Mt 12 - Chuj San Sebastian Bible

Yaljnac Jesús yuj sc'ul 'iljelal

¹ A 'a jun sc'ul 'iljelal, 'ix 'ec' Jesús 'a jun b'e 'a scal nann̈l trigo yet' eb' scuywum. Ax eb' scuywum cha, caw tz'och swejl eb'. Yuj cha, xch'inn 'elt eb' sjolm 'ixim, sb'uchn eb' sc'uxu'.

² Palta 'ix yiln jun tzo'n̈ ewin fariseo tas tzb'o eb'. Yuj cha, xyaln ewin 'ixtc 'a Jesús: —'Ilt eb' a cuywum tic. Wan smunlj eb' 'a sc'ul 'iljelal, palta 'in may sleyl tzb'o eb' 'ixta', xchi ewin 'a 'a.

³ Palta 'ix yaln 'ixtc 'a ewinac: —¿Tom mant 'a 'aj xeyil 'a Ch'an̈ U'un̈, tas sb'ojnac David 'a jun 'el, yic yoch swejl yet' eb' ajun yet'oc?

⁴ 'Ochnc 'a yatut Dios, swajnac jun tzo'n̈ pan yicn̈ej Dios yaji, yet' eb' ajun yet'oc. A jun tzo'n̈ pan cha, cojn eb' ya'mal 'och qui ti 'a Dios, an̈j eb' 'ay sleyl swani. Man̈ sleyloc scomn wan David yet' eb' ajun yet' cha, palta man̈ mulc jun chi sb'o eb' 'a sat Dios.

⁵ ¿Tom may 'aj xeyil 'a ley yic Moisés, chajtlto a eb' ya'mal 'och qui ti 'a Dios, eb' 'ay 'a yol yatut Dios, matz yiclj eb' sc'ul 'iljelal? Palta matz 'och smul eb'.

⁶ Palta an tzwal 'ayex, yel xo 'ec'b'al wel'ch 'a yatut Dios.

⁷ Octom xnachj 'el eyu'uj, tas yaljnac can Dios 'a Cha'n̈ U'un̈, yic yaln 'ixtic: Tzin nib'j to tz'o'ch e c'ojl 'a eb' eyit 'anma'il, man̈ocn̈ej jun tzo'n̈ xajmb'al tzin nib'ej, xchi. Comnoc xnachj 'el jun tic eyu'uj, to 'ixta', ma'ix eyala to x'och smul eb' 'anma may smul.

⁸ An tic, tztac' walni tas tzqui b'o 'a sc'ul 'iljelal, yujto 'Ochnc in 'Anma'il, xchi Jesús 'a ewin fariseo cha.

A jun win sicb'nac 'el sc'ab'

⁹ Xlajw cha, x'at Jesús, xc'och 'a yol jun scapiya eb' cha.

¹⁰ Ata 'ayc' jun winc sicb'nac 'el sc'ab', jun 'ejmn̈ej caw tacn̈ cotnac. Ax eb' fariseo cha, tznib'j eb' 'ay junc smul Jesús tz'ilchj yu'uj, sec tzyac' queja eb'. Yuj cha, stz'acn eb' sc'anb'c 'ixtc 'a 'a: —¿'Aym sleyl tzcac' b'oxc junc ya'ay 'a sc'ul 'iljelal, mto ma'ay? xchi eb' 'a 'a.

¹¹ Yuj cha, xyaln 'a eb' 'ixtic: —Q'uinloc 'ayx 'ay junc e calnelu tz'at 'a yol junc xab' 'a sc'ul 'iljelal. ¿Tom matz 'at eyi' q'ueta?

¹² Ocxo wal junc 'anma', yel xo wal niwn yel'ch 'a yib'n̈ junc calnelu. Yuj cha, sleyl ton tzqui b'o jun tzo'n̈ tas wach' 'a sc'ul 'iljelal, xchi 'a eb'.

