Mt 20 - Chuj San Sebastian Bible

A jun 'ab'x yic eb' munljum

¹ 'Ix yaln Jesús 'a eb' scuywum 'ixtic: —'Oj wal 'ayex tas tz'aj eb' 'anma yoch 'a yol sc'ab' Dios 'aj satcha'an̈. A 'a jun 'el, 'ay jun patron̈, 'ayt sacb'i sq'ue wa'an, x'at saync jaywn̈ smajn tzch'inn 'el te uva.

² A yic xchax eb', xya'n win strato yet' eb'. 'Ix yaln win 'a eb' to tz'acn tztoj win sc'u junjn eb'. Xlajw cha, schecn 'at win eb' 'a 'aj 'ay smunljel cha.

³ Ax 'a sq'uec'ual, x'at win 'a plas. Ax xyilni, 'ayc' jun tzo'n̈ winc may tas tzmunlej.

⁴ Yuj cha, xyaln win 'ixtc 'a eb': Toto tze nib'j tzex munlji, 'ixquec munljoc jac 'ayn 'a in lu'um. Yaln̈ej jantcto 'oj e munloc, tz'acn 'oj wac' e tojol, xchi win 'a eb'. Yuj cha, x'at eb' munljoc 'a winac.

⁵ Ax 'a chimc'ual, x'atx winac. Lajn xyutj win ya'n strato yet' jun tzo'n̈ xo eb' chi 'icha xyac' 'a sq'uec'ual. An̈jtona', 'ixta pax xyutj win 'a sutmjc'ual.

⁶ Ax 'a yemc'ual, 'ix 'atx win 'a plas. Ax xyilni 'ayc' jun tzo'n̈ xo winc may tas tzmunlej, xyaln win 'ixtc 'a eb': ¿Tas yuj ton̈j 'ayx 'ec' 'a tic tz'ec' c'u? ¿Tom may jac tze munlej? xchi winac.

⁷ Ma'ay, yujto may mach tzon̈ c'ann on̈, xchi eb' 'a winac. To 'ixta', 'ixquec munljoc jac 'ayn 'a in lum 'an, xchi win 'a eb'.

⁸ Ax 'a sq'uic'b'alil, xyaln win 'aj munljel chi 'ixtc 'a jun scaporal: 'Awtj cot eb' in majn cha, tza'n stojl eb'. A eb' slajb' xo x'och munljel, a eb' tza b'ab'l 'a'j stojol. Ax eb' xb'ab'l 'ochi, slajb' xo tzac' stojl eb', xchi winac.

⁹ Yuj cha, a eb' yemc'ul xo x'och munljel, a eb' xb'ab'l c'och scha stojol. Tz'acn schaj eb' stojl sc'u.

¹⁰ Ax eb' xb'ab'l 'och munljel cha, a snan eb' to yel xo niwn stojl eb' 'oj scha'. Palta an̈jtona', cojn stojl sc'u eb' chi tz'acn scha'aj.

¹¹ Ax yic xchan eb' stojl cha, xcot yowl eb' 'a winac.

¹² 'Ix yaln eb' 'ixtic: A wal ewin slajb' xo x'och munljel, jun wal hora xmunlj ewinac. Palta tz'acn xa toj sc'u ewin 'icha tzac' 'ayn̈ tic on̈. Palta 'in xcac' techjoc jun c'u on̈, til wal pax c'ac', xchi eb' 'a winac.

¹³ Palta xyaln win patron̈ chi 'a jun win 'a scal eb' 'ixtic: Ach in wach'c'ojol, man̈ tuc tzwutj in b'a 'ayach. 'In xcac' qui trato chajtlto jun c'u tzach wutj ach in tojni.

¹⁴ Yuj cha, chaj a tojl tic, paxan̈. Ax jun tzo'n̈ xo eb' slajb' xo x'och munljel, x'el 'a in c'ojol to tz'acn xwac' stojl eb' 'icha tzwac' 'aych tic.

¹⁵ Yujto an 'ay waln wic wa'n in tumn 'icha tzin nib'ej. Matz tac' a chichn 'och 'ayin, yujto wach' tzwutj in b'a 'a junc xo mach, xchi winac. 'Ixta tzyal jun 'ab'x tic.

¹⁶ Yuj cha, a eb' may yel'ch ticnec, yel xo niwn 'oj 'aj 'el'ch eb'. Ax eb' niwn yel'ch ticnec, may yel'ch 'oj 'aj eb' ta'. [Til wal eb' 'awtb'il yuj Dios, palta jaywn̈n̈ej eb' tzsi' cha'an̈,] xchi Jesús 'a eb'.

'Aycto yaln pax Jesús yuj schamlil

¹⁷ Ax Jesús, 'ix 'atx yet' eb' ajun yet'oc, yic tz'at eb' 'a Jerusalén. Yic wan sb'ey eb' 'a yol b'e, 'ix yawtn 'elt eb' scuywum slajchwan̈il 'a scal eb' 'anma cha, 'ix yaln 'a eb' 'ixtic:

¹⁸ —'Iltec, wan qui 'atc 'a Jerusalén ticnec. An tic, wach'xam 'Ochnc in 'Anma'il, palta 'oj wajx 'och 'a yol sc'ab' ewin sat ya'mal 'och qui ti 'a Dios, yet' 'a yol sc'ab' ewin cuywjum 'a ley yic Moisés. 'Oj ya'ch eb' chaml 'a wib'an̈.

