Mr 3 - Chuj San Sebastian Bible

B'oxnac jun win sicb'nac 'el sc'ab'

¹ 'Ay jun c'u 'ix 'ochx Jesús 'a yol capiya, ata 'ayc' jun winc sicb'nac 'el sc'ab', caw tacn̈ cotnac yaj 'a jun 'ejmn̈ej.

² 'Ay eb' xtan̈wni yila', toto tzb'ox sc'ab' win yuj Jesús 'a sc'ul 'iljelal, yujto tznib'j eb' ya'ch 'a yib'n̈ Jesús.

³ 'Ix yaln Jesús 'ixtc 'a win sicb'nac 'el sc'ab' cha: —Cotan̈, jawn̈ lin̈n 'a qui tz'ey tic on̈, xchi 'a winac.

⁴ Xlajw cha, xyaln 'a eb' 'anma chi 'ixtic: —¿'Aja junc 'ay sleyl tzqui b'oc 'a sc'ul 'iljelal tze na'a? ¿Tztac' am qui b'onec jun tzo'n̈ tas wach', mto a jun tzo'n̈ maysch'olnil? ¿Tztac' am ca'nec b'oxc sc'ojl junc ya'ay, mto tzqui wach' miljec chamoc? xchi. Palta ton̈j sictac x'aj eb' 'anma cha.

⁵ 'Ix 'ec' q'uel-loc Jesús 'a eb', 'ix cot yowal, 'ix cus pax cha'an̈, yujto caw pit eb', 'ix yaln 'a win 'ixtic: —'A' cot a c'ab', xchi. 'Ix ya'n 'at win sc'ab' 'a 'a, 'ixta to b'i'an, 'ix b'ox cani.

⁶ Yic tox x'elt ewin fariseo cha, 'ix sc'umn sb'a ewin yet' ewin spartido win rey Herodes. 'Ix slajtin sb'a eb', chajtl 'oj yutc eb' smiln cham Jesús.

C'ochnc eb' 'anma 'a sti a mar

⁷ Ax Jesús 'ix c'och 'a sti a mar yic Galilea yet' eb' scuywum. Til wal eb' 'anma xc'och 'a 'a. 'Ay eb' xcot 'a yol yic Galilea,

⁸ 'a Judea, 'a Jerusalén, 'a Idumea, yet' 'a sc'axpil a Jordán. 'Ay pax eb' xcot 'a yol yic Tiro yet' Sidón. 'Ix yab'n eb' to man̈x jantcoc milagro 'ix sb'o Jesús, yuj cha, til wal eb' xc'och 'a 'a.

⁹ Xlajw cha, xyaln Jesús 'a eb' scuywum, to tzyac' lista eb' junc barco, sec matz witz'nb'i yuj eb' 'anma', yujto til wal eb'.

¹⁰ Caw niwn eb' tox 'ix b'ox sc'ojl yu'uj, yuj cha, til to wal eb' ya'ay 'ix syam sb'a, yic tzayn 'och eb' sc'ab' 'a 'a.

¹¹ Ax jun tzo'n̈ eb' demonio, yic xyiln ewin Jesús, x'em cumn ewin 'a yojltac, x'awj chan̈ ewin 'ixtic: —Ach tic Yunnal ach Dios, xchi ewinac.

¹² Palta xtenx 'och wan ewin yu'uj, sec matz yal-l ewin mach Jesús cha.

Si'jnac 'el Jesús lajchwan̈ schecab'

¹³ Xlajw cha, x'at Jesús 'a jun tzalan, 'ix yawtn cot mach eb' tznib'j tzcan yet'oc, 'ix jaw eb' 'a 'a.

¹⁴ 'Ay lajchwan̈ eb' xya'ch yopiso, sec wach' tz'ec' eb' yet'oc, ax schecn 'at eb' yal-l yab'xil.

¹⁵ 'Ix ya'n 'och yopiso eb' ya'n b'oxc sc'ojl eb' ya'ay, yet' yi'n 'el eb' ewin demonio 'a eb' 'anma'.

¹⁶ Atn eb' lajchwan̈ tic: A Simón, tzcuch pax Pedro yu'uj,

¹⁷ yet' Jacobo, yet' jun yu'tac Juan sb'i, a chawn̈ eb' tic, yunnal Zebedeo eb'. 'Ix ya'n can pax sb'ic eb' Boanerges. A Boanerges tzyal 'el'chi, ow spaxtin eb' 'icha sc'an̈ c'u.

