Mt 18 - Chuj San Sebastian Bible

A eb' niwn yel'chi

¹ A 'a jun tiempoal cha, xjaw eb' scuywum Jesús 'a 'a, 'ix sc'anb'n eb' 'a 'ixtic: —¿Mach junc caw niwn yel'ch 'a scal eb' 'aych 'a yol sc'ab' Dios 'aj satcha'an̈? xchi eb' 'a 'a.

² Ax Jesús 'ix yawtn cot jun 'unin, xyi'n 'och 'a scal eb'.

³ 'Ix yaln 'a eb' 'ixtic: —Wal yel tzwal 'ayex, toto matz e jel e nab'en, toto man̈ lajnoc tz'aj e nab'en 'icha eb' 'unn tic, ma'oj stac' eyoch 'a yol sc'ab' Dios.

⁴ Yuj cha, a eb' 'emmquil tzyutj sb'a 'icha jun 'unn tic, an̈j eb' caw niwn yel'ch 'a scal eb' 'aych 'a yol sc'ab'.

⁵ Tzann̈j mach tzchan junc 'unn 'icha jun tic, yujn̈ej to wico', an tzin scha'aj.

'Ay smay tzjuw 'el qui nab'enec

⁶ Toto 'ay mach tz'a'n juwc 'el snab'en junc 'unn tzya'ch sc'ojl 'ayin, caw 'oltac jun cha. Octom tzb'ab'l jalx 'och junc niwquil q'uen cha 'a sjaj, tzjulx can 'at 'a yojl a mar, yic mantzac juw 'el snab'en jun chi yu'uj. Toto 'ixta', yel xo wal wach' yico'.

⁷ 'Oltac wal eb' 'anma yuj jun tzo'n̈ tas tz'a'n juwc 'el snab'en. Smasnil tiempo 'ay jun tzo'n̈ cha, palta a wal eb' tzc'anlb'ani, tzya'n eb' juwc 'el snab'en yit 'anma'il, caw wal 'oltac eb'.

⁸ Toto yuj junc e c'ab' mto yuj junc eyoc tzjuw 'el e nab'en, yel xo wach' tze tzu'li, tze juln can 'eli, sec ma'oj juwc 'el e nab'en 'a jun 'ejmn̈ej. Yujto wach'xam man̈x ex tz'acnoc, toto 'oj e cha e q'uinl 'a jun 'ejmn̈ej, caw wach' eyico'. Palta wach'xam tz'acn e c'ab' yet' eyoc, toto 'oj e 'atcn 'a scal jun c'ac' may b'a'n̈ tztupi, toto 'ixta', caw maysch'olnil eyico'.

⁹ Toto yuj junc yol e sat tzjuw 'el e nab'en, yel xo wach' tzeyij 'elta, tze juln 'eli, sec ma'oj juwc 'el e nab'en yuj 'a jun 'ejmn̈ej. Yujto wach'xam cojn jun yol e sat, toto 'oj e cha e q'uinl 'a jun 'ejmn̈ej, caw wach' eyico'. Palta wach'xam tz'acn yol e sat, toto 'oj e 'atcn 'a scal c'ac' 'a infierno, toto 'ixta', caw maysch'olnil eyico'.

A yab'xil jun calnelu tzsati

¹⁰ Caw man̈ e patquilc can 'el eb' 'unn tic. An tzwal 'ayex, a eb' ángel tztan̈wni junjn eb', 'ayc'n̈ej eb' 'a yojltac qui Mam Dios 'a satcha'an̈.

¹¹ [An 'Ochnc in 'Anmal tic, in jaw wul wac' colchjoc 'el eb' satncto.]

¹² Q'uinloc 'ay junc mach 'ay junc ciente scalnelu, toto tzsat junc no', tzyactj can win no 99 chi 'a lum tzalan, tz'at saync 'ec' win jun no tzsat cha.

¹³ Toto tzchax no yuj winac, caw tzalj win yu'uj. Ax no matz sat cha, 'icha to matz tzalj win yu'uj.

¹⁴ 'Ixta pax qui Mam 'ayc' 'a satcha'an̈, matz nib'j 'ay junc tzsat 'a scal eb' 'unn tic.

Yowlal tzca'c niwnc'ojlal

¹⁵ Q'uinloc 'ay junc eyit creyenteal tz'och smul 'ayex, tzex 'at e ch'ocoj, tz'at eyal 'a 'a, chajtlto x'och smul 'ayex. Toto tzchaj yab' 'ayex, tox 'ix eyac' ganar e montn jun eyit 'anmal chi tzyal cha.

¹⁶ Palta toto matz chaj yab' 'ayex, wach' tzeyij 'at jun chawn̈oc mach tz'at alnoc eyet' 'a 'a. 'Ay cab' chawn̈oc mto 'oxwn̈oc testigo, sec wach' 'ay yip smasnil tas tzalxi, 'icha tzyal 'a spaxti Dios tz'ib'b'il cani.

¹⁷ Palta toto an̈ja matz chaj yab' 'a eb', yel xo wach' tzeyal 'a iglesia. Toto an̈ja matz chaj yab' pax 'a eb', cann̈j cab' 'ixta'. 'Icha junc comn 'anma man̈ 'ojtnacoc Dios, mto junc tecm 'el tumin, 'ixta cab' tz'ajcn 'a e sat.

