Mt 19 - Chuj San Sebastian Bible

Yaljnac Jesús yuj eb' tzpoj sb'a

¹ Ax yic xlajw yaln Jesús jun tzo'n̈ cha, 'ix cotx 'a Galilea 'aj 'ayc' cha. 'Ix jaw 'a yol yic Judea, 'a sc'axpil 'ec' a niwn a Jordán.

² Caw niwn 'anma x'och tza'n yu'uj. Xya'n can b'oxc sc'ojl eb' ya'ay ta'.

³ 'Ay jun tzo'n̈ ewin fariseo xjaw 'a 'a. Tznib'j ewin yac' prowal, yuj cha, 'ix sc'anb'n ewin 'ixtc 'a 'a: —¿'Aym sleyl tzpoj sb'a junc winc yet' yistl yuj tzann̈j junc tas? xchi ewin 'a 'a.

⁴ Yuj cha, xyaln 'ixtc 'a ewinac: —¿Tom mant 'a 'aj xeyil 'a Ch'an̈ U'un̈, to a yic sb'on can Dios yolyib'n̈q'uinl tic, sb'ojnac win winac yet' 'ix 'ix?

⁵ Yaljnac can 'ixtic: Yuj cha, a eb' winac yowlal tzyactj can eb' smam snun, sec junxn̈ej tz'ajcn eb' yet' yistzil. 'Icha wal to junxn̈ej niwnal tz'ajcn eb' schawn̈il, xchi.

⁶ Yuj cha, man̈x chawn̈oc eb', junxn̈ej tz'ajcn eb'. Yujto a eb' junxn̈ej tz'ajcn yuj Dios, 'ay yowlal spojn sb'a eb', xchi Jesús 'a ewinac.

⁷ 'Ix yaln pax ewin 'ixtc 'a 'a: —¿Palta tas yuj yaljnac can Moisés, to tztac' ya'n junc winc yun̈al yic pojjb'al 'a yistzil yic tzpojn sb'a eb'? xchi ewin 'a 'a.

⁸ —Yuj e pital yaln can Moisés to tztac' e pojn e b'a yet' eyistzil. Palta yictax sb'on Dios yolyib'n̈q'uinal, man̈ 'ichcta yaj yu'uj.

⁹ Yuj cha, tzwal 'ayex, tzann̈j mach tzpoj sb'a yet' yistzil, tzyi'n junc xo 'ix, tz'ochcn 'ajmulal. Cojn toto tzmuln 'ix yet' junc xo winac, tztac' spojn sb'a win yet' 'ix. [A pax mach tzyij sb'a yet' junc 'ix spojjnac sb'a yet' yichmil cha, tz'och win 'ajmulal yet' 'ix, xchi 'a ewinac.]

¹⁰ Ax eb' scuywum 'ix aln 'ixtc 'a 'a: —Toto jun 'ejmn̈ej tzcan junc winc yet' yistzil, to 'ixta', yel xo am wach' matz ca'ch xon quistzil, xchi eb'.

¹¹ Yuj cha, xyaln pax 'a eb' 'ixtic: —Palta man̈ smasnilc 'anma tztechj yuj jun tzeyal tic. Cojn eb' 'aj tzcolwj Dios, a eb' tztechj yu'uj.

¹² 'Ay jun tzo'n̈ eb', yictax yalj eb' palta xon yaj eb', yuj cha, matz tac' yoch yistl eb'. 'Ay pax eb' tzat juw yuj eb' 'anma', yuj cha, matz tac' yoch pax yistl eb'. 'Ay pax eb' matz ya'ch xon yistzil, yujto cojxn Cajlil 'ayc' 'a satcha'an̈, an̈j tznib'j eb' tzyac' servil. A eb' tz'a'n techjoc jun tic, techj cab' yuj eb', xchi Jesús 'a eb'.

X'ijx cot eb' 'unn 'a Jesús

¹³ Xlajw cha, 'ay jun tzo'n̈ eb' 'unn 'ix yij cot eb' 'anma 'a Jesús, sec tzyab't sc'ab' 'a sjolm eb', tzleslwi yuj eb'. Palta ax eb' scuywum xtenn 'och wan eb'.

¹⁴ Yuj cha, xyaln Jesús 'a eb' scuywum chi 'ixtic: —Chajec cot eb' 'unn 'ayin. Man̈ e tench wan eb'. Yujto cojn eb' lajn snab'en 'icha eb' 'unn tic, an̈j eb' 'ay yaln yic yoch 'a yol sc'ab' Dios 'aj satcha'an̈, xchi 'a eb'.

¹⁵ 'Ixta to b'i'an, xya'n 'at sc'ab' 'a sjolm eb'. Xlajw cha, x'atx 'a jun lugar cha.

