Lv 8 - Chuj San Sebastian Bible

'Ochnc Aarón yet' eb' yunnal 'a yopiso

¹ 'Ix yaln Jehová 'a Moisés 'ixtic:

² 'Ij cot Aarón yet' eb' yunnal, tze'n pax cot spichl eb' tzya'ch 'a yic tzyiln yopiso ya'malc 'och sti eb' 'anma 'ayin, yet' pax perjuma tzc'anlb'ax 'a yic tzsi'x can 'och eb' 'a yopiso cha. Tze'n cot pax junc no quelm wacx 'oj 'ajxoc xajmb'al-l yuj yajx lajwc mul, chawn̈oc no calnelu, yet' junc yune xuc 'ixm pan may yich.

³ Tzlajw cha, tza'n syam sb'a smasnil eb' chon̈b' 'a sti yamq'uil Mantiado 'aj tzin chaj in b'a eyet'oc, xchi Dios.

⁴ 'Ix sb'o Moisés 'icha wal xyutj Jehová yaln 'a 'a, 'ix yac' syam sb'a smasnil 'anma 'a sti yamq'uil Mantiado cha.

⁵ 'Ix yaln Moisés 'ixtc 'a smasnil eb' 'anma cha: Atn jun tzo'n̈ tic 'ix yal Jehová to 'oj qui b'o'ec, xchi.

⁶ Xlajw cha, xyaln Moisés to tzjaw Aarón yet' eb' yunnal 'a stz'ey, xyaln 'a eb' to tz'achn can eb'.

⁷ 'Ix ya'n 'och spichl Aarón, sb'on 'och sjal-l snan̈al, xya'n 'och sjucn pichul, xya'n 'och te scamx chaleco, sjaln 'och yet' sjal-l snan̈al. Atn te tz'isb'il 'och yelwnub'al.

⁸ Ax 'a spatquil te', ata xya'ch pax te smacl yic sn̈i sc'ojol, a 'a te' 'ix ya'ch q'uen Urim yet' q'uen Tumim.

⁹ Xlajw cha, xya'n q'ue sc'oxl sjolom, ax 'a yib'n̈ snan̈l sat, ata xya'ch jun q'uen placa nab'a oro. A tzch'oxni chajtlto sic'b'il 'el ya'malc 'och sti eb' 'anma 'a Dios, 'icha wal xyutj Jehová yaln 'a Moisés.

¹⁰ Xlajw cha, xyi'n cot Moisés jun perjuma tzc'anlb'ax 'a yic tzsi'x 'och junc mach 'a yopiso, mto junc tas tz'ochcn yico'oc Dios. Stzicn 'at jun perjuma chi 'a yib'n̈ scajnub' Dios, yet' 'a yib'n̈ smasnil tas 'ay 'a yojl cha. 'Ixta wal x'aj yochcn smasnil jun tzo'n̈ chi yico'oc Jehová.

¹¹ An̈jtona jun perjuma cha, a stzicch uc 'ejm 'a spatquil jun yet'l xajmb'al cha, 'a yib'n̈ smasnil syamc'ab'il, 'a yib'n̈ jun niwquil palagan, yet' 'a sb'achnub'al yalan̈. 'Ixta x'ajcn jun tzo'n̈ chi yochcn 'a yopiso yu'uj.

¹² Xlajw cha, xya'n pax q'ue Moisés perjuma 'a sjolm Aarón, yuj yochcn ya'malc 'och sti eb' 'anma 'a Dios.

¹³ Xyaln Moisés to tzjaw pax eb' yunnal Aarón chi 'a stz'ey. 'Ix ya'n 'och sjucn pichl eb', sjal-l snan̈l eb' yet' pax sc'oxl sjolm eb', 'icha wal xyutj Jehová yalni.

¹⁴ Xlajw cha, xya'n Moisés 'ijxoc cot no quelm wacx tz'och xajmb'al-l yuj yajx lajwc mul, ax Aarón yet' eb' yunnal, x'a'n q'ue sc'ab' 'a sjolm no'.

¹⁵ Smiln cham Moisés no', 'ix yi'n 'at jab' schic'l no yet' yune sc'ab', sb'on̈n 'och 'a sch'ac jun yet'l xajmb'al 'aych 'a schicn schan̈il, sec wach' chab'il yuj Dios. Ax jantc to chic' xcani, 'ix seccn 'ejm 'a yich yet'l xajmb'al cha. 'Ixta x'ajcn jun chi yochcn yico'oc Dios, sec wach' tz'ajx can lajwc mul.

¹⁶ Xyi'n cot Moisés smasnil xepual no yol sc'ojol, xepual no seyub', no stut schab'il yet' pax xepual. A smasnil jun tzo'n̈ cha, xyac' tz'a 'a yib'n̈ yet'l xajmb'al.

¹⁷ Ax stz'umal yet' schib'jal no wacx cha, yet' stza no', ata x'ajx tz'a 'a spatquil 'el camplamento, 'icha wal 'ix yutj Jehová yaln 'a Moisés.

¹⁸ 'Ix ya'n pax Moisés 'ijxoc cot no mam calnelu tz'ajx tz'a smasnil xajmb'alil, ax Aarón yet' eb' yunnal, xyac' q'ue eb' sc'ab' 'a sjolm no'.

¹⁹ Smiln cham Moisés no', stzicn 'och schic'l no 'a schan̈paq'uil jun yet'l xajmb'al cha.

