Miqueas 5 - Chuj San Sebastian Bible

A Jehová 'oj 'a'nc 'och*r* junc sreyl chon̈b' Israel

¹ Ex 'aj Jerusalén, b'oc chan̈ smuroal 'aj tze col e b'a, yujto tox 'ix 'och oyn eb' 'ajc'ojl 'ayex. 'Oj smac' eb' sat win syajlil chon̈b' Israel yet' jixc'ab'te'.

² A Dios a tzaln 'ixtic: A chon̈b' Belén tzcuch pax Efrata, wach'xam yunen̈ej chon̈b'al 'a scal jun tzo'n̈ xo chon̈b' 'ay 'a yol yic Judá, palta ata 'oj cot jun yajal, ax wa'n 'och syajlilc chon̈b' Israel. 'Oj 'eltoc 'a scal jun 'in̈tal eb' israel cha, a jun cha, 'ayc' xon 'a yic pecti', xchi Dios.

³ Ax ticnec, 'oj yactc can Jehová schon̈ab', masnto 'oj 'aljoc yune jun 'ix 'ix wan stan̈wni yalj cha. Atta 'oj meltzjoc cot eb' israel 'ijxnac 'at 'icha presoal 'a chuc chon̈b'al, sec junxn̈ej 'oj 'aj eb' yet' eb' yit chon̈ab'.

⁴ A jun yajl cha, 'oj q'ue wa'an, ax ya'n Jehová qui Diosal yopiso yet' spoder 'a 'a, yic stan̈wni eb' schon̈ab' sec tzcan eb' 'a junc'ojlal, yujto a jun yajl cha, caw niwn 'oj 'aj 'el'ch 'a scal chon̈ab', masnto 'aj tzlajw c'och lum lum tic.

⁵ A 'oj 'i'nc cot junc'ojlal. A yic 'oj jawc eb' asirio 'a yol qui nacion̈ tic, ax yoch eb' yac' owl 'a yol qui cuartel, a yic cha, til wal eb' qui yajlil to niwn yel'ch 'oj qui checb'ti yic tz'at ya'nc eb' owl yet' eb'.

⁶ A eb' chi 'oj 'at 'a'nc ganar yejm eb' 'aj Asiria yet' espada, atn snacion̈ win Nimrod. Caw 'oj qui colchjec 'el yuj jun qui yajlilec chi 'a yol sc'ab' eb' asirio cha, atn eb' xc'axw 'e't 'a qui mon̈jonec yuj yi'n 'ec' eb' qui lumec yalni.

⁷ A yic cha, a eb' yin̈tl Jacob 'oj canoc, 'oj yi' cot eb' wach'ilal 'a scal nan̈loc chon̈ab', 'icha tz'aj sya'xb' te c'ultc yuj n̈ab', mto yuj chicb'chan̈ tz'em 'a 'ac'wal. A Jehová 'oj 'a'nc cot jun wach'ilal cha, man̈oc 'a eb' 'anma 'oj cotoc.

⁸ Lajn wal 'oj 'aj eb' yin̈tl Jacob chi 'a scal nan̈loc nacion̈ 'icha junc no león 'ay 'a scal no calte'al noc', mto 'icha junc no león tz'och 'a scal jun b'ulc no calnelu. A yic tzc'och no', tzyamn cot no e no calnelu cha, tzcotc ch'iychtan 'at no'. Man̈x 'a junc mach tztac' scoln e no'.

⁹ 'Ixtnta wal 'oj eyutc eya'n ganar eb' 'ajc'ojl yajch 'ayx ex yin̈tl can Jacob, caw 'oj e satcn 'el eb' smasnil.

¹⁰ A Jehová a tzaln 'ixtc 'ayx ex wit israelal: A 'a yic jun c'ul cha, 'oj in mil cham e chej, ax wa'n lajwc 'ejm e caruaje yic owal.

¹¹ 'Oj in ma'cn lan̈chjoc jun tzo'n̈ e chon̈b' 'ay smuroal yet' pax e cuartel, 'oj lajwc 'ejm 'a jun 'ejmn̈ej.

¹² 'Oj in satl smasnil eb' b'alm 'a e cal. Man̈x 'a junc eb' 'ajchum 'oj wactc cani.

¹³ 'Oj in satl jun tzo'n̈ e diosal, yet' jun tzo'n̈ q'uen q'uen 'aj tzex leslwi, sec wach' man̈x 'oj eyac' 'emmquilal 'a jun tzo'n̈ e diosal xe b'o cha.

¹⁴ 'Oj in to' chan̈ smasnil te niwc te 'aj tzeyac' 'emmquilal, ax in satn 'el jun tzo'n̈ lugar 'aj tzeyac' e xajmb'al 'a jun tzo'n̈ comn dios cha.

¹⁵ Yet' wal yowl in c'ojol, ax in pactzan 'a jun tzo'n̈ nacion̈ ma'ix yiclni tas xwala, xchi Dios.