¹³ Xlajwn̈ej cha, xyaln 'a jun winc chi 'ixtic: —'A' cot a c'ab' 'ayin, xchi. Xya'n cot win sc'ab' 'a 'a, yajn̈j cha xb'o jun sc'ab' win cha, lajn x'aj yet' jun wach' xon cha.

¹⁴ Ax 'ix 'elt ewin fariseo cha, 'ix slajtin sb'a ewin 'a spatic, tas 'oj yutc ewin smilni.

'Aycto yaln can Dios yuj Jesucristo

¹⁵ A yic xyojcan 'el Jesús tas tznib'j ewin xyutej, 'ix yi'n 'el sb'a ta'. Til wal 'anma x'at yet'oc. Jantcn̈ej eb' ya'ay, c'uxn xb'ox can sc'ojl eb' yu'uj.

¹⁶ 'Ix yaln 'ixtc 'a eb': —May junc mach 'aj tzeyala mach in, xchi.

¹⁷ 'Ixta xyutj yaln 'a eb', sec tz'el'ch tas tz'ib'b'il can yuj Isaías, win schecb' Dios pecti', yic yaln can 'ixtic:

¹⁸ A jun tic, in checab', sic'b'il 'el wu'uj. Caw xajn wu'uj. Caw tzin tzalj yet'oc. 'Oj wac' Wespíritu 'a 'a. 'Oj yal-l 'a scal eb' nacion̈, chajtlto 'oj sb'oyaj eb' 'a stojlal.

¹⁹ May 'aj 'oj yac' owal. May 'aj 'oj q'ue yaw, may mach 'oj 'ab'noc sjaj 'a yol caye.

²⁰ 'Ay eb' caw 'oltac, 'icha junc te 'aj tzpacchji, mto 'icha junc cantil wan stupi, 'ixta 'eb'. Palta a 'oj colwjoc 'a eb', ma'oj yixtc eb'. 'Ixta 'oj yutc sb'a, masnto 'oj 'och Yajlil. Ax ya'n yajlil 'a stojlal.

²¹ Ax eb' 'anma 'a junjn chon̈ab', 'oj ya'ch eb' yipc sc'ojl jun cha, xchi Dios 'a Ch'an̈ U'un̈.

'Aych win diablo 'a Jesús yaln eb' fariseo

²² 'Ay jun winc x'ijx cot 'a Jesús, matz tac' yilni, matz uj spaxtin paxi, yujto 'aych jun demonio 'a 'a. Ax Jesús a 'ix 'a'n b'oxc sc'ojol, yuj cha, xb'o yilni, 'ix b'o spaxtin paxi.

²³ Ax eb' 'anma smasnil, caw sat sc'ojl eb' yilni, 'ix laj yalnc eb' 'ixtic: —¿A jun winc tic, am jun yin̈tl David tan̈b'il sjaw cujec? xchi eb'.

²⁴ Palta a yic xyab'n ewin fariseo jun tzo'n̈ cha, 'ix yaln ewin 'ixtic: —A jun winc tic, tztac' ton yi'n 'el ewin demonio, yujto a win Beelzebú win syajlil ewin demonio cha, a 'aych yet'oc, xchi ewinac.

²⁵ Ax Jesús, yojtac tas wan snan eb', yuj cha, xyaln 'a eb' 'ixtic: —Tzann̈j junc nacion̈ tzpoj sb'a 'a yol yico', caw tzjuwi. An̈jtona', tzann̈j junc chon̈ab' mto junc n̈al 'anma tzpoj sb'a 'a yol yico', caw tzjuw pax 'eli.

²⁶ An̈jtona', 'ixta pax win Satanás, toto tzpoj sb'a win yet' ewin yit demonioal, ¿tom najtl 'oj yac' yopiso winac?

