Lv 5 - Chuj San Sebastian Bible

A jun tzo'n̈ mul*r* smoj tz'ajx xajmb'al yu'uj

¹ Q'uinloc 'ay junc mach tz'awtx 'at yala', yic tzya'n testigoal sb'a 'a junc tas tzyila mto tzyab'i, palta toto matz chaj yala', a jun cha, tz'och smuloc, tzcann̈j 'a yib'an̈.

² Q'uinloc 'ay junc mach tzyamn junc tas man̈ wach'oc, mto tztench sb'a 'a sniwnal junc no chamnc noc', wach'xam calte'al noc', mto cajb'il noc', mto junc no tzjucsb'a 'a sat lu'um, a jun 'anma cha, man̈ wach'c tz'ajcn yuj jun cha. Tz'ochcn jun chi smuloc, wach'xam mantzac yil cot sb'a.

³ Q'uinloc 'ay mach tzyamn junc tas man̈ wach'c tz'el 'a sniwnal junc 'anma'. A mach tzyamn cha, man̈ wach'c tz'ajcn yu'uj, wach'xam matz yil cot sb'a muc'uc. Palta a yic tzyiln cot sb'a, a jun cha, tz'ochcn smuloc.

⁴ Q'uinloc 'ay mach tzyac' sti 'a junc paxti 'a sji'lti'al, 'a tzann̈j junc tas, a jun 'anma cha, tz'ochcn jun chi smuloc yic tznachj 'el yu'uj chajtlto matz tac' ya'n 'el'choc 'aj ya'jnac can sti cha.

⁵ A mach tz'och smul 'a jun tzo'n̈ tic, yowlal tzchaj 'och smuloc.

⁶ Tztac' ya'n jun 'anma chi junc no nun calnelu mto junc no nun chiwo xajmb'al-l 'ayn an Jehová in, yuj smul cha. A yuj jun xajmb'al cha, ax yajx can lajwc smul jun 'anma cha.

⁷ Toto may stumn jun 'anma chi smann junc no calnelu cha, mto junc chiwo cha, to 'ixta', yowlal tzyij cot chawn̈oc no cowojte', mto chawn̈oc no parama 'a wojltac, junc no tz'ajx yuj mul cha, junc xo no tz'ajx tz'a xajmb'alil.

⁸ B'ab'el tz'ajx no 'a junc win ya'mal 'och sti eb' 'anma'. A no tz'ajx yuj mul, ton̈j tzc'uychtax 'el sjaj no', palta matz 'ijx 'el no sjolm chi 'a jun 'ejmn̈ej.

⁹ Tzlajw cha, tzb'on̈x 'och jac schic'l no 'a junc spac'b'il yet'l xajmb'al cha, ax jantc to schic'l no tzcani, tzwach' secx can 'ejm 'a yich jun yet'l xajmb'al cha, yujto xajmb'al yic mul yaji.

¹⁰ Ax junx no schab'l cha, tz'ajx tz'a no xajmb'alil, a tzyal sleyal. 'Ixta tzyutj win ya'mal 'och sti eb' 'anma chi sb'on no xajmb'al cha, sec tz'ajx lajwc smul jun 'anma cha.

¹¹ Q'uinloc may stumn jun 'anma chi smann chawn̈oc no cowojte', mto no parama cha, to 'ixta', yowlal tzyij cot chan̈e'oc libra 'ixm harina caw wach'. Matz 'ajx 'och aceite 'a scal, matz 'em pax incienso 'a yib'an̈, yujto xajmb'al yic mul yaji.

¹² Yowlal tzyij cot 'a junc win ya'mal 'och sti eb' 'anma cha, ax win tz'i'n cot jun jopoc 'ixm harina cha, tzya'n tz'a 'a yib'n̈ yet'l xajmb'al, sec a tzch'oxn 'eli to a smasnil jun ofrenda cha, to wic yaji. Junn̈j tz'aj stz'a yet' jun tzo'n̈ xo ofrenda tz'a 'a wojltac cha. A jun ofrenda cha, yuj mul tz'ajxi.

¹³ 'Ixta tzyutj win ya'mal 'och sti eb' 'anma sb'on jun xajmb'al cha, yuj yajx lajwc can smul jun 'anma cha. A jantc to tas tzcani, yic win tz'ajcni, 'icha tzyac' yet' jun tzo'n̈ xo tas tzc'uxxi, xchi Dios 'a Moisés.

A no xajmb'al yuj stojl mul

¹⁴ 'Ix yaln Jehová 'a Moisés 'ixtic:

¹⁵ Q'uinloc 'ay mach man̈ sc'anc sc'ojl tzya'ch smul, yic matz yac' tas to wicn̈ej yaj an Jehová in, a jun cha, yowlal tzyij cot junc no mam calnelu may spaltail 'a wojltac, yic tz'och no xajmb'al-l yuj stojloc smul cha. A no tzyij cot 'ayn cha, yowlal tznaxi jantc tz'el'ch stojl no 'a q'uen plata, 'icha q'uen 'echtab' tzc'anx 'a in cajnub'.

¹⁶ A jun 'anma cha, yowlal tzyac' sjel tas 'aj 'ix 'och smul 'a tas to wicn̈ej yaj cha. Yowlal tztoj junc xo yomacn̈il 'a 'icha stojol, tzya'n 'a junc win ya'mal 'och sti eb' 'anma cha. Junn̈j tzyutj ya'n yet' no calnelu tzyac' xajmb'al-l yuj smul cha. Ax win ya'mal 'och sti eb' 'anma chi tzb'on no xajmb'al cha. 'Ixta to b'i'an, tz'ajx can lajwc smul cha.

¹⁷ Q'uinloc 'ay junc mach tz'och smul 'a tas to man̈ smojc sb'on 'a jun tzo'n̈ in checnb'il an Jehová in 'ix wac' 'aych tic, wach'xam man̈ sc'anc sc'ojol, a jun cha, tz'och smuloc.

¹⁸ Yuj cha, yowlal tzyij cot junc no mam calnelu may spaltail 'a junc win ya'mal 'och sti eb' 'anma'. A no tzyij cot 'ayn cha, yowlal tznaxi jantc tz'el'ch stojl no', a win ya'mal 'och sti eb' 'anma cha, a 'oj 'a'nc 'och jun xajmb'al cha. 'Ixta 'oj 'aj yajx lajwc smul jun 'anma cha, 'a yic man̈ sc'anc sc'ojl tzb'o'o.

¹⁹ Atn jun xajmb'al chi tztojn lajwc smul, yujto a jun 'anma cha, 'ay smul 'a wojltac an Jehová in, xchi Dios 'a Moisés.