Mt 10 - Chuj San Sebastian Bible

Si'jnac 'el Jesús eb' scuywum

¹ Ax Jesús 'ix yawtj cot eb' scuywum slajchwan̈il 'a 'a. 'Ix ya'n 'och yopiso eb' yi'n 'el ewin demonio. 'Ix ya'n pax yopiso eb' ya'n b'oxc sc'ojl eb' 'anma tzann̈j yab'ilal tz'i'ni, yet' tzann̈j yailal.

² Atn sb'i eb' lajchwan̈ schecb' tic: A Simón, tzcuch pax Pedro, yet' jun yu'tac Andrés sb'i; Jacobo yet' jun yu'tac Juan sb'i. A eb' chawn̈ tic, yunnal Zebedeo eb'.

³ 'Ayc' pax Felipe, Bartolomé, Tomás yet' Mateo, atn jun tecm 'el tumn 'a yic yalan̈, yet' Jacobo yunnal Alfeo, yet' Tadeo.

⁴ 'Ayc' pax junx win tzcuch Simón win cananeo yet' pax Judas win 'aj Queriot, atn jun x'a'n 'och Jesús 'a yol sc'ab' chamel.

Schecb't Jesús eb' scuywum

⁵ Atn eb' lajchwan̈ tic 'ix checx 'at yuj Jesús. Yic mantzac 'at eb', 'ix yaln jun tzo'n̈ checnb'il tic 'a eb' 'ixtic: —A yic tzex 'ati, man̈ ex 'ec' 'a jun tzo'n̈ slugar eb' man̈ israeloc, yet' 'a jun tzo'n̈ chon̈b' 'a yol yic Samaria.

⁶ An̈j 'a eb' satnc to 'a scal eb' quit israelal, an̈jta tzex 'eq'ui. Yujto 'icha junc calnelu tzsatq'ui, 'ixta 'eb'.

⁷ Tz'at eyal-li, to jab'xoj wal 'oj wach' 'och jun 'aj satchan̈ Yajlil.

⁸ A eb' ya'ay yuj lepra, tz'ec' eyac' b'oxc eb'. Yet' pax jun tzo'n̈ xo eb' ya'ay, tzeyac' b'oxc sc'ojl pax eb'. Tzeya'n pax pitzwc eb' chamnac. An̈jtona', tz'ec' laj eyi'nc pax 'el ewin demonio 'a eb' 'anma'. Xe chaj jun e poder tic 'a nab'an̈ej, yuj cha, 'oj e colwj pax yet' 'a nab'an̈ej jun xo.

⁹ A yic tzex 'ati, may e tumn tzeyi'aj, man̈ eyic' q'uen oro, yet' q'uen plata. Wach'xam junc centavo, may cab' jac tzeyi'aj,

¹⁰ man̈ eyic' e pa tzex 'ati. Junn̈j e camx tzeya'chi, tzex 'ati. Man̈ eyic' jun mojn̈ocx e xan̈ab'. Man̈ eyic' e c'ococh. Tzwal jun tzo'n̈ tic 'ayex, yujto a eb' tzmunlji, smoj tzchaj eb' tas tzc'uxu.

¹¹ A yic tzex laj c'och 'a junjn chon̈ab', 'a junjn aldea, tze say junjnoc mach wach' sb'eyb'al. Ata tzeyac' e posada 'a yatut, masnto tzex 'atxi.

¹² A yic tzex laj c'och 'a jun n̈a cha, tzeyal 'a eb' 'ajn̈a chi 'ixtic: 'Ay cab' sjunc'ojlal Dios eyet'oc, xe chi 'a eb'.

¹³ Toto smoj eb' 'ixta', 'el'ch cab' 'icha 'oj eyal 'a eb'. Palta toto man̈ smojc eb' 'ixta', matz 'el'ch cab' 'icha 'oj eyal 'a eb' cha.

¹⁴ Toto matz ex schaj eb', toto matz nib'j eb' tas 'oj eyala', tzex 'elx 'a yol yatut eb', yet' 'a yol schon̈b' eb' cha. Tze ma'cn 'el spoccal eyoc, yic tze ch'oxn can 'eli, to man̈x 'a eyaln eyic 'a eb'.

