Mt 11 - Chuj San Sebastian Bible

A tas xyac' Juan Bautista c'anb'xoc

¹ Ax yic xlajw yaln Jesús jun tzo'n̈ cuynb'il tic 'a eb' scuywum slajchwan̈il, 'ix 'atxi. 'Ix 'ec' yalcn 'el yab'x eb' 'anma 'a jun tzo'n̈ chon̈b' 'a jun lugar cha, 'ix cuywj pax 'a eb'.

² A 'a jun tiempoal cha, 'aych Juan Bautista 'a preso. 'Ix yab'ni, tastc wan sb'on Cristo, yuj cha, schecn 'at chawn̈ eb' scuywum 'a 'a.

³ 'Ix 'at sc'anb'noc eb' 'a 'ixtic: —¿Tom ach tic Cristo to tan̈b'il xon a jaw cuj on̈, mto tzqui tan̈wj sjaw junc xo on̈? xchi eb' 'a 'a.

⁴ Yuj cha, xyaln 'ixtc 'a eb': —Paxn̈ec 'a Juan cha, tzeyaln 'a 'a, tastc wan eyab'ni, yet' tas wan eyiln 'a tic.

⁵ Tzeyal 'a 'a, chajtlto 'ay eb' matz uj xon yilni, tzax stac' yiln eb' ticnec. A eb' coxo, tztac' xo sb'ey eb'. A eb' tzlaj c'a yuj lepra, tzlaj b'ox can sc'ojl eb'. A eb' chacan̈, tzax laj yab' eb'. A eb' chamnac, 'ay eb' wan laj spitzw paxi. Ax eb' meb'a', wan yalx wach' 'ab'x yic colnb'il 'a eb'.

⁶ Yuj cha, a eb' matz somchj 'el snab'en wu'uj, caw wach' yic eb'. 'Ixta tzeyutj eyaln 'a Juan chi e c'ochi, xchi Jesús 'a eb'.

⁷ Xlajw xoj spax eb', 'ix yaln Jesús 'ixtc 'a eb' 'anma yuj Juan cha: —Nac coti, tas xit' eyiljnac 'a cusltac lu'um. ¿Tom a junc te 'aj tz'ib'x yuj 'ic' xit' eyiljnac?

⁸ ¿Tas xit' eyiljnac jun? ¿Tom a junc winc caw wach' yaj yet' spichl xit' eyiljnac? 'In a eb' caw wach' yaj yet' spichl cha, a 'a yol yatut eb' rey 'ayc' eb'.

⁹ Toto 'ixta', ¿tas xit' eyiljnac pax jun? ¿Am jun yalmal 'el spaxti Dios xit' eyiljnac? Atn ton jun cha. Palta a Juan cha, man̈ cojnoc yalmal 'el spaxti Dios yaji.

¹⁰ Atn yab'xil Juan chi yaljnac can Dios 'a Ch'an̈ U'un̈, yic yaln 'ixtic: 'Oj in b'ab'l checc 'at jun in checab', sec a 'oj b'ab'l b'onc a b'e yic mantzac ach c'ochi, xchi.

¹¹ Wal yel tzwal 'ayex, a 'a scal eb' 'anma 'a yolyib'n̈q'uinl tic, may junc mach 'ec'b'al yel'ch 'a yib'n̈ Juan Bautista cha. Palta ax eb' 'aych 'a yol sc'ab' Dios, wach'xam eb' caw may yel'chi, yel xo 'ec'b'al swach'l yic eb' 'a yib'n̈ yic Juan cha.

¹² Yictax syamn 'och Juan ya'w bautisar, masnto ticnec, til wal 'anma yelc'ojlal tz'och 'a yol sc'ab' Dios. 'Ay eb' te'n tzyutj sb'a, caw tzyac' eb' 'ip ya'n 'och sb'a 'a yol sc'ab'.

¹³ A yic mantzac 'alj Juan cha, yaljnac can eb' schecb' Dios smasnil, chajtlto 'oj wach' 'och Dios 'aj satchan̈ Yajlil. An̈jtona', 'ixta yaln pax ley yic Moisés.

¹⁴ Toto tze nib'j tzeya'ch e c'ojl 'a tas yaljnac can Juan cha, 'oj nachjc 'el eyu'uj, to a jun cha, atn Elías tan̈b'il sjawi.

¹⁵ A jun tzo'n̈ tzeyab' tic, nac wal si'mb'il.

¹⁶ A wal eb' 'anma 'a jun tiempoal tic, 'oj wal 'ayex tas yaj snab'en eb'. Lajn eb' 'icha jun tzo'n̈ 'unn tztajn 'a plas. 'Ay eb' tzaln 'a jun tzo'n̈ xo eb' yit 'unnal 'ixtic:

¹⁷ ¡Niwnoc xcob' quixtj qui b'a cutz'n 'amay eyu'uj, palta ma'ix eyac' chan̈al. An̈jtona', niwnoc xcob' qui b'itnoc jun tzo'n̈ b'it caw cusltac yochi, palta ma'ix e tz'ac 'oc' pax e b'a quet' on̈! xchi eb'.

