Lv 24 - Chuj San Sebastian Bible

Aceite tzc'anx 'a cantil

¹ 'Ix yaln Jehová 'a Moisés 'ixtic:

² 'Ac' yi' cot eb' et israelal yaceiteal sat te olivo pitz'b'il 'elta, yujto a jun aceite chi 'oj c'anxoc 'a cantil yic tz'och sc'aq'uil.

³ Ax Aarón a 'oj b'onc 'och sc'aq'uil, sec wach' 'aychn̈ej sc'aq'uil yic tz'ec' 'ac'wl 'a wojltac 'a yol Mantiado 'aj tzin chaj in b'a eyet'oc, 'a yojltac 'elt te cortina 'aych yen̈loc scaxail in trato. A jun tic ley tz'ajcn 'ayx yet' 'a eb' eyin̈tl b'aq'uin̈.

⁴ Wach' cab' tzyutj Aarón sb'on 'och jun tzo'n̈ cantil chi 'a yib'n̈ jun yet'l cantil nab'a oro, 'aychn̈ej cab' sc'a'l 'a wojltac.

'Ixm pan tz'ajx 'och 'a yojltac Dios

⁵ 'Ijx cab' cot 'ixm harina caw wach', sec a 'a jun harina cha, ata tzb'o lajchwe'oc 'ixm niwc pan, chan̈e libra 'ixm harina tz'och 'a jun jun.

⁶ Tzlajw cha, tz'ajx 'ejm 'ixm 'a sat jun mexa 'aych oro 'a 'a, atn jun 'aych 'a wojltac an Jehová in. Chalatz'n̈ tz'aj cha'an̈, waque pan chi 'a junjn latz'an̈.

⁷ Tza'n 'ejm incienso caw wach' 'a yib'n̈ junjn latz'an̈, sec a jun incienso chi 'oj tz'a 'a wojltac yic tzch'oxn 'eli, to wic yaj 'ixm pan cha.

⁸ A jun tzo'n̈ pan cha, yowlal a 'ixm c'a't tz'ajx 'och 'a wojltac 'a junjn sc'ul 'iljelal. A jun tic, in trato tz'ajcn eyet' 'a smasnil tiempo.

⁹ Ax jun tzo'n̈ 'ixm pan tz'elcn cha, yic Aarón tz'ajcn yet' eb' yin̈tl 'a smasnil tiempo. Yowlal ata tzwaj eb' 'ixm pan chi 'a junc lugar to sic'b'il 'eli, yujto niwn yel'ch 'ixm pan chi 'icha jun tzo'n̈ xo xajmb'al tz'ajx tz'a 'a wojltac, xchi Dios.

A eb' tzb'ajwj 'a Dios, yowlal tzcham eb'

^10-11 A 'a scal eb' israel, 'ay jun winc 'aljnac 'a scal eb', israel snun, ax smam 'aj Egipto. A snun cha, Selomit sb'i 'ix, yisl jun win tzcuch Dibrí 'a scal eb' yin̈tl Dan. A jun winc cha, stejsb'a yet' jun yit israelal 'a yol camplamento. X'och smul sb'ajwj 'a Jehová, yuj cha, 'ix yi'n cot eb' win 'a yojltac Moisés.

¹² 'Ix 'och stan̈mal winac, masnto xyal Jehová tas tz'aj winac.

¹³ Yuj cha, xyaln Jehová 'a Moisés 'ixtic:

¹⁴ 'Ijec 'el win x'och smul chi 'a sti 'el camplamento; ax smasnil eb' x'ab'n yaln cha, ya' cab' q'ue eb' sc'ab' 'a sjolm winac, ax eb' chon̈b' chi smasnil, a eb' tzjuln cham yet' q'uen q'ue'en.

^15-16 Al jun tzo'n̈ tic 'a eb' et israelal: A mach tz'och smul in sb'ajn an Jehová sDiosal in, yowlal tzcham yuj smul cha. A smasnil eb' chon̈b' tzjuln chamoc. Toxn̈ej cab' chuc chon̈b'al, mto 'aj chon̈b' eyet'oc, toto tzb'ajwj 'ayin, yowlal tzjulx chamoc.

¹⁷ A mach tzmiln junc yit 'anma'il, yowlal tzcham pax jun xo.

¹⁸ A mach tzma'n cham scajb'en noc' junc xo mach, yowlal tzyac' sjel, a cab' pax no noc' chi tzyac' sjeloc.

¹⁹ A mach tzma'n lajwc junc yit chon̈ab', 'icha wal tzyutj cha, 'ixta pax tz'aj jun xo.

²⁰ Toto tzwecchji, mto tz'elt yol sat, mto tz'el ye jun cha, 'icha wal tz'aj yab'n syal junc chi yu'uj, 'ixta pax tz'aj yab'n syal jun xo.

²¹ A mach tzma'n cham junc scajb'en noc' junc xo mach, tztac' ya'n sjel no', palta a mach tzmiln junc yit 'anma'il, yowlal tzchami, matz 'eq'ui.

²² A jun ley tic, a 'oj 'och yopiso 'a eb' chuc chon̈b'al cajn 'a e cal. An Jehová in, an tzwala, xchi Dios.

²³ 'Icha wal xyutj Dios yalni, 'ixta pax xyutj Moisés yaln jun tzo'n̈ paxti chi 'a eb' yit israelal. Yuj cha, 'ix yi'n 'el eb' chon̈b' chi jun winc 'ix b'ajwj 'a Dios chi 'a sti 'el camplamento, axta sjul cham eb' yet' q'uen q'ue'en. 'Ix syiclj eb' sb'on 'icha 'ix yutj Jehová yaln 'a Moisés cha.