Mt 15 - Chuj San Sebastian Bible

A tas tz'a'n juwc 'el qui nab'enec

¹ 'Ay jun tzo'n̈ ewin fariseo yet' ewin cuywjum 'a ley yic Moisés, 'ix cot ewin 'a Jerusalén. 'Ix syamn sb'a ewin 'a 'aj 'ayc' Jesús. 'Ix sc'anb'n ewin 'a 'ixtic:

² —¿Tas yuj matz b'eylb'ej eb' a cuywum sb'eyb'al eb' qui mam quichmec? 'In a yic tzwa eb', matz b'icl eb' sc'ab' 'icha tzyal sley eb' qui mam quichmec, xchi eb' 'a 'a.

³ Yuj cha, xyaln Jesús 'a eb' 'ixtic: —Ax xo tic, ¿tas yuj matz eyiclj jun tzo'n̈ schecnb'il Dios? An̈j jun tzo'n̈ sley eb' e mam eyichm tze b'eylb'ej.

⁴ Yujto yaljnac can Dios 'ixtic: 'Ay cab' yel'ch e mam e nun 'a e sat. A mach tzb'aj smam snun, milx cab' chamoc, xchi Dios.

⁵ Palta ax xo tic, tzeyala, to man̈ yowlalc tzcolwj junc mach 'a smam snun. Toto 'ay junc mach tzaln 'ixtc 'a smam snun: Matz tac' tzin colwj 'ayex, yujto jantcn̈ej tas 'ay 'ayin, yicn̈ej Dios yaji, toto xchi, caw wach' tzeyab'i.

⁶ Ax xo tic tzeyala, toto 'ay mach tzaln 'ixta', man̈x yowlalc tzcolwj 'a smam snun. 'Ixta tzeyutj eyixtn 'el schecnb'il Dios, yujto an̈j jun tzo'n̈ sley e mam eyichm tze b'eylb'ej.

⁷ Caw chab'sat ex. Yel ton tas yaljnac can Isaías eyu'uj, yic yaln can 'ixtic:

⁸ A eb' 'anma tic, tzcob' yal eb' to 'ay wel'ch 'a sat eb', palta ax snab'en eb' caw najt yajl 'ayin.

⁹ Nab'an̈ej tzcob' yal sb'a eb' 'ayin, palta cojn jun tzo'n̈ checnb'il tzlaj spitz chan̈ eb' 'anma', a chi tzyac' eb' cuyxoc, xchi Dios 'a Ch'an̈ U'un̈, xchi Jesús 'a ewinac.

¹⁰ Xlajw cha, xyawtn cot eb' 'anma 'a 'a, 'ix yaln 'ixtc 'a eb': —'Ab'ec, nachj cab' 'el eyu'uj tas 'oj wala'.

¹¹ A jun tzo'n̈ tas tz'och 'a qui ti', matz on̈ juw yuj 'a sat Dios. Palta a jun tzo'n̈ tas tz'elt 'a qui ti', a tzon̈ 'a'n juwc 'eli, xchi 'a eb'.

¹² Yuj cha, xjaw eb' scuywum 'a stz'ey, 'ix yaln eb' 'ixtc 'a 'a: —¿Ojc ama to caw xcot yowl ewin fariseo yuj jun xal tic? xchi eb' 'a 'a.

¹³ Palta xyaln pax 'a eb' 'ixtic: —Jantcn̈ej jun tzo'n̈ te man̈ 'awb'ilc yuj qui Mam 'ayc' 'a satcha'an̈, 'oj to'x q'uet yet' sch'an̈l yib'. Yuj cha, 'icha junc te chi tzto'x q'uet cha, 'ixta 'oj 'aj eb'.

¹⁴ Yuj cha, yilx ewinac, lajn ewin 'icha junc mach matz uj yilni, tzcob' squetznc 'at junc xo mach matz uj yiln chi yet'oc, ax tz'aji, lajn 'oj sto'l sb'a eb' 'a sat junc pa'n schawn̈il, xchi.

¹⁵ Ax Pedro 'ix aln 'a Jesús 'ixtic: —Al 'ayn̈ on̈, tas tzyal 'el'ch jun 'ab'x chi 'ix al 'a ewin fariseo cha, xchi 'a 'a.

¹⁶ Yuj cha, xyaln Jesús 'ixtic: —¿Tom matz nachj pax 'el jun chi eyu'uj?

¹⁷ ¿Tom man̈ eyojcoc a tas tz'och 'a qui ti', a 'a qui c'ojl tzc'ochi? Yajn̈ej tz'elx can muc'uc.

¹⁸ Palta a jun tzo'n̈ tas tz'elt 'a qui ti', a 'a qui nab'en tzpitzwi. Atn jun tzo'n̈ chi tzon̈ 'a'n juwc 'el 'a sat Dios.

¹⁹ Yujto a 'a snab'en eb' 'anma tzpitzw jun tzo'n̈ tu nab'enal tic. 'Ay eb' tzmiln cham yit 'anma'il. 'Ay eb' tzb'on 'ajmulal 'a yol sc'ab' yistzil. 'Ay eb' mant 'a yistzil tzb'on 'ajmulal paxi. 'Ay eb' tz'elc'wi, 'ay eb' tzyac' 'es, 'ay pax eb' tzcomn b'uchwji.

²⁰ Atn jun tzo'n̈ tic tz'a'n juwc 'el eb' 'anma 'a sat Dios. Palta wach'xam matz qui b'icl qui c'ab' tzon̈ wa'i, matz on̈ juw 'el 'a sat Dios, xchi Jesús.