¹⁸ Yujto a sb'eyb'al Juan, may tas tznib'j tzc'uxu, may tas tzyuq'uej. Yuj cha, tzyaln eb', to a win demonio 'aych 'a 'a.

¹⁹ Xlajw cha, in jaw an 'Ochnc in 'Anmal tic. An xo tic, tzin wan̈ej, tzwu'jn̈ej tas. Palta tzyal eb' 'ixtc wu'uj: A Jesús cha, cojn wal snib'n wa sb'a, 'u'm 'an̈ paxi. Caw swach'c'ojl sb'a yet' eb' tecm 'el tumin, yet' jun tzo'n̈ xo eb' maysch'olnil sb'eyb'al, xchi eb' wu'uj. Palta a eb' 'ay sjelnal Dios 'a 'a, tzcheclj 'el sjelnal eb' chi yuj tastc tzb'o'o, xchi Jesús 'a eb'.

A eb' chon̈b' ma'ix sna sb'a

²⁰ Xlajw cha, 'ix syamn 'och Jesús yalni, tas smul eb' 'anma 'a jun tzo'n̈ chon̈b' 'aj 'ix sb'o nan̈l milagro. Yujto wach'xam caw niwn milagro 'ix sb'o ta', palta ma'ix sna sb'a eb', 'ix yaln yuj eb' 'ixtic:

²¹ —A wal ex 'aj Corazín, caw 'oltac ex. Yet' ex 'aj Betsaida, caw 'oltacx paxi. Octom a 'a Tiro yet' 'a Sidón b'ob'il jun tzo'n̈ milagro 'icha xb'o 'a e cal. Toto 'ixta', pectix snajnac sb'a eb'. Tox 'ix ya'ch eb' jun tzo'n̈ pichl n̈achtac. Tox am 'ix yac' q'ue eb' stan̈l c'ac' 'a sjolom, sec tzcheclji, to caw tzcus eb' yuj smul.

²² Yuj cha, tzwal 'ayex, at 'a yic 'oj jawc jun c'u yic sb'eyc'ojlal Dios, yel xo wal niwn yailal 'oj 'ajxc 'ayx 'a yib'n̈ eb' 'aj Tiro yet' eb' 'aj Sidón.

²³ An̈jtona', 'ixta 'ex 'aj Capernaum. Tzcob' e na', to smoj 'oj e c'och 'a satcha'an̈. Palta ton̈j 'oj eyemcn 'a scal eb' chamnac. Octom a 'a Sodoma b'ob'il jun tzo'n̈ milagro 'icha xb'o 'a e cal. To 'ixta', snajnac sb'a eb', ax jun schon̈b' eb' cha, an̈ja 'ayc' ticnec.

²⁴ Yuj cha, tzwal 'ayex, at 'a yic 'oj jawc jun c'u yic b'eyc'ojlal cha, yel xo wal niwn yailal 'oj 'ajxc 'ayx 'a yib'n̈ eb' 'aj Sodoma cha, xchi Jesús.

A Jesucristo tzon̈ ya'c 'iljoc

²⁵ Ax 'a jun tiempoal cha, 'ix leslwi Jesús 'ix yaln 'ixtic: —Mamin, Yajl ach 'a satcha'an̈ yet' 'a yolyib'n̈q'uinl tic. Tzwal wach' paxti 'ayach, yujto xa c'ub'j 'el jun tzo'n̈ tic 'a eb' jelan, eb' caw 'ay snab'en 'a sat eb' yit 'anma'il, ax 'a eb' 'icha 'unin, a eb' xac' 'ojcanc 'eli.

²⁶ 'Ixta x'aj Mamin, yujto 'ixta tza nib'ej, xchi 'a Dios.

²⁷ Xlajw cha, xyaln 'a eb' 'ixtic: —A 'in Mam, ya'jnac smasnil tas 'a yol in c'ab'. An Yunnaln tic, may junc mach 'ojtnacn si'mb'il, cojxn in Mam 'ojtnac in. An̈jtona', may mach tzcomn 'ojcan 'el in Mam. Cojxn in an Yunnaln tic, yet' pax eb' tzin nib'j tzwac' 'ojcanc 'eli.

²⁸ Tzann̈j ex 'icha to tz'el eyip e munlji, yet' ex 'icha to caw 'al eyaj yuj eyicatz, cotn̈ec 'ayin, 'oj ex wac 'iljoc.

²⁹ Cuchc junx 'icha 'ictz 'oj wac' 'ayex. Cuywan̈c 'ayin, yujto an tic manso in, 'emmquil in, toto 'ixta', 'oj ex wac' 'iljoc.

³⁰ Yujto a jun 'icha 'ictz tzwac' e cuch tic, man̈ 'aloc, man̈ 'ajltacc in eya'n servil, xchi Jesús 'a eb'.