Miqueas 4 - Chuj San Sebastian Bible

'Oj yac' Jehová yajlil 'a junc'ojlal

¹ A yic 'oj jawc jun slajb' tiempoal, a lum tzaln 'aj 'ay yatut Jehová ticnec. A jun tzaln cha, yel xo chan̈ 'oj 'ajb't 'a yib'n̈ jun tzo'n̈ xo lum tzalan. Ax smasnil eb' nacion̈ 'oj jawc eb' 'a 'a.

² Caw niwn sb'isl eb' chon̈b' cha, ax yaln junjn eb' 'a 'ixtic: Cotn̈ec, q'ue coyc 'a lum tzaln 'aj 'ay yatut Jehová, atn sDiosal eb' yin̈tl Jacob, yic wach' tzon̈ sch'oxc 'a sb'eyb'al, sec tzqui b'eylb'ejec, 'oj schic eb'. Yujto a 'a tzaln Sión cha, ata 'oj 'eltoc cuynb'il yic Jehová, ax 'a Jerusalén, ata 'oj cuyxoc sley cha.

³ A Jehová 'oj b'eyc'ojlanc eb' nacion̈. A 'oj alnoc tas 'oj 'aj junjn eb' nacion̈ to caw wal jelan, wach'xam caw najt 'ay eb'. Yuj cha, 'oj meltzjoc 'och q'uen yespada eb' asaronal, ax q'uen lanza, 'oj 'ochcn q'uen josal, yujto may junc xo chon̈b' 'oj yi' chan̈ syamc'ab' yic owal, ax yoch 'ajc'ojlal 'a junc xo chon̈ab', man̈x 'a mach 'oj cuyxoc 'a tas tz'aj yoch owal.

⁴ Yuj cha, smasnil 'anma', 'oj can eb' 'a tzaljc'ojlal. Junjn mach 'oj stac' yilj 'a yen̈l yich te uva 'awb'il yu'uj, yet' pax 'a yich te higo. A Jehová tztac' yuj smasnil, a 'ix 'a'n can sti 'a jun tic.

⁵ Wach'xam smasnil jun tzo'n̈ xo chon̈ab', caw yiclum eb' a sdiosal yalni, palta 'ixta pax on̈ an̈ec tic, caw yiclum on̈c 'a Jehová qui Diosal 'a smasnil tiempo.

A Jehová 'oj colnc eb' schon̈ab'

^6-7 A Jehová a tzaln 'ixtic: A 'a yic jun c'u cha, 'oj in molb'tzoc cot pax eb' in chon̈ab', atn eb' wa'jnac 'och syailal 'a jun tzo'n̈ chuc chon̈b'al, atn eb' wecchjnac, eb' c'unb'nac, yet' eb' pucnc can 'ati. A yet' eb' 'oj in b'ox jun chon̈b' to yel xo 'oj yi' yip. An Jehová in, an 'oj wac' yajlil 'a yib'n̈ in chon̈b' chi 'a lum tzaln Sión 'a smasnil tiempo.

⁸ A lum tzaln Sión yic Jerusalén yaji, ata 'oj in tan̈wc eb' in chon̈b' 'icha junc 'ilm calnelu. A Jerusalén 'oj ya'x yajlil pax jun 'ejm xo 'a yib'n̈ smacb'en 'aj ya'jnac yajlil 'a pecti', xchi Dios.

⁹ A ticnec ex 'aj Jerusalén, ¿tas yuj tz'el eyaw 'icha 'ix 'ix tzyab' syal yalj yune'? ¿tom yujto may e reyal? ¿mto yujto may eb' 'a'm nab'en 'a e cal?

¹⁰ Ex 'aj chon̈b' Sión, 'el cab' eyaw yuj yailal, yujto 'icha cab' yab'n junc 'ix 'ix syail yic tz'alj yune', 'ixta cab' eyab'n syail. 'Oj eyel 'a yol e chon̈b' tic, axta 'oj e c'och cajn 'a caltcte', masnto 'oj e c'och 'a Babilonia. Ax Jehová, a 'oj e coln 'el 'a yol sc'ab' eb' 'ajc'ojl yajch 'ayex.

¹¹ A ticnec, caw niwn eb' nacion̈ jun tzyutj sb'a, yujto 'oj 'och eb' 'ajc'ojlal 'ayex, tzyaln eb' 'ixtic: 'Oj ca'c wal qui nab'en quiln tas 'oj 'aj Jerusalén slajw 'ejmi, xchi eb'.

¹² Palta a jun tzo'n̈ nacion̈ cha, man̈ yojcoc eb' tas nab'il yuj Jehová. Man̈ yojcoc eb' toto 'oj e molb'tzax yu'uj, 'icha wal tz'aj smolb'tzax 'ixm trigo 'a junc 'amac', 'ixta 'oj ex yutoc.

¹³ Ex 'aj Sión, q'uen̈ec wa'an, te'c 'ejm jun tzo'n̈ nacion̈ cha, yujto tzyal Jehová 'ixtic: An 'oj wac' eyip e te'n 'ejm jun tzo'n̈ nacion̈ cha, 'icha junc no quelm wacx nab'a hierro sch'a'ac, nab'a pax bronce yech to te'm trigo. Ax eyi'n can 'ec' sricoal jun tzo'n̈ nacion̈ ya'jnac ganar 'a spatc maysch'olnil, ax eya'n 'ayn an Jehová in tic, an tic Yajl waj 'a smasnil yolyib'n̈q'uinal, xchi Dios.