

⁴ Yuj cha, xyaln pax 'a eb' 'ixtic: —Caw tzeyil wal e b'a, sec may junc mach 'oj eyixtn paxti'.

⁵ Yujto til wal mach 'oj' 'esnc 'el in b'i, ax yaln eb' 'ixtic: An ton tic Cristo in, 'oj schic cob' eb'. Til wal 'anma 'oj yixtc paxti eb'.

⁶ 'Oj eyab' yoch jun tzo'n̈ niwc owal, ax eyab'n speclal jun tzon̈ xo 'ijn 'oj 'ochoc. Palta man̈ ex xiwoc, yujto yowlal 'ixta 'oj 'ajoc, palta mantoc a slajb' cha.

⁷ 'Ay jun tzo'n̈ niwc chon̈b' 'oj yac' owl sb'a yet' yit niwc chon̈b'al; ax ya'n owl sb'a eb' yajl yet' eb' yit yajlil. Til wal 'aj 'oj yamchjc eb' 'anma yuj yab'il, 'oj jawc pax wejl 'a yib'n̈ eb'. Til wal 'aj 'oj 'ec' pax quixcab'.

⁸ A jun tzo'n̈ yailal cha, ton̈j tzb'ab'lj cani, 'ayt wal jun tzo'n̈ xo yel xo tu 'oj jawoc.

⁹ Ax tic, 'oj eyajx 'och 'a yol sc'ab' eb' yajal, sec 'oj eyab' syal yuj eb', 'oj laj ex smil cham eb'. Smasnil 'anma 'oj laj chichnc 'och 'ayx wu'uj.

¹⁰ A 'a jun tiempoal cha, til wal mach 'oj meltzjoc pax 'a spatic, 'oj chichnc 'och eb' 'a eb' yitb'eym xon cha. Caw 'oj ya'ch eb' chaml 'a yib'n̈ eb'.

¹¹ Til wal mach 'oj pitzwc cha'an̈, ax cob' yalnc 'och sb'a eb' schecb'oc Dios, til wal mach 'oj yixtc paxti eb'.

¹² Caw 'oj niwtjoc maysch'olnilal, yuj cha, man̈x 'oj laj schamc'ojloc sb'a eb' 'anma'.

¹³ Palta a mach caw te'n tzyutj sb'a masnto 'a slajub', atn eb' chi 'oj colchjoc.

¹⁴ Ax jun wach' 'ab'ix, a tzalni chajtl tz'aj eb' 'anma yoch 'a yol sc'ab' Dios, yowlal 'oj alxc 'el 'a smasnil yolyib'n̈q'uinl tic, sec 'oj laj yab' eb' 'a junjn chon̈b'al. 'Ixta to b'i'an ax sjaw jun slajb' cha.

¹⁵ Palta 'ay jun win yajb'il yuj Dios, a 'oj 'a'nc juwc 'el jun tzo'n̈ tas. A Daniel win schecb' Dios pecti', a aljnac can yuj jun cha. A mach tz'iln jun 'ab'x tic, nachj cab' 'el yu'uj. A yic 'oj eyilnc jun chi 'a yol yatut Dios,

¹⁶ a eb' 'ayc' 'a Judea, 'at cab' eb' 'elc 'a tzalctac.

¹⁷ A eb' 'ay q'ue 'a span̈nil yib'n̈ yatut, yic tz'em paxt eb', man̈x cab' 'och eb' yic' 'elt junc tas 'a yol yatut cha, yic tz'at eb' 'eloc.

¹⁸ A eb' 'ayb't munljel, man̈x cab' 'at yic' eb' spichul.

¹⁹ A 'a jun tiempoal cha, a yic 'oj 'at eb' 'anma 'eloc, caw 'oltac eb' 'ix 'ix 'ayx tz'i'ni, yet' eb' tzyac' chuw yune'.

²⁰ C'anc 'a Dios, sec toq'ue man̈oc 'a stiempoal n̈ab'lq'uinal, mto 'a yic sc'ul 'iljelal, 'oj e 'at 'eloc.