¹⁸ 'Ayc' pax Andrés, Felipe, Bartolomé, Mateo, Tomás, Jacobo yunnal Alfeo, Tadeo yet' Simón win cananeo.

¹⁹ 'Ayc' pax Judas win 'aj Queriot, atn jun x'a'n 'och Jesús 'a yol sc'ab' chamel.

Yaljnac eb' 'anma',*r* to a win diablo 'aych yet' Jesús

²⁰ Xlajw cha, x'at Jesús 'a jun n̈a yet' eb' scuywum. Til wal 'anma 'ix syam sb'a jun 'ejm xo 'a 'a. Yuj cha, man̈ jac tztac' swa yet' eb' scuywum cha.

²¹ Yic 'ix yab'n eb' smam yu'tac Jesús, 'ix jaw eb' 'at cob' syama', yujto a snan eb' to owya tzcot 'a sjolom.

²² 'Ay jun tzo'n̈ ewin cuywjum 'a ley yic Moisés 'ix cot 'a Jerusalén, 'ix yaln ewin 'ixtic: A win Beelzebú a 'aych yet' Jesús. Yuj cha, tztac' ton yi'n 'el Jesús ewin demonio cha, yujto a win 'aych yet'oc, xchi ewinac. A win Beelzebú cha, a win yajl yaj 'a ewin demonio.

²³ 'Ix yawtn cot Jesús ewinac, 'ix yaln jun tzo'n̈ 'ab'x 'ixtc 'a eb': A win Satanás cha, ¿tast wal 'oj yutc win spechn 'el ewin yit demonioal cha?

²⁴ Q'uinloc 'ay junc niwc chon̈b' 'aj tzlaj spoj sb'a eb' yajal, tzlaj ya'nc eb' owal; toto 'ixta', yajn̈ej tzjuw 'el jun yic eb' cha.

²⁵ Q'uinloc 'ay junc n̈al eb' 'anma tzlaj spoj sb'a yuj owal; toto 'ixta', yajn̈ej tzjuw 'el jun n̈al eb' cha.

²⁶ An̈jtona', 'ixta pax win Satanás. Q'uinloc tzpoj sb'a win yet' ewin yit demonioal, tzya'n win owl yet' ewinac, toto 'ixta', tzcaw juw 'el winac, tzlajw 'el yopiso winac.

²⁷ Q'uinloc 'ay junc niwc winc caw 'ay yip, may junc mach tztac' scomn 'och 'a yol yatut, tzyi'n 'elt tastc 'ay 'a winac. Cojn toto tzyac' ganar sjalx can win 'ajn̈a chi yuj b'ab'el, to 'ixta', tztac' yi'n 'el tastc 'ay 'a winac. 'Icha win 'ajn̈a cha, 'ixta pax win diablo.

²⁸ Wal yel tzwal 'ayex, tzann̈j smul eb' 'anma', yet' jantcn̈ej b'uchwal paxti tzyal eb' 'a spatc Dios, 'oj stac' yajx lajwc yuj Dios.

²⁹ Palta tzann̈j mach tzb'uchwj 'a Yespíritu Dios, a jun smul cha, toxn ma'oj 'ajxc can lajwoc; tz'ochcn 'a yib'n̈ 'a jun 'ejmn̈ej, xchi Jesús.

³⁰ 'Ixta xyutj yalni, yujto xyal eb' to a win demonio 'aych yet' Jesús.

A snun Jesús yet' eb' yu'tac

³¹ Xlajw cha, xjaw snun Jesús yet' eb' yu'tac, an̈j 'a sti n̈a xjaw eb', 'ix sc'anb'n 'elt eb' Jesús cha.

³² Ax eb' wocn 'ejm 'a stz'ey, xyaln eb' 'ixtc 'a 'a: —'Ayc' a nun yet' eco o'tac 'a sti n̈a, tolab' tzach sayc' eb', xchi eb'.

³³ Palta xyaln 'a eb' 'ixtic: —¿Mach in nun, mach eb' wu'tac tze na'a? xchi 'a eb'.

³⁴ Xlajw cha, x'ec' q'uel-loc 'a eb' wocn 'ejm 'a stz'ey cha, 'ix yaln 'ixtic: —Ax tic, 'icha in nun, 'icha wu'tac ex.

³⁵ Yujto tzann̈j mach tzyiclni 'icha tznib'j Dios, atn wal eb' 'icha wu'tac, 'icha wanab', 'icha in nun, xchi Jesús 'a eb'.