A yab'xil jun quelm rico

¹⁶ A 'a jun 'el, 'ay jun win quelm xjaw 'a Jesús, 'ix sc'anb'n win 'a 'ixtic: —Ach in wach' Cuymal, tzin c'anb'j 'ayach, ¿tas junc wach' tzin b'o'o, sec 'oj in cha in q'uinl 'a jun 'ejmn̈ej? xchi win 'a 'a.

¹⁷ —¿Tas yuj tzin al wach'il? Cojxn jun mach wach', [atn Dios] may junc xo. Toto tza nib'j tza chaj a q'uinal, yiclj jun tzo'n̈ schecnb'il Dios, xchi 'a winac.

¹⁸ —¿'Ajm 'a jun tzo'n̈ checnb'il chi tzin yiclej? xchi win 'a 'a. —Man̈ a mil cham junc et 'anma'il. Man̈ a b'o 'ajmulal 'a yol sc'ab' estzil. Man̈ ach 'elc'woc. Man̈ 'a'ch 'es 'a yib'n̈ et 'anma'il.

¹⁹ 'Ay cab' yel'ch a mam a nun 'a a sat. Chamc'ojlej eb' et 'anma'il, 'icha tzotj a chamc'ojlan a b'a, xchi 'a winac.

²⁰ —Yictax in cot'ch yune'al, tzin yiclj jun tzo'n̈ checnb'il tic smasnil. Palta ¿'ayt am tzyac' palta in b'oni? xchi winac.

²¹ Toto tza nib'j man̈x 'a jac a paltail, 'ixic, 'at chon̈cn 'el jantcn̈ej tas 'ay 'ayach, tza'n stojl 'a eb' meb'a', sec 'oj a cha a ricoal 'a satcha'an̈. Tzlajw cha, tzach japx 'ayin, ax och in cuywumoc, xchi Jesús 'a winac.

²² A yic xyab'n win jun tzo'n̈ cha, caw cusc'ojlal xpax winac, yujto til wal tas 'ay 'a 'a.

²³ Xlajw cha, xyaln pax Jesús 'ixtc 'a eb' scuywum: —Wal yel tzwal 'ayex, a wal eb' rico, caw teb'il 'oj 'och eb' 'a yol sc'ab' Dios 'aj satcha'an̈.

²⁴ Tzwaln pax 'ayex: Q'uinloc 'ay junc no cameyo, ¿tom 'oj stac' yec' no 'a yixl junc 'acxa'? 'Ixta eb' rico, yel xo wal teb'il 'oj 'och eb' 'a yol sc'ab' Dios, xchi 'a eb'.

²⁵ Yic 'ix yab'n eb' scuywum jun cha, caw sat sc'ojl eb'. 'Ix laj yal-lanc eb' 'ixtic: —Toto 'ixta', ¿macht wal 'oj stac' scolchji? xchi eb'.

²⁶ Yuj cha, 'ix 'och q'ueln Jesús 'a eb', 'ix yaln 'ixtic: —A jun tic may junc 'anma tztac' yu'uj. Palta cojn Dios tztac' yu'uj, yujto tzta'n̈j yuj smasnil, xchi 'a eb'.

²⁷ Ax Pedro 'ix aln 'ixtc 'a 'a: —Mamin, an̈ tic on̈, 'in xcan smasnil tas cuj on̈, on̈ 'och a cuywumoc on̈. Yuj cha ¿tasm spac 'oj qui cha 'on̈? xchi 'a 'a.

²⁸ —Wal yel tzwal 'ayex: At 'a yic 'oj 'a'tb'oc smasnil tas, ax e chan spac eyico'. An 'Ochnc in 'Anmal tic, 'oj wem wocn 'a in despacho 'a 'aj 'oj checljoc 'el in poder. Ax xo ex 'och in cuywumoc tic, 'oj eyem wocn e lajchwan̈il 'a junjn e despacho. Ax e b'eyc'ojlan eb' quit israelal slajchw macn̈il.

²⁹ Tzann̈j mach tzyactj can yatut wu'uj, mto yu'tac, yanab', mto smam snun, mto yunnal, mto slum tzyactj can wu'uj, a jun cha, caw niwn spac 'oj scha'. Ax schan pax sq'uinl 'a jun 'ejmn̈ej.

³⁰ 'Ay eb' 'anma niwn yel'ch 'a qui calc ticnec. Palta a eb' cha, niwn eb' toxn may jac yel'ch 'a yic jun tiempoal cha. An̈jtona', 'ay eb' may jac yel'ch 'a qui calc ticnec. Palta a eb' cha, niwn eb' caw 'ay yel'ch 'a yic jun tiempoal cha, xchi Jesús 'a eb'.