Mr 8 - Chuj San Sebastian Bible

Ya'jnac wa Jesús chan̈e mil 'anma'

¹ A 'a yic jun tiempoal cha, til wal 'anma 'ix syam sb'a 'a Jesús, palta may tas tzc'ux eb', yuj cha, 'ix yawtn cot eb' scuywum 'a 'a, 'ix yaln 'a eb' 'ixtic:

² —Caw tz'o'ch in c'ojl 'a eb' 'anma tic, yujto yoxl xo c'u 'ayc' eb' wet' 'a tic, palta man̈x 'a tas tzc'ux eb'.

³ Toto may tas 'oj sc'ux eb', tzin checn pax eb' 'a yatut, tecn 'oj sicb'c 'el eb' 'a yol b'e, yujto 'ay eb' najt 'ay, xchi 'a eb' scuywum cha.

⁴ 'Ix ta'w eb' 'ixtc 'a 'a: —Palta, ¿tas wal 'oj cutquec ca'n wa eb' 'a jun cusltac lum tic? xchi eb'.

⁵ 'Ix sc'anb'n Jesús 'a eb' 'ixtic: —¿Jaye 'ixm pan eyet'i? xchi. —Uque wali, xchi eb' 'a 'a.

⁶ Xlajw cha, 'ix yaln Jesús 'a eb' 'anma cha, to tz'em wocn eb' 'a sat lu'um. 'Ix yi'n chan̈ 'ixm pan chi yuquil, 'ix ya'n yuj diosal 'a Dios yu'uj. 'Ix sch'iyn 'ixm pan cha, xya'n 'a eb' scuywum. Ax eb' x'a'n 'ec' 'a eb' 'anma cha.

⁷ 'Ay pax jaywn̈ cotc chay yet' eb', 'ix ya'n pax yuj diosal 'a Dios yuj no'. Xlajw cha, xyaln 'a eb' to tzya'x 'ec' eb' no chay chi 'a eb' 'anma'.

⁸ 'Ix wa eb' smasnil, 'ix b'ut'j eb'. Xlajw swa eb', xb'ut'j can pax uque xuc xyac' sobra scan yuj eb'.

⁹ 'Aym chan̈e'oc mil sb'isl eb' xwa'i, xlajw cha, xyaln can sb'a Jesús 'a eb'.

¹⁰ 'Ix 'ochx 'a yojl te barco yet' eb' scuywum cha, 'ix 'at eb' 'a yol yic Dalmanuta.

Sc'anjnac eb' fariseo yil junc milagro

¹¹ 'Ay jun tzo'n̈ ewin fariseo xjaw 'a Jesús, 'ix syamn 'och ewin sten sb'a yet'oc, yujto tznib'j ewin tzya'lj prowal, yuj cha, 'ix sc'ann ewin yil junc milagro tzch'oxn 'el spoder Dios.

¹² Ax Jesús, si'sni sjaw sc'ojol, 'ix yaln 'ixtic: —Ax tic, ¿tas yuj tze c'an eyil junc milagro 'ayin? Wal yel tzwal 'ayex, may junc milagro 'oj ch'oxxoc eyila', xchi Jesús.

¹³ Xlajw cha, xyactn can Jesús ewin fariseo cha, 'ix 'ochx 'a yojl te barco jun 'ejm xo yet' eb' scuywum, 'ix c'axw 'ec' eb' 'a junx sc'axpil 'ec' a'.

A scuynb'il ewin fariseo

¹⁴ Ax eb' scuywum Jesús, ma'ix sna eb' yi't span, cojn wal jun pan yet' eb' 'a yojl te barco cha.

¹⁵ 'Ix yaln Jesús 'ixtc 'a eb': —'Ab'ec, tzeyil wal e b'a, a wal yich span ewin fariseo, yet' yich span win Herodes, caw 'ay smay tzex juw 'el yu'uj, xchi 'a eb'.

¹⁶ Ax eb' scuywum cha, 'ix laj yal-lanc eb' 'ixtc yuj tas 'ix yal cha: —Tzyal 'ixta', yujto may qui pan quet'ec, xchi eb'.

¹⁷ Ax Jesús yojtac tas chi wan yaln eb', yuj cha, xyaln pax 'ixtc 'a eb': —¿Tas yuj tzeyala, to may e pan? ¿Tom matz nachj 'el eyu'uj? ¿Tom man̈ eyojcoc tas tzyal 'el'ch jun tic? Caw mant 'a jac e nab'en.

¹⁸ 'Ay cob' yol e sat, palta matz eyila; 'ay cob' e chiquin, palta matz eyab'i. ¿Tom matz e na coti?

¹⁹ A yic wa'n 'ec' o'e pan 'a scal o'e mil winac, ¿jaye xuc b'ut'j can paxi, yic 'ec' e chanc can pax jantc xyac' sobra? xchi 'a eb'. —Lajchwe xu'uc, xchi eb' 'a 'a.

²⁰ —Ax yic xwa'n 'ec' uque pan 'a scal chan̈e mil 'anma', ¿jaye xuc xb'ut'ji, yic x'ec' e chanc can pax jantc 'ix yac' sobra? xchi. —Uque xu'uc, xchi eb'.

²¹ Yuj cha, xyaln 'a eb' 'ixtic: —¿Tas yuj an̈ja matz nachj 'el xon jac eyuj jun? xchi.

Jacwnac sat jun winc 'aj Betsaida

²² Xlajw cha, xjapx eb' 'a chon̈b' Betsaida. Ax eb' 'anma 'ix quetzn cot jun winc matz uj yiln 'a Jesús, 'ix tew 'och eb' 'a 'a, sec tzaych sc'ab' 'a winac.

