Miqueas 1 - Chuj San Sebastian Bible

B'eyc'ojlal 'a Samaria yet' Jerusalén

¹ An Miqueas in tic, ata cajn in 'a chon̈b' Moreset 'a yol yic Judá. A yic xlaj 'ec' ewin tic reyl 'a Judá, atn Jotam, Acaz, yet' Ezequías, ata sch'ox Jehová wil 'a 'icha waychil yuj tas wan sjaw 'a yib'n̈ Samaria yet' Jerusalén. Yuj cha, xwaln 'ixtic:

² E masnil ex wit chon̈ab', 'ab'c wal jun tzo'n̈ tic. Tzcham wal e maclni e masnil ex cajn 'a yolyib'n̈q'uinl tic: A Jehová Cajlilec, 'ayc' 'a yol yatut to yicn̈ej yaji, a 'oj alnc 'el e mul.

³ 'Oj 'eltoc Jehová 'a yol yet'l 'aj cajn 'eq'ui, ax sb'ey cot 'a sjolm eb' lum witz.

⁴ 'Oj 'ulb'xoc 'ejm eb' lum witz chi 'a yaln̈ yoc 'icha tz'aj yulb'x no chab'ic', 'oj b'ey 'ejm lu'um, ax sb'ey lum 'a eb' lum niwc ch'oln 'icha c'acap.

⁵ 'Oj ujc smasnil jun tzo'n̈ tic, yuj wal spitl eb' yin̈tl Jacob, yuj pax tas maysch'olnil 'ay 'a yol smacb'en Israel. Yujto 'a stenmtacl eb' yin̈tl Jacob cha, ata tzcheclj 'a chon̈b' Samaria. Ax 'a Jerusalén ata tzcheclj smul eb' 'aj Judá yic tz'och eb' 'emmquilal 'a jun tzo'n̈ comn dios.

⁶ Yuj ton wal cha, tzyaln Jehová 'ixtic: 'Oj wac' lan̈chjoc 'ejm chon̈b' Samaria, toxn̈ej 'oj q'uecn b'uln sc'axpil. Sec 'oj 'ajcn yet'l 'icha 'aj wach' yawx te uva. At 'a lum pan̈ctac, atta 'oj in julcn 'at sq'uenal jun chon̈b' tic, ax scheclj can q'uet stzatzl yich.

⁷ Caw choc' 'oj wutc can jun tzo'n̈ yechel, c'uxn 'oj in satl jun tzo'n̈ comn dios cha. Smasnil jun tzo'n̈ yelwnub'l yol yet'l eb' comn dios cha, 'oj in n̈uscn tz'a'oc. Yujto a yet' q'uen tumn yic 'ajmulal 'ajxnac b'o'oc, yuj cha, a jantc to ma'oj tz'a'oc, 'oj c'anxoc pax jun 'ejm xo 'a 'ajmulal, xchi Dios.

A scusc'ojlal Miqueas

⁸ Yuj wal cha, tzin 'oc' si'mb'il yuj cusc'ojlal; jitn in 'eli, may in xan̈b' 'aychi tzin 'eq'ui. Xoj yel waw 'icha junc no 'oques, mto 'icha junc no cujub'.

⁹ Yujto a tas lajwnac 'a Samaria, man̈x 'oj 'an̈txoc. 'Ix yamchj c'och Judá yuj jun yailal cha, masnto xc'och 'a sti chon̈b' Jerusalén, atn sat yaj 'a in nacion̈ yet' eb' wit chon̈ab'.

¹⁰ Man̈ eyal jun tzo'n̈ tic 'a eb' cajn 'a chon̈b' Gat. Man̈ ex 'oc' 'a sat eb'. 'E'n̈ec teln 'a scal pococ yuj e cusc'ojlal chi 'a Bet-le-afra.

¹¹ Ax xo ex cajn 'a chon̈b' Safir, 'ixquec can 'icha presoal, jitnex cab' 'eli tzex 'ati, q'uixweltac cab' eyilxi. Man̈x cab' 'eltoc eb' cajn 'a chon̈b' Zaanán. 'Ay 'oc'l 'a chon̈b' Bet-esel, man̈x 'a mach 'oj 'och eyet'oc.

¹² A eb' cajn 'a chon̈b' Marot, caw tzch'umm 'ec' eb' yuj yab'n syail. Tztan̈wj eb' cob' sc'och colwal, yujto tox xc'och yailal 'a sti chon̈b' Jerusalén yuj Jehová.

¹³ Ax xo cajn ex 'a chon̈b' Laquis, caw pitx 'icha eb' israel. Yuj e pitl cha, x'och smul eb' 'aj Sión. 'A'c stoc' e no chej jun tzo'n̈ e caruaje yic owal.

¹⁴ Alcn e b'a 'a chon̈b' Moreset-gat. Ax chon̈b' Aczib, a tz'ixtn paxti eb' sreyl Israel.

¹⁵ A Jehová a tzaln 'ixtc 'a eyib'n̈ ex cajn 'a chon̈b' Maresa: 'Oj wa'ch e chon̈b' 'a yol sc'ab' eb' 'ajc'ojol, ax eb' yajl to caw b'inab'il 'a scal eb' israel, 'oj 'at sc'ub'c 'el sb'a eb' 'a yoltc n̈aq'uen 'a sla'nil Adulam.

¹⁶ Joxc 'el xil e jolm yuj cusc'ojlal. Chact'irnac cab' tz'ajcn e jolm chi 'icha wal sjolm no xulem, atn yuj eb' eyunnal to caw wal 'ay e chamc'ojlal 'a 'a, yujto 'oj 'ijxoc 'at eb' 'icha presoal, xchi Dios.