¹⁹ 'Oj wajx 'och 'a yol sc'ab' eb' man̈ israeloc. 'Oj in sb'uch eb'. 'Oj in smac' eb'. 'Oj in yac' q'ue eb' 'a spenc culus. Palta ax 'a schab'jial, ax in pitzw paxi, xchi 'a eb'.

A tas sc'an snun Jacobo yet' Juan

²⁰ A 'ix yistzil win Zebedeo, 'ix c'och 'ix 'a Jesús yet' chawn̈ eb' yune', atn Jacobo yet' Juan. 'Ix 'em cumn 'ix sc'och 'a yojltac Jesús, yujto tznib'j 'ix sc'an junc tas 'a 'a.

²¹ Yuj cha, xyaln 'a 'ix 'ixtic: —¿Tas tza nib'j tza c'an 'ayin? xchi. —A 'a yic 'oj och Yajlil, comnoc tza chaj 'ejm wocn eb' wune tic 'a a tz'ey, junc 'a a wach' c'ab', junc 'a a surito, xchi 'ix 'a 'a.

²² Yuj cha, 'ix yaln 'ixtc 'a ewin schawn̈il: —Palta matz nachj 'el eyu'uj, tas tze c'an 'ayin. ¿'Ojm techjoc eyu'uj yic 'oj eyajx prowal 'icha 'oj waji? A wal jun tas 'oj jawc 'a wib'an̈, ¿tom 'oj techjoc eyu'uj? xchi 'a eb'. —'Oj techjoc, xchi eb' 'a 'a.

²³ —Wal yel, 'oj eyajx prowal 'icha 'oj waji. 'Icha 'oj wutc wab'n syal an tic, 'ixta 'oj eyab' pax syal jun xo. Palta an tic, may waln wic ex wa'n 'em wocn 'a in wach' c'ab', mto 'a in surito. Yujto a qui Mam Dios a b'ojnac xoni, mach eb' 'oj 'em wocn ta', yuj cha, atn eb' 'aj 'oj 'ajxoc, xchi 'a eb'.

²⁴ Ax lajn̈wan̈ xo eb' scuywum, yic xyab'n eb' jun tzo'n̈ cha, xcot yowl eb' 'a eb' chawn̈ cha.

²⁵ Yuj cha, 'ix yawtn cot Jesús eb' slajchwan̈il, 'ix yaln 'a eb' 'ixtic: —Eyojc xoni, a eb' 'aych yajlil 'a junjn niwc chon̈ab', caw tzyac' mandar eb'. Ax eb' niwc winac, caw yajl yaj eb' 'a yib'n̈ eb' 'anma'.

²⁶ Palta ax tic, man̈ 'ichcta 'oj 'aj 'a e cal. Toto 'ay ex, tze nib'j caw niwn eyel'ch 'a e cal, yowlal tzex 'och ya'malc servil eb' eyit cuywumal smasnil. Toto 'ixta', caw niwn eyopiso.

²⁷ An̈jtona', toto 'ayx tze nib'j tzex 'och 'a junc niwc 'opiso, yowlal tzex 'och mosoal 'a eb' eyit cuywumal.

²⁸ 'Ixta pax in an 'Ochnc in 'Anmal tic, man̈ yujoc wajx servil in jawi, palta yuj wa'w servil. In jaw wul wac' milxoc cham in b'a, sec wach' til wal mach 'oj colchjoc wu'uj, xchi 'a eb'.

Jacwnac sat chawn̈ winc yuj Jesús

²⁹ Ax yic wan s'atx eb' 'a Jericó 'aj 'ayc' cha, til wal 'anma x'och tza'n yuj Jesús.

³⁰ Ax 'a sti b'e, wocn 'ejm chawn̈ winc matz uj yilni. Yic 'ix yab'n eb' to wan yec' Jesús ta', caw 'ip 'ix 'awj chan̈ eb' 'ixtic: —Mamin, ach Yin̈tl can David, comnoc tz'o'ch a c'ojl 'ayn̈ on̈, xchi eb' 'a 'a.

³¹ Palta ax eb' 'anma xcob' tennc 'och wan eb', sec sictac tz'aj eb'. Palta caw 'ip 'ix swach' alj eb' 'ixtic: —Mamin, ach Yin̈tl David, comnoc tz'o'ch a c'ojl 'ayn̈ on̈, xchi eb' 'a 'a.

³² Yuj cha, x'och wan Jesús, 'ix yawtn cot eb' 'a 'a. —¿Tas tze nib'j tzex wutej? xchi 'a eb'.

³³ —Mamin, caw tzqui nib'j tza jac qui sat tic on̈, xchi eb' 'a 'a.

³⁴ Yuj cha, 'ix 'o'ch sc'ojl Jesús 'a eb', 'ix stzayn 'och sc'ab' 'a yol sat eb', yajn̈j wal cha, xjacw sat eb', xlajw cha, x'och tza'n eb' yu'uj.