²⁷ Ax tic, tzeyala to yuj spoder win Beelzebú tzin pechn 'el ewin demonio cha. Palta toto 'ixta', ¿machm 'aych yet' eb' e cuywum, yic tzpechn 'el eb' ewin jun xo? Mun a eb' e cuywum chi tzch'oxn 'el e paltail.

²⁸ Palta yujn̈ej Yespíritu Dios, tzin pechn 'el ewin demonio cha. Yuj cha, tzcheclji, to tox 'ix syamch Dios ya'n Yajlil 'a e cal.

²⁹ Q'uinloc 'ay junc winc caw 'ay yip. May junc mach tztac' scomm 'och 'a yol yatut, tzyi'n 'el tastc 'ay 'a 'a. Cojn toto tzyac' ganar sjaln can win 'ajn̈a cha, to 'ixta', tztac' yi'n 'elt tastc 'ay 'a yol yatut winac. 'Icha win 'ajn̈a cha, 'ixta pax win diablo.

³⁰ A mach man̈ 'ayc 'och wet'oc, 'ajc'ojl yajch 'ayin. Ax mach matz molb'tzan eb' 'anma wet'oc, a tz'a'n sactzic eb'.

³¹ Yuj cha, tzwal 'ayex, tzann̈j smul eb' 'anma', tzann̈j b'uchwal paxti tzyal eb', 'oj stac' yajx lajwc yuj Dios. Palta a mach tzb'uchwj 'a Yespíritu Dios, a jun smul eb' cha, toxn ma'oj 'ajxc can lajwoc.

³² Toto 'ay mach tzin b'uchn an 'Ochnc in 'Anmal tic, 'oj stac' yajx lajwc jun smul cha. Palta a mach tzb'uchwj 'a Yespíritu Dios, may b'a'n̈ 'oj lajwc jun smul cha. Wach'xam ticnec, wach'xam 'a jun tiempoal tot 'oj jawoc.

A qui b'eyb'alec tzchecltan tas cajec

³³ Nac si'mb'il, toto 'ay junc snun te wach', wach' sat tzyac'a. Toto 'ay junc te maysch'olnil, maysch'olnil sat tzyac'a. Yuj sat cha, tzcojcan 'eli, tas yaj te snun cha.

³⁴ Ax tic, caw 'ixtm 'anma 'ex, lajn ex 'icha no chan. Yuj cha, ¿tom 'ay jac tas wach' tz'el eyalni? Yujto an̈j tas 'ay 'a e nab'en, an̈j chi tzeyala.

³⁵ A eb' wach' snab'en, wach' tzyutj sb'a eb', yujto an̈j tas wach' 'ay 'a snab'en eb'. Ax eb' maysch'olnil snab'en, maysch'olnil tzyutj sb'a eb', yujto an̈j maysch'olnil 'ay 'a snab'en eb'.

³⁶ Yuj cha, tzwal 'ayex, at yic 'oj jawc jun c'u yic b'eyc'ojlal, jantcn̈ej jun tzo'n̈ paxti may yopiso tzlaj eyala', c'uxn 'oj e b'eyc'ojlax yu'uj.

³⁷ Yujto a Dios 'oj e b'eyc'ojlan yuj tas tzeyal cha. Ata 'oj yal 'ayex toto may e mul, mto 'ay e mul, xchi Jesucristo.

'Ay eb' sc'anjnac yil milagro

³⁸ 'Ay jun tzo'n̈ ewin cuywjum 'a ley yic Moisés yet' jun tzo'n̈ ewin fariseo, 'ix yaln ewin 'a Jesús 'ixtic: —Ach qui cuymal on̈, tzqui nib'j tza ch'ox junc milagro quil on̈, xchi ewinac.

³⁹ Yuj cha, xyaln 'ixtc 'a ewinac: —A wal ax 'anmax 'a jun tiempoal tic, caw may e ch'olnil, man̈oc wal 'a Dios tzeya'ch e nab'en. Ton̈j tze c'an eyil junc milagro, junc tzch'oxn spoder Dios. Palta cojxn jun milagro 'oj 'ajxoc eyila', atn jun 'icha sch'ojxnac Dios yet' jun schecb' Jonás sb'i.