²⁰ 'Ix scotc tzu'n 'at Moisés no', xya'n tz'a no sjolom, yet' no choc' x'aj stzu'x cha, yet' pax xepual no';

²¹ smaxn 'el no sch'an̈quin, no xub' yet' no yoc. Xya'n tz'a smasnil 'a yib'n̈ yet'l xajmb'al. Caw wach' sjab' jun ofrenda chi xyab' Jehová, 'icha wal xyutj yaln 'a Moisés.

²² 'Ix ya'n Moisés 'ijxoc cot junx no mam calnelu cha, no tzc'anlb'ax 'a yic yochnb'il eb' 'a yopiso. Ax Aarón yet' eb' yunnal xyac' q'ue sc'ab' 'a sjolm no'.

²³ Xlajw cha, smiln cham Moisés no', xyi'n cot jab' schic'l no', sb'on̈n 'och 'a sjayl sti schicn Aarón 'a swach', 'a snun sc'ab' 'a swach' yet' pax 'a snun yoc 'a swach'.

²⁴ An̈jtona xyaln paxi to tzjaw eb' yunnal Aarón 'a stz'ey. Xya'n pax 'och schic'l no noc' chi 'a sjayl sti schicn eb' 'a swach', 'a snun sc'ab' eb' 'a swach', yet' pax 'a snun yoc eb' 'a swach'. Ax jantc to chic' xcani, swach' tzicn can 'och 'a schan̈paq'uil jun yet'l xajmb'al cha, yet' 'a yib'an̈.

²⁵ Xlajw cha, xyi'n cot Moisés xepual no sn̈e, xepual no sch'an̈quin, yic no seyub', yic no stut schab'il, yet' no xub' 'a swach'.

²⁶ Xyi'n q'uet 'oxe 'ixm pan may yich 'a yol te xuc 'ay 'a yojltac Jehová, jun 'ixm pan pim, jun 'ixm calb'il yet' aceite, yet' junx 'ixm c'oxox pan. 'Ix ya'nq'ue 'a yib'n̈ no xepu cha, yet' no xub' x'elt 'a swach' no cha.

²⁷ 'Ix ya'n smasnil jun tzo'n̈ tic 'a yol sc'ab' Aarón yet' pax 'a yol sc'ab' eb' yunnal, sec a eb' tzb'achn 'och jun tzo'n̈ chi 'a yojltac Jehová.

²⁸ Xlajw cha, xyi'n 'ec' pax Moisés smasnil jun tzo'n̈ tic 'a yol sc'ab' eb', xya'n tz'a smasnil 'a yib'n̈ yet'l xajmb'al, junn̈j x'aj stz'a yet' no xajmb'al cha, yuj yochnb'ilc eb' 'a yopiso. Caw wach' sjab' jun tzo'n̈ chi xyab' Jehová.

²⁹ 'Ix yi'n pax cot Moisés sn̈i sc'ojl no mam calnelu cha, no x'ajx yic yochnb'ilc eb' 'a yopiso, xit' sb'achnc 'och 'a yojltac Jehová. A jun chib'j cha, xyij can yico'oc, yujto 'ixta xyutj Jehová yaln 'a 'a.

³⁰ Xlajw cha, xyi'n cot jun perjuma yet' chic' 'ayc' 'a yib'n̈ yet'l xajmb'al. 'Ix stzicn 'at 'a yib'n̈ Aarón yet' 'a spichul, yet' 'a yib'n̈ eb' yunnal Aarón cha, yet' pax 'a spichl eb'. 'Ixta x'ajcn eb' yoch yet' spichl yico'oc Dios.

³¹ 'Ix yaln Moisés 'ixtc 'a Aarón yet' 'a eb' yunnal: Tz'an̈x cab' no chib'j tic 'a yamq'uil 'elt Mantiado 'a 'aj tzqui chaj qui b'a yet' Dios, axta tze chi no ta', yet' 'ixm pan 'ay 'ejm 'a yol te yune xu'uc, atn 'ixm 'ac'b'il yuj yic eyochcn 'a eyopiso; yujto yaljnac can Jehová 'ixtic: A Aarón yet' eb' yunnal, a eb' 'oj c'uxnc jun tzo'n̈ tic yet' no chib'j cha, xchi.

³² Jantc to ma'oj lajwc e chin no chib'j cha, yet' 'ixm pan cha, tze wach' 'a'j can tz'a'oc.

³³ A 'a yamq'uil Mantiado 'aj tzqui chaj qui b'a yet' Dios, an̈jta tzex can 'a uque c'ual, masnto tz'acw uque c'u eyochcn 'a eyopiso tic.

³⁴ A ticnec, tic 'ix qui b'oc 'icha wal 'ix yutj Jehová ya'n qui b'o', yic tzlajw can e mul 'a eyib'an̈.

³⁵ Yuj cha, uque c'u, uque 'ac'wl tzex can 'a yamq'uil Mantiado tic. Tzeyiclni smasnil jun tzo'n̈ schecnb'il Jehová, sec wach' ma'oj e chami, yujto 'ixta xyutj yaln 'ayin, xchi Moisés 'a eb'.

³⁶ 'Ixta 'ix yutj syiclni Aarón yet' eb' yunnal smasnil tas 'ix yac' Jehová yal Moisés 'a eb'.