Miqueas 7 - Chuj San Sebastian Bible

A smaysch'olnilal chon̈b' Israel

¹ Yuj cha, xwaln 'ixtic: ¡'Oltacn wali! lajn in xoj 'icha eb' tz'ec' sayj sat uva yet' sat higo 'a yic man̈x stiempoaloc. Palta man̈x 'a sat te xcani, man̈x 'a te sb'ab'l sat caw nib'b'il sloxi.

² 'Icha te sat 'awb'ente cha, 'ixta waji, yujto man̈xtzac 'ilchj junc 'anma wach' sb'eyb'al, tojl snab'en 'a sat Dios 'a yol qui chon̈b'ec. A eb' wit chon̈b' cha, cojxn milj cham 'anma tznib'j eb' sb'o'. Tzlaj yac' 'ejm junjn eb' sch'an̈ yal 'a yol sb'e.

³ Caw cuywjum eb' sb'on maysch'olnil. A eb' 'ay yopiso, tzc'an eb' q'uen c'ultac tumn 'a eb' yit chon̈ab'. Ax eb' juez tzchaj eb' q'uen c'ultac tumn cha. Yuj cha, a eb' rico tzb'on̈j eb' tas 'icha wal tznib'ej. A eb' cha, jun tzyutj sb'a eb', tzyixtn eb' yit 'anma'il.

⁴ A mach wach' to wal 'a scal eb', lajn wal 'icha te q'ui'ix. A mach tojl to wal tas tzb'o'o, lajn wal 'icha te cacwq'ui'ix. Palta jun, caw la'n xoj sjaw sc'ual yic 'oj 'ajxoc 'och yailal 'a yib'n̈ eb' yuj Dios, 'icha x'aj yaln 'el eb' schecb' yu'uj. Cojxn̈ej somc'ojlal 'oj niwtjoc chan̈ 'a scal eb' 'anma cha.

⁵ Man̈ eya'ch 'a e c'ojl tas tzyal eb' cajn 'a e tz'ey, man̈ eya'ch junc e wach'c'ojl yipc e c'ojol. Tzcham wal e nan tas tzeyal yet' eyistzil.

⁶ An̈jtona eb' 'unnab'il, tzpatquilj can 'el eb' smam, a eb' 'ix 'uneab'il, tzpitj sb'a eb' 'ix 'a snun, an̈jtona eb' 'ix 'alb'ab'il, tz'och eb' 'ix 'ajc'ojlal 'a yalib'. A eb' jun yaj 'a yol yatut, tz'och eb' 'ajc'ojlal 'a jun jun.

⁷ Palta an xo pax an tic, a Jehová 'aych yipc in c'ojol. Cojn Dios in Colmal yaji, a yipc'ojlal yaj wu'uj, yujto 'oj yab' tas 'oj wala'.

Yuj Jehová ax ya'n ganar eb' israel

⁸ Ex 'ajc'ojl eyajch 'ayn̈ on̈, man̈ex tzaljoc yuj tas tzon̈ 'aj on̈. Wach'xam tzon̈ 'ejmi, palta 'oj qui q'uex wan jun 'ejm xo on̈. Wach'xam tz'och 'oynjoc q'uic'q'uinl 'ayon̈, palta a Jehová 'aych qui sacq'uinloc on̈.

⁹ 'Ix 'och qui mulc 'a Jehová, yuj cha, 'oj ca'c techjoc yowl sc'ojol, masnto 'oj on̈ sb'eyc'ojloc, ax on̈ sb'onec yaji. 'Oj yac' Jehová quilc sacq'uinlal, 'oj quilc tas 'oj yutc on̈ scolnec 'eli.

¹⁰ An̈jtona eb' 'ajc'ojl yajch 'ayn̈ec, 'oj yac' Dios yil pax eb' jun tic, caw 'oj q'uixwc can 'el eb' yu'uj. Atn eb' aljnac 'ayn̈ec 'ixtic: ¿'Ajtil 'ay Jehová e Diosal cha? xchi eb'. Palta a ticnec, 'oj quilc wal tas 'oj 'aj slajw 'el eb'. 'Oj te'wtan̈xoc eb' 'icha lum b'i'ch 'a yoltc caye.

¹¹ Ex 'aj Jerusalén, jab'xoj sjaw sc'ul e b'on pax chan̈ smuroal e chon̈b' jun 'ejm xo; caw 'oj lewnb'oc pax e macb'en.

¹² A 'a yic jun c'u cha, 'oj cot eb' 'anma 'a smasnil nacion̈, ax sjaw eb' 'ayex. 'Oj cot eb' 'aj Asiria, yet' eb' 'aj Egipto, ax scot eb' 'ay 'a sti a Nilo, yet' eb' 'ay 'a sti a Éufrates. 'Oj cot eb' cajn 'a stitc a mar, yet' eb' 'ay 'a lum jolmctac witz.

¹³ Caw cusltac 'oj 'ajcn yolyib'n̈q'uinal, smulyujoc eb' cajn 'a 'a, 'ixta 'oj 'ajoc.

¹⁴ Mamin Jehová, tan̈wj eb' a chon̈b' to ec yaji. Lajn eb' 'icha no calnelu 'aycn 'a caltcte sch'ocoj, ax 'a spatquil 'el no', 'ay te c'ultc to caw wal ya'ax. 'Ij 'at eb' a chon̈b' tic 'icha wal otjnac 'a yic pecti', 'ij 'at eb' 'a 'aj wach' tz'aj eb' 'icha no cajb'en noc' 'ay 'a yol yic Basán yet' 'a yol yic Galaad.

¹⁵ 'Ix ta'w Dios 'ixtic: 'Oj in ch'ox eyil tas to caw satjub'tac yilxi, 'icha wal wutjnac wi'n 'elt eb' e mam eyichm 'a Egipto.

¹⁶ 'Oj yil pax jun tzo'n̈ xo nacion̈, tas 'oj ex wutoc, ax sq'uixw can 'el eb', wach'xam caw jeln eb', 'oj cancn eb' 'a 'icha to matz tac' spaxtini, matz tac' pax yab'n eb'.

¹⁷ Caw wal 'oj xiw eb', ax yi'n 'ejm sb'a eb', 'oj can teln eb' 'a scal pococ 'icha no chan. 'Oj laj 'ib'xoc eb' yuj xiwlal, ax yelt eb' 'a scuartel. Caw tzxiw eb', ax sjaw eb' 'a 'ayn an Jehová e Diosal in tic, xchi Dios.

Tzyac' Dios niwnc'ojlal*r* smul eb' schon̈ab'

¹⁸ Mamin Jehová, may junc xo Dios lajn et'oc, yujto ach tic, ach tzac' niwnc'ojlal smul jaywn̈ xo eb' a chon̈b' tic xcani, tz'atcn satc'ojlal stenmtacl eb' o'oj. Man̈ 'ayc 'ec' yowl a c'ojl 'a smasnil tiempo, yujto tz'el 'a a c'ojl a ch'oxn pax a chamc'ojlal.

¹⁹ 'Oj 'o'ch a c'ojl 'ayn̈ jun 'ejm xo. A qui mul on̈, 'icha to 'oj a muccn 'ejm 'a yol lu'um. A qui maysch'olnilal on̈, 'icha to 'oj a julcn 'at 'a xab'l yich a mar.

²⁰ 'Ayn̈j 'ec' a wach'c'ojlal yet' a chamc'ojlal 'ayn̈ on̈ Mamin, 'icha otjnac a'n can a ti 'a eb' qui mam quichm 'a yictax pecti 'on̈, atn 'a Abraham yet' 'a Jacob, xchi Miqueas.