Mr 2 - Chuj San Sebastian Bible

B'oxnac jun win sicb'nac 'eli

¹ 'Ayxm sjayloc c'u, 'ix c'ochx Jesús 'a chon̈b' Capernaum jun 'ejm xo. Ax 'ix 'ab'xi to 'ayc' 'a yatut,

² yuj cha, til wal 'anma 'ix syam sb'a mu'c 'a jun n̈a cha. Man̈x 'a 'aj tz'aj eb', ax Jesús 'ix yaln spaxti Dios 'a scal eb'.

³ 'Ay jun win sicb'nac 'eli, 'ix 'ijx cot yuj chan̈wn̈ eb' winac.

⁴ Palta matz tac' yochch eb' 'a 'aj 'ayq'ui, yujto til wal 'anma'. Yuj cha, xq'ue eb' 'a span̈nil yib'n̈ jun n̈a cha, axta xyol eb' jun oln 'a stojlal 'aj 'ayc' Jesús. Xlajw cha, xya'n 'emt t'un̈n̈oc eb' win sicb'nac 'el chi yet' swaynub', 'ix 'eml 'a sat lu'um.

⁵ Yic xyiln Jesús, chajtlto tzya'ch eb' sc'ojl 'a 'a, 'ix yaln 'a win sicb'nac 'el chi 'ixtic: —Ach winac, tic 'ix 'ajx can lajwc a mul, xchi 'a winac.

⁶ Palta 'ay jun tzo'n̈ ewin cuywjum 'a ley yic Moisés wocn 'ejm ta', 'ix snan ewin 'ixtic:

⁷ ¿Tas yuj tzyal jun winc tic 'ixta'? Caw tzb'uchwj win 'a Dios, may junc 'anma tztac' ya'n lajwc qui mul, cojxn Dios, xchi ewinac.

⁸ Ax Jesús, yojtac tas wan snan ewinac, yuj cha, xyaln 'ixtc 'a eb': —¿Tas yuj wan e nan jun tzo'n̈ tic 'ixtic?

⁹ ¿'Aja junc man̈ 'ajltacc yel'ch tze na'a? Toto tzcal 'ixtic: Tic 'ix 'ajx can lajwc a mul, xqui chi: Mto q'uen̈ wa'an, b'eyan̈, xqui chi. ¿Tom 'ay junc man̈ 'ajltacoc yel'chi?

¹⁰ Palta a ticnec 'oj in ch'ox 'ayex, to an 'Ochnc in 'Anmal tic, 'ay in poder wa'n can lajwc smul eb' 'anma 'a yolyib'n̈q'uinl tic, xchi 'a ewinac. Xlajw cha, xyaln 'ixtc 'a win sicb'nac 'el cha:

¹¹ —An tzwal 'ayach q'uen̈ wa'an, 'ij chan̈ a waynub' tic, paxn̈ 'a atut, xchi 'a winac.

¹² Yajn̈j wal cha, 'ix q'ue wan winac, 'ix yi'n chan̈ win swaynub' cha, q'ueln 'och eb' smasnil 'ix pax winac. Yuj cha, caw sat sc'ojl eb' smasnil, 'ix laj yalnc eb' wach' paxti 'a Dios. —Toxn mant xon 'aj tzquil jun tic 'ixtic, xchi eb'.

'Ochnc Leví scuywumoc Jesús

¹³ Xlajw cha, 'ix c'ochx Jesús 'a sti a mar yic Galilea jun 'ejm xo, c'uxn xlaj c'och eb' 'anma 'a 'a, 'ix cuywj 'a eb'.

¹⁴ Ax 'a yic wan sb'eyi, 'ix yilni 'ayc' jun winc Leví sb'i, yunnal Alfeo, wocn 'ejm 'a 'aj tztecl stumn eb' 'anma'. —'Ochn̈ in cuywumoc, xchi Jesús 'a 'a. Yuj cha, 'ix q'ue wa'an, 'ix 'och scuywumoc.

¹⁵ Ax yic xc'och Jesús wac 'a yatut win Leví cha, yic 'ix 'em wocn swa yet' eb' scuywum, 'ay pax nan̈l eb' tecm 'el tumn 'ix 'em wocn yet' eb', yet' nan̈l xo eb' maysch'olnil sb'eyb'al. Yujto til wal eb' tox x'och tza'n yu'uj.

¹⁶ Ax ewin cuywjum 'a ley yic Moisés, yet' ewin fariseo, 'ix yiln ewinac to wan swa Jesús yet' eb' maysch'olnil sb'eyb'al cha, yuj cha, 'ix yaln ewin 'ixtc 'a eb' scuywum Jesús cha: —¿Tas yuj tzwa Jesús yet' eb' tecm 'el tumin, yet' jun tzo'n̈ xo eb' maysch'olnil sb'eyb'al tic? xchi ewinac.

