Mr 13 - Chuj San Sebastian Bible

A tas yaljnac Jesús yuj yatut Dios

¹ Yic wan yelt Jesús 'a yol sti yamq'uil yatut Dios, 'ix yaln jun scuywum 'ixtc 'a 'a: —Ach in cuymal, 'ilto caw niwc jun tzo'n̈ q'uen q'uen tic, caw niwc pax jun tzo'n̈ n̈a tic, xchi 'a 'a.

² —A jun tzo'n̈ niwc n̈a tic, c'uxn 'oj lan̈chjc 'ejm smasnil, yet' jun tzo'n̈ q'uen tusb'il q'ue tic, tzwal 'ayach to man̈x 'a junc 'oj can 'a yib'n̈ yit q'uenal, xchi Jesús 'a 'a.

A jun tzo'n̈ senya yic slajb' c'ual

³ Xlajw cha, x'at eb' 'a tzaln Olivo, 'a yojltac 'at yatut Dios. Ata x'em wocn Jesús, ax Pedro, Jacobo, Juan, yet' Andrés, sch'ocj eb' 'ayc' yet'oc. 'Ix sc'anb'n eb' 'ixtc 'a 'a:

⁴ —Tzqui nib'j tzal 'ayn̈ on̈, ¿b'a'n̈ 'oj jawc jun chi 'ix al cha? ¿Tas junc senya 'oj sch'ox Dios, yic jab'xoj 'oj jawc jun tzo'n̈ cha? xchi eb' 'a 'a.

⁵ Yuj cha, xyaln 'a eb' 'ixtic: Caw lista tzeyutj e b'a, sec may junc mach 'oj eyixtn paxti'.

⁶ Yujto til wal mach 'oj jawoc, ax yesn 'el eb' in b'i. An ton tic Cristo in, 'oj schic cob' eb'. Til wal 'anma 'oj yixtc paxti eb'.

⁷ 'Oj eyab' yoch jun tzo'n̈ niwc owal. Ax eyab'n speclal jun tzo'n̈ xo 'ijn 'oj 'ochoc. Man̈ ex xiwoc, yujto yowlal 'ixta 'oj 'ajoc. Palta mantoc slajb' cha.

⁸ Yujto 'ay jun tzo'n̈ niwc chon̈b' 'oj yac' owl yet' yit niwc chon̈b'al, ax ya'n owl sb'a eb' yajl yet' eb' yit yajlil. Til wal 'aj 'oj 'ec' quixcab'. 'Oj jawc niwc wejl 'a yib'n̈ eb' 'anma'. A jun tzo'n̈ yailal cha, ton̈j tzb'ab'lj cani, 'ayt wal jun tzo'n̈ xo yel xo tu 'oj jawoc.

⁹ Palta ax tic, caw lista tzeyutj e b'a, yujto 'oj eyajx 'och 'a yol sc'ab' eb' yajal. 'Oj e ma'x 'a yol capiya. 'Oj ex yi't eb' 'a yojltac ewin yajal, yet' 'a yojltac ewin rey, yujto 'aych e nab'en 'ayin. 'Ixta 'oj eyaji, sec 'oj stac' eyaln 'el wab'xil 'a ewinac.

¹⁰ A yic mantzac jaw jun slajb' c'ual, yowlal 'oj b'ab'l alxc 'el jun 'ab'x yic colnb'il 'a junjn chon̈ab'.

¹¹ 'Oj eyijx 'at 'a yojltac ewin yajal, palta caw matz e na yuj tas 'oj eyala'. Caw matz ex 'och 'il. A jun tzo'n̈ paxti 'oj 'ajxoc 'ayx yuj Yespíritu Dios 'a jun rato cha, a tzeyala. Yujto man̈oc ex 'oj e paxtini, palta a Yespíritu Dios 'oj paxtinoc.

¹² A eb' 'u'tacab'il, 'ay eb' 'oj ya'ch yu'tac 'a yol sc'ab' chamel, 'ixta 'oj yutc pax sb'a jun tzo'n̈ eb' mamb'il 'a yunnal. Ax eb' 'unnab'il, 'ay eb' 'oj yac' owl yet' smam, ax smiln cham eb' smam cha.

¹³ 'Oj chichnc 'och smasnil 'anma 'ayex, yujto 'aych e nab'en 'ayin, palta a eb' 'oj 'a'nc techjoc masnto tzchami, atn eb' chi 'oj colchjoc.

¹⁴ Palta 'ay jun winc yajb'il yuj Dios, a 'oj 'a'nc juwc 'el jun tzo'n̈ tas. [A win Daniel, win schecb' Dios pecti', a aljnac can yuj jun cha.] A mach tz'iln jun 'ab'x tic, nachj cab' 'el yu'uj. A yic 'oj eyilnc jun chi 'a 'aj man̈ smojc yochi, a eb' 'ayc' 'a Judea, 'at cab' eb' 'elc 'a tzalctac.

¹⁵ Ax eb' 'ay q'ue 'a span̈nil yib'n̈ yatut, yic tz'em paxt eb', man̈x cab' 'och eb' yic' 'elt junc tas 'a yol yatut cha, yic tz'at eb' 'eloc.

¹⁶ Yet' eb' 'ayb't munljoc, man̈x cab' 'at yic' eb' spichul.

¹⁷ A 'a jun tiempoal cha, a yic 'oj 'at eb' 'anma 'eloc, caw 'oltac eb' 'ix 'ix 'ayx tz'i'ni, yet' eb' tzyac' chuw yune'.

