Lv 6 - Chuj San Sebastian Bible

Xajmb'al yuj eb' 'anma tz'ixtxi

¹ 'Ix yaln pax Jehová 'a Moisés 'ixtic:

^2-3 Q'uinloc 'ay mach tz'och smul 'a wojltac an Jehová in 'a tzann̈j tas 'a jun tzon̈ 'oj wal tic, yowlal tzyac' junc xajmb'al yuj jun tzo'n̈ tic: yuj tzyixtj junc yit 'anma'il yuj junc tas tzcan 'ab'enal 'a 'a, yuj tzyel'j junc tas, yuj yi'n 'ec' junc tas yic tzyixtn jun yit 'anmal cha, yuj tzsic' junc tas, tzlajw cha, tzte'wtzan sb'a yalni to may tas tzyila, yuj tzcomn alj junc paxti man̈ yeloc, mto yuj junc xo maysch'olnil tzb'o 'icha jun tzo'n̈ tic.

^4-5 A yic tznan sb'a, to 'ix 'och smul 'a jun tzo'n̈ tic, yowlal tzyac' meltzjoc stojl 'a mach 'ay yico', tzya'n pax junc xo yomacn̈il 'icha stojl jun cha, tzya'n pax junc xajmb'al 'ayn yuj smul tz'och cha.

⁶ A no xajmb'al tzyac' cha, a junc scalnelu, mto junc schiwo may spaltail, a tzyij cot 'a junc win ya'mal 'och sti eb' 'anma cha, ax win tznan 'eli jantc tz'el'ch stojl no'.

⁷ Ax win tz'a'n 'och jun xajmb'al chi 'a wojltac yuj smul jun 'anma cha, ax smul cha, 'oj 'ajxoc can lajwoc, xchi Dios 'a Moisés.

A tas tz'aj yajx xajmb'al tzn̈usxi

⁸ 'Ix yaln Jehová 'ixtc 'a Moisés:

⁹ Al 'a Aarón yet' 'a eb' yunnal, yuj sleyl tas tz'aj yajx no xajmb'al tzn̈usxi. A no noc' tz'ajx xajmb'al-l cha, yowlal tzcan no 'a yib'n̈ stzac'ac' 'a smasnil 'ac'wal, sec tz'a no'.

¹⁰ Ax 'a junx sq'uin̈b'ial, a junc win ya'mal 'och sti eb' 'anma cha, yowlal tzya'ch win spichl caw wach', yet' scutin wex b'ob'il 'a te lino. Tzlajw cha, tzmoln chan̈ win stan̈il no noc' tz'ajx tz'a 'a yib'n̈ yet'l xajmb'al cha, tzsecn 'ejm 'a junc spac'b'il jun yet'l xajmb'al cha.

¹¹ Tzlajw cha, tzjeln pax 'el win spichl cha, tz'at ya'nc win stan̈il no xajmb'al chi 'a jun lugar wach' yaj sb'o 'a spatquil 'el camplamento.

^12-13 A jun c'ac' 'aych 'a yib'n̈ jun yet'l xajmb'al cha, may xon cab' tz'aj stupi. Yowlal tz'ajx 'och sc'atztzil 'a junjn sq'uin̈b'il yuj eb' ya'mal 'och sti eb' 'anma cha. A 'a yib'n̈ c'ac' chi tz'ajx q'ue no xajmb'al tz'a'oc. Ata tz'a pax xepual no xajmb'al yic junc'ojlal.

A tas tz'aj yajx ofrenda 'a tas tzc'uxxi

¹⁴ A jun tzo'n̈ checnb'il tzalx tic, atn tas tz'aj yajx ofrenda tz'ijx 'el 'a 'ixm sat trigo mto 'ixm cebada. A eb' ya'mal 'och sti eb' cha, a eb' tz'i'n 'och 'a wojltac an Jehová in, 'a 'aj 'ayc' yet'l xajmb'al.

¹⁵ Tzyi'n cot junc eb' jun jopoc 'ixm harina yet' aceite, junn̈j tz'aj yet' smasnil incienso yic ofrenda cha. Tzlajw cha, tz'ajx tz'a 'a yib'n̈ jun yet'l xajmb'al cha, yuj sch'oxn coti to a smasnil ofrenda cha, wic yaji, caw wach' sjab' tzwab'i.

¹⁶ Ax jantc to ofrenda tzcani, 'oj sc'ux Aarón yet' eb' yunnal. A yic tzb'o'i, may yich tz'ejmi. Ata 'oj sc'ux eb' 'a yamq'uil Mantiado 'aj tzin chaj in b'a eyet'oc.

