Mr 4 - Chuj San Sebastian Bible

A yab'xil win tzicm 'in̈at

¹ 'Ix syamn 'och Jesús scuywj 'a eb' 'anma 'a sti a mar jun 'ejm xo. Til wal 'anma 'ix syam sb'a ta'. Yuj cha, 'ix 'och 'a yol jun barco 'ayc' 'a sti a', 'ix 'em wocan. Ax eb' 'anma cha, xcan eb' smasnil 'a sti a cha.

² Til wal tastc xyac' scuy eb'. 'Ix yaln jun tzo'n̈ 'ab'x 'a eb' 'ixtic:

³ 'Ab'ec, 'Ay jun winc 'ix 'at tzicj 'in̈at.

⁴ Yic wan stzicx jun tzo'n̈ 'in̈t cha, 'ix tz'itj can 'at jun tzo'n̈ 'a yol b'e, ax no ch'ic x'ec' si'noc.

⁵ 'Ay jun tzo'n̈ xo xc'ochcn 'a yib'n̈ samq'ue'en 'a 'aj jab' wal slumal, yajn̈ej 'ix paq'ui, yujto jab' wal slumal.

⁶ Palta ax yic 'ix q'uel c'u, yajn̈ej 'ix tacj cha'an̈, yujto may wal sch'an̈l yib'.

⁷ 'Ay jun tzo'n̈ xo xc'ochcn 'a scal c'ultac, ax te c'ultc cha, xwach' q'uib' te', ton̈j 'ix satl jun tzo'n̈ 'in̈t chi 'a scal te'. Yuj cha, toxn ma'ix yac' xon jac sjolom.

⁸ Palta 'ay jun tzo'n̈ xo x'emcn 'a 'aj caw 'ay syaxil lu'um. A jun tzo'n̈ cha, 'ix paq'ui, 'ix q'uib'i, 'ix ya'n sjolom. 'Ay xyac' sat 'a treinta, 'ay xyac' 'a sesenta, 'ay pax xyac' 'a jun ciente.

⁹ A jun tzo'n̈ tzeyab' tic, nac wal yuj si'mb'il, xchi 'a eb'.

A yopiso jun tzo'n̈ 'ab'x ya snachji

¹⁰ A yic man̈x 'ayc 'ec' eb' 'anma chi yet' Jesús, ax eb' scuywum slajchwan̈il yet' eb' 'ayc' 'a stz'ey, 'ix sc'anb'n eb' 'ixtc 'a 'a: —¿Tas wal tzyal 'el'ch jun 'ab'x 'ix al tic? xchi eb'.

¹¹ Yuj cha, 'ix yaln 'a eb' 'ixtic: An̈j 'ayx tzch'ox Dios jun tzo'n̈ tas mant 'a mach 'ojtnac, sec tznachj 'el eyu'uj chajtl tzex 'aj eyoch 'a yol sc'ab'.*f6* Palta ax eb' 'anma', cojxn jun tzo'n̈ 'ab'x ya snachji, a tzwal 'a eb',

¹² sec matz nachj 'el yuj eb'. Wach'xam tzyil eb' junc tas, ton̈j tzcann̈j eb' 'ixta', 'icha to may tas tzyil eb'; an̈jtona', wach'xam tzyab' eb', palta matz nachj xon 'el jac yuj eb'. Yuj cha, matz jel xon eb' jac snab'en, matz 'ajx lajwc can pax smul eb', xchi.

A tas tzyal 'el'ch*r* yab'xil win tzicm 'in̈at

¹³ Xyaln pax 'ixtic: Toto man̈ eyojcoc tas tzyal 'el'ch jun 'ab'x xwal tic, ¿tas wal 'oj eyutc eyojcan 'el jun tzo'n̈ xo 'ab'x smasnil?

¹⁴ A win tzicm 'in̈t cha, tzyal 'el'chi, atn junc mach tzaln 'el spaxti Dios.

¹⁵ A jun tzo'n̈ 'in̈t 'ix tz'itj can 'at 'a yol b'e, tzyal 'el'chi, 'ay eb' 'anma tz'ab'n spaxti Dios, palta ax yic tzlajw yab'n eb', tzc'och win diablo, tzyi'n 'el win spaxti Dios 'a snab'en eb'.