¹⁸ Wal yel tzwal 'ayex, tzann̈j tas 'oj eyal to 'ay yowlal 'a yolyib'n̈q'uinl tic, 'ay pax yowlal 'a sat Dios 'aj satcha'an̈. An̈jtona', tzann̈j tas 'oj eyal to may yowlal 'a yolyib'n̈q'uinl tic, may pax yowlal 'a sat Dios.

¹⁹ Tzwaln pax 'ayex, toto 'ay chawn̈oc ex lajnn̈ej e nan yuj junc tas tze c'an 'a e lesal, ax qui Mam 'ayc' 'a satcha'an̈, 'oj ya'n̈j 'ayex.

²⁰ Yujto tzann̈j 'aj 'ay chawn̈oc mto 'oxwn̈oc mach tzyam sb'a, yic tzyaln sb'a eb' 'ayin, 'ayn 'ec' yet' eb', xchi Jesús.

²¹ Ax Pedro xjaw 'a stz'ey, 'ix yaln 'a 'a: —Mamin, toto 'ay junc wu'tac niwn 'ejm tz'och smul 'ayin, ¿jay 'ejm tzwac' niwnc'ojlal 'a 'a? ¿Yowlal am tzwac' niwnc'ojlal uc 'ejmoc 'a 'a? xchi.

²² —Tzwal 'ayach, man̈ cojnoc uc 'ejmoc tzac' niwnc'ojlal 'a 'a. Wach'xam uc 'ejm setenta 'ejm tz'och smul 'ayach, yowlal an̈ja tzac' niwnc'ojlal 'a 'a.

A yab'xil jun win may sniwnc'ojlal

²³ 'Oj wal 'ayex, chajtl 'oj 'aj eb' 'ayx 'och 'a yol sc'ab' Dios 'aj satcha'an̈. Q'uinloc 'ay jun rey tzb'o yaj scuenta eb' smoso.

²⁴ A yic wan syamn 'och sb'onyaj jun tzo'n̈ cuenta cha, tz'ijx cot jun smoso chi 'a 'a, caw man̈x b'ischjb'enoc sb'oc 'a win patron̈ cha.

²⁵ Palta a jun winc cha, caw may stumin, man̈xtzac stac' ya'n meltzjoc jun tzo'n̈ sb'oc cha. Yuj cha, tzyaln win rey cha, to yowlal tzchon̈x 'el win yet' yistzil, yet' yunnal yet' jantcn̈ej tas 'ay 'a 'a, sec toq'ue tztup sb'oc win cha.

²⁶ Ax win moso cha, tz'em cumn win 'a yojltac win rey cha. Caw tztew 'och win 'a 'ixtic: Mamin, caw niwn tzotj a c'ojl 'ayin. Caw jab'jnal 'oj wac' tup in b'oc chi 'aych smasnil, xchi winac.

²⁷ Yuj cha, tz'o'ch sc'ojl win rey chi 'a winac. Tzya'n can lajwc win jun tzo'n̈ sb'oc win chi smasnil, tz'el win 'a libre.

²⁸ Ax yic tzlajw yel win 'a libre cha, tz'ilchj junc win yit mosoal win yu'uj, 'ay jac sb'oc jun win chi 'a winac. Yuj cha, tz'och b'annjoc win 'a sjaj winac, tzyaln win 'ixtic: 'A' cot q'uen a majn tumn 'ayn mu'c wal ticnec, xchi winac.

²⁹ Palta tz'em cumnjoc jun 'ay sb'oc chi 'a yojltac winac. Tztew 'och 'a win 'ixtic: Caw niwn tzotj a c'ojl 'ayin, jab'jnal 'oj wac' tup in b'oc chi 'aych smasnil, xchi 'a winac.

³⁰ Palta matz yal sc'ojl win tzyac' niwnc'ojlal. Yuj cha, tz'at ya'nc 'och win 'a preso, masnto tzya'cn sb'oc chi 'a winac.

³¹ Ax tzyiln jun tzo'n̈ xo eb' yit mosoal cha, yuj tas tzb'o winac, caw tzcus eb' yilni. Yuj cha, tz'at yalnc eb' 'a win rey cha.

³² Ax win rey cha, tzya'n win 'awtxoc paxt winac. Tzyaln 'a winc 'ixtic: Ach in moso, caw maysch'olnil a nab'en. 'In xwac' lajwc jun tzo'n̈ a b'oc smasnil, yujto ach tew 'och 'ayin.

³³ Octom wal x'o'ch a c'ojl 'a win et mosoal cha, 'icha x'o'ch in c'ojl 'ayach, xchi win 'a winac.

³⁴ Yuj cha, caw tzcot yowl win rey cha, tzyaln winac to tz'ajx 'och win 'a syailal, toq'ue tztupl win sb'oc chi smasnil.

³⁵ Yuj cha, ax tic, toto matz eyac' niwnc'ojlal 'a eb' eyit 'anmal 'a smasnil e c'ojol, to 'ixta', 'ixta 'oj ex yutc pax qui Mam Dios 'ayc' 'a satcha'an̈, xchi Jesús 'a eb'.