¹⁷ A jun tzo'n̈ ofrenda cha, matz tz'an̈x yet' yich pan. A jantc to tas tzcan 'a 'a, a tzwac' 'a eb'; a jun tzo'n̈ cha, wicn̈ej yaji, 'icha yaj no xajmb'al tz'ajx yuj mul yet' no xajmb'al tztojn lajwc mul.

¹⁸ A jun cha, 'oj b'on̈j 'a smasnil tiempo. A ofrenda to wic yaji, tz'ajx tz'a'oc, tzta'n̈j sc'uxn ewin yin̈tl Aarón. Tzann̈j junc tas tztench sb'a 'a jun tzo'n̈ ofrenda cha, wic tz'ajcni, xchi Dios 'a Moisés.

Yofrenda eb' ya'mal 'och sti eb' 'anma

¹⁹ 'Ix yaln pax Jehová 'a Moisés 'ixtic:

²⁰ A Aarón yet' eb' yunnal, yowlal tzyac' eb' junc ofrenda 'ayn an Jehová in, yic tzsi'x 'och eb' ya'malc 'och sti eb' 'anma cha. Tzyac' eb' chan̈e'oc libra 'ixm harina caw wach', yujto ofrenda yuj tas tzc'uxxi. Nan̈l tz'ajx 'och 'a wojltac 'a sq'uin̈b'ial, ax nan̈locx tz'ajx 'och 'a wojltac 'a yemc'ual. Matz tac' ya'n palta jun tzo'n̈ chi 'a junc c'u.

²¹ A 'a yojl junc xalten tzb'o jun ofrenda cha, wach' tz'aj sc'anb' 'a scal aceite, tzlajw cha, tzb'uychtax 'a yic tz'ajx ofrendail. Caw wach' sjab' jun tzo'n̈ chi tzwab' an Jehová in.

²² 'Ixta 'oj yutc junc yin̈tl Aarón sb'oni, atn win 'oj 'ochx can sjelc 'a sat ya'malc 'och sti eb' 'anma 'ayin. Jantcn̈ej jun tzo'n̈ ofrenda cha, wicn̈ej yaji, yuj cha, yowlal tz'ajx tz'a smasnil 'a wojltac.

²³ Smasnil jun tzo'n̈ ofrenda to a eb' ya'mal 'och sti eb' 'anma chi tz'a'ni, yowlal tz'ajx tz'a smasnil, may junc mach tztac' sc'uxni, xchi Dios 'a Moisés.

A xajmb'al tz'a'n lajwc mul

²⁴ 'Ix yaln pax Jehová 'a Moisés 'ixtic:

²⁵ Al smasnil jun tzo'n̈ cuynb'il tic 'a Aarón yet' 'a eb' yunnal, yuj tas tz'aj yajx no xajmb'al tz'a'n lajwc mul. A no xajmb'al cha, yowlal tzmilx cham no 'a wojltac an Jehová in, 'a jun lugar 'ajtil tzmilx xon cham no noc' tz'ajx tz'a'oc, yujto wic yaji.

²⁶ A win ya'mal 'och sti eb' 'anma cha, a tz'a'n jun xajmb'al cha, yuj yajx lajwc mul, tztac' schin win jac no', palta ata tzchi win no 'a jun lugar to wicn̈ej yaji, atn 'a yamq'uil Mantiado 'aj tzin chaj in b'a eyet'oc.

²⁷ Tzann̈j junc tas tztench sb'a 'a no chib'j cha, wic tz'ajcni. Q'uinloc tz'och tzicn̈joc schic'l no 'a junc pichul, yowlal tzju'x 'el 'a jun lugar to wicn̈ej yaji.

²⁸ An̈jtona lum chen 'aj tz'an̈x no xajmb'al cha, yowlal tzma'x poj lu'um. Palta toto a 'a yojl junc q'uen chen bronce tz'an̈xi, cojn to tzjosx 'el slumal, caw wach' tz'aj sb'icx 'eli.

²⁹ A jun xajmb'al tic wicn̈ej yaji. Tzann̈j ewin yin̈tl eb' ya'mal 'och sti eb' 'anma', tzta'n̈j schin eb' no xajmb'al cha.

³⁰ Palta a junc no xajmb'al tz'ijx cot schic'l 'a yojl Mantiado 'a jun lugar to wicn̈ej yaji, yuj ya'n lajwc mul, a no cha, matz tac' schix no', yowlal tz'ajx tz'a no smasnil.