Malaquías 4 - Chuj San Sebastian Bible

A jun c'u yic yowl sc'ojl Jehová

¹ A Jehová tztac' yuj smasnil, a tzaln 'ixtic: Wan sjaw jun c'u yic 'oj wa'nc yowl in c'ojol, yic 'oj wa'nc satxoc 'el smasnil eb' b'uchwjum, yet' eb' tzb'on maysch'olnil, man̈x 'a junc eb' 'oj canoc. 'Icha wal tz'aj stz'a 'ejm te 'ac 'a yol junc jorna, 'ixta wal 'oj 'aj eb'.

² Palta ax xo pax to 'ay wel'ch 'a e sat, 'icha wal sq'uel c'u 'a sq'uin̈b'ial, 'ixta 'oj wutj in ch'oxn in colwal 'ayex. Yuj cha, 'oj e tzalj jun 'ejm xo. Caw 'oj e b'atj chan̈ yuj tzaljc'ojlal, 'icha tzyac' junc no quelm wacx tzat 'elt 'a yet'l 'aj macan.

³ A 'a yic jun c'ul cha, 'oj e te'cn 'ejm eb' tzb'on maysch'olnil, 'icha wal tz'aj ste'x q'uen stan̈il c'ac', 'ixta 'oj eyutc eb'.

⁴ Nac cot in checnb'il wa'jnac can 'a in checb' Moisés yic 'ayc' 'a sjolm lum witz Sinaí. A jun tzo'n̈ ley yet' jun tzo'n̈ checnb'il cha, smoj wal to tzeyiclj e masnil ax israel ex tic.

⁵ 'Ab'tec, 'oj in b'ab'l checc cot in checb' Elías, yic mantzac jaw jun c'u yic 'oj checljoc chan̈ yowl in c'ojol. A jun c'u cha, caw niwn yel'chi, 'ay xo smay tas 'oj ujoc.

⁶ A Elías cha, a 'oj 'a'nc 'och eb' mamb'il yet' eb' 'unnab'il 'a junc'ojlal. Toto ma'oj sna sb'a eb', ax yic 'oj in jawi, ax in satn 'el eb' in chon̈b' 'a jun 'ejmn̈ej, xchi Dios.