¹⁶ Ax jun tzo'n̈ 'in̈t xc'ochcn 'a yib'n̈ q'ue'en, tzyal 'el'chi, 'ay jun tzo'n̈ xo 'anma tz'ab'n spaxti Dios, caw tzaljc'ojlal tzcob' scha eb',

¹⁷ palta may ste'nal eb', 'icha junc te may sch'an̈l yib'. Caw matz b'ey tiempo yuj eb', yujto a yic tzjaw junc yailal, mto tz'ajx 'och 'a yib'n̈ eb' yuj spaxti Dios, yajn̈ej tzjuw 'el snab'en eb'.

¹⁸ Ax jun tzo'n̈ xo 'in̈t x'emcn 'a scal c'ultac, tzyal 'el'chi, 'ay jun tzo'n̈ xo eb' tz'ab'n spaxti Dios,

¹⁹ palta cojxn jun tzo'n̈ yic yolyib'n̈q'uinl tic tzna eb'. Tzjuw 'el snab'en eb' yuj snib'n 'och sricoal. Til wal jun tzo'n̈ tas tzcomn nib'j 'och eb'. An̈j 'a jun tzo'n̈ chi tzya'ch eb' snab'en; yuj cha, caw tzjuw 'el spaxti Dios 'a eb', lajn tz'aj eb' 'icha jun tzo'n̈ 'in̈t may xon jac sjolm tzyac'a.

²⁰ Palta ax jun tzo'n̈ xo 'in̈t 'ix 'emcn 'a 'aj 'ay syaxil lu'um, tzyal 'el'chi, 'ay jun tzo'n̈ xo eb' tz'ab'n spaxti Dios, tzya'ch wal eb' 'a sc'ojol. A eb' cha, lajn eb' 'icha jun tzo'n̈ 'in̈t tzyac' sat 'a treinta, 'a sesenta, yet' 'a jun ciente, xchi Jesús.

A tas c'ultac yaji, 'oj checljoc 'eli

²¹ 'Ix yaln pax Jesús 'ixtic: A yic tzca'nec 'och qui cantil, matz ca'c 'och 'a yaln̈ junc cajon, matz ca'c pax 'och 'a yaln̈ junc ch'at. A 'a yib'n̈ junc tas cha'an̈, ata tzca'c q'ue'i, sec wach' sacq'uinl tz'aj 'ejm yoc 'a yol n̈a cha.

²² 'Ixta pax jantcn̈ej tas c'ub'b'il 'eli, 'oj 'ilchjoc, yet' jantcn̈ej tas c'ultac yaji, c'uxn 'oj checljoc 'eli.

²³ A jun tzo'n̈ tzeyab' tic, nac wal yuj si'mb'il, xchi.

²⁴ Xyaln pax 'ixtc 'a 'eb': Caw tzeya'ch e chicn 'a tas tzeyab'i, yujto 'icha tzeyutj eya'n 'och e chiquin, 'ixta 'oj yutc Dios ya'n nachjc 'el eyu'uj. 'Oj swach' 'a'c nachjc 'el nan̈locx eyu'uj.

²⁵ Yujto a eb' tznib'j tznachj 'el yu'uj, 'oj wach' 'ajxoc nachjc 'el nan̈locx yuj eb'. Ax eb' matz nib'j tznachj 'el yu'uj, a jab' tas 'ijn tznachj 'el yuj eb', 'oj wach' 'ijxc 'ec' 'a eb', xchi Jesús.

A yab'xil jun tzo'n̈ 'in̈t tzpaq'ui

²⁶ 'Ix yaln pax Jesús 'ixtc 'a eb': —'Oj wal 'ayex chajtl tz'aj eb' 'anma yoch 'a yol sc'ab' Dios. Q'uinloc 'ay junc winc tzicw 'in̈t 'a junc lu'um.

²⁷ Tzlajw cha, tzway win 'a junjn 'ac'wal, tzq'uex wan win 'a junjn c'u. Ax jun tzo'n̈ 'in̈t cha, tzpaq'ui, tzq'uib'i, palta man̈ yojcoc winac tas wal tz'aj sq'uib'i.

