Malaquías 1 - Chuj San Sebastian Bible

A schamc'ojlal Dios 'a chon̈b' Israel

¹ An Malaquías in tic, schecb' Dios waj 'a chon̈b' Israel.

² A Jehová a tzaln 'ixtc 'a chon̈b' Israel: An tic, caw tzex in chamc'ojlej. Palta ax xo tic', 'in 'ixtc wal tzeyutj ta'wc e b'a 'ayin: ¿Tas wal tzcutj cojcan 'eli, toto tzon̈ a chamc'ojlej? xe chi. An Jehová in, an tzwal 'ixtc 'ayex: Wach'xam yu'tac sb'a Esaú yet' Jacob, palta an xin chamc'ojlej Jacob,

³ ax Esaú chacb'il 'el wu'uj. A lum jolm witz 'aj cajn eb' yin̈tl Esaú, xwa'cn 'och lum 'a cusltac lumal. Cojxn̈ej no calte'al noc' xcan cajn ta'.

⁴ Toto a eb' edomita yin̈tl Esaú a eb' tzaln 'ixtic: Wach'xam on̈ lajwec 'eli, palta 'oj qui b'oc pax chan̈ qui chon̈b'ec tic jun 'ejm xo, toto xchi eb', wach'xam tzb'ox chan̈ eb' schon̈ab', palta an 'oj in ma'x lan̈chjoc jun 'ejm xo. A snacion̈ eb' cha, 'oj yal eb' 'anma yuj 'ixtic: A jun nacion̈ tic, caw wal maysch'olnil, 'ayn̈j 'och pax yowl sc'ojl Jehová 'a yib'an̈, 'oj xchic eb'.

⁵ Ax israel ex tic, caw 'oj eyil wal si'mb'il, ax eyaln 'ixtic: A Jehová tic, yel xo niwn yel'ch 'a smasnil yolyib'n̈q'uinal, man̈ cojnoc 'aj tzlajw c'och qui mon̈jonec tic 'aj tzb'inaxi, 'oj e chioc, xchi Dios.

A Jehová tz'a'n cuenta*r* eb' ya'mal 'och sti eb' 'anma'

⁶ A Jehová tztac' yuj smasnil, a tzaln 'ixtc 'a eb' ya'mal 'och sti eb' 'anma': A eb' 'unnab'il 'ay yel'ch smam snun eb' 'a sat, an̈jtona eb' checab', 'ay yel'ch spatron̈ eb' 'a sat. An xo pax an tic, Mamb'il waj 'ayex, Eyajl pax waji, palta 'in may wel'ch 'a e sat. Caw tzin e patquilj can 'eli. Tzeyaln to cob' 'ixtic: ¿Tas wal tzach cutj ach qui patquiln can 'eli? xe chi.

⁷ Ax tic, tzeyij cot 'ixm pan to man̈ smojc sjaw 'a yet'l xajmb'al to wic yaji, tzlajw cha, tzcob' e c'anb'n pax 'ayn 'ixtic: ¿Tas wal 'aj tz'och qui mul 'ayach? xe chi. Ax tic, x'och e mul 'ayin, yujto xe patquilj can 'el jun yet'l xajmb'al cha.

⁸ ¿Tom wach' tze na'a, to an̈j 'ijnocn̈ej eya'n no noc' 'ay spaltail xajmb'al-l 'ayin: atn no matz uj yilni, no wecchjnac yet' no ya'ay? Q'uinloc tzeyij 'at jun tzo'n̈ noc' chi e siylab'oc 'a eb' eyajlil, ax eyilni, toto 'oj tzaljoc eb' schan 'ayex.

⁹ Tzyal eb' 'anma 'ayx 'ixtic: Ex ya'mal 'och qui ti 'a Dios, c'anc wal 'a Dios chi cu'uj, sec 'oj 'o'ch sc'ojl 'ayn̈ec, xchi eb'. Palta an Jehová in, tztac' wuj smasnil, an tzwala: Toto a jun tzo'n̈ tas xwal tic, a 'oj eya'n̈j eyofrendaoc 'ayin, ma'oj in tzalj in chan 'ayex.

¹⁰ Comnoc wal a junc ex tze mac spuertail watut, sec wach' man̈xtzac 'och sc'a'l jun yet'l xajmb'al to wic yaji yujto man̈x 'a yel'chi, an Jehová in, tztac' wuj smasnil, caw wal matz in tzalj eyet'oc, man̈x 'oj in cha pax eyofrenda cha.

¹¹ An tzwala to niwn wel'ch 'a sat smasnil nacion̈ 'a yolyib'n̈q'uinal. A wal tas caw wach' a chi tzyac' tz'a eb' xajmb'alil, yet' ya'n eb' yofrendaoc 'ayin, yujto caw niwn wel'ch 'a sat eb'.

¹² Palta ax xo tic, 'in caw may jac wel'ch 'a e sat, 'in tzeyala to may yel'ch jun yet'l xajmb'al cha, yet' jun tzo'n̈ schib'l wal tzeyac' xajmb'al-l 'ayin.

¹³ 'In tzeyal 'ixtic: Caw tzon̈ tzactzj c'och yet' jun tzo'n̈ tic, xe chi, tzin e patquiln can 'eli. Tzeya'n pax cob' e xajmb'al chi 'ayin, a no noc' 'elc'b'il eyu'uj, no wecchjnac, yet' no ya'ay, a chi tzeyac'a. ¿Tom 'oj in cha jun tzo'n̈ chi 'ayx e nani?

¹⁴ An tic Rey in niwn wel'chi, smoj xiw smasnil nacion̈ 'ayin. A eb' tzta'wj sti ya'n junc scalnelu xajmb'al-l 'ayin, no may spaltail, ax tz'aji, tzjeln eb', ax junc no 'ay spaltail tzyac' eb' 'ayin, a jun tzb'o eb' cha, caw wal catb'tzab'il, xchi Jehová tztac' yuj smasnil.