²³ Ax Jesús cha, 'ix 'och yamn 'a sc'ab' winac, 'ix squetzn 'at win 'a sti 'el chon̈ab', 'ix sucn 'och jab' stzub' 'a yol sat winac, 'ix stzayn 'och sc'ab' 'a 'a, xlajw cha, 'ix sc'anb'ni, toto tzax yil win jab'oc.

²⁴ Yuj cha, xya'lni win yilni, 'ix yaln win 'ixtc 'a 'a. —Tzax wil jun tzo'n̈ 'anma', lajn eb' yet' te te tzwila, palta tzb'eyc' eb', xchi winac.

²⁵ Yuj cha, 'ix squiln 'och Jesús sc'ab' 'a yol sat winac, 'ixta to b'i'an, xwach' jacw yol sat winac, caw wach'x yiln win si'mb'il.

²⁶ Xlajw cha, 'ix schecn pax win 'a yatut, 'ix yaln 'a win 'ixtic: —Man̈ ach 'ec' 'a yol chon̈ab', xalt jun tic 'a junc mach ta', xchi Jesús 'a winac.

Yaljnac Pedro to a Jesús atn Cristo

²⁷ Xlajw cha, x'ec' Jesús 'a jun tzo'n̈ aldea 'a yol yic Cesarea, 'a yol yic Filipo yet' eb' scuywum. A yic wan sb'ey eb', 'ix sc'anb'n 'ixtc 'a eb': —¿Machn yal eb' 'anma tzeyab'i? xchi 'a eb'.

²⁸ 'Ix ta'w eb' 'ixtc 'a 'a: —'Ay eb' tzalni tolab' Juan Bautista ach, 'ay pax eb' tzalni tolab' Elías ach, 'ay pax eb' tzalni tolab' schecb' ach Dios, 'e'nc ach 'a pecti', xchi eb'.

²⁹ —Al ex ¿machn pax eyala'? xchi 'a eb'. Yuj cha, 'ix ta'w Pedro 'a 'ixtic: —Ach tic, Cristo ach, xchi.

³⁰ Palta xyaln pax Jesús 'ixtc 'a eb': 'Ayt 'aj xeyal-l jun tic, xchi.

'Aycto yaln can Jesús yuj schamlil

³¹ Ax 'a jun tiempoal cha, 'ix syamn 'och scuywj 'a eb' scuywum, yuj tastc 'oj jawc 'a yib'an̈, 'ix yaln 'ixtic: An tic wach'xam 'Ochnc in 'Anma'il, palta yowlal caw 'oj wab' syail. A wal ewin 'ichmtac winc 'ay yopiso, yet' ewin sat ya'mal 'och qui ti 'a Dios, yet' pax ewin cuywjum 'a ley yic Moisés, 'oj in patquilx can 'el yuj ewinac, 'oj in smil cham ewinac, palta ax 'a schab'jial ax in pitzw paxi, xchi 'a eb'.

³² Tojln̈ej xyutj Jesús yaln jun tzo'n̈ chi 'a eb', palta ax Pedro x'i'n 'elt Jesús chi sch'ocoj, 'ix ya'lni stenn 'och wa'an.

³³ Palta ax Jesús 'ix meltzj 'at q'ueln 'a jun tzo'n̈ xo eb' scuywum, 'ix stenn 'och wan Pedro cha, 'ix yaln 'ixtc 'a 'a: Ach Satanás 'eln̈ 'a in tz'ey, yujto man̈oc jun tzo'n̈ yic Dios 'aj tza'ch a nab'en, an̈j jun tzo'n̈ yic 'anma 'aj 'aych a nab'en, xchi 'a 'a.

³⁴ Xlajw cha, 'ix yawtn cot eb' scuywum chi 'a 'a, yet' eb' 'anma', 'ix yaln 'ixtc 'a eb': —Toto 'ay eb' tznib'j tz'och in cuywumoc, yowlal man̈x yico'oc sb'a eb' sch'ocoj, yab' cab' eb' syal wu'uj, toxn̈ej tz'ajx 'och eb' 'a spenc culus, toto 'ixta', 'och cab' eb' in cuywumoc.

³⁵ Yujto 'a eb' ton̈j tznib'j colchjoc sb'a yolyib'n̈q'uinl tic, 'oj satl sq'uinl eb' 'a jun 'ejmn̈ej. Palta ax eb' 'oj yac' cham sb'a wu'uj, yet' pax yuj jun wach' 'ab'x yic colnb'il tic, atn eb' chi 'oj scha sq'uinl 'a jun 'ejmn̈ej.

³⁶ Q'uinloc tzquique'ej smasnil yolyib'n̈q'uinl tic, palta toto tzon̈ satcn 'el 'a jun 'ejmn̈ej, ¿tast wal qui ganar 'ixta'?

³⁷ A eb' tzsatcn 'el 'a jun 'ejmn̈ej, ¿tast wach' tzyac' mann colchjoc sb'a?

³⁸ A wal eb' 'anma 'a jun tiempoal tic, man̈oc 'a Dios tzya'ch eb' snab'en, caw maysch'olnil eb'. A eb' tzq'uixw wuj 'a sat eb' yit 'anma'il, tzq'uixw pax yuj in paxti', an̈jtona an 'Ochnc in 'Anmal tic, 'oj in q'uixw pax yuj eb' yic 'oj in jaw yet' spoder in Mam, yet' eb' ángel yic xo yaji, xchi.