²⁸ Yujto yujn̈ej syaxil lu'um tzq'uib'i. Tzb'ab'l q'uel xi'il, tzlajw cha, tzq'uel sjolom, tz'och sat.

²⁹ Ax yic tzc'anb'i, tzpolx 'eli, yujto tzc'och stiempoal yeli.

A yab'xil sat te rechivo

³⁰ ¿Chajtl am tz'aj sq'uib' sb'isl eb' 'anma tz'och 'a yol sc'ab' Dios tze na'a? 'Oj wal jun 'ab'x tic eyab' nab'an, chajtl tz'aj sq'uib' sb'isl eb'.

³¹ A eb' cha, lajn eb' 'icha junc 'in̈t rechivo tz'awx 'a junc lu'um. A jun 'in̈t cha, yel xo wal yune 'a yib'n̈ smasnil jun tzo'n̈ xo 'in̈t 'a yolyib'n̈q'uinl tic,

³² palta yic tox x'awxi, tzq'uib'i, yel xo wal niwquil tz'aj 'a yib'n̈ smasnil jun tzo'n̈ xo te tz'awx 'a junjn ab'il. Caw niwc tz'aj sc'ab', tztac' tz'och wan no ch'ic 'a yen̈ul, xchi Jesús 'a eb'.

'Ab'xn̈ej yaljnac Jesús 'a eb' 'anma'

³³ Til wal jun tzo'n̈ 'ab'x 'icha jun tic 'ix yal Jesús 'a eb' 'anma', yic 'ix yaln 'el spaxti', cojn jun tzo'n̈ tas tznachj 'el yuj eb', a xyal-li.

³⁴ Cojxn jun tzo'n̈ 'ab'x chi 'ix sc'anlb'ej, yic xyaln 'el 'a eb' 'anma'. Ax 'a eb' scuywum, c'uxn 'ix yac' nachjc 'el jun tzo'n̈ chi yuj eb'.

Sictac 'ajnc 'ic' yet' a mar

³⁵ Ax yic wan sq'uic'b' 'ejm 'a jun c'u cha, 'ix yaln Jesús 'a eb' scuywum 'ixtic: —Coyc 'a junx sc'axpil 'ec' a', xchi.

³⁶ Yuj cha, 'ix yactn can eb' jun tzo'n̈ eb' 'anma 'ayc' 'a sti a cha. 'ix 'och eb' 'a yol te barco 'aj 'aych xon Jesús, 'ix 'at eb'. 'Ix 'at pax jun tzo'n̈ xo barco yet' eb'.

³⁷ Palta 'ix jaw jun 'ic' caw ow 'a yib'n̈ a', caw x'och chel-loc a 'a yojl te yuj 'ic' cha. 'Ijn wal tz'at te 'a yich a'.

³⁸ Ax Jesús, waync 'a syop 'el'ch te barco cha, 'aych jun sc'an̈ jolom. Yuj cha, 'ix spitzn 'el eb' swayan̈. —Mamin, ¿matz a na am jab'oc? 'Ilto, to wan qui lajwec 'eli, xchi eb' 'a 'a.

³⁹ Yuj cha, 'ix q'ue wa'an, stenn 'och wan jun 'ic' cha, 'ix yaln pax 'a a mar 'ixtic: —Sictac tzach 'aji, xchi. 'Ixta to b'i'an, 'ix 'och wan jun 'ic' cha, caw sictac x'aj smasnil.

⁴⁰ Xlajw cha, xyaln 'ixtc 'a eb' scuywum cha: —¿Tas yuj tzex caw xiwi? ¿Tas yuj matz eya'ch wal e c'ojl 'a Dios? xchi 'a eb'.

⁴¹ Ax eb' ton̈j 'ix caw sat sc'ojl eb' yuj si'mb'il, 'ix laj yal-lanc eb' 'ixtic: —¿Tas wal sb'o jun tic? 'In tzyiclj 'ic' yet' a mar tas tzyala, xchi eb'.