A jun 'ix man̈ israeloc,*r* ya'jnac 'och sc'ojl 'a Jesús

²¹ Xlajw cha, x'atx Jesús. 'Ix c'och 'a Tiro yet' 'a Sidón.

²² Ata 'ay jun 'ix man̈ israeloc, 'aj Canaán 'ix. Xjaw 'ix 'a Jesús, 'ix 'awj 'ix 'ixtc 'a 'a: —Mamin, ach yin̈tl David, mamtzac 'o'ch a c'ojl 'ayin. 'Ay jun 'unx wune', 'aych jun demonio 'a 'unix, caw tzyab' 'unx syal yu'uj, xchi 'ix 'a 'a.

²³ Palta toxn ma'ix ta'w 'a 'ix. Ax yic xjaw eb' scuywum 'a stz'ey, 'ix yaln eb' 'a 'a: —Comnoc tza chec meltzjoc 'ix, yujto til wal yawj 'ix 'a qui patic, xchi eb' 'a 'a.

²⁴ 'Ix ta'w Jesús 'a 'ix 'ixtic: —An̈j 'a eb' wit israelal checb'iln cot yuj Dios. Yujto 'icha jun tzo'n̈ calnelu tzsatq'ui, 'ixta eb', xchi.

²⁵ Palta x'ec' jun 'ix chi 'a eb', 'ix 'em cumn 'ix 'a yojltac Jesús, xyaln 'ix 'ixtic: —Mamin, caw colwjan̈ 'ayn 'an, xchi 'ix 'a 'a.

²⁶ Palta man̈ wach'oc, toto tzto'x 'ec' yoch eb' 'unnab'il, tz'ajx 'a no cotc tz'i', xchi 'a 'ix.

²⁷ —Yel ton Mamin, palta a no cotc tz'i', tzsi' chan̈ no sc'ajl yoch eb' 'unnab'il 'a yaln̈ smexa win 'ajn̈a, xchi 'ix 'a 'a.

²⁸ Yuj cha, xyaln pax 'a 'ix 'ixtic: —Ach 'ix, tzwila caw yelc'ojlal tza'ch a c'ojl 'a Dios. Yuj cha, b'o cab' 'icha tza nib'ej, xchi 'a 'ix. Yajn̈j wal cha, 'ix b'ox can sc'ojl 'ix yune 'ix cha.

Til wal eb' b'oxnc yuj Jesús.

²⁹ Xlajw cha, x'atx Jesús. 'Ix b'ey't 'a sti a mar yic Galilea, axta xc'och 'a jun tzalan, 'ix 'em wocn ta'.

³⁰ Til wal eb' 'anma xjaw 'a 'aj 'ayc' cha. 'Ix yij cot eb' jun tzo'n̈ eb' coxo, eb' matz uj yilni, eb' matz uj spaxtini, yet' eb' wecchjnac. Til to wal jun tzo'n̈ xo eb' ya'ay x'ijx cot 'a 'a. Xwul 'ajxc eb' 'a yojltac Jesús, ax x'a'n b'oxc sc'ojl eb'.

³¹ A eb' matz uj spaxtini, 'ix paxtin eb'. Ax eb' wecchjnac, 'ix b'ox can eb'. A eb' coxo, tztac' xo sb'ey eb'. An̈jtona yet' eb' matz uj yilni, xjacw sat eb'. Yic 'ix yiln eb' 'anma chi jun tzo'n̈ cha, caw sat sc'ojl eb'. 'Ix yaln eb' wach' paxti 'a Dios.

'Ajxnac wa chan̈e mil winac

³² 'Ix yawtn cot Jesús eb' scuywum, 'ix yaln 'a eb' 'ixtic: —Caw tz'o'ch in c'ojl 'a eb' 'anma tic, yujto yoxl xo c'u sjaw eb' 'a tic. A ticnec, man̈x 'a tas tzc'ux eb'. Matz in nib'j tzin checx eb' 'a yatut, toto matz wa eb' s'ati. 'Ay smay tzsicb' 'el eb' 'a yol b'e, xchi 'a eb'.

³³ —¿Tas wal 'oj cutquec ca'n wa eb' 'a jun cusltac lum tic? 'In caw niwn eb', xchi eb' scuywum cha.

³⁴ —¿Jaye 'ixm pan eyet'i? xchi 'a eb'. —Uque wal quet' on̈, yet' jayc'otn̈ chay, xchi eb' 'a 'a.

³⁵ Xlajw cha, xyaln Jesús 'a eb' 'anma cha, to tz'em wocn eb' 'a sat lu'um.

³⁶ 'Ix syamn chan̈ 'ixm pan chi yuquil, yet' jayc'otn̈ chay cha, 'ix ya'n yuj diosal 'a Dios yu'uj. Sch'iyn 'ixm pan cha, 'ix ya'n 'a eb' scuywum, ax eb' x'a'n 'ec' 'a eb' 'anma cha.

³⁷ 'Ix wa eb' smasnil, xb'ut'j eb'. Yic xlajw swa eb', xb'ut'j can pax uque xuc xyac' sobra scan yuj eb'.

³⁸ Chan̈e mil eb' winc xwa'i, ax eb' 'ix 'ix yet' eb' 'unin, ma'ix 'och eb' sb'isloc.

³⁹ Xlajw cha, xyaln can sb'a Jesús 'a eb'. 'Ix 'ochx 'a yojl te barco, 'ix 'at 'a yol yic Magdala.