¹⁷ Ax yic 'ix yab'n Jesús jun cha, 'ix yaln 'a ewin 'ixtic: —Q'uinloc 'ay junc 'a'm remel ticnec, a eb' wach' sc'ojol, ¿tom 'ay tz'och yuj eb'? Cojn eb' ya'ay, a eb' 'ay tz'och yu'uj. 'Ixta waj an tic, a eb' wach' sb'eyb'al snani, toc 'ay tzin 'och yuj eb', palta yuj wawtn eb' tznachj 'el yu'uj to maysch'olnil sb'eyb'al, yuj cha, in jawi, xchi Jesús.

Matz chaj sb'a*r* 'ichm b'eyb'al yet' 'ac' b'eyb'al

¹⁸ Ax 'a jun 'el, 'ix 'och eb' scuywum Juan Bautista 'a c'ajb'c'ojlal yet' eb' scuywum ewin fariseo. Yuj cha, 'ay eb' xjaw 'a Jesús, 'ix yaln eb' 'a 'ixtic: A eb' scuywum Juan yet' eb' scuywum eb' fariseo, tzya'ch sb'a eb' 'a c'ajb'c'ojlal. Palta ax eb' a cuywum ach tic, ¿tas yuj matz ya'ch sb'a eb' 'a c'ajb'c'ojlal? xchi eb' 'a 'a.

¹⁹ Yuj cha, xyaln Jesús 'ixtc 'a eb': —Q'uinloc 'ay junc nupnel tz'och ticnec, a eb' 'awtb'il 'at ta', ¿tom tztac' ya'n 'och sb'a eb' 'a c'ajb'c'ojlal, yic 'ayc' win tznupn chi yet' eb'? A yic 'ayt 'ec' win yet' eb', matz tac' yoch eb' 'a c'ajb'c'ojlal.

²⁰ Palta at 'oj jawc stiempoal yijx 'el win 'a scal eb', atta 'oj ya'ch sb'a eb' 'a c'ajb'c'ojlal. 'Ixta 'in yet' eb' in cuywum tic.

²¹ Q'uinloc 'ay junc 'ichm pichl tzolchji. ¿Tom 'ay junc mach tz'a'n 'och jun 'a't nip sniploc? Yujto a junc 'a't nip cha, caw tzpotzi, tzwach' to'n jat jun 'ichm cha. Caw tzjuw can jun 'ichm pichl chi yu'uj.

²² An̈jtona', may junc mach tz'a'n 'ejm 'ac' yal uva mantzac jaw sti 'a yojl junc 'ichm tz'um yet'l yal uva, yujto a yic tzjaw sti', caw tzsipji, ton̈j tzjat jun 'ichm tz'um chi yu'uj, ton̈j tz'ixtx jun yal uva chi yet' jun tz'um cha. Yuj cha, an̈j 'a yojl jun tzo'n̈ 'a't tz'u'um, an̈jta tz'ejm 'ac' yal uva yic tzjaw sti', xchi Jesús 'a eb'.

Yaljnac Jesús yuj sc'ul 'iljelal

²³ A 'a jun sc'ul 'iljelal, 'ix 'ec' Jesús 'a yol b'e 'a scal nan̈l 'ixm trigo yet' eb' scuywum. Ax eb' scuywum cha, sch'in 'elt eb' sjolm 'ixim, yic tzb'ey eb'.

²⁴ Yuj cha, ax ewin fariseo 'ix aln 'a Jesús 'ixtic. —'Ilto, ¿tas yuj wan smunlj eb' a cuywum 'a sc'ul 'iljelal tic? 'In may sleyl tzb'o eb' 'ixta', xchi ewinac.

²⁵ Palta xyaln Jesús 'ixtc 'a ewinac: —¿Tom may 'aj xeyil 'a Ch'an̈ U'un̈, tas sb'ojnac David 'a jun 'el, yic yoch swejl yet' eb' ajun yet'oc?

²⁶ 'Ochnc 'a yatut Dios, yic 'aych win Abiatar sat ya'malc 'och sti eb' 'anma 'a Dios. A yic cha, swajnac jun tzo'n̈ pan yic Dios yaji, xya'n pax 'a eb' ajun yet' cha. A jun tzo'n̈ pan cha, cojn eb' ya'mal 'och qui ti 'a Dios, an̈j eb' 'ay sleyl swani, palta a jun sb'ojnac David cha, man̈ mulc 'a sat Dios.

²⁷ A Dios aljnac cani, yelcn yich sc'ul 'iljelal, sec wach' yic eb' 'anma'. Palta man̈ yujoc syiclni eb' sc'ul 'iljelal, sb'on Dios eb' 'anma'.

²⁸ An tic tztac' walni, tas tzqui b'o 'a sc'ul 'iljelal, yujto 'Ochnc in 'Anma'il, xchi Jesús 'a ewinac.