⁴⁰ A Jonás cha, 'oxe c'u, 'oxe 'ac'wl 'e'nc 'a yol sc'ojl jun niwquil chay. 'Icha 'ajnc Jonás cha, 'ixta 'oj waj pax an 'Ochnc in 'Anmal tic. 'Oxe c'u, 'oxe 'ac'wl 'oj wec' 'a yol lu'um.

⁴¹ A yic 'ec' yalnc Jonás yab'xil Dios 'a eb' 'aj Nínive, caw snajnac sb'a eb'. An xo tic, 'ayn 'ec' 'a tic, 'ec'b'al wel'ch 'a yib'n̈ Jonás cha, palta matz e na e b'a. Yuj cha, at 'oj jawc jun c'u yic b'eyc'ojlal, a eb' 'aj Nínive cha, 'oj q'ue wan eb', ax yaln eb' e mul.

⁴² 'Ixta pax jun 'ix sreinail Sur pecti', caw wal najt cotnc 'ix, wul yab'xni 'ix 'a win Salomón yuj sjelnal. Ax ticnec, 'ayn 'ec' 'a tic, 'ec'b'al wel'ch 'a yib'n̈ Salomón cha, palta matz wul ex 'ab'xnoc 'ayin. Yuj cha, at 'oj jawc jun c'u yic b'eyc'ojlal, 'oj q'ue wan 'ix, ax yaln 'ix e mul.

A jun demonio tzc'ochx 'a yet'ul

⁴³ Q'uinloc 'ay junc demonio tz'elt 'a junc 'anma ticnec. Tzlajw cha, c'uxn tzb'eyc' 'a jun tzo'n̈ tacn̈ lu'um, tzsayn 'ec' 'aj wach' tz'ilji. Palta matz 'ilchj 'aj tz'aji, yuj cha, tznan pax 'ixtic:

⁴⁴ 'Oj in paxx 'a jun wet'l 'aj 'elnc in ta, xchi. Ax yic tzc'ochxi, tzyiln pax tas yaj jun 'anma cha, lajn 'icha junc n̈a may yajal, palta caw mesb'il, caw wach' pax yilxi.

⁴⁵ Yuj cha, tz'at yi'nc cot ucwn̈ocx yit demonioal 'ec'b'al xo stul 'a yib'an̈. Tzwach' 'och cajn eb' 'a jun 'anma cha. Yuj cha, yel xo wal caw maysch'olnil tz'aj jun 'anma chi 'icha 'a b'ab'el. 'Icha jun 'anma cha, 'ixta 'oj 'aj swach' juw 'el e nab'en, xchi Jesús.

A snun Jesús yet' eb' yu'tac

⁴⁶ Wanto yaln Jesús 'a eb' 'anma', 'ix c'och snun yet' eb' yu'tac. An̈j 'a sti n̈a xc'och eb', palta tznib'j eb' tzc'umej.

⁴⁷ Yuj cha, 'ay jun xaln 'ixtc 'a 'a: —'Ix jaw a nun yet' eco o'tac 'a sti n̈a, tolab' tznib'j eb' tzach sc'umej, xchi.

⁴⁸ —¿Mach in nun, mach eb' wu'tac tza na'a? xchi Jesús.

⁴⁹ Xlajw cha, sch'oxn Jesús eb' scuywum chi 'a 'a. —Atn eb' tic, 'icha 'in nun, 'icha wu'tac.

⁵⁰ Yujto tzann̈j eb' tzb'on 'icha tznib'j in Mam 'ayc' 'a satcha'an̈, atn eb' chi 'icha wu'tac, 'icha wanab', 'icha in nun yaji, xchi.