¹⁸ C'anc 'a Dios sec toq'ue man̈oc 'a stiempoal n̈ab'lq'uinl 'oj e 'at 'eloc.

¹⁹ Yujto a jun niwn yailal 'oj jawc 'a jun tiempoal cha, mant 'a 'aj xyac' 'ixta', yictax sb'on Dios yolyib'n̈q'uinl tic. Cojxn jun cha, man̈x 'a pax tas 'oj yac' 'ixta'.

²⁰ Toto a Dios ma'oj 'a'n c'ochnb'oc jun yailal 'a jun tiempoal cha, may junc mach 'oj colchjoc can 'el 'a yol sc'ab' chamel, palta yuj eb' sic'b'ilx 'el yu'uj, ax ya'n c'ochnb'oc.

²¹ Toto 'ay eb' 'oj alnc 'ixtc 'ayex: 'Iltec yaj Cristo 'a tic, mto 'iltec yaj 'a cha, toto 'oj schic eb', caw man̈ e cha eyab'i'.

²² Yujto 'ay eb' 'oj pitzwc cha'an̈, ax cob' yaln 'och sb'a eb' Cristoal. 'Ay pax eb' 'oj cob' yalch sb'a schecb'oc Dios, 'oj cob' sch'ox eb' jun tzo'n̈ senya, yet' jun tzo'n̈ milagro, sec tzsomchj 'el eb' 'anma yuj eb'. 'Oj ya'lc eb' ya'n somchjoc pax 'el eb' sic'b'il 'el yuj Dios, toto 'oj stac' yuj eb'.

²³ Palta ax tic, caw lista tzeyutj e b'a. 'Aycto tzwaln can smasnil jun tzo'n̈ tic 'ayex.

Sjawnb'il Jesús 'a scha'ejmal

²⁴ Palta a 'a jun tiempoal cha, yic tox 'oj lajwc 'ec' jun niwn yailal cha, 'oj 'och q'uic'q'uinl 'a c'u, ax stup yoc 'uj.

²⁵ Ax jun tzo'n̈ c'anal, 'oj 'emtoc 'a satcha'an̈. Yet' jun tzo'n̈ 'ay spoder 'a satcha'an̈, 'oj tzicb'tan̈xoc eb'.

²⁶ 'Oj lajwc cha, ax yiln q'ue eb' 'anma', to an 'Ochnc in 'Anmal tic 'oj weml 'a scal 'asun. Man̈ jantcoc in poder yet' in tzictznial, ax in jawi.

²⁷ An tic, 'oj in chec cot eb' wángel 'ec' smolb'tzoc cot eb' sic'b'il 'el wuj 'a smasnil yolyib'n̈q'uinal. 'Oj 'ec' 'ijx cot eb' 'a 'aj tzlajw c'och yolyib'n̈q'uinal, masnto 'a yib' cha'an̈.

²⁸ 'Ab'c jun 'ab'x tic 'oj wal yuj te higo. A 'a yic tz'unnb'i sc'ab' te', yic wan xo spac' xil te', eyojtac to jab'xoj sjaw n̈ab'lq'uinal.

²⁹ An̈jtona', a yic 'oj eyil sjaw jun tzo'n̈ tic, nachj cab' 'el eyu'uj, chajtlto caw jab'xoj 'oj in jawi, 'icha to la'n xo waj 'a sti puerta.

³⁰ Wal yel tzwal 'ayex, ma'oj satl jun tzo'n̈ 'anma tic, masnto 'oj 'e'cn jun tzo'n̈ xwal tic smasnil.

³¹ 'Oj lajwc 'ec' satcha'an̈ yet' yolyib'n̈q'uinl tic, palta ax in paxti', may b'a'n̈ 'oj lajwc 'eq'ui.

³² Palta may mach 'ojtnac, 'aja c'u, jantc yorail 'oj in jawi. A eb' ángel 'ay 'a satcha'an̈, man̈ yojcoc eb'. An xo tic yunnaln Dios, palta man̈ wojcoc paxi. Cojxn Dios Mamb'il a 'ojtnac.

³³ Yuj cha, caw lista tzeyutj e b'a, macwjan̈ec, leslwan̈ec, yujto man̈ eyojcoc b'a'n̈ 'oj jawc stiempoal jun cha.

³⁴ Q'uinloc 'ay junc winac, tz'at 'a junc xo lugar 'a najat, tzcan yatut. Tzya'n can win yopiso junjn eb' smoso, tzyaln can winac tastc smunljel junjn eb', tzyaln can pax win 'a win stan̈mal n̈a, chajtlto tzmacwj winac.

³⁵ Ax eb' smoso win cha, man̈ yojcoc eb' b'a'n̈ 'oj jawc pax win 'ajn̈a chi 'a yatut, tom sq'uic'b'alil mto chim'ac'wal, mto sutmj'ac'wal, mto yic wan sacb'i. 'Icha win 'ajn̈a cha, 'ixta 'in, man̈ eyojcoc, b'a'n̈ 'oj in japx 'a scha'ejmal. Yuj cha, caw lista tzeyutj e b'a,

³⁶ sec wach' man̈toc 'icha to waync ex, ax in jaw tza'njoc.

³⁷ A jun tzo'n̈ tzwal 'ayx tic, tzwal pax 'a eb' 'anma smasnil, caw listan̈ej tzeyutj e b'a, xchi Jesús.