¹⁵ Wal yel tzwal 'ayex, a yic 'oj jawc jun c'u yic sb'eyc'ojlal Dios, yel xo wal niwn syailal eb' 'oj 'ajxc 'a yib'n̈ eb' 'aj Sodoma yet' eb' 'aj Gomorra.

'Oj 'ajxc 'och 'a yib'n̈ eb' yic Cristo

¹⁶ 'Ab'ec, 'oj ex in checb't 'icha jun tzo'n̈ calnelu tz'at 'a scal no 'oques, 'ixta 'oj eyaji. Yuj cha, caw lista tzeyutj e b'a 'icha junc chan caw jelan, palta caw manso tzeyutj pax e b'a 'icha junc no parama.

¹⁷ Caw tzeyil wal e b'a, yujto 'ay eb' 'oj eyi'n 'at 'a eb' yajal, 'oj ex smac' eb' 'a yol jun tzo'n̈ scapiya.

¹⁸ 'Oj ex yi't pax eb' 'a yojltac eb' niwc yajal wu'uj. 'Ixta 'oj eyaji, sec 'oj stac' eyaln 'el wab'xil 'a eb' yajl cha, yet' 'a eb' man̈ israeloc.

¹⁹ Palta a yic 'oj eyajx 'och 'a yol sc'ab' eb' yajl cha, man̈ e na yuj tas 'oj eyala'. Man̈ ex 'och 'il yuj tas 'oj eyutc eyaln 'a eb', yujto a 'a jun rato cha, a Dios 'oj 'a'n nachjc 'el eyu'uj tas 'oj eyala'.

²⁰ Man̈oc ex 'oj e paxtini, yujto a Yespíritu qui Mam 'oj majnanc e ti', ax eyalni.

²¹ A 'a jun tiempoal cha, 'ay eb' 'u'tacab'il 'oj ya'ch yu'tac 'a yol sc'ab' chamel. 'Ay pax eb' mamb'il 'ixta 'oj yutc sb'a 'a yunnal. An̈jtona', 'ay pax eb' 'unnab'il 'oj yac' owl yet' smam, ax ya'n 'och eb' smam chi 'a yol sc'ab' chamel.

²² Smasnil 'anma 'oj chichnc 'och 'ayx wu'uj. Palta a eb' 'oj 'a'nc techjoc smasnil jun tzo'n̈ cha masnto 'a slajub', 'oj colchjoc eb'.

²³ A yic tzya'n eb' stul 'ayx 'a junc chon̈b' 'aj 'ayx 'eq'ui, tzex 'at 'elc 'a junc xo chon̈ab'. Wal yel tzwal 'ayex, a yic mantzac ex lajw 'ec' 'a smasnil jun tzo'n̈ schon̈b' eb' quit israelal, ax in japx an 'Ochnc in 'Anmal tic.

²⁴ May junc cuywum 'ec'b'al yel'ch 'a yib'n̈ scuymal. An̈jtona', may junc tz'a'w servil 'ec'b'al yel'ch 'a yib'n̈ spatron̈.

²⁵ Toto lajn tz'aj 'el'ch junc cuywum yet' scuymal, smoj ton tzalji. 'Ixta pax junc moso yet' spatron̈. An tic, 'icha 'ajn̈a in, ax xo tic, 'icha 'unnab'il ex. 'Ay eb' tzalni to Beelzebú in, yajl waj 'a eb' demonio yaln eb'. Ocxom wal 'ayx ax tic, yel xo wal tu 'oj yal eb' 'ayex.

Yowlal cojn 'a Dios tzon̈ xiwi

²⁶ Yuj cha, man̈ ex xiw 'a eb' 'anma'. Jantcn̈ej tas c'ultac yaj ticnec, c'uxn 'oj checljoc 'eli. Yet' jantcn̈ej tas c'ub'b'il 'eli, c'uxn 'oj 'ojcaxc 'eli.