²¹ Yujto a jun niwn yailal 'oj jawc 'a jun tiempoal cha, mant 'a 'aj tzyac' 'ixta', yictax sb'on Dios yolyib'n̈q'uinl tic. Cojxn pax jun cha, man̈x 'a tas 'oj yac' 'ixta'.

²² Toto a Dios ma'oj yac' c'ochmb'oc jun tiempoal yic yailal cha, may junc mach 'oj colchjoc can 'el 'a yol sc'ab' chamel. Palta yuj eb' sic'b'ilx 'el yu'uj, ax ya'n c'ochmb'oc.

²³ Toto 'ay mach tzaln 'ixtc 'ayex: 'Iltec, yaj Cristo 'a tic, mto yaj 'a cha, toto xchi, caw man̈ e cha eyab'i'.

²⁴ Yujto 'oj pitzwc chan̈ jun tzo'n̈ eb' 'oj cob' yalch sb'a Cristoal, yet' eb' 'oj cob' yalch sb'a schecb'oc Dios. 'Oj sch'ox eb' jun tzo'n̈ milagro senyaoc, sec 'oj 'ixtxoc paxti eb' 'anma yuj eb'. 'Oj ya'lc pax eb' yixtn paxti eb' sic'b'il 'el yuj Dios, palta ma'oj stac' yuj eb'.

²⁵ 'Aycto, tzwaln can jun tzo'n̈ tic 'ayex.

²⁶ Yuj cha, toto 'ay eb' 'oj alnc 'ixtc 'ayex: 'Ab'ec, 'ayc' Cristo 'a cusltac lu'um, toto 'oj schic eb', caw man̈ 'at eyila'. Toto 'ay pax eb' 'oj alnc 'ixtic: 'Ab'ec, yaj 'a yol jun cuarto 'a yol n̈a, toto 'oj schic eb', caw man̈ e cha eyab'i'.

²⁷ Yujto 'icha junc raya, c'uxn tzcheclj 'a yolyib'n̈q'uinl tic, tzcheclj 'a 'aj tzq'uel c'u, tzcheclj pax 'a 'aj tz'em c'u, 'ixta 'oj 'aj scheclj in jaw an 'Ochnc in 'Anmal tic.

²⁸ 'Icha pax 'aj tzcheclj sniwnal junc no chamnc noc', yujto ata tzyam sb'a no 'usej, 'ixta 'oj 'ajoc.

A sjawnb'il Jesús 'a scha'ejmal

²⁹ A 'a yic 'oj lajwc 'ec' jun niwn yailal cha, 'oj 'och q'uic'q'uinl 'a c'u, 'oj tup yoc 'uj, ax yemt jun tzo'n̈ c'anal, yujto 'oj stzicb'tan̈c Dios tas 'ay 'a satcha'an̈.

³⁰ 'Ixta to b'i'an, ax scheclj jun senya 'a satcha'an̈, chajtlto an 'Ochnc in 'Anmal tic, an tzin jawi. Ax eb' 'anma 'a junjn chon̈b' 'a yolyib'n̈q'uinl tic, 'oj 'oc' eb', yujto 'oj yil eb' in jaw 'a scal 'asun. Man̈ jantcoc in poder yet' in tzictznial, ax in jawi.

³¹ Ax q'uen trompeta, caw 'ip 'oj 'oc' q'ue'en, an xo 'Ochnc in 'Anmal tic, 'oj in chec cot eb' wángel 'ec' smolb'tzoc cot eb' sic'b'il 'el wuj 'a smasnil yolyib'n̈q'uinl tic. 'Oj 'ec' 'ijx cot eb' 'aj tzlajw c'och yolyib'n̈q'uinal, masnto 'a yib' cha'an̈.

³² 'Ab'c jun 'ab'x tic 'oj wal yuj te higo, a 'a yic tz'unnb'i sc'ab' te', yic wan xo xpac' xilte', eyojtac to jab'xoj sjaw n̈ab'lq'uinal.

³³ An̈jtona', a yic 'oj eyil sjaw smasnil jun tzo'n̈ xwal tic, nachj cab' 'el eyu'uj, chajtlto jab'xoj 'oj in jawi, 'icha to la'n xo waj 'a sti puerta.

³⁴ Wal yel tzwal 'ayex, ma'oj satl jun tzo'n̈ 'anma tic, masnto 'oj 'e'cn jun tzo'n̈ xwal tic smasnil.

³⁵ 'Oj lajwc 'ec' satcha'an̈ yet' yolyib'n̈q'uinl tic, ax in paxti', may b'a'n̈ 'oj lajwc 'eq'ui.

³⁶ Palta may mach 'ojtnac, 'aja c'u, jantc yorail 'oj in jawi. An̈jtona eb' ángel 'ay 'a satcha'an̈, man̈ yojcoc eb'. An xo tic, yunnaln Dios, palta man̈ wojcoc paxi, cojxn Dios Mamb'il a 'ojtnac.

³⁷ 'Icha jun tiempoal yic yec' win Noé, 'ixta 'oj 'aj jun tiempoal yic 'oj in jaw an 'Ochnc in 'Anmal tic.

³⁸ Yujto a yic mantzac jaw jun owl yaxn̈ab' cha, may tas tzna eb' 'anma', ton̈j wanc eb', laj yu'n eb' tas, laj yi'lan sb'a eb', laj ya'nc 'och eb' yisl yistloc eb' winac. 'Ixta yutjnac sb'a eb', masnto yic jun c'u yic yoch win Noé 'a yojl te barco.

³⁹ Palta ma'ix nachj 'el xon jac yuj eb', masnto xjaw jun yaxn̈ab' cha, ata xcham eb' smasnil. 'Icha 'ajnc eb' 'a jun tiempoal cha, 'ixta 'oj 'aj eb' 'anma', yic 'oj in jaw tza'njoc.

⁴⁰ Q'uinloc 'ay chawn̈oc winc 'ayb't munljel yic 'oj in jaw cha: 'Ay jun 'oj 'ijxc 'ati, ax jun 'oj canoc.

⁴¹ Q'uinloc 'ay chawn̈oc 'ix wan scheni: Jun 'oj 'ijxc 'ati, jun 'oj canoc.

⁴² Yuj cha, caw lista tzeyutj e b'a, yujto man̈ eyojcoc jantc yorail 'oj in jaw an Yajl in tic.

⁴³ Q'uinloc 'ay junc win 'ajn̈a ticnec, toto yojtac janc' tzjaw junc 'elc'm 'a 'ac'wal, caw lista 'oj yutc sb'a, sec ma'oj stac' yoch jun 'elc'm cha.

⁴⁴ Yuj cha, an̈jtona 'ex, caw lista tzeyutj e b'a, yujto a yic tze na'a to matz in jawi, lemb'il ata 'oj in jawi.

A eb' moso yet' spatron̈

⁴⁵ Q'uinloc 'ay junc win patron̈ yet' eb' smoso. A eb' yiclum, eb' 'ay snab'en, atn eb' 'oj ya'ch win yopiso ya'n cuenta yatut, yet' smasnil tas 'ay 'a 'a. ¿Palta mach eb' yiclum chi tze na'a?

⁴⁶ Atn eb' wan smunlj 'icha tznib'j win patron̈ cha, yic 'oj jawc win jun 'ejm xo. Caw wach' yic eb' cha.

⁴⁷ Wal yel tzwal 'ayex, 'oj ya'ch win eb' smoso chi yajlil 'a yib'n̈ smasnil tas 'ay 'a 'a.

⁴⁸ Palta toto maysch'olnil snab'en eb' moso cha, tzcob' sna eb', to ma'oj jawc win patron̈ chi muc'uc.

⁴⁹ Yuj cha, tzyamn 'och eb' sma'n eb' yit mosoal. Ton̈j tz'ec' eb' wac yet' eb' 'u'm 'an̈, tz'u'w 'an̈ pax eb' yet' eb'.

⁵⁰ Ax 'a jun c'u yic tzna eb' moso cha, to matz jaw win patron̈ cha, ata 'oj jawc 'a yorail man̈ yojcoc eb',

⁵¹ ax ya'n 'och win patron̈ chi jun niwn yailal 'a yib'n̈ eb', ax ya'n can 'at win eb' yet' eb' yit chab'satil cha. Ata 'oj 'oc' eb', caw 'oj juch'ch'oc ye eb' yab'n syail.