²⁷ A jun tzo'n̈ tas tzwal 'ayx 'a c'ultaquil, c'uxn tzeyal-l 'a eb' 'anma'. Yet' jun tzo'n̈ xo tas tzlaj in c'ultac alc 'a e chiquin, c'uxn tzlaj eyal-l 'a yoltc caye.

²⁸ Man̈ ex xiw 'a eb' tztac' smiln e niwnal tic, yujto a e pixan matz tac' smiln eb'. Palta a 'a Dios tzex xiwi, yujto a tztac' satn 'el e pixn yet' e niwnal, tz'at 'a infierno yu'uj.

²⁹ 'Iltec e no cotc ch'ic. A yic tzchon̈x e no', chawn̈ e no 'a centavo, palta may junc e no tzcomm chami toto man̈ 'ichcta tznib'j qui Mam Dios.

^30-31 Palta ax xo tic, yel xo wal niwn eyel'ch 'a yib'n̈ e no'. An̈jtona xil e jolom, c'uxn b'isb'il yuj Dios. Yuj cha, caw man̈ ex xiwoc.

A eb' matz q'uixw yuj Cristo

³² Tzann̈j mach matz q'uixw yaln 'a sat eb' 'anma', to wic eb', an xo tic, 'oj wal eb' wico'oc 'a yojltac qui Mam Dios 'ayc' 'a satcha'an̈.

³³ Palta ax eb' tzaln 'a sat eb' 'anma', to man̈ wico'oc eb', an̈jtona 'in, 'oj wal 'a qui Mam 'ayc' 'a satcha'an̈, to man̈ wico'oc pax eb'.

Yuj Jesús 'ay eb' 'oj yac' owl sb'a

³⁴ Man̈ e na', to in jaw wul wac' junc'ojlal 'a eb' 'anma 'a yolyib'n̈q'uinl tic. Man̈ yujoc yoch junc'ojlal 'a scal eb' in jawi, palta yuj yoch owl 'a scal eb'.

³⁵ In jawi, sec wach' 'ay eb' winc 'oj yac' owl sb'a yet' smam. 'Ay eb' 'ix 'ix 'oj yac' owl sb'a yet' snun. 'Ay eb' 'ix 'alb'al 'oj yac' owl sb'a yet' yalib'.

³⁶ Yuj cha, a eb' jun yaj yet' junc mach 'a yol yatut, atn eb' 'oj sutmjc 'och 'ajc'ojlal 'a 'a.

³⁷ A mach yel xo niwn tzchamc'ojlej smam snun 'a wib'an̈, man̈ smojc eb' yoch wico'oc. An̈jtona', a mach yel xo wal niwn tzchamc'ojlej yunnal 'a wib'an̈, man̈ smojc yoch eb' wico'oc.

³⁸ A mach matz yal sc'ojl tzyab' syal wuj 'icha 'oj waj 'a spenc culus, man̈ smojc yoch wico'oc.

³⁹ A eb' ton̈j tznib'j colchjoc sb'a 'a yolyib'n̈q'uinl tic, 'oj satl sq'uinl eb' 'a jun 'ejmn̈ej. Palta ax eb' 'oj yac' cham sb'a wu'uj, atn eb' 'oj scha sq'uinl 'a jun 'ejmn̈ej.

A eb' 'oj chanc spac yic 'a Dios

⁴⁰ A eb' tzex chani, an tzin schaj eb'. Ax eb' tzin chan cha, wan schan pax eb' jun checjnacn coti.

⁴¹ A eb' tzchan junc schecb' Dios, yujn̈ej to schecb' Dios yaji, 'oj scha eb' spac 'icha yic eb' schecb' Dios cha. A eb' tzchan junc mach tojl sb'eyb'al, yujn̈ej to tojl sb'eyb'al, 'oj scha eb' spac 'icha yic eb' tojl sb'eyb'al cha.

⁴² Tzann̈j mach tzsiyn junc vaso sicl a 'a junc eb' in cuywum, wach'xam junc may wal yel'chi, palta yujn̈ej to in cuywum